Mateus 6

Ca xiram pa' tococwa oro wari' co om nonon carawa

1Ma' tara xumuhu' me. Ara iri jein ca awi wa pain ca ara xin hwein ca param nucun Iri' Jam ne, ta ara hwet to hwein cocon oro wari' me ta ac tococwa na. Ta querec ma' tatarapa' pain hwe me. Mo ta querec ma' tatarapa' pain hwe, om ta mi' cuhu' pain oro ca awi wa Cotere' co pe pawin cwain.

2Je ca tomi' xuhu' ca', tomi' inem pain ca xiram pa' ton mon wari' co om non carawa ma', pain ca mi' ton mon pain caramajum ma'. Ta mi' xec xec mon pain me. Ta an xiho' momon oro wari' co ac ca iri'o' xi' ca' tara me nana ma'. Mi' xec xec to ara xi' nanain oro xirim ca cut in to xucucun ma'. Mi' xec xec to nanain wana ca xuruxut in to caca oro wari' ma' quem. Ma' ta querec pin' cacapari' oro wari' ta nana. Ma' ta awi tamana nana xin ne cacapari' ta nana. Je ca tomi' xuhu' ca', tomi' iri'o' inuhu': Oro wari' co mi' xec xec ac i ma' nana ma', om ta cut pan cacain oro ca awi wa con Iri' Jam. Xi wara cut pin ara cacain ca tomi' querec te nucucun oro win ma' caca pain ca xec xec ximama' nucucun ta. 3Wum pain ca xiram pa' mon wari' co om non carawa ma' iri na ne, pain ca mi' ton mon pain caramajum ma', mi' hohomu ac mon pain tara. Xica' to je pain ca mi' xujuhu' pain. 4Ma' ta om taxi' quequem oro wari' pain ca mi' mon pain caramajum. Cut mi' ac quem, pain tara ca awi wa Cotere'. Taraju pa' ra e': Ara iri irin ca awi wa pain ca xica' pe nexi' ne, om paxi' na ca querec cacapari' oro wari' ma'. Ane querec pan capari' Cotere' ne ta. Wirico tara co cut mi' nem pain oro ca awi wa quem.

Ca tomi' xun Iri' Jam

Lucas 11.1-4

5Tomi' xun iri jun Iri' Jam ne, ta an xiho' huhun oro wari' co ac ca iri'o' xi' ca' tara me nana ma', co tomi' xec xec nonon Iri' Jam pain ca tomi' xun cocon ma'. Tomi' xun iri nonon ne, coromicat ximama' ac xucucun na: Tomi' pe iri ton Iri' Jam pain oro xirim ca cut in to xijexi' ne, querec pin' ac cacapa' tara oro win ma' ne pain ca tomi' ton ta. Ac i ma' tatarapa' pain ca tomi' pe ton Iri' Jam pain ximijain wana ma' quem. Querec pin' tatarapa' pain ca tomi' ton ta, ac i ma' na ca coromicat ximama' nucucun pain ca an hwet pe pan xucucun pain ca tomi' cocon Iri' Jam. Je ca tomi' xuhu' ca', tomi' iri'o' inuhu': Om ta cut pan cacain carawa ca awi con Iri' Jam. Xi wara cut pin ara cacain ca tomi' querec te nucucun oro win ma' caca pain ca xec xec ximama' nucucun ta.

6Wum iri na ne, pain ca tomi' ton mon Iri' Jam ma', corom mao ac main tara man pain tequipain xirim ma', tao' pa' ac main tara manain, tomi' ac mon tara Cotere' co om querec wa. Taraju pa' ra e': Tomi' ton iri mon Iri' Jam pain ca xica' pe nem ne, om paxi' na ca querec quequem oro wari' cwa', ane querec pan quem Cotere' ne ta. Wirico tara co mi' nem pain oro ca awi wa quem.

7Tomi' xun Iri' Jam iri je ne, ta tomi' ximama' e' hwe me, pain ca tama' in hwet in hwet hwein ca wara tomi' nuhu'. Ac i ma' ara xi' nana co om howa nonon Iri' Jam ma'. Tomi' ha' tarapari' ma' nonon pain ca tomi' tamana e' nucucun. 8Ta an xiho' huhun me. Wara taxi' ara xi' nuhu' Cotere' pain carawa ca param hwe ma', pain ca om cuhu' carawa ma'. Wara taxi' nuhu' pain ca om tomi' querec hun ma' quem. 9Tomi' xun iri jun ne, tomi' ca' jun:

Coturut Iri' Jam co pe pawin.

Param urut pum pain ca querec pin' querec pin' pi' pin quequem oro wari' pain ca awi tamana nem pain ca Iri' Jam nem.

10Param urut pum pain ca maqui' hap ne xec pain ca taramaxicon pe ho' taramaxicon pe ho' xam' momon oro wari' pain oro xijein macan' ca' quem.

Param urut pum pain ca tomi' ha' tomi' ha' xam' quequem oro wari' pain oro xijein macan' ca' quem.

Win caca oro jam co taramaja mi' nenem ma', pain ca tomi' ha' tomi' ha' pi' pin quequem pain pawin ma'.

11Mi' xut pain carawa ca cao' wa pain xec ca' quem.

12Xic am pin rain ca caracat nuxut ca' quem.

Win ne ca mana' mana' om pin urut cocon oro wari' pain ca caracat nucucun pain ca ara cup cacaparut ca'.

Tomi' xo' urut cocon, om ca mana' mami' urut cocon.

13Narain ho' xut pain ca tomi' querec caparut Caxicon Jam quem.

To' witan ca' xut con quem.

Wum pan ara xi' na co Iri' Taramaxicon cara ma'.

Tama' hwara' opa cara ma quem.

Tama' awi tamana na ta cara nenem oro wari' cwa' quem.

Amém, iri'o' na ca tomi' ne ta.

Ac i ma' je pain ca tomi' xun hun Iri' Jam ta na ca tomi' tococwa ma'.

14Je ca tomi' xuhu' ca' ac tococwa na. Mo ta mana' mana' om pin huhun oro wari' pain ca caracat nucucun ma', pain ca ara cup cucuhu' ma', xic am pin ac cain tara ca caracat nuhu' Cotere' co pe pawin cwain. 15Mo ta mana' cara huhun pain, om ta xic am pin cain ca caracat nuhu' Cotere' co pe pawin cwain quem.

Ca an pe xine ca cao' wa con Iri' Jam

16Mo ta an to xin hwein ca cao' wa con Iri' Jam ma', pain ca momon tomi' e' xun hun ma', ta naro hwe me ta ac tococwa na. Ta an xiho' huhun oro wari' co ac ca iri'o' xi' ca' tara me nana pain ca an to pin cacain ca cao' wa con Iri' Jam. Naro ximama' nana. Ma' ta querec pin' cacapari' oro wari' pain ca an to urut pain ca cao' wa pain ca momon tomi' e' urut con Iri' Jam cwa' nana. Je ca tomi' xuhu' ca', tomi' iri'o' inuhu': Om ta cut pan cacain oro ca awi wa con Iri' Jam. Xi wara cut pin ara cacain ca tomi' querec te nucucun oro win ma' caca pain ca xec xec ximama' nucucun ta.

17Je ca tomi' xuhu' ca', tomi' inem pain ca an pe main ca cao' wa pain ca momon tomi' e' ton mon Iri' Jam ma'. Ac pain oro xijein xec ma' tara pum, hohoc rain tucum, pan xic rain tenenem quem. 18Ma' ta om querec pin' quequem oro wari' pain ca an pe main ca cao' wa ma', pain ca momon tomi' e' ton mon Iri' Jam. Taxi' e' terem Cotere' co om querec wa ma'. Taraju pa' ra e': An pe iri rain ca cao' wa pain ca momon tomi' e' ton mon pain ca xica' pe nem ne, om paxi' na ca querec quequem oro wari' cwa', ane querec pan quem Cotere' ne. Wirico tara co cut mi' nem pain oro ca awi wa ta.

Ca cut in xo' xine carawa pain pawin

19Ta cut in xo' tamana hwein oro carawa pain macan' ca' me ta ac tococwa na. Cao' ara xi' nain caramajixi' caxicon tohoro' pain macan' ca'. Cao' nain caxicon tohoro', tot mao na quem. Ma' nana co joc pa hot nanain xirixi', cut noc xa ac cacain na quem. 20Je ca tomi' xuhu' ca': Cut in xo' tamana e' jein carawa pain pawin cain. Xi ma' ca caxicon tohoro' pain i cain ta. Om ca tot mao ne caramajixi' pain i cain, om ca corom taparu caca co cut noc xa xi' nana pain i cain, om ca cut noc xa cacain caramajixi' pain i cain quem. 21Jain jain e' iri irin oro caramajixi' ca cut in xo' iri' pain macan' ca' ne, pain ca ara e' xin ca param nexi' ca', je i ma' tara ca win xumu iri'. Ane om ac i ma' ne pain oro caramajixi' ca cut in xo' iri' pain pawin cain ne. Jain jain e' iri irin ne, je i ma' tara ca win xumu mao iri' quem, je cwerein ta.

22Ac naran nein cwerexi' na tocoxi' quem ac tococwa na. Ac ca toha capari' na pain cwerexi', ac ca tom xuruxut iri' na pain ca toha capari' tocoxi'. Je ca tomi' xuhu' ca', tomi' inem pain ca toha xo' ne tucum ma'. Mo ta toha xo' quem tucum ma', toha toha pi' pin ac nein tara cwerem#6.22 Pain ca pijim' joc mam' mi' cain tocoxi' Jeju cwa', ac ca tomi' capari' na pain ca howa nexi' ca'. Mo ta xuruxut xo' iri' pain ca howa xun ca', ac ca querec pira iri' na, ac ca toha mi' capari' na naran pain ximixi'. . 23Mo ta om awi ne tucum ma' quem, mo ta paxi' ma, ac ca jo' pin ne na naran nem ma'. Ac ca om xiram pa' momon na oro win ma' nem, ac ca narain ho' momon na pain caramajum. Ac ca pe main na ca jitacat nein xim. Je ca tomi' xim ca': Mo ta win xumu e' main caramaji macan' ca', ac ca jo' pin ne na naran nem, ac ca pe main na iri' xim.

24Om ca taramaja mi' 2 ac tococwa oro taramaxicon. Mo ta param tocwa xucun, noc ac tocwa tara xucun. Mo ta win xumu tocwa xucun, tomi' napat ac tocwa tara xucun. Je ca tomi' xuhu' ca': Om ca taramaja mi' ac hun Iri' Jam pain ca taramaja mi' taramaja mi' wet hwein dinheiro ta.

Caramajixi' con Iri' Jam

Lucas 12.22-31

25Tomi' ac tococwa na: Je ca tomi' xuhu' ca': Ta toron ne xumuhu' pain ca ma' xirapa' na hwein oro caramaji macan' ca to' e' nuhu' me, je carawa ca cao' xi' hwe, je carawa ca toc xi' hwe, wirico wom co to xi' hwe ma' quem, ta toron ne xumuhu' pain me. Hohot paxi' na ca ma' capari' carawa ca cao' wa, ane hohot tamana pan ne ca e' nexi' ne. Hohot paxi' na ca ma' capari' wom co to iri' quem. Ane hohot tamana pan ne cwerexi' ca' ne. 26Noro jein oro me ca toin mama' nein pawin ma'. Om paxi' na ca tota ne. Om ca oin' nein oro tocwi pain xitot, om ca cut nein caramaji, om nain xirim ca cut to xo' nein quem. Ane pa' mi' pan cain Cotere' co pe pawin ne. Je ca tomi' xuhu' ca': Querec wet paxi' nain oro me Cotere' ma'. Ane querec wet tamana pan cuhu' ne. 27Je ca tomi' xuhu' ca' ac tococwa na. Iri' Jam ma', wara an to xo' nain oro xec nein ca e' e' wet nexi'. Ha' turuhu' pain ca mam' e' e' tiquin' wijimain ca' hwein pain ca toron tamana ne xumuhu' quem ra? Om ca ha' cuhu' ta.

28Para toron ximama' ne xumuhu' con wom co to xi' hwe quem? Noro jein oro hwijein pana pain ca horon pin ne ma'. Om paxi' na ca taramaja ne, om paxi' na ca tu mi' xijein con wom quem. 29Ane om ca wom co awi co awi tiquin' ca' nain hwijein pana ca' ne, om om na. Caramaju tamana paxi' na Salomão cara pane, awi tamana paxi' na womicon pane. Ane awi tamana ca' con womicon Salomão oro hwijein pana ca' ne. Tomi' iri'o' inuhu' ta. 30To' awi tamana paxi' nain hwijein pana Iri' Jam ma', ane om e' cara ne ne. Awi nain xec ca', xec cono' pin ac ne na, tom pin ac xine na quem. Ane querec wet cain Iri' Jam ne, to' awi tamana nain. Je ca tomi' xuhu' ca': Om ta querec wet mip cuhu' quem ra? Om ta mi' cuhu' con wom quem ra? Ac ca om howa mip hun a xira. 31Je ca tomi' xuhu' ca': Ta toron ne xumuhu' me. Ta tomi' xujuhu' pain ca main xi carawa ca cao' xi' ca' ne hwe me. Ta main xi carawa ca toc xi' ca' ne hwe me. Ta mon xi wom co to xi' cwa' ne hwe me. 32Xi ac i ma' ara caca oro wari' co om howa nonon Iri' Jam ta. Tama' win xumu e' nanain carawa ca cao' wa, je carawa ca toc wa, wirico wom co to wa quem. Ane taxi' pan cuhu' Cotere' co pe pawin cwain ne, taxi' nuhu' pain ca om cuhu' carawa ca cao' wa. Taxi' nuhu' pain ca om cuhu' carawa ca toc wa. Taxi' nuhu' pain ca om cuhu' wom quem. Taxi' nuhu' pain ca ma' xirapari' na hwein quem. 33Win xumu cain' jun Iri' Jam. Tomi' ha' jun pain ca taramaxicon pe ho' cuhu' ma'. Cut mi' ac cuhu' tara pain oro carawa ca om nuhu' ma'. 34Je ca tomi' xuhu' ca': Ta toron ne xumuhu' pain oro ca to' i'ina nuhu' pain xijein xec me. Hohot turuhu' pain xijein xec. Ma' paxi' turuhu' oro ca to' i'ina cuhu' pain xijein xec ma'. Je i ma' ira, ta toron ximama' ne xumuhu' pain me. Mo ta wara toron ximama' ne xumuhu' pain, ac ca to' hwara' pin hwein na. To wet iri ne ma' jein ta.

Actualmente seleccionado:

Mateus 6: TBPN

Destacar

Copiar