युहान्ना 9
9
पोङ्सानालाम्मा डोक् याङ्कानिनिबा नुमानिङ् लिसाना
1ठिक् लेम्बा येसु लाम्टियाउङ् खाडागेट्टाना बेला ठिबाङ् पोङ्सानाँ डोक् याङ्कानिनिबा लिसाना याप्मि निसुए॥ 2हिट्नुङ् ओचेलाचिङा उन् उसिलाप्टुए, “काहिसिक्बा, साङा पाप चोगुङ् ना याप्मि याङ्कानिनिबा लिसाउङ् पोङ्सेना? उन्ङा आप्पे चोगुङ् इ उप्पा-उमाङा इ?”
3येसुङा लोडुचे, “नाङा आप्पे पाप चोगुङ् चा माखाक्, उप्पा-उमाङाना पापङा चा माखाक्, टरो माङ्हाङ्ङाना ओटोॽवा ना याप्मि ओचोलाङि ओठेट्याक् नुङ् डोक् उन् याङ्कानिनिबा लिसाना ए॥ 4लेम्बा व्हाङ् लिनाँ डोक् आङा याङ्कापाङ्बाङाना ओटोॽवा आनि चोक्मा कोन्युक्॥ जब नाम् कुयुक्, खोनाङा चा टोॽवा चोक्मा उहिडुन्ना॥ 5आङा नाराङि युङ्ङालोक् आङा डोक् नाराङिना व्हाङ् ए॥”#मात्ति ५:१४; युहान्ना ८:१२
6ना रिङ् माट्टुङ् उन्ङा खाम्ङि ठ्या ठोक्टुए, हिट्नुङ् खाम् फोडुङ् याङ्कानिनिबाङाना उमिक्ङि नेक्टुबिडुए, 7हिट्नुङ् उन्ङा हिट्ना लोडुए, “खाडा, सिलोआमङाना पोखारिङि खाडाउङ् वासिडु” (सिलोआमङाना उटुप् “पाङ्बालाक्” लियुक्)॥ हिट्ना याप्मि पोखारिङि खाडाउङ् वासिडुए, हिट्नुङ् उन् याङ्निसुङ् नोक्टा आबे॥
8हिट्ना याप्मिङाना ओटाक्लुङ्चि लोक् हिट्ना नाक्सा युङाना उनिसुगाँ ओलोडुए, “पाक् ना युङाउङ् याङ्कानाक् याप्मि माखाइ?”
9आम्टेप्माङा ओलोडुए, “ना उन् डोक्॥” टरो आरुङा ओलोडुए, “ना हिट्ना याङ्कानिनिबा याप्मि गाड्डेम्बाक् निङ्ना, टरो हिट्ना माखाक्॥”
टरो हिट्नाँ लोडुचे, “छेम्बा डोक्, आङा हिट्ना याप्मि डोक्॥”
10हिट्नागाँ हिट्ना उसिलाप्टुए, “खोड्डेउङ् खान्ङा कामिक्ङा निमा आहिडुएना टे?”
11हिट्नाँ लोडुचे, “येसु उनिङ् लिसाना ठिबाङ् याप्मिङा खाम् फोडुङ् आमिक्ङि नेक्टाङ्बिडाङे, हिट्नुङ् सिलोआमङाना पोखारिङि खाडाउङ् वासिडु याङ्लोडे॥ हिट्नुङ् आङा खाडाङाउङ् वासिडुङे, हिट्नुङ् आङा याङ्निसुङे॥”
12हिट्नागाँ उसिलाप्टुए, “हिट्ना याप्मि खोनाइ वाहेट्ना टे?”
हिट्नाङा लोडुचे, “आङा ठाहा टोक्निङ्ना॥”
13हिट्नुङ् पाइले याङ्कानिनिबा लिसाना याप्मि हिट्नागाँ फारिसि याप्मिचि सोरि ओखाट्टुए॥ 14येसुङा खाम् फोडुङ् हिट्ना याप्मिङाना उमिक्ङि नेक्टुङ् नुमानिङ् चोगुना लेम्बा युङ्माना लेम्बा डाना॥ 15फारिसि याप्मिचिङा “खान् खोड्डेउङ् याङ्निमा काहिबा आलिसेना” पिक्सा उसिलाप्टुए॥ हिट्नाङा लोडुचे, “उन्ङा खाम् फोडुङ् आमिक्ङि नेक्टाङ्बिडाङ्ङे, हिट्नुङ् आङा वासिडुङ् याङ्निमा काहिबा लिसाङे॥”
16फारिसि याप्मिचि माड्डे कोइ-कोइङा ओमाट्टुए, “ना याप्मि माङ्हाङ्लाम्मा उङ्साना माखाक्, पोङ्भोने नाङा युङ्माना लेम्बा पालान् चोगुन्ना॥” टरो आरुङा ओमाट्टुए, “कायाङ्छाबा याप्मिङा चा नाड्डेना डोङ् ठोङ्डिना टोॽवा चोग्मा हिडुटुनि टे?” नाड्डेउङ् उन्चि उन्चि ओटोङ्नेएट्नि॥
17हिट्नागाँ फेरि हिट्ना याङ्कानिनिबा याप्मि उसिलाप्टुए, “हिट्ना याप्मिङा कामिक् नुमानिङ् चोगुए, हाट्ले हिट्ना याप्मिङाना बारेङि खान् पाक् आपिक्युक्ना?”
हिट्नाङा लोडुचे, “उन् माङ्काटा ए॥”
18हिट्ना याङ्निसाना याप्मिङाना उप्पा-उमा ओछेम्डुचिउङ् मिसिलाप्मे सोम्मा याहुदि ओठेडाङ्चिङा उन् छेम्बा याङ्कानिनिबा डाना हिट्नुङ् याङ्निमा काहिबा लिसे नुङ् बिस्वास ओचोग्वाट्टुन्॥ 19हिट्नुङ् हिट्नागाँ हिट्नागाचि उसिलाप्टुचे, “पाक् ना खान्चि छा इ? पाक् ना पोङ्सानालाम्मा डोक् याङ्कानिनिबा लिसाउङ् पोङ्साना नुङ् आपिक्चिचिगि? हाट्ले खोड्डेउङ् ना याङ्निमा काहिबा लिसेना?” 20हिट्ना उमा-उप्पाङा हिट्नागा लोडाचुचे, “आए, ना आन्च्याँ छा डोक् हिट्नुङ् ना याङ्कानिनिबा पोङ्साना डाना॥ 21टरो ना खोड्डेउङ् याङ्निमा काहिबा लिसेना हिट्नुङ् खोनाङा उमिक् नुमानिङ् चोगुएना, हिट्ना रिङ्उम्टे आन्च्याँ ठाहा टोक्चुन्नागा॥ खानिङा आप्पे हिट्ना सिलाप्टानुम्, हिट्नाङा आप्पे माप्मा हिडुटु, हिट्नाङाना उमेर चा लिसाइसे॥” 22हिट्नाङाना उप्पा-उमा याहुदि ओठेडोङ्चिलोक् किट्टाचिनाँ हिड्डेना रिङ् माट्टाचुए, पोङ्भोने कोइङा येसु खिरिस्ट नुङ् ओलाडुटु भोने, हिट्नालाउङ्सा छुम्मापाङ्लाम्मा होप्मा कोन्युक् पिक्सा याहुदि ओठेडोङ्चिङा पाइला डोक् रिङ्पान् ओचोगुएसुना॥ 23हिड्नाड्डेउङ् उप्पा-उमाङा “हिट्नाङाना उमेर लिसाइसे, उन् डोक् सिलाप्टानुम्” पिक्सा माट्टाचुए॥
24हिट्नुङ् हिट्नागाँ पोङ्सानालाम्मा डोक् याङ्कानिनिबा लिसाना याप्मि फेरि ओछेम्डुए हिट्नुङ् ओलोडुए, “माङ्हाङ् ओटोकानाङि छेम्बाना रिङ् माट्टु॥ खान् नुमानिङ् माचोगाना याप्मि कायाङ्छाबा नुङ् आन्याँलाउङ्सा ठाहा युङ्ग्वा॥”
25हिट्नाङा लोडुचे, “उन् कायाङ्छाबा याप्मि इ कायाङ्छाबा माखाक्, आङा हिट्ना रिङ् ठाहा टोक्निङ्ना॥ आङा ठिक् रिङ् एडोक् ठाहा टोगुङ्टुङ्, आङा याङ्निनिङ्ना डाना, टरो हाट्ले आङा निसुङ्टुङ्॥”
26टब हिट्नागाँ हिट्ना उसिलाप्टुए, “उन्ङा खान् पाक् माचोगेना? उन्ङा कामिक् खोड्डेउङ् नुमानिङ् चोगुएना?”
27हिट्नाङा लोडुचे, “आङा खानि हाले डोक् लोमा हिनाँने, टरो खानिङा आखेम्नेट्निम्॥ हाटले फेरि पोङ् हिट्ना रिङ् खेम्मा आकोलुएट्टुम्ना? पाक् खानिङा चा ओचेला लिमाना निङ्ग्वा आचोगुएट्टुम्नि पाइना?”
28ना रिङ् ओखेम्सुङ् हिट्नागाँ हिट्ना खेमा लाप्सा ओलोडुए, “खान् गोलो हिट्नाङाना ओचेला, टरो आन्याँ टे मोसाङाना ओचेलाचि॥ 29मोसा लोक् माङ्हाङ् चेक्टाना रिङ् आन्याँलाउङ्सा ठाहा युङ्ग्वा, टरो ना याप्मिम्बाक् खोनिना नुङ् आन्याँलोङ्सा ठाहा वाइना॥”
30हिट्ना याप्मिङा हिट्नागा लोडुचे, “ना खोड्डे पाराना रिङ् हाउ! उन्ङा आमिक् नुमानिङ् याङ्चोगाबिडे, हिट्नुङ् उन् खोनिलाम्मा टायाना याप्मि नुङ् पाक् खानिङा ठाहा आटोक्निम्नै? 31माङ्हाङ्ङा कायाङ्छाबा याप्मिचिगा रिङ् खेम्सुन्गा नुङ् आनि सोब्बेलाउङ्सा ठाहा युङ्ग्वा, टरो माङ्हाङ्ङाना माङ्ध्यान् काचोक्बा हिट्नुङ् उनिङ्ग्वा गाड्डे टोॽवा काचोक्बाङाना उरिङ् उन्ङा खेम्सुटु॥ 32नाराङाना उटुम्लाम्मा हाट्ले सोम्मा पोङ्सानालाम्मा याङ्कानिनिबा लिसाउङ् पोङ्साना साङा चा नुमानिङ् चोगुना रिङ् खोना बेला चा खेम्निगेट्निना॥ 33ना याप्मि माङ्हाङ्लाम्मा उङ्नेएट्निनाम्बे उन्ङा पाक्चा चोक्मा हिडुवाट्टुन्॥”
34हिट्नागाँ हिट्ना ओलोडुए, “खान्उम्टे कायाङ्छाबा आलिसाउङ् डोक् आपोङ्साना, हिट्नुङ् पाक् हाट्ले खान्ङा आन्याँ हिसिक्मा याप्मि आकोन्येट्नि?” हिट्नुङ् हिट्नागाँ उन् छुम्मापाङ्लाम्मा भारा ओहोट्टुडिसुए॥
निङ्ग्वा टेप्मा
35याहुदिचिङा हिट्ना याप्मि छुम्मापाङ्लाम्मा भारा ओहोट्टुना रिङ् येसुङा खेम्सुए, हिट्नुङ् हिट्ना टुबुङ् लोडुए, “पाक् खान्ङा याप्मि छाङि बिस्वास आचोगुटुनि?”
36हिट्नाङा लोडुए, “आडाङ्बा, उन् साइना आङा याङ्लोडा हिट्नुङ् आङा बिस्वास चोगुङ्टुङ्॥”
37येसुङा हिट्ना लोडुए, “खान्ङा उन् आनिसुएसुए, हिट्नुङ् खान्लोक् चेक्येट्ना उन् डोक् ए॥”
38ना रिङ् खेम्सुङ् हिट्नाङा लोडुए, “आटाङ्बा, आङा बिस्वास चोगुङ्टुङ्”, हिट्नुङ् हिट्नाङा उन्ङाना माङ्ध्यान् चोगुए॥
39हिट्नुङ् येसुङा लोडुए, “याङ्कानिनिबा याप्मिचिङा उनिसुवाक् हिट्नुङ् याङ्उनिसुगा याप्मिचि याङ्कानिनिबा उलियाक् नुङ् आङा नाराङि न्याए चोक्माउङ्सा उङ्साङे॥”
40ना रिङ् ओखेम्सुङ् हिट्नि उलिसागा फारिसि याप्मिचि माड्डे कोइ-कोइङा उन् ओलोडुए, “पाक् आन्याँ चा याङ्कानिनिबाचि इ टे?”
41येसुङा हिट्नागा लोडुचे, “खानि याङ्कानिनिबा डोक् आलिसिना बे खानिङि पाप लिनेएट्नि बे, टरो खानिङा ‘आन्याँ निसुम्मागा’ नुङ् आमाट्टुम्गा, हिड्नाड्डेउङ् खानि पाप लियुयाक्युक्॥”
Actualmente seleccionado:
युहान्ना 9: APH
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2023, Wycliffe Bible Translators, Inc. and Nepal Bible Society
