ಮತ್ತಾಯ 8
8
ಯೇಸುನೆ ಏಕ್‌ ಖೋಡೆಲಾನ ಅಛ್ಛು಼ ಕರ‍್ಯೊತೆ
(ಮಾರ್ಕ 1:40-45; ಲೂಕ 5:12-16)
1ಯೇಸು ಪಹಡ್ ಉತ್ರಿನ್ ಆವಾದಿನ್, ಅದ್ಮಿನು ಏಕ್‌ ಝೂ಼ಂಡ್‌ ಇನ ಪೀಠೆ ಗಯು. 2ತದೆ ಖೋಡ್‍ ಲಗ್ಯೋಹುಯೊ ಏಕ್‌ ಜ಼ಣೊ ಯೇಸುಕನ ಐನ್, ಇನ ಖ್ಹಾಮ್ಣೆ ಢುಕ್‌ಣ್ಯ ಟೇಕಿನ್, “ಪ್ರಭು, ತೂ ಮನ್ ಕರ‍್ಯೋತೊ, ಮನ ಶುದ್ದಿ ಕರೆಜಾ಼ಯ್” ಕರಿ ಬೋಲ್ಯೊ.
3ಯೇಸುನೆ ಹಾತ್‌ ಖ್ಹಾಮ್ಣೆ ಕರೀನ್, ಇನ ಛೀಮಿನ್‌, “ಮನ ಮನ್ ಛಾ಼, ಶುದ್ದಿ ಹೂ” ಕರಿ ಬೋಲ್ಯೊ. ತದ್‌ನು-ತದ್ದೇಸ್ ಯೋ ಅದ್ಮಿನ ಖೋಡ್‍ ಅಛ್ಛು಼ ಹುಯಿಗಯು. 4ತದೆ ಯೇಸುನೆ ಇನ, “ಖ್ಹಮಜ಼್! ಕಿನಾಬಿ ನಕೊ ಬೋಲೀಶ್‌; ಕತೋಬಿ ಯಾಜಕಕನ ಜೈ಼ನ್ ತಾರು ಆಂಗ್‌ತನ್‌ ವತಾಳಿನ್ ಮೋಶೇನೆ ನೇಮ್‌ಶಾಯೋತೆ ಕಾಣ್ಕೆನ ದೇ; ಅನೇಥಿ ಅದ್ಮಿಖ್ಹಾರಾಮ ತುನ ಅಛ್ಛು಼ ಹುಯಿಗಯು ಕರಿ ಸಬೂತ್ ರ‍್ಹಿಶೆ” ಕರಿ ಬೋಲ್ಯೊ.
ಖ್ಹೋ ಶಿಪಾಯಿನೊ ಮೋಟಾನ ಆಳ್‌ನ ಯೇಸುನೆ ಅಛ್ಛು಼ ಕರ‍್ಯೊತೆ
(ಲೂಕ 7:1-10)
5ಯೇಸು ಕಪೆರ್ನೌಮ್‌ನ ಆವಾದಿನ್, ಖ್ಹೋಶಿಪಾಯಿನೊ ಮೋಟಾನೆ ಇನಾಕನ ಗಿಂಗೈನ್, 6“ಪ್ರಭು, ಮಾರೊ ಸೇವಕ್ ಲಖ್‌ವೊ ಮಾರಿನ್, ಘರ್‌ಮ ಛಾ಼ದ್ರಿಪರ್‌ ಪಡ್ಯೋಸ್‌ ಅಜು಼ ಅಜಾ಼ಥಿ ಘಣು ತರಪ್‌ಡುಕರಾಸ್” ಕರಿ ಬೋಲಿಲಿದೊ.
7ಯೇಸುನೆ, “ಮೇ ಆಯಿನ್, ಇನ ಅಛ್ಛು಼ ಕರುಸ್” ಕರಿ ಬೋಲ್ಯೊ.
8ತದೆ ಯೋ ಖ್ಹೋಶಿಪಾಯಿನೊ ಮೋಟಾನೆ, “ಪ್ರಭು, ತೂ ಮಾರ ಘರ್‌ಕನ ಆವಾಯೆತ್ರೆ ಮೇ ಲ್ಹಾಯೇಕ್‌ನೊ ಕಾಹೆ. ತೂ ಖಲಿ ಏಕ್‌ ವಾತೆ ಬೋಲ್ಯೋತೊ ಬಶ್‌, ಮಾರ ಸೇವಕ್‌ನ ಅಛ್ಛು಼ ಉಶೆ. 9ಮೇಬಿ ಬಿಜೇಕ್ ಅದಿಕಾರ್‌ನ ಹಾತ್‍ಹೇಟ್ ರ‍್ಹವಾಳೊ, ಮಾರ ಅದೀನ್‌ಮಾಬಿ ಸಿಪಾಯಿಖ್ಹಾರು ಛಾ಼. ಮೇ ಇವ್ಣಾಮ ಏಕ್‌ ಜ಼ಣಾನ ‘ಜಾ಼’ ಕರಿ ಬೋಲ್ಯೊತೊ ಜಾ಼ಸ್‌; ಬಿಜ್ಜೇಕ್‌ ಜ಼ಣಾನ, ‘ಆವ್’ ಕರಿ ಬೋಲ್ಯೋತೊ, ಆವಸ್; ಮಾರ ಆಳ್‌ನ, ‘ಅಮ್ನು-ಅಮ್ನು ಕರ್‌’ ಕರಿ ಬೋಲ್ಯೋತೊ, ಯೋ ಕರಸ್” ಕರಿ ಬೋಲ್ಯೊ.
10ಯೇಸುನೆ ಅನಖ್ಹಮ್‌ಜಿನ್, ಆಶ್ಚರ್ಯಖೈನ್, ಇನ ಪೀಠೆ ವಳ್ಯಾವ್‌ತುಥೂತೆ ಇವ್ಣುನ, “ಮೇ ಅವ್ಡಿ ಮೋಟಿ ವಿಶ್ವಾಸ್‌ನ ಇಸ್ರಾಯೇಲ್‌ ಅದ್ಮಿಮಾಬಿ ಕೋ ದೇಖ್ಯೋನಿ ಕರಿ ತುಮೂನ ಖ್ಹಾಚಮಾಬಿ ಬೋಲುಸ್. 11ಅತ್ರೇಸ್ ಕಾಹೆತೆ, ಮೇ ತುಮೂನ ಬೋಲುಸ್ಕಿ, “ಪೂರಬ್ ಪಶ್ಚಿಮ್ ದಿಕ್ ಭಣೀಥು ಅದ್ಮಿ ಐನ್, ಸೊರ್ಗನು ರಾಜ್ಯಮ ಅಬ್ರಹಾಮ್‌, ಇಸಾಕ್ ಅಜು಼ ಯಾಕೋಬನ ಜೋ಼ಡೆ ಖಾಣನ ಬೇಖ್ಹ್‌ಶೆ; 12ಕತೋಬಿ ಕೋಣ್ ಆ ರಾಜ್ಯಮ ಮಳವಾಳೊಕಿ ಇವ್ಣೆ ಭಾರ್ ಅಂಧಾರಾಮ ಫೆಕೈಜಾ಼ಶೆ; ಹಿಜ್ಜಾ಼ ಇವ್ಣೆ ರೊವ್‌ಶೆ ಅಜು಼ ಕರ್‌-ಕರ್‌ ದಾತ್‌ ಚಾ಼ವಾನು ಉಶೆ” ಕರಿ ಬೋಲ್ಯೊ. 13ಅಜು಼ ಯೇಸುನೆ ಯೋ ಖ್ಹೋಶಿಪಾಯಿನೊ ಮೋಟಾನ, “ತೂ ವಿಶ್ವಾಸ್ ಕರ‍್ಯೊತೆ ಇಮ್ಮಸ್ ತುನ ಹುವಾದೆ, ಘರೆ ಜಾ಼” ಕರಿ ಬೋಲ್ಯೊ.
ಯೋಸ್‌ ವಖ್ಹತ್‌ಮ ಇನ ಸೇವಕ್‌ನ ಅಛ್ಛು಼ ಹುಯಿಗಯು.
ಯೇಸುನೆ ಕೈಯೆಕ್ಕಿ ಅದ್ಮಿನ ಅಛ್ಛು಼ ಕರ‍್ಯೊತೆ
(ಮಾರ್ಕ 1:29-34; ಲೂಕ 4:38-41)
14ಅನಕೇಡೆಥು ಯೇಸು ಪೇತ್ರಾನ ಘರ್‌ಕನ ಆಯಿನ್, ಹಿಜ್ಜಾ಼ ಇನಿ ಖ್ಹಾಖ್ಹು ತಾವ್ ಐನ್, ಬಿಛಾ಼ವ್ಣಿಪರ್ ಖ್ಹುತಿಥೀತೆ ದೇಖ್ಯೊ. 15ಯೇಸುನೆ ಇನ ಹಾತ್ನ ಛೀಮ್ಯೊ; ಛೀಮ್‌ತಾಸ್ನ ತಾವ್ ಉತ್ರಿಗಯೊ, ಅಜು಼ ಯೋ ಉಠೀನ್ ಇನಿ ಚಾ಼ಕ್ರಿ ಕರಿ.
16ಖ್ಹಾಂಜ಼್ ಹುವ್ವಾದೀನ್, ಭೂತ್‌ ಧರಿರಾಖ್ಯುಥೂತೆ ಘಣ ಅದ್ಮಿನ ಯೇಸುಕನ ಬುಲೈಲಾಯು; ಯೇಸುನೆ ಖಲಿ ವಾತೆಥೀಸ್‌ ಭೂತ್‌ಖ್ಹಾರು ಕಾಡ್ಯೊ ಅಜು಼ ರೋಗ್‌ಮ ಥೂತೆ ಖ್ಹಾರಾನ ಅಛ್ಛು಼ ಕರ‍್ಯೊ. 17ಅನೇಥಿ, “ಖ್ಹುದ್ ಇನೇಸ್‌ ಅಪ್ಣು ರೋಗ್‌-ರಾಯನ ಪಾಡಿಲಿದೊ, ಅಜು಼ ಅಪ್ಣ ಅಜಾ಼ನ ಢೊಯಿಲಿದೊ” ಕರಿ ಯೆಶಾಯ ಪ್ರವಾದಿಥಿ ಬೋಲೈತೆ ವಾತೆ ಚಾ಼ಲಾನಖ್ಹಾಜೆ ಯೇಸುನೆ ಆ ಖ್ಹಾರು ಕರ‍್ಯೊ.
ಯೇಸುನ ಪೀಠೆ ಜಾ಼ವಾಳು ಕಿಮ್ ರ‍್ಹೇಣು?
(ಲೂಕ 9:57-62)
18ಯೇಸುನೆ ಇನ ಅಶ್‌ಪಿಶ್‌ಥೂತೆ ಅದ್ಮಿನಿ ಭೀಡ್‌ಣ ದೇಖಿನ್‌, ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಜಾ಼ವ್ಣುಕರಿ ಇನ ಶಿಷ್ಯರ್‌ನ ಹುಕುಮ್ ದಿದೊ. 19ತದೆ ಮೋಶೆನಿ ವಚನ್ ಶಿಕಾಡವಾಳೊ ಏಕ್‌ ಜ಼ಣೊ ಐನ್, ಯೇಸುನ, “ಗುರು, ತೂ ಕಿಜ್ಗಾ಼ ಗಯೊತೋಬಿ ಮೇ ತಾರ ಪೀಠೇಸ್‌ ಆವ್‍ಸ್‌” ಕರಿ ಬೋಲ್ಯೊ.
20ಯೇಸುನೆ ಇನ, “ನ್ಹೋರಿಯೆನ ಘವಿಯೆ ಛಾ಼, ಅಜು಼ ಆಬ್‌ಪರ್ ಉಡಾತೆ ಜಿನಾವರ್‌ನ ಖ್ಹಾರು ಮ್ಹಾಳೊ ಛಾ಼, ಕತೋಬಿ ಅದ್ಮಿನ ಛಿಯ್ಯಾನ ಮುಡ್‌ಕ್ಯು ಟೇಕಯೆವ್ಡಿ ಝ಼ಗೋಬಿ ಕೊಯ್ನಿ” ಕರಿ ಬೋಲ್ಯೊ.
21ಶಿಷ್ಯರ್‌ಮ ಬಿಜೇಕ್‌ನೆ, “ಪ್ರಭು, ಮೇ ಪಹಿಲೆ ಜೈ಼ನ್ ಮಾರ ಬಾನ ಧಪ್‌ನೈದೀನ್‌ ಆವಾನ ಮನ ಹುಕುಮ್ ದೆ” ಕರಿ ಬೋಲ್ಯೊ.
22ಯೇಸುನೆ ಇನ, “ಮಾರ ಪೀಠೆ ಆವ್, ಮರ‍್ಯಹುಯಾಸ್‌ ಇವ್ಣಮ ಮರಿಗಯೂತೆ ಇನ ಮಾಟಿ ಕರಾದೆ” ಕರಿ ಬೋಲ್ಯೊ.
ಯೇಸುನೆ ತೋಫಾನ್‌ ಭೀರಾಖ್ಯೋತೆ
(ಮಾರ್ಕ 4:35-41; ಲೂಕ 8:22-25)
23ಯೇಸು ಡೋಣ್‌ಪರ್‌ ಚ಼ಢ್ಯೊ, ಅಜು಼ ಇನ ಶಿಷ್ಯರ್‌ಬಿ ಇನಜೋ಼ಡೆ ಗಯ. 24ಎಕ್ಕಸ್‌ದಮ್‌, ಮೋಟೊ ವಹಿರೊ ದರ‍್ಯಾವ್‌ಮ ಹುವಾಲಗ್ಯೊ, ಅಜು಼ ಝೋ಼ಕಾಳ್ಯೊ ಆಯಿನ್ ಡೋಣ್ಣಾ ಢಾಪಿನಾಖನಿತರ ಹುಯು. ಕತೋಬಿ ಯೇಸು ಖ್ಹುತೋಥೊ. 25ಶಿಷ್ಯರ್‌ ಯೇಸುಕನ ಜೈ಼ನ್, ಇನ ಉಠಾಡಿನ್, “ಪ್ರಭು, ಹಮೂನ ಬಚಾ಼ಡ್‍! ಹಮೆ ಮರ‍್ವಾನ ಆಯಾನಿ!” ಕರಿ ಬೋಲ್ಯ.
26ಯೇಸುನೆ, “ತುಮೆ ಶನ ಡರೋಸ್ತೆ? ತುಮೂನ ಕಮ್‍ವಿಶ್ವಾಸ್ ಛಾ಼!” ಕರಿ ಬೋಲಿನ್, ಉಠೀನ್ ವಹಿರನಾಬಿ, ದರ‍್ಯಾವ್ನ ಗುರ್‌ಕಾಯೊ, ತದೆ ಖ್ಹಾರೂಸ್ ಖ್ಹೊಪೊ ಪಡಿಗಯು.
27ಹರೇಕ್ ಜ಼ಣು ಅಶ್ಚರ್ಯ ಖೈನ್, “ಆ ಕಿಮ್ನೊ ಉಶೆ? ವಹಿರೋಬಿ, ದರ‍್ಯಾವ್‌ಬಿ ಜಿನು ಆ ಬೋಲಾತೆ ಇಮ್‌ ಖ್ಹಮ್‌ಜಾ಼ಸ್‌ನಿ?” ಕರಿ ಬೋಲ್ಯು.
ಯೇಸುನೆ ಭೂತ್‌ ಧರಿರಾಖ್ಯುಥೂತೆ ಬೇ ಜ಼ಣಾನ ಅಛ್ಛು಼ ಕರ‍್ಯೊತೆ
(ಮಾರ್ಕ 5:1-20; ಲೂಕ 8:26-39)
28ಅನಬಾದ್‍ಮ ಯೇಸು ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಥೂತೆ ಗದರೇನ್‌ ಕರಿ ತಬರ್‌ಖಾನ ಆವಾದಿನ್, ಭೂತ್‌ ಧರಿರಾಖ್ಯುಥೂತೆ ಬೇ ಜ಼ಣು ಮಖ್ಹಾಣ್ಯನಿ ಘವಿಮಾಥೊ ನಿಕ್ಳಿನ್‌, ಇನಖ್ಹಾಮ್ಣೆ ಆಯು. ಇವ್ಣೆ ಘಣು ಚ಼ಂಢಾಳಿ ಹುಯಿರ‍್ಹುಥೂತೆ ಇನಖ್ಹಾಜೆ ಯೋ ವಾಟೆ ಕೋಣ್‌ಬಿ ಕೋ ಫರ್ತುಥೂನಿ. 29ತದೇಸ್‌ ಇವ್ಣೆ, “ದೇವ್ನ ಛಿಯ್ಯಾ, ಹಮಾರೇಥಿ ತುನ ಶಾತ್‌ ಛಾ಼? ವಖ್ಹತ್ ಆವಾನ ಆಗಾಡಿಸ್‌ ಹಮೂನ ನಿಶತ್ ದ್ಯಾವಾನ ಐರ‍್ಹೋಸ್ಕಿ ಶು?” ಕರಿ ಚಿಕ್ರಿನ್ ಬೋಲ್ಯೊ.
30ದರ್ರಾಶಿ ದೂರ್ ಪಾರಸ್ ಡೂಕರ್‌ನಿ ಏಕ್‌ ಮೋಟಿ ಝೂ಼ಂಡ್‌ ಚ಼ರೂಕರ್‌ತೂಥು. 31ಯೋ ಭೂತ್‌ಖ್ಹಾರು, “ತೂ ಹಮೂನ ಅವ್ಣ ಮಹಿಥು ನಖ್ಹಾಡ್‌ತೊ ಉಶೇತೊ, ಯೋ ಡೂಕರ್‌ನಿ ಝೂ಼ಂಡ್‌ನ ಮಹಿ ಮೋಕಲ್” ಕರಿ ಗಿಂಗೈಲಿದು.
32ಯೇಸುನೆ ಇವ್ಣುನ, “ಜಾ಼ವೊ” ಕರಿ ಬೋಲ್ಯೊ. ತದೆ ಯೋ ಭೂತ್‌ಖ್ಹಾರು ಇವ್ಣ ಭೇ ಜ಼ಣಾನ ಮ್ಹೆಂದಿನ್, ಡೂಕರ್‌ನ ಮಹಿ ಪೆಶಿಗಯು. ತದ್‌ನು-ತದ್ದೇಸ್ ಡೂಕರ್‌ಖ್ಹಾರು ನಾಶಿನ್, ಪಹಡ್‌ನಿ ಕಥಾರ್‌ಪರ್‌ಥು ದರ‍್ಯಾವ್‌ಮ ಪಡೀನ್, ಡುಬಿನ್ ಮರಿಗಯು.
33ತದೆ ಡೂಕರ್‌ ಚ಼ರಾವವಾಳು ಇವ್ಣೆ ಗಾಮ್‌ನ ಮಹಿ ನಾಶಿ ಜೈ಼ನ್, ಭೂತ್‌ ಧರಿರಾಖ್ಯುಥೂತೆ ಇವ್ಣುನ ಚಾ಼ಲ್ಯುತೆ ಖ್ಹಾರಿಸ್ ಬಾರೇಮ ಬೋಲ್ಯು. 34ತದೆ ಯೋ ತಬರ್‌ಖಾನು ಖ್ಹಾರುಸ್‌ ಅದ್ಮಿ ಯೇಸುನ ಮಳಾನಖ್ಹಾಜೆ ಆಯು; ಅಜು಼ ಇವ್ಣ ತಬರ್‌ಖಾನ ಮ್ಹೆಂದಿನ್ ಜಾ಼ ಕರಿ ಇನ ಗಿಂಗೈಲಿದು.
Actualmente seleccionado:
ಮತ್ತಾಯ 8: NTWVe23
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
The New Testament in Waghri Language © The Word for the World International and Waghri Translation Samiti, Karnataka, 2023.
