Mateus 2
2
Ca pe torotop mi' querec te cocon Jeju wari' co maqui' nanain pira
1Pan' pe nain Belém Jeju, pain macarain Judeia ma'. Je ca pan' pe ca pane. Pain ca taramaxicon taramaxicon wet ca Herodes pane, je ca pan' qui' ca Jeju. Om om, maqui' ac caca na caram ma' co noro taxipa' nonon oro pijo'. Maqui' nanain pira pain ca maqui' ac ca xina. Xuruxut xuruxut hwet ac cacain na Jerusalém. 2Tomi' querec ac caca na: Mon taramaxicon co xo' pan' qui' ma', co taramaxicon pe ho' toton nuhu' pain ca judeu hwe ca' quem? Querec ara xi' urut con pijo' nucun pain macaraxut pane, pain ca maqui' ac ca xina ma'. Je ca maqui' urut ca'. Ma' ta pe torotop mi' querec te xun urut con ta na ca tomi' querec caca ma'.
3Taraju iri nain i ma' taramaxicon Herodes ma' ne, pain ca xo' pan' qui' ca xucun taramaxicon ma', toron tamana ac ne na ximicon. Teretem teretem pi' pin ac caca na oro wari' pain Jerusalém ma' quem. 4Tomi' cut in tomi' cut in pi' pin ac tococwa na oro taramaxicon nucucun oro sacerdote#2.4 Oro sacerdote ma', taramaja to nanain cote ne xiricon Iri' Jam. Tomi' mi' nonon con Iri' Jam oro wari', tom tain' mi' nonon pain carawa nucucun quem. cocon oro co ca' na taxipa' nanain ca xirao' nucun Moisés. Tomi' querec ac tococwa na: Main ca pan' pe ta' ca Cristo quem? Cain' ca xirao' pe cacain oro profeta pane, ac i ma' na ca tomi' tococwa ma'.
5Pan' pe tarain Belém pain Judeia ta ac caca na. Je ca xirao' pe ca profeta pane nana. Ca' na ca xirao' pe nucun pane nana:
6Wahu' pain ca to hwein Belém pain macarain Judá ca'#2.6 Judá na xijein wixinain macarain Judeia. , tomi' inuhu'.
Paric to paxi' hwe, ane hwara' opa pan hwe ne.
Hwara' opa tiquin' ca' huhun co to nanain oro cote ne cidade pain Judá ma'.
Xi om ne ca pan' pe ho' xim ara cuhu' taramaxicon, pan' pe tarain Belém ma' pahu'.
Querec wet querec wet xam' turuhu' pain ca oro wari' ne xuhu' ca'.
Win ne ca querec wet taxipa' xine ovelha ma',
ac i ma' tara pain ca querec wet taxipa' cuhu' pain ca wari' nein Israel hwe ma'.
Ac i ma' na ca xirao' pe cain capijacon Iri' Jam profeta pane na ca tomi' cocon Herodes ma'.
7Tomi' cut in ac tococwa na caram ma' co noro nonon pijo' ma' quem. Tomi' noc xa tata. Xica' to nana, wirico Herodes ma', wiricoco co noro nonon pijo' ma' quem. Tomi' querec ac tococwa na: Cain' ca hwet ca pijo' ma' quem? Pain cara pane ra? Xo' hwet na ra? Cain' cain' ca quem? Tomi' xine ta tata. Tomi' hwet ac cocon na. 8Mama' jein Belém ta ac tococwa na. Mo querec je. Pirao' xo' jun pije' ma'. Mam' iri jun ne, tomi' ac mahu' tara. Ma' ta hwet ton, ma' ta pe torotop mi' querec te ton quem, ac i ma' na ca tomi' mixein tococwa ma'.
9Taraju iri nanain ca tomi' nucun taramaxicon ma' ne, maji ta ac caca na. Xuruxut xuruxut, querec ac cocon na pijo' co wara querec qui' caca pain i cain. Ac ca o tococwa na. O o, wara ca' na ca pe ca pije' ma', xat ac ca na. 10Tomi' querec te tamana nana pain ca querec cocon pijo' ma'. Mija na ca tomi' querec te caca. 11Xuruxut xuruxut, wara ca' na xirim ma', corom mama' ac caca na. Querec ac cocon na pije' cam jicon ma', Maria na. Pe torotop mi' querec te ac cocon na. Pa ac cacain na panaxicocon ca cut to cacain carawa nucucun ca awi tamana ma'. An hwet mi' ac cocon na pain carawa ca mi' querec te xun cocon ma'. Je ouro, je incenso, je mirra ma' quem#2.11 Oro xijein waraqui pana na incenso je mirra ma'. Tom iri ta ne, hu awi ac ne na. , ac i ma' na oro carawa ca mi' querec te cocon Jeju pane.
12Tomi' ac tococwa na pain ca tohwein' nucucun. Ma' tara xumuhu' con taramaxicon Herodes me ta tata. Ta in hwet hun me ta ac tococwa na. Ma ac caca na, moji'ac ca' xun ta, ac ni xin xijein wana ta, in mama' ac cacain na macaracocon.
Ca jein mama' cacamain Egito José cam Maria con Jeju
13Mama' iri nana caram ma' co noro nonon pijo' ma' ne, tohwein' ac ca na José. Tohwein' non jam co taramaja mi' non Iri' Jam. Tequi' pe ra ta José. An mao ron pije' ma'. An mao ram jicon ma' quem. Jein mama' jein Egito cain. To wet ac hwein i cain tara. Aram aram tomi' ac xuhu' tara, in qui' ac hwe tara. Pirao' ton ara xi' non pije' Herodes ma'. To' pa' pin ton ta na, ac i ma' na ca tomi' con pain ca tohwein' nucun.
14Tequi' pe ac ca na. Maji ta, mama' towa ac cacama na, mama' ac cacamain na Egito. 15To ac cacamain na i cain. Mon to wet mon to wet, mi' pin iri na Herodes ma' ne, paca' ac cacamain na Egito, in mama' ac cacamain na macaracacam. Ac i ma' na ca hwet pin ne capijacon Iri' Jam ca wara tomi' pe ca con profeta pane, pain ca pe qui' cain Egito panxica pane. Ca' na ca wara tomi' pe ca con pane:
Paca' rain Egito ta arain ac ton na panxita',
paca' ac cain na quem.
Ac i ma' na ca wara tomi' pe nucun pane.
16Mixein nanapa' xin caram pacara ne ta ac ca na Herodes ma'. Mana' tamana ac ca na. Mama' jein Belém ta ac tococwa na oro soldado nucun. To' parapa' to parapa' pi' pin jujun ca tarama' nucucun oro hwijima', wiricoco co to nanain Belém, wiricoco co to nanain oro cidade ca to ja' pan nain quem, to' parapa' to' parapa' pi' pin jujun ta tata. Oro hwijima' co ma' 2 na cawaxi' nucucun, cocon oro hwijima' co om hwet querec nanain ca 2 ne cawaxi' nucucun ma' quem, to' parapa' to' parapa' pi' pin jujun ta na ca tomi' cocon ma'. Je ara xi' na ca tomi' nucucun caram pacara pane, pain ca tomi' querec wixite tococwa pane. Ma' 2 na cawaxi' pain ca xo' hwet pa' caparut pijo' pane nana pane.
17Ac i ma' na ca hwet pin ne ca wara tomi' pe nucun Iri' Jam ma', pain ca tomi' hwet rain capija qui' con profeta Jeremias cara pane. Ca' na con pane:
18Taraju ac tacacama na oro narima' co awaran to nanain Ramá ma'.
Mija na ca awaran nequequem.
Wiricacam waram jinacam Raquel co awaran nana ma'.
Awaran nonon humaxicacam.
Om ca am moin' je na cacama.
Cono' pin ara xi' nana humaxicacam.
Ac i ma' na ca tomi' pe ca profeta Jeremias pane.
Ca in mama' cacamain Israel
19Mi' pin iri na Herodes ne, om om, tohwein' ac ca na José. Wirico jam co taramaja mi' non Iri' Jam co hwet non pain ca tohwein' nucun pain ca pe pe wet cain Egito pane. 20Tequi' pe ra ta José ac con na. An mao ron pije' ma'. Maji ram jicon ma' quem. In mama' jein macarahu' pain Israel. Cono' pin ara xi' nana co to' pa' xun nonon pije' pane na ca tomi' con ma'.
21Tequi' pe ac ca na. Maji nanam, in mama' ac cacamain na macaracacam pain Israel. 22Xuruxut xuruxut, taraju ho' na José: Taramaxicon pe nain Judeia Arquelau ma', pe pin nain maxicon cote ca, ac i ma' na ca taraju ca ma'. Jin' pin ac ca na quem. Jin' nain ca mao wa pain Judeia. Tomi' ac ca na Iri' Jam, tomi' non pain ca tohwein' nucun. Ta mama' hwein i cain me ta non. Ma ac ca na, mama' ac cacamain na macarain Galileia ma'. 23To pin ac cacamain na Nazaré cain#2.23 Nazaré na cidade ca wara to cacama José cam Maria pane. , je i ma' wixinain cidade ca to pin cacama pane. Ma' ta hwet pin ne capija ca wara tomi' pe ta' pane, pain ca tomi' hwet rain ta toton oro profeta pane na Iri' Jam. Ca' na con pane:
Maqui' tarain Nazaré wari' co wara tomi' pe ta' cwa'.
Ac i ma' na ca tomi' pe nucun pane.
Actualmente seleccionado:
Mateus 2: TBPN
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Copyright 2023 Missão Novos Tribos do Brasil
