लुका 14
14
येसुङा युङ्माना लेम्बा टुगाना याप्मि नुमेट्टुटु
1ठिक् युङ्माना लेम्बा येसु ठिबाङ् ओठेडोङ् फारिसि याप्मि ओपाङ्ङि चामा चासिङा खाडे॥ हिट्नि याप्मिचिङा उन् मिच्छो मेट्सा उयुङासागा॥ 2हिट्नि ठिबाङ् उलाङ् उमुक्चि होमाना याप्मि येसु ओटोकानाङि युङासाना॥ 3हिट्नुङ् येसुङा धारमाबिधि काहिसिक्बाचि हिट्नुङ् फारिसि याप्मिचि सिलाप्टुचे, “धारमाबिधि गाड्डे युङ्माना लेम्बा टुखुमाङ् नुमानिङ् चोक्मा ओचेट्नुना लियुक् नि लिनिनै?” 4टरो हिट्नागा पाक्चा उपिग्नेयाट्नि हिट्नुङ् उन्ङा हिट्ना टुखुमाङ् याप्मि उठुङ्ङि उमुक् युङ्सुङ् नुमानिङ् चोगुए हिट्नुङ् हिट्नालाम्मा पाङ्सुडिसुए॥ 5हिट्नुङ् येसुङा हिट्नागा लोडुचे, “युङ्माना लेम्बा खानि ओओ आथाबा पिट् घाइरो चुवाडाम्ङि ठाए भोने, पाक् खानिङा हिट्ना बेला डोक् आहोट्निम्नै टे?”#मात्ति १२:११ 6हिट्नुङ् फेरि चा हिट्नागाँ पाक्चा माप्मा उहिडुवाट्टुन्॥
निम्टो पिबाचिलोङ्सा येसुङा मुन्डुम् लोडुचिगा
7येसुङा हिट्नि भातेरङि ओछेम्डुचिगा याप्मिचिङा मुलि-मुलि युङ्ग्माना ठोङ् ओसेगुना निसुङ् हिट्नागा ठिक् नाड्डेना मुन्डुम् लोडुचे, 8“खानि भ्या भातेरङि निम्टो मापिडिए भोने मुलि डेन्ङि युङ्नेनिन्, पोङ्भोने खानि नुङ्ना चा उनिङ् मुक्टाना याप्मि निम्टो उपिडुएसुए भोने, 9हिट्ना होन्युटानाँ हिट्ना निम्टो कापि याप्मि आप्युङ्, ‘खान् आयुङाना ठोङ् उन्लोङ्सा नाडुबिडु’ मालोडे भोने खान्ङाना कानाभु खाॽयुक् हिट्नुङ् खान् गुन्दरिङि युङ्मा कोन्युक्॥ 10टरो निम्टो आटोगुङ् भ्या भातेरङि आखाट्नाँ यो खाम्मि डोक् युङा, हिट्नुङ् निम्टो कालोबा आप्युङ् खान् मालोयुक्, ‘हाउ आम्बु, नाहि नाट्टो डोक् काडाउङ् युङा॥’ हिट्ना बेला सोब्बे सोरि कानिङ् भेन्युक्॥ 11पोङ्भोने आप्पे ठेलोक् काचोक्बाचि माङ्हाङ्ङा खाट्टिउगा चोगुचिचि हिट्नुङ् जुन्ङा खाट्टिना ए पिग्युक् हिट्नागा उन्ङा ठेलोक् चोगुचिचि॥”#मात्ति २३:१२; लुका १८:१४
12हिट्नुङ् येसुङा पाङ् ओडाङ्बा चा नाड्डे लोडुए, “खान्ङा नाड्डेना भातेर आचोगुनाँ खान्ङा मिसेन् आनिसुचिगा कासाइबाचि, भुम्बु-झान्झाचि, कानातेदारचि हिट्नुङ् वागाठागा काटाक्लुङ्चि छेम्डुन्चिन्, पोङ्भोने हिट्नागाँ ठेट्लोङ् हुङ्मालोङ्सा फेरि खान् चा भातेरङि माछेम्युक् हिट्नुङ् मानोक्युबियुक्॥ 13टरो भातेरङि पाक्चा ओवानिगा, लोङ्लेन् हिट्नुङ् याङ्उनिनिगा याप्मिचि छेम्डुचि॥ 14हिट्नुङ् खान्ङा आसिक् आटोगुटु, पोङ्भोने हिट्नागाँ काठेट्लोङ् हुङ्मा उहिडुन्गा॥ टरो धारमोति याप्मिचि उसियुङ् उहिङ्ग्वाट् उलिनाँ माङ्हाङ्ङा खान् ना टोॽवाङाना इनाम् मापियुक्॥”
ठेना भातेरङाना मुन्डुम्
(मात्ति २२:१-१०)
15येसुलोक् चामा चासिङा युङाना ठिबाङ् याप्मिङा ना रिङ् खेम्सुङ् लोडुए, “माङ्हाङ् उमुलुक्ङिना भातेर चामा काटोक्बाचि उन्ङा आसिक् पिडुचिचि॥”
16येसुङा हिट्ना याप्मि ठिक् मुन्डुम् लोडुए, “ठिबाङ् याप्मिङा ठेना भातेर टेयार चोगुए हिट्नुङ् जोम् याप्मिचि निम्तो पिडुचे॥ 17हिट्नुङ् भातेर चामा बेला लिसाउङ् ओचाकार ‘भातेर चामा बेला लिसे, आबानि’ लोङा निम्तो ओलोडुचिगा छेम्सिङा पाङ्सुए॥ 18टरो निम्तो उपिडुचिगा सोब्बेङा ठिक्-ठिक् रिङ् ओचोगुङ् खाप्मा ओटेन्नेट्नि॥ हिट्नुङ् पाइलेना पिगे, ‘आङा ठिक् बेङ्सि इनुएसुङ्ङे हिट्ना बेङ्सि पुसिङा खाप्मा डोक् कोन्युक्, कानिङ्ग्वा उटुक्नि चा, आङा भातेरङि आप्मा हिनिङ्ना॥’ 19आरकोङा लोडुए, ‘आङा लेम्बोक् हाल गोरु इनुएसुङे हिट्नागा फेङ्सुङ् पुयुङ्चिङ्चिङ्, कानिङ्ग्वा उटुक्नि चा, आङा भातेरङि आप्मा हिनिङ्ना॥’ 20आरकोङा चा लोडुए, ‘आङा लोप्मो एडोक् भ्या चोगुएसुङे, हिट्डेउङ् आङा आप्मा हिनिङ्ना॥’ 21हिट्नुङ् ओचाकार नोक्टा खाडाउङ् सोब्बे रिङ् ओडाङ्बा खेम्मेट्टुए॥ हिट्डेउङ् ओडाङ्बाङाना उसिरिबा काडाउङ् ओचाकार लोडुए, ‘एला खाडाउङ् खालाङ्गाङि लाम्बो-कोक्पोङिगा पाक्चा ओवानिगा, टुखुमाङ्चि, लोङ्लेन्चि हिट्नुङ् याङ्उनिनिगा याप्मिचि छेम्डुचिउङ् टाडुचि॥’
22“हिट्नुङ् हिट्ना चाकारङा ओडाङ्बाङा लोडु गाड्डे डोक् चोगुङ् ओडाङ्बा लोडुए, ‘आडाङ्बा, खान्ङा आमाट्टुचिगा सोब्बे छेम्डुङ्चिउङ् टाडुङ्चिङे॥ हिट्नुङ्चा हाट्ले चा जोम् युङ्माना डेन् खेरोक् युङ्ग्वा॥’
23“फेरि ओडाङ्बाङा लोडुए, ‘हिट्डे भोने, युक्ताम्ङि लाम्बो-लाम्बो हिट्नुङ् खोप्चा-खोप्चिङि खाडाउङ् भातेरङि खाप्मा डोक् कोन्युक् पिक्सा छेम्डु टाडुचि॥ हिट्नुङ् आपाङ् उइप्याक्॥ 24पोङ्भोने आङा खानि लोनाँनि, पाइला निम्तो पिबालाक्चि खोनाङा चा आङा टेयार चोगुङ्ना भातेर चामा ओटोगुन्ना॥’”
येसु ओचेला लिसिनाँ याङ्छाडिना रिङ्
(मात्ति १०:३७-३८)
25ठिक्खेप् जोम् याप्मिचिगा खिमेयाङ्मे येसुलोक् ओखाडागेट्टागा, हिट्नुङ् येसु हिट्नागालेङ् नोक्टाउङ् लोडुचे, 26“आङा आएङ् आएङ् रोक् कारिक्बाङा उप्मा-उमा, ओटालिमाङ्, उइछाचि, उम्भु-उन्झाचि, उना-उन्झाचि हिट्नुङ् आप्पे नुङ्ना चा आङा माया याङ्आचोगिन्नागा भोने, हिट्ना आचेला लिमा हिनिना॥#मात्ति १०:३७ 27हिट्नुङ् आप्पे उखाप्चे खुयुङ्#१४:२७ उखाप्चे खुमा नुङ् येसुलोङ्सा याङ्छामा खुमा हिट्नुङ् सिमा चा टेयार लिमा॥ आएङ् आएङ् लाहाब् लिनेट्नि भोने, आचेला लिमा हिनिना॥#मात्ति १०:३८; १६:२४; मारकुस ८:३४; लुका ९:२३
28“हाट्ले खानि माड्डे ठिबाङ्ङा चोङ्साङ्मा पाङ् चोक्माना निङ्ग्वा चोगुए भोने, हिट्ना चोक्मा हिमा खोट्टेप्मा ओफाबा लाहाबा लियुक्ना, हिट्नुङ् हिट्टेप्मा ओफाबा आङालोक् युङ्ग्वा नि वाइना नुङ् पाइले डोक् हिसाबकिताब चोगुटिनि माइनि टे? 29हिट्डेउङ् हिट्ना याप्मिङा पाङ् ओजाग् ठेन्डुङ् चोक्मा हिडुवाट्टुन् भोने, हिट्ना टोॽवा उनिसुगा याप्मिचिङा हिट्ना नाड्डे पिक्सा ओलोडुजोटु, 30‘ना याप्मिङा चोक्मा ठालाँ चोगुए, टरो पुरो चोक्मा हिडुवाट्टुन्॥’ 31हाट्ले मिट्टानुम् टे, ठिबाङ् हाङ्बालोक् ठिमेक् हाजार टिलिङ्गाचि उयुङ्ग्वा, हिट्नुङ् आरको इप्पोक् मेक् हाजार टिलिङ्गाचि लिसाना हाङ्बालोक् चुङ्मा खाप्मा नुङ्ना पाइले डोक् मेप्मा हिडुङ्टुङ्नि हिनिङ्ना इ नुङ् उनिङ्ग्वाङि मिट्टुन्नै टे? 32हिट्ना हाङ्बाङा मेप्मा हिनिङ्ना नुङ् ठाहा टोगुए भोने, आरको हाङ्बा लाप्माङ् लाम्बोङि ओआप्युगेट्ना बेला डोक् ओखाबोर कालो पाङ्सुङ् टोङ्माना रिङ् चोगुटु॥ 33नाड्डेउङ् खानि माड्डे जुन्ङा आङालोङ्सा ख्वाप्पा रिङ्चि नाडुन्ना, हिट्ना आचेला लिमा हिनिना॥
उसाम् मेना युम्
(मात्ति ५:१३; मारकुस ९:५०)
34“युम् नुना, टरो युम्ङाना ओसाम् खाडे भोने हिट्ना फेरि नुम्नुम् लोलोक् चोग्मा हिनिम्ना॥ 35हिट्नुङ् ना स्वाँरा लोङ्सा मोल चा लिनिना, याप्मिचिङा खेरोक् डोक् ओलेप्टुटु॥ खेम्माना नुभेक् लोक्गाङा ना रिङ् नुलोक् खेम्सानुम्॥”
Actualmente seleccionado:
लुका 14: APH
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2023, Wycliffe Bible Translators, Inc. and Nepal Bible Society
