लुका 20
20
येसुङाना आधिकार बारेङि सिलाप्मा
(मात्ति २१:२३-२७; मारकुस ११:२७-३३)
1ठिक् लेम्बा येसुङा माङ्ठानाङिना टेल्लाङ्ङि याप्मिचि सिकाँ चोक्सा नुना खाबोर पारचार चोगुएट्टुना डाना॥ हिट्ना बेला ओठेडोङ्चिलोक् गाडुवाडाङ्बाचि हिट्नुङ् धारमाबिधि काहिसिक्बाचि उन् सोरि ओआबाउङ् उसिलाप्टुए, 2“आन्याँ याप्मिलोडा, खान्ङा खोनालाम्मा आधिकार आटोगुङ् नागा टोॽवा आचोगुएट्टुना? ना आधिकार खान् साङा मापिडेना?”
3येसुङा हिट्नागा लोडुचे, “आङा चा खानि ठिक् रिङ् सिलाप्नाँनि, आङा याङ्लोडानि, 4बाप्टिस्मा कापि युहान्नाङा बाप्टिस्मा पिमाना आधिकार खोनालाम्मा टोगुएना, माङ्हाङ्लाम्मा इ याप्मिलाम्मा इ?”
5हिट्नुङ् हिट्नागा उन्चि उन्चि नाड्डे रिङ्पान् ओचोगे, “हाट्ले आनि पाक् लोमाना? ‘माङ्हाङ्लाम्मा’ लोडुम् भोने, ‘पोङ् युहान्ना बिस्वास आचोग्नेट्निम्ना टे?’ पिक्सा आसिलाप्युक्॥ 6‘याप्मिलाम्मा’ लोडुम् भोने नागा उछुमागा याप्मिचिङा आनि लुङ्गेॽवाङा आलेप्युसेट्युक्, पोङ्भोने नागाँ युहान्ना माङ्काटा नुङ् बिस्वास ओचोगुना॥” 7हिड्डेउङ् हिट्नागाँ येसु ओलोडुए, “खोलो, हिट्ना आधिकार खोल्लाम्मा टाएना ठाहा टोग्निम्मागा॥”
8येसुङा चा हिट्नागा लोडुचे, “हिड्डे भोने आङा खोना आधिकारङा नागा ख्वाप्पा येम्बोक् चोगुएट्टुङ् आङा चा खानि लोनेनिन्गा॥”
आङ्गुर बारिङिना आधियाङाना ठिक् मुन्डुम्
(मात्ति २१:३३-४६; मारकुस १२:१-१२)
9हिट्नुङ्ना येसुङा याप्मिचि ठिक् मुन्डुम् लोडुचे, “ठिबाङ् याप्मिङा ओस्वाँराङि आङ्गुर लेट्टुए हिट्नुङ् हिट्ना आङ्गुर बारि आधियाङि लाहाब् चोगुङ् उन् याप्मा लेम्बा लोङ्सा भारा खाडे॥ 10आङ्गुर सोङ्डाउङ् उन्ङा ठिबाङ् ओचाकार आधिया फोक्माउङ्सा पाङ्सुए॥ टरो आधिया कामाँ काचोक्बाचिङा हिट्ना ओलेम्सुङ् पाक्चा मिपिङे ओपाङ्सुए॥ 11हिट्नुङ् आरको ठिबाङ्चा स्वाँरा डाङ्बाङा पाङ्सुए, टरो हिट्ना चा आधिया कामाँ काचोक्बाचिङा ओलेम्सुए हिट्नुङ् ओचाफेम्मा ओमेट्टुङ् पाक्चा मिपिङे ओपाङ्सुए॥ 12हिट्नुङ् स्वाँरा डाङ्बाङा फेरि आरको ओचाकार पाङ्सुए॥ हिटना चाकार चा आधिया कामाँ काचोक्बाचिङा सियालोक् ओलेम्सुङ् आङ्गुर बारि भारा ओलेप्टुए॥
13“हिट्नुङ् आङ्गुर डाङ्बा आप्पे पिगे, ‘हाट्ले आङा पाक् चोक्ङाना? आलुक्माङा चोना आइछा पाङ्सुङ्टुङ् उन् उनिसुए भोनेम्टे छेम्बा डोक् नुलोक् ओमेट्टुटु होला॥’ 14टरो आधिया कामाँ काचोक्बाचिङा स्वाँरा डाङ्बाङा उइछा आबागेट्टाना उनिसुङ् हिट्नागा नाड्डे पिक्सा उमुन्डुप्टे, ‘लु, नाम्उम्टे स्वाँरा डाङ्बा उइछा डोक्॥ लु हाट्ले ना सेडुम् हिट्नुङ् ना आङ्गुर स्वाँरा आनिना डोक् लियुक्॥’ 15हिट्नुङ् स्वाँरा ओडाङ्बाङा उइछा आधिया कामाँ काचोक्बाचिङा आङ्गुर बारिलाम्मा भारा ओहोट्टुङ् ओसेडुए॥”
येसुङा हिट्नागा सिलाप्टुचे, “हाट्ले आङ्गुर स्वाँराङा ओडाङ्बाङा हिट्नागा आधिया कामाँ काचोक्बाचि पाक् मेट्टुचिचिगा टे? 16स्वाँरा डाङ्बा आप्पे आप्युङ् हिट्नागा दुस्टा आधिया कामाँ काचोक्बाचि सेडुचिचि हिट्नुङ् ओस्वाँरा आरुलोङ्सा पिडुचिचि॥”
ना रिङ् याप्मिचिङा ओखेम्सुङ् ओमाट्टुए, “हिट्डेम् खोना बेला चा उलिनि चा॥”
17हिट्नुङ् येसुङा हिट्नागा पुयुचिउङ् माट्टुए, “हिट्डेना रिङ् लिनेट्नि भोने धारमाछाप्लाङि छेप्टाना रिङ्ङाना उटुप् पाइना टे?–
लुङ् काछेट्बाचिङा ओलेप्टुना लिङ्गेॽवा डोक् पाङ् ओजाग्ङि छेट्माना उसुरङिना मुलि लिङ्गेॽवा लिसे॥#छाम्लोमा छाप्ला ११८:२२
18“हिट्ना लुङ्गेॽवा उठुङ्ङि ओठागाम्बाक् सोब्बे पिच्चिक् वाच्चिक् उलियुक् हिट्नुङ् हिट्ना लिङ्गेॽवा खोना उठुङ्ङि ठायुक् हिट्ना चा पिच्चिक् लियुक्॥” 19धारमाबिधि काहिसिक्बाचि हिट्नुङ् गाडुवाडाङ्बाचिङा ना मुन्डुम् उन्चि बारेङि डोक् माट्टुना नुङ् ठाहा ओटोगुङ् हिट्नागाँ उन् हिट्नि डोक् लाप्माना निङ्ग्वा ओचोगुए, टरो हिट्नागा याप्मिचिलोक् उकिट्टागा डागा॥
तिरो हुङ्माना बारेङि सिलाप्मा
(मात्ति २२:१५-२२; मारकुस १२:१३-१७)
20हिट्डेउङ् हिट्नागाँ येसु लाप्मा लोङ्सा सुक्मा ठालाँ ओचोगुए॥ नागाँ येसु ओलाबुङ् रोमि टाङ्बाङाना उमुक्ङि पिमा ओकोलुएट्टुना॥ हिट्नुङ् हिट्नागाँ उन्चि याप्मिचि “धारमोति लिसि गाड्डे चोगानि” पिक्सा येसुङाना मिच्छो चोक्मा ओमेट्टुचे॥ 21नागा याप्मिचिङा येसु उसिलाप्टुए, “काहिसिक्बा, खान्ङा माहामा डोक् आमाट्टुगा हिट्नुङ् माहामा डोक् आहिसिक्टुचिगा॥ खान्ङा सोब्बे याप्मिचि ठिक्ए चाट्ला आमेट्टुचिगा खोनालेङ् चा आकेङ्निना, हिट्नुङ् छेम्बा डोक् माङ्हाङ्ङाना ओलाम्बो बारेङि आहिसिक्टुचिगा नुङ् ठाहा टोगुएसुम्मे॥ 22हाट्ले आन्याँ याप्मिलोडा, आन्याँ याहुदि धारमाबिधिङि रोमि सारकार कैसारलोङ्सा तिरो हुङ्मा लियुक् नि लिनिनै?”
23येसुङा हिट्नागाँगा निङ्ग्वाङिना आप्टाङ्ग्वा रिङ् ठाहा टोगुङ् हिट्नागा लोडुचे, 24“खोलो आङा ठिक् रुपाक् राङ् याङ्निमेट्टानिङ् टे, नाहि साङाना निङ् लोक् छाप् केङ्ग्वाना?”
हिट्नागाँ “कैसारङाना” ओलोडुए॥ 25टब येसुङा हिट्नागा लोडुचे, “हिट्डे भोने रोमि सारकार कैसारङाना टेप्मा कैसार डोक् पिडानुम्, हिट्नुङ् माङ्हाङ्ङाना थोक्चि माङ्हाङ् पिडानुम्॥”
26हिट्नुङ् याप्मिचि सोरि हिट्नागाँ येसुङा माट्टुना खोना रिङ्ङि चा वारिक्ङि ठेम्मा उहिडुवाट्टुन् हिट्नुङ् उन्ङा लोडुचिगा उरिङ्लाम्मा हिट्नागा डोङ् ओठोङ्डाउङ् मिचेक्ङे उयुङे॥
उसियागा उहिङ्ग्वाट् लिना बारेङि सिलाप्मा
(मात्ति २२:२३-३३; मारकुस १२:१८-२७)
27हिट्नुङ्ना आम्टेप्मा सादुकि याप्मिचि येसुङि ओआबाउङ् उसिलाप्टुए॥ नागा याप्मिचिङा उसियागा याप्मिचिम्बाक् उहिङ्ग्वाट् उलियुक् नुङ् बिस्वास ओचोगुन्गा॥#मुलिचेला टोॽवा २३:८ 28हिट्नागाँ येसु उसिलाप्टुए, “काहिसिक्बा, मोसाङा छेप्टुना धारमाबिधि गाड्डे खोना चा भुम्भु उइछाचि मिलिए सिए भोने, उन्झाङा ओमोटेङ्मा भ्या चोगुङ् उम्भुलोङ्सा छालेट् पोङ्माबिमा डोक् कोन्युक्॥#धारमाबिधि २५:५ 29आच्छो बेला सि टेप्मा भुम्भु-झान्झाचि ओवासेट्टागा॥ तुम्सामिङा भ्या चोगुए, टरो उन् उइछाचि मिलिङे सिए॥ 30हिड्डे लिसाउङ् माइला उन्झाङा ओमोटेङ्मा भ्या चोगुए, उन् चा उइछाचि मिलिए सिए॥ 31हिट्नुङ् छालुम्बा झान्झाङा चा भ्या चोगुए हिट्नुङ् उन्लाम्मा चा उइछाचि ओपोङ्नेट्नि हिट्नुङ् सिए॥ हिट्डेउङ् सि झान्झाचिङा डोक् ओमोटेङ्मा भ्या ओचोगुए, टरो हिट्ना मेन्झेमालाम्मा खोनाँगा चा छालेट् ओपोङ्नेट्नि टरो सोब्बे छाचि मिलिए उसिए॥ 32हिट्नुङ् आखेरिङि हिट्ना मेन्झेमा चा सिए॥ 33हिड्डेउङ् उसियागा उहिङ्ग्वाट् उलियुङ् ओकोब्यु काट्नाँ हिट्ना मेन्झेमा साङाना ओटालिमाङ् लियुक्ना? पोङ्भोने हिट्नागा सि जानाङा डोक् हिट्ना भ्या ओचोगुए॥”
34येसुङा हिट्नागा लोडुचे, “ना नाराङि एडोक् याप्मिचिङा भ्याबारि ओचोगुटु हिट्नुङ् ओचोगुबिडुचिचि॥ 35टरो हिट्ना जुगङि उसियुङ् उहिङ्ग्वाट् उलियुङ् टोनालोग्ङि माङ्हाङ्लोक् युङ्मा नुगा उलिसागाँ भ्या ओचोग्निगा हिट्नुङ् ओचोगुन्बिडुन्चिन्गा चा॥ 36हिट्नुङ् हिट्नागा माङ्हाङ् रिङ् काउग्बाचि गाड्डे डोक् उलियुक् हिट्नुङ् उसिनिगा चा॥ हिट्नुङ् हिट्नागा माङ्हाङ् छालेट्चि उलियुक्, पोङ्भोने हिट्नागा उसियाउङ् फेरि उहिङ्ग्वाट् उलिसे॥ 37उसियागा याप्मिचि उहिङ्ग्वाट् उलिना रिङ्ङाना पारमान् मोसाङा ओचेट्नुलोक् पिडुएसुए॥ उन्ङा मि हाट्टेएटाना पोथराङाना बारेङि छेप्टुनाँ माङ्हाङ् डाङ्बा, ‘आब्राहाम, इसाहाक, याकुबङाना माङ्हाङ्’ पिक्सा पारचिन्दा माट्टुएसोए॥#पारस्थान ३:१-६ 38उन्बाक् उहिङ्ग्वाट् याप्मिचिगा माङ्हाङ् ए, उसियागा याप्मिचिगा माखाक्, पोङ्भोने माङ्हाङ्ङाना उमिक्ङि साब्बे याप्मिचि उहिङ्ग्वाट् उलियुक्॥” 39हिट्नुङ् धारमाबिधि काहिसिक्बाचि माड्डे आम्टेप्माङा ओलोडुए, “आन्याँ काहिसिक्बा, खान्ङा आड्डिक् माहामा आमाट्टुए॥” 40हिट्नुङ् येसु साङा चा आरु रिङ् सिलाप्माना निङ्ग्वा चोक्मा उहिडुवाट्टुन्॥
खिरिस्टङाना बारेङि सिलाप्मा
(मात्ति २२:४१-४६; मारकुस १२:३५-३७)
41येसुङा हिट्नागा सिलाप्टुचे, “खोड्डेउङ् खिरिस्ट दाउद हाङ्बाङाना उइछा नुङ् ओलोडुटुना? 42-43पोङ्भोने दाउद हाङ्बाङा छाम्लोमा छाप्लाङि नाड्डे पारिक् छेप्टुएसुए–
‘माङ्हाङ् डाङ्बाङा आटाङ्बा लोडुए,
आङा कासाट्टुरचि कालाङ्घेप्पा उछिक्ङि मिचोक्ङे सोम्मा खान् आछुप्टाङ्लेङ् डोक् युङा॥’#छाम्लोमा छाप्ला ११०:१
44“दाउद हाङ्बाङा खिरिस्ट ‘टाङ्बा’ लोडुना भोने खोड्डेउङ् खिरिस्ट दाउदङाना उइछा लिसेना टे?”
धारमाबिधि काहिसिक्बाचिगा हिसिक्मालाम्मा येसुङा ओछेक्छेक् चोगुचिगा
(मात्ति २३:१-३६; मारकुस १२:३८-४०)
45हिट्नुङ् ख्वाप्पा याप्मिचिङा येसु ओखेम्सुएट्टुना बेला ओचेलाचि लोडुचे, 46“धारमाबिधि काहिसिक्बाचिगा हिसिक्मालाम्मा ओछेक्छेक् चोगानि, नागाँ धारमोति ओठेट्लोक् लोट्लिङ्चि ओवाडुङ् योम्बो-टोम्बो ओवागा, हिट्नुङ् खालाङ्गाङि सोब्बेङा बाबा ओमेट्टुचियाक् नुङ् निङ्ग्वा ओचोगुगा हिट्नुङ् याहुदि छुम्मापाङ्ङि लोक् भातेरङि मान् उपिडुना ठोङ्ङि युङ्मा ओकोन्गा॥ 47नागाँ लाङ्मेप्माचिगा माक्फेन्सुबेन् ओनाप्टुचिगा हिट्नुङ् याप्मिचिङा धारमोति ओलोडुचि नुङ् होप्मो बेला सोम्मा केलोक् बिन्टि ओचोगुगा॥ नाड्डेगा याप्मिचिङा आड्डिक् टुक्लोक् ठेना साजाए ओटोगुटु॥”
Actualmente seleccionado:
लुका 20: APH
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2023, Wycliffe Bible Translators, Inc. and Nepal Bible Society
