Mateus 11

Ca tomi' querec cocon Jeju co taxipa' ca João co ja' taxipa' com

Lucas 7.18-35

1Pi' pin iri na ca tomi' xo' caparut pain ca taxipa' urut con Jeju ma' ne, mao ac cain na oro xijein cidade pain Galileia. Ca' na toton pain capijacon Iri' Jam oro wari' cwain, pijim' mi' toton pain ta ac ca na.

2Wara tao' pe ta pain xirinain ca tao' to tao' to to wa João ma', co ja' taxipa' nonon pain com oro wari' pane. Je ca taraju pe con Jeju ma' quem: Awi tamana na oro ca ara ca Jeju ta na ca taraju nucun. Taraju iri nain ne, tomi' ac tococwa na co taxipa' ca ma'. Mo tomi' jun Jeju e'. 3Tomi' querec ca' jun: Wum tara co wara tomi' pe ca Iri' Jam pane ra, co main maqui' tara ta ca pane ra? Winim' jun xucun maparut ra? Ac i ma' tara ca tomi' querec hun ta tata. Hwet ac cocon na, tomi' querec ac cocon na quem.

4Je i ca' ca tomi' xo' cocon Jeju: In hwet jun João ta. Tomi' hwet ac hun tara pain oro ca taraju hwe ca', je pain oro ca querec hwe ca' quem. 5Querec pin' nana co om tococon. Xuruxut pin nana co xuruxut xirac nana. Xio pin nana co ma' nonon caji nan. Taraju pin nana co om taraxicocon. E' mami' nana co cono' nana. Pijim' mi' inonon pain capijacon Iri' Jam oro wari' co ximin nana quem, pain ca to' witan pin xim cuhu' Iri' Jam ta toton ca'. 6Tomi' jun pain i ca' quem: Wari' co howa cara napa' ma', co om tara con ta'a napa' ma', wirico tara co param mi' ca pain ca awi wa Iri' Jam ta, ac i ma' na ca tomi' xo' tococwa ma'.

7Mama' iri nana co taxipa' ca João ne, tomi' ac cocon na oro wari' Jeju. Tomi' mi' nonon con João. Ma' carawa ca querec xi' hwe pain ca mama' hwein mahweri pane? Querec xun hun wari' co pijim' ximao ra, co an xiho' nain caji quiwo' ca meo ximao pain hotowa ra? Om na. 8Ma' co querec xi' hwe pane quem? Querec xun hun wari' co caramaju ra, co pe non wom co awi ra? Om na quem. Xi to ara cacain xiricon taramaxicon oro wari' co caramaju ac i ma' nana ta. 9Ma' co querec xi' hwe pane quem? Querec xun hun profeta ra? Iri'o' na, wirico profeta co querec hwe pane. Querec hun profeta co hwara' opa tamana. Hwara' opa tiquin' ca' nonon oro xucucun profeta. Tomi' iri'o' inuhu' ta. 10Wirico João co xirao' pe ca profeta pane, pain ca xirao' pe cain ca tomi' nucun Iri' Jam pane, pain ca tomi' capa' pain ca main mao rain macan' ta capa' pane. Ca' na ca xirao' pe nucun pane:

Main tomi' ton wari' co tomi' hwet tain nain capija ca'.

Tomi' ca' ton pum: O ra ta ton,

tomi' xo' ac tococwa tara oro wari' pum.

Ma' ta winim' xo' quequem.

Ac ca wara ara xo' cain wanajum ma' tara pain ca tomi' xo' tococwa oro wari' pum ta.

Ac i ma' na ca xirao' pe ca profeta pane, pain ca xirao' pe cain ca tomi' xo' capa' Iri' Jam con João pane na.

11Je ca tomi' xuhu' ca', tomi' iri'o' inuhu' ta ac tococwa na. Iri' wari' na João co ja' taxipa' com, hwara' opa na. Om na xucun wari' co tiquin' ca' non pain ca hwara' opa nucun, om nana oro hwanana co hwara' opa tiquin' ca' nonon quem, om paxi' nana. Ane hwara' opa tiquin' ca' pan con João wari' co om hwara' opa camain' ne, co taramaxicon pe ho' ca Iri' Jam pain ca howa capa' ma', hwara' opa tiquin' ca' pan non João ta. 12Pijim' paxi' nonon oro wari' João pane, pijim' mi' paxi' nonon con Iri' Jam co taramaxicon pe ho' pin ton nonon quem. Ane noc urut con ta cocon Iri' Jam ne. Noc urut con pain ca taramaxicon pe ho' caparut ta nana. Je curucucun pane, pain ca xo' pijim' ten qui' ca pane, mao ac ne ma' na cocon, noc urut con noc urut con wet nana pain xocori ca' quem. To' quiji' pin xun nonon oro wari' co taramaxicon pe ho' ca Iri' Jam quem. 13Ca pijim' nucun João pane, pain ca tomi' hwet cocon oro wari' pain ca maqui' ne ca', xirao' pe ac i ma' nain Moisés cara pane. Wara xirao' pe nain ca maqui' ne pane. Oro profeta cara pane quem, xirao' pe nanain ca maqui' ne ca'. Aram aram maqui' pa' ac cocon na João cwa'. 14Mija paxi' nana oro win ma' hwe co om howa je ha' nanain ca tomi' nucucun oro profeta ma'. Wahu' iri na ne, pain ca howa xin hwein ma', xin ne ac hwein tara ca tomi' xuhu' ca'. João ma', wirico co ac Elias ta. Wirico co xirao' pe caca oro profeta pane. Maqui' cain' tara Elias, aram aram maqui' ac ca tara wari' co wara tomi' pe ca Iri' Jam ta nana pane. Wirico João co xirao' pe caca pane. 15Mo ta taraju pa' xixi' na hwe ma', je ta taraju wet qui' hwe ta na.

16Ma' co an xiho' caca oro wari' pain xocori ca' quem ac tococwa na. Om na, pijim' joc mam' mi' xuhu' cocon wari' co an xiho' caca cwa'. An xiho' nonon oro hwijima' co merem caracan xucucun pain ca waraju nucucun. Xao to nanain ca xao to to caca oro wari' pain ximijain cidade, merem ac xucucun na. 17On mi' paxi' urut pahu' pain xuwiwio' ca', ane om pi' xirao' hwe ne, ac i ma' na ca merem nucucun hwijima'. Merem ac xucucun na quem: Awaran waraju xi' paxi' urut pahu' pain ca ac ca mi' pin ca ne win ma' nexi' cwa' urut pahu', ane om awaran hwe ne. Ac i ma' na ca merem nucucun oro hwijima' pain ca om ha' xucucun pain ca waraju nucucun.

18Ac i ma' maparut pain ca pijim' nuxut ca' quem ac tococwa na. An xiho' huhun oro hwijima' pain ca noc urut pain noc urut pain xucucun pain ca waraju nucucun. Noro jun João ma'. An pe nain ca cao' wa pain ca tomi' ton con Iri' Jam. Om ca toc cain comi uva quem. Tomi' ximama' pan ac hun na: Corom pe ho' non Caxicon Jam ta hun. 19Wata' pain ca Iri' Wari' ta' ca' iri na ne, cao' ina, toc inain comi uva quem. Tomi' ximama' ac mahu' na: Xocomu ma, toc tamanain pe ma, taxipa' momon oro caracat ma', oro co cut in taxipa' nanain oro imposto ma', wiricoco oro wari' co hwet taxipa' wixicocon pain ca pan teretem nucucun ma' quem, wiricoco nana co taxipa' ma ma', ac i ma' na ca tomi' ximama' mahu'. Tomi' ximama' ac i ma' paxi' maparut, ane tomi' iri'o' urut pain ca pijim' nuxut ne. Oro wari' co taraju nanapa' pain ca pijim' ne ca', mo ta querec cocon oro co xuruxut xo' nana pain ca tomi' ha' cacapa' ma', querec pin' ac cacapa' tara pain ca tomi' iri'o' ta' ca' na ca tomi' tococwa ma'.

Oro wari' co om cwirin' je ha' nana

Lucas 10.13-15

20Tomi' ac ca na Jeju ma', pain ca tomi' em' tococwa oro wari' co to nanain oro xijein cidade pain i cain. Xi an hwet mi' tamana paxi' ara tococwa pain ca hwara' opa nucun pain ca ara cain ca om ara taxi' ne ca wari' wa ira. Ane om cwirin' je na caca ne. 21Wa inuhu' me oro wari' co to nanain Corazim ma'! Wa inuhu' me oro wari' co to nanain Betsaida ma' quem! Ximin hwe. Wap tamana turuhu' Iri' Jam ta. An hwet mi' paxi' inuhu' pain ca hwara' opa ne ca', querec paxi' mahu' pain ca ara tain oro ca om ara taxi' ne ca wari' wa ca'. Ane om cwirin' je ha' hwe ne. Mo xi an hwet mi' ac i ma' toton pain ca hwara' opa ne oro caracat co to nanain Tiro je Sidom cara pane, wara cwirin' pin ac caca xira pain cara pane, wara to ac cocon xira caxicon wom, wara maxoc pa' ac xucucun xira pain topacon pain winacocon pain ca an hwet pe cacain ca cwirin' pin cacain ca pan teretem nucucun pane quem, ac i ma' paxi' xirara pane. 22Ane tomi' pan xuhu' pain i ca' ne, tomi' iri'o' inuhu': Maqui' iri tara xec nein ca wap toton oro wari' pain ca caracat nucucun Iri' Jam ne, wap ac cuhu' tara. Wap pije' totoron oro caracat co to nanain Tiro je Sidom cara pane. Wahu' iri na ne, pain ca to hwein Corazim je Betsaida ma', wap tamana pan ac cuhu' tara ta! 23Wahu' quem oro wari' co to nanain Cafarnaum ma'. Xec xec a xihwe! Awi urut, querec pin' taraparut pain ca awi nuxut xi' ma hun Iri' Jam ra? Om na ta! Wixicaracao' mi' turuhu' pain cote ne xe ta! An hwet mi' paxi' inuhu' pain ca hwara' opa ne ca', querec paxi' mahu' pain ca ara tain oro ca om ara taxi' ne ca wari' wa ca'. Ane om cwirin' je na hwe ne. Mo xi an hwet mi' ac i ma' toton pain ca hwara' opa ne oro caracat co to nanain Sodoma cara pane, cwirin' pin ac caca xira, ma' ma' wet ac ne xira cidade nucucun pain xocori ca', ac i ma' paxi' xira cocon. 24Ane tomi' pan xuhu' pain i ca' ne: Maqui' iri tara xec nein ca wap toton oro wari' pain ca caracat nucucun Iri' Jam ne, wap ac cuhu' tara. Wap pije' totoron oro wari' co to nanain Sodoma cara pane. Wahu' iri na ne, pain ca to hwein Cafarnaum ma', wap tamana pan ac cuhu' tara ta! Tomi' iri'o' inuhu' ta ac i ma' na ca tomi' tococwa pane.

Ca mi' xim capari' pain ca xao to wa xin ximixi' Jeju

Lucas 10.21-22

25Tomi' ac con na Iri' Jam Jeju: Tomi' querec te inem ta Te. Wum co Taramaxicon pe nain pawin je macan' ca'. Tomi' querec te inem pain ca tora' momon oro wari' co om xec xec nana cwa', co an xiho' nonon oro hwijima' pain ca om xec xec nucucun ca'. An hwet mi' momon pain oro ca joc xim ma cocon oro wari' co taxi' urut xi' ma nana ma'. 26Je ca param nem ma' quem Te. Hohot nem pain ca xiram pa' momon ta na ca tomi' con Iri' Jam.

27Wirico Te co mi' napa' pain ca hwara' opa tiquin' ca' toton oro wari' ta ac tococwa na. Mi' napa' pain ca querec pin' tain oro ca coromicat nucun quem. Oro ca param nucun, oro ca ara nucun quem, taxi' taxi' pi' pin inain con. Querec pin' napa' pain ca Panxita' capa' ca' quem. Om na xucun wari' co querec pin' nain oro ca coromicat ne. Xica' pe na Te co querec pin' nain oro ca coromicat ne. Wata' iri na ne, pain ca Te ton ca', querec pin' inon quem. Oro wari' co an hwet mi' ta' con, querec pin' nonon quem na ca tomi' tococwa ma'.

28Tomi' ac tococwa na quem: Wahu' pain ca jam' ca' hwein oro ca jain jain nuhu' pain ca tama' tomi' ha' xun paxi' huhun co hu nunuhu' ma', ac ca an tiquin' hwein na carawa ca xite. Tomi' inuhu': Harahap je, wixicam xine me. To' wa pin ac tain tara xumuhu'. 29Ja' ja' xine, na ra xine pain ca hu xim xuhu' ca'. Xao to wa ac hwein tara xumuhu'. Xi tomi' wixite ara xuhu' ta. Om ca xec xec ta' pain ca tomi' pan hot e' xuhu' ca'. 30Om ca i'ina tomi' ha' xine oro ca hu ne ta na ca tomi' tococwa ma'.

Actualmente seleccionado:

Mateus 11: TBPN

Destacar

Copiar