ಮತ್ತಾಯ 7
7
ಬಿಜಾ಼ನ ತೀರ್ಪ್ ಕರಾನಿ ಬಾರೇಮ
(ಲೂಕ 6:37,41-42)
1“ತುಮೆ, ಬಿಜಾ಼ನ ತೀರ್ಪ್ ನಕೊ ಕರೊ, ತದೆ ದೇವ್‌ಬಿ ತುಮೂನ ತೀರ್ಪ್ ಕೋ ಕರ್‌ಶೇನಿ. 2ತುಮೆ ಬಿಜಾ಼ನ ಕಿಮ್ ತೀರ್ಪ್ ಕರಾಸ್ಕಿ, ಇಮ್ಮಸ್ ದೇವ್‌ಬಿ ತುಮೂನ ತೀರ್ಪ್ ಕರ್ಶೆ, ಅಜು಼ ತುಮೆ ಬಿಜಾ಼ನ ಕಿಮ್ ಮಾಪಿನ್‌ ದೇಸ್ಕಿ, ಇಮ್ಮಸ್ ದೇವ್‌ಬಿ ತುಮೂನ ಮಾಪಿನ್‌ ದಿಶೆ. 3‘ತೂ ತಾರ ಡೋಳಾಮ ಛಾ಼ತೆ ಪೇದಡ್‌ನಿ ಬಾರೇಮ ಸೋಚ್ಯೊಕೊಂತೆ, ತಾರ ಭೈನ ಡೋಳಾಮ ಛಾ಼ತೆ ಕಾಕ್ರಿನಿ ಬಾರೇಮ ಸೋಚಾಸ್ತೆ ಕಿಮ್? 4ತು ತಾರ ಭೈನ, ಭೈ ತಾರ ಡೋಳಾಮ ಛಾ಼ತೆ ಕಾಕ್ರಿನ ಕಾಡುಸ್‌ ಆವ್’ ಕರಿ ತು ಕಿಮ್ ಬೋಲಾಸ್? ತಾರ ಡೋಳಾಮ ಪೇದಡಸ್‌ ಛಾ಼ನಿ? 5ಅಲಾ ಠಗಾರ! ತಾರ ಡೋಳಾಮ ಛಾ಼ತೆ ಪೇದಡ್‌ನ ಪಹಿಲೆ ಕಾಡ್, ತದೆ ತಾರ ಭೈನ ಡೋಳಾಮ ಛಾ಼ತೆ ಕಾಕ್ರಿ ತುನ ಅಛ್ಛಿನಿತರ ದೆಖಾವ್‌ಶೆ.
6ಪರಿಶುದ್ ರಾಛ಼ವ್ನ ಕುತ್‌ರ‍್ಯಾವ್‍ನ ನಕೊ ನಾಖೊ; ಯೊ ಪಾಛು಼ಫರಿ ತುಮಾರಪರ್ ಪಡಿನ್ ಕಲ್ಡಿನಾಕ್ಷೆ. ಮುತ್ತ್ ಖ್ಹಾರು ಡೂಕರ್‌ನ ಖ್ಹಾಮ್ಣೆ ರಂಚೊ಼ ನಕೊ. ಯೊಅಖ್ಖು ಯೊ ಮುತ್ನ ಖುಂದ್ಲಿನಾಕ್ಷೆ.
ಮಾಂಗೊ, ಢೂಂಡೊ, ಖಟ್‌ಖಟಾವೊ
(ಲೂಕ 11:9-13)
7“ಮಾಂಗಿಲೇವೊ, ತದೆ ತುಮೂನ ದೇವಾವ್‌ಶೆ; ಢೂಂಡೊ, ತದೆ ತುಮೂನ ಮಳ್‌ಶೆ; ಖಟ್‌ಖಟಾವೊ, ತುಮುನ ಬಾಕಲ್ ನಿಕಳ್‌ಶೆ, 8ಶನಕತೊ ಮಾಂಗವಾಳ ಹರೇಕ್‌ನ ದೆವಾವ್‌ಶೆ, ಅಜು಼ ಢೂಂಡವಾಳನ ಮಳ್‌ಶೆ, ಕೋಣ್ ಖಟ್‌ಖಟಾವಸ್ಕಿ ಇನ ಬಾಕಲ್ ಕಡಾವ್‌ಶೆ. 9ತುಮಾರಾಮ ಕೋಣ್‌ತೋಬಿ ರೋಟೊ ಮಾಂಗವಾಳ ಛಿಯ್ಯಾನ ಬಂಡೊ ದಿಶುಕಿ ಶು? 10ನತರ್‌ಕಿ ಮಾಛ಼್‌ಲು ಮಾಂಗ್ಯೊತೊ, ಖ್ಹಾಪ್‍ನ ದಿಶೆ! 11ಇಮ್‍ಕತೊ ಖರಾಬ್ ಹುಯಿರ‍್ಹಾತೆ ತುಮೇಸ್ ತುಮಾರ ಲಡ್ಕಾವ್‍ನ ಅಛ್ಛು಼ ರಾಛ಼ವ್ನ ದೆವಾಪರ್, ಪರಲೋಕ್‌ನೊ ತುಮಾರೊ ಬಾ, ಇನಾಕನ ಮಾಂಗವಾಳನ ಕೆತ್ರೇಕ್ಕಿ ಅಛ್ಛು಼ ರಾಛ಼ವ್ನ ದಿಶೆಕೊಯ್ನಿಕಿ ಶು?
12ಅದ್ಮಿಖ್ಹಾರು ತುಮೂನ ಶಶ್ಶಾತ್ ಕರ‍್ನುಕರಿ ತುಮೆ ಆಖ್ಹ್ ಕರೋಸ್ಕಿ, ಯೋಸ್ ತುಮೆ ಇವ್ಣುನ ಕರೊ: ಮೋಶೇನು ಧರ್ಮಶಾಸ್ತ್ರ ಅಜು಼ ಪ್ರವಾದಿಯೇನು ವಚನ್ನು ಮತ್‌ಲಬ್ ಆಸ್ ಹುಯಿರ‍್ಹೂಸ್.
ನ್ಹಾನು ಬಾಕಲ್‌ನಿ ಬಾರೇಮ
(ಲೂಕ 13:24)
13ನ್ಹಾನ ಬಾಕಲ್ ವಾಟೆಕರಿ ಮಹಿ ಜಾ಼ವೊ, ಶನಕತೊ ನರಕ್‌ನ ಜಾ಼ವಾನು ಬಾಕಲ್ ಝಾ಼ಲು ಅಜು಼ ಇನಾಮ ಚಾ಼ಲಿ ಜಾ಼ವಾನು ಶುಲ್ಬ, ಅಜು಼ ಇನಾಮ ಜಾ಼ವಾಳು ಅದ್ಮಿ ಘಣು. 14ಕತೋಬಿ ಹಮೇಶಾನಿ ಜಿ಼ಂದ್‌ಗೀಮ ಜಾ಼ವಾನು ಬಾಕಲ್ ನ್ಹಾನು ಅಜು಼ ಇನಾಮ ಜಾ಼ವಾನ ಮುಶ್ಕಿಲ್, ಯೋ ಮಾರಗ್‌ನ ಢೂಂಡಿಲ್ಯವಾಳು ಥೋಡುಸ್ ಅದ್ಮಿ.
ಝಾ಼ಡು ಅಜು಼ ಇನು ಪಂಡಾನಿ ಬಾರೇಮ
(ಲೂಕ 6:43-44)
15ಝೂ಼ಟ ಪ್ರವಾದಿಯೇನಿ ಬಾರೇಮ ಹೊಷಾರ್‌ಥಿ ರ‍್ಹವೊ; ಇವ್ಣೆ ಮೇಂಢಾನು ಪೇರ್‌ವಾಖ್ಹ್‌ನ ಘಾಲಿಲೀನ್‌ ತುಮಾರಕನ ಆವ್‌ಶೆ, ಕತೋಬಿ ಮಹಿ ದೇಖ್ಯುತೊ ಇವ್ಣೆ ಖ್ಹಾಚಮಾಬಿ ಝಂಜೋ಼ಡಿ ಖವಾಳ ಜ಼ರಕ್‌ನಿಘೋಣಿ ಹುಯಿರ‍್ಹೂಸ್. 16ತುಮೆ ಇವ್ಣಿ ಚಾ಼ಲ್‌ಥೀಸ್ ಇವ್ಣುನ ಮಾಲುಮ್‌ ಕರಿಲಿಶು. ಕಾಟಾನಿ ಡಾಗೇಮ ದ್ರಾಕ್ಷಿನು ಪಂಡಾ ಅಜು಼ ದತ್ತೂರಿನ ಝಾ಼ಡಾವ್‌ಮ ಅಂಜೀರ್‌ನ ಪಂಡಾ ಮ್ಹೇಲಾಸ್ಕಿ ಶು? 17ಇಮ್ಮಸ್ ಅಛ್ಛು಼ ಝಾ಼ಡು ಅಛ್ಛು಼ಸ್ ಪಂಡು ದೇಸ್, ಕತೋಬಿ ಕೀಡ್‌ಣು ಝಾ಼ಡು ಖ್ಹಡ್ಯುಪಂಡು ದೇಸ್. 18ಅಛ್ಛು಼ ಝಾ಼ಡು ಖ್ಹಡ್ಯು ಪಂಡು ಕೋ ದೇಯ್ನಿ, ಅಜು಼ ಕೀಡ್‌ಣು ಝಾ಼ಡು ಅಛ್ಛು಼ ಪಂಡು ಕೋ ದೇಯ್ನಿ. 19ಅಜು಼ ಅಛ್ಛು಼ ಪಂಡು ದೇಯಿಕೊಂತೆ ಹರೇಕ್ ಝಾ಼ಡನ ಕತ್ರೀನ್, ಆಗ್‌ಮ ನಾಖಾಸ್. 20ಅಮ್ ಝೂ಼ಟಿ ಪ್ರವಾದಿಯೇನು ಚಾ಼ಲ್‌ಥೀಸ್ ತುಮೆ ಇವ್ಣುನ ಮಾಲುಮ್‌ ಕರಿಲಿಶು.
ತು ಕೋಣ್‌ಕರಿ ಮನ ಮಾಲುಮಸ್ ಕೊಯ್ನಿ
(ಲೂಕ 13:25-27)
21“ಮನ, ‘ಪ್ರಭು, ಪ್ರಭು’ ಕರಿ ಬೋಲವಾಳು ಖ್ಹಾರು ಸೊರ್ಗ ರಾಜ್ಯಮ ಜಾ಼ಶೆಕರಿ ನಕೊಲ್ಹಾವೊ. ಕತೋಬಿ ಸೊರ್ಗಾಮ ಛಾ಼ತೆ ಮಾರ ಬಾನಿ ಮರ್ಜಿನಿಘೋಣಿ ಚಾ಼ಲವಾಳುಸ್ ಸೊರ್ಗ ರಾಜ್ಯಮ ಜಾ಼ಶೆ. 22ನ್ಯಾವ್‍ನಿ ತೀರ್ಪ್‌ನ ದನ್ಮ ಕೈಯೆಕ್ಕಿ ಅದ್ಮಿ ಮನ, ‘ಪ್ರಭು, ಪ್ರಭು’ ತಾರ ನಾಮ್ಪರ್ ಹಮೆ ಪ್ರವಾದ್‌ನೆ ಬೋಲ್ಯ, ತಾರ ನಾಮ್ಪರ್ ಹಮೆ ಭೂತ್‌ನ ಖ್ಹಾರು ಕಾಡ್ಯ ಅಜು಼ ಕೈಯೆಕ್ಕಿ ಮಹಾನ್ ಕಾಮ್ನ ಕರ‍್ಯಾ, ಕರಿ ಬೋಲ್‌ಶೆ. 23ತದೆ ಮೇ ಇವ್ಣುನ, ತುಮೆ ಕೋಣ್‌ಕರಿ ಮನ ಮಾಲುಮಸ್ ಕೊಯ್ನಿ. ಮಾರೇಥಿ ದೂರ್ ಹಟಿಜಾ಼ವೊ, ತುಮೆ ಖರಾಬ್ ಅದ್ಮಿ ಹುಯಿರ‍್ಹಾಸ್!” ಕರಿ ಬೋಲಿಶ್.
ಬೇ ಜ಼ಣು ಘರ್ ಭಾಂದಾವಾಳು
(ಲೂಕ 6:47-49)
24“ಇನಖ್ಹಾಜೇಸ್, ಆ ಮಾರಿ ವಾತೇನ ಖ್ಹಮ್‌ಜಿನ್‌, ಅನೀನಿಘೋಣಿ ಚಾ಼ಲವಾಳು ಹರೇಕ್ ಜ಼ಣು ಬಂಡಾಪರ್ ಘರ್ ಭಾಂದಿಲೇಸ್ತೆ ಅಕ್ಲಿ ಅದ್ಮಿನಿಘೋಣಿ ಹುಯಿರ‍್ಹೂಸ್. 25ಭಾಂದಾನ ಬಾದ್ಮ ಅಪಟ್-ಜ಼ಪಟ್‌ನೊ ಪಾಣಿ ವರ್ಶೀನ್, ನದ್ದಿಯೆ ಭರೈನ್ ಆಯು, ಅಜು಼ ಚಾರ‍್ಹೆ ಆಡಿಥು ವ್ಹಾಯಿರೊ ವಾಗಿನ್ ಯೋ ಘರ್‌ನ ಮಾರ್ ಪಡ್ಯು. ಕತೋಬಿ ಯೋ ಘರ್ ಬಂಡಾಪರ್ ಭಂದೈರ‍್ಹೂಥೂತೆ ಇನಖ್ಹಾಜೆ, ಯೋ ರಡ್‍ಕ್ಯು ಕೊಯ್ನಿ.
26ಕತೋಬಿ ಆ ಮಾರಿ ವಾತೇನ ಖ್ಹಮ್‌ಜಿನ್‌ಬಿ, ಇನೀನಿಘೋಣಿ ಚಾ಼ಲಕೊಂತೆ ಹರೇಕ್ ಜ಼ಣು ರೇತಿಪರ್ ಘರ್ ಭಾಂದಿಲೇಸ್ತೆ ಬುಧ್ಧು ಅದ್ಮಿನಿಘೋಣಿ ಹುಯಿರ‍್ಹೂಸ್. 27ಭಾಂದಾನ ಬಾದ್ಮ, ಅಪಟ್‌ಝ಼ಪಟ್‌ನೊ ಪಾಣಿ ವರ್ಶೀನ್, ನದ್ದಿಯೆ ಭರೈನ್ ಆಯು, ಅಜು಼ ಚಾರ‍್ಹೆ ಆಡಿಥು ವಹಿರೊ ವಾಗಿನ್, ಯೋ ಘರ್‌ನ ಮಾರ್ ಪಡ್ಯು. ತದೆ ಯೋ ಘರ್ ಧಡಮ್‌ ಕರಿ ರಡ್ಕಿ ಗಯು.
ಯೇಸುನಿ ಅದಿಕಾರ್‌ನಿ ಬಾರೇಮ
28ಯೇಸುನೆ ಆ ಖ್ಹಾರಿ ವಾತೇನ ಬೋಲಿನ್ ಖತಮ್ ಕರಾನ ಬಾದ್ಮ, ಇನೆ ಬೋಲಿವತಾಳ್ಯೋತೆ ಇನಿ ಬಾರೇಮ ಅದ್ಮಿಖ್ಹಾರು ಘಣು ಆಶ್ಚರ್ಯಖಾದು. 29ಶನಕತೊ, ಯೇಸು ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೇನಿಘೋಣಿ ಕಾಹೆತೆ ಅದಿಕಾರ್ ರ‍್ಹವಾಳಾನಿತರ ಬೋಲಿ ವತಾಳ್‌ತೋಥೊ.
Actualmente seleccionado:
ಮತ್ತಾಯ 7: NTWVe23
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
The New Testament in Waghri Language © The Word for the World International and Waghri Translation Samiti, Karnataka, 2023.
