Pulim 4

Kain dedaane Abel taane

1Adam déem ma peini de o kaane Awa. O ma ja puga o lo bakeira. O ma pa o yere we ‘Kain’, ye o we, “Ko ye Baŋa Wɛ zeinim ŋwaane mo a loge bakeira.” 2Awa daa ta ma lo Kain nyaane Abel o woli da. Ba na ke nɔɔna ba ti to, Abel déem ma ba o ji nayero, ye Kain maa ye valo. 3Ko maa wora ko wora. Kain ma twori tega kam wo-vallo tem wone o ma ke pɛɛre o pa Baŋa Wɛ. 4Abel de ma le o vare-mwa bam wone boboa bu na nuga to o go o ma ke pɛɛre o pa Baŋa Wɛ. Abel de o pɛɛre dem maama ma su Baŋa Wɛ yi.#Hiburu 11:4 5Se ko ná ye Kain, Wɛ déem ve‑o mo, o de o pɛɛre dem maama. Kain bane ma tiini de zaŋe ye o yiga nyɔne lanyerane. 6Baŋa Wɛ ma bwei Kain o we, “Bɛ mo ye nmo pa se n bane zaŋe konto? Bɛŋwaane mo nmo yiga nyɔne? 7Nmo ná ke lanyerane, nmo yuu bá zeiŋi wɛɛne na? Nmo nam daa ná wo ke lanyerane, ta‑n yei we wɛleere vwɛ n diga ni dem ne ye de lage de ja‑m ne ga-varem tei. Nmo nam jege se n kwaane n wane-de mo.”

8Dɛ dedwe Kain ma ta de o nyaane Abel o we, ba tɔge daane ba vo gaao wo. Ba na yi da to, Kain ma zi o nyaane Abel o mage o go.#Matiyu 23:35; 1 Jɔn 3:12

9 Baŋa Wɛ laam ma bwei Kain o we, “Se nmo nyaane Abel bɛ?” O ma leiri o we, “Amo yeiri o jei. Ko ye amo totoŋe mo se a taa yere a nyaane wom na?” 10Baŋa Wɛ laam ma ta o we, “Nmo ke bɛ lɛɛro mo tento? Nii! Nmo nyaane wom jana bam wo tega kam ne mo ba keeri ba jare-ne se a jwoori a ŋwe nmo totoŋ-balɔrɔ kom jene dem. 11Konto to, sɔɔlem laam nam wo nmo baŋa ne pa se tega kam ve‑m. Kokuri, nmo na go n nyaane wom to, tega kam kaŋe ka ni mo ka jwoŋi o jana bam ka nyɔ. 12Tega kam daa bá ke wodiu ka pa‑m, de nmo ná maŋe n va tetei. Nmo wó ta‑n kare n beeri tega kam maama ne, ye n bá‑n na jeiŋa jei.”

13Kain ma ta de Baŋa Wɛ o we, “Nmo na pɛ amo waarem delo to tiini de daga de dwoi amo jaanem. 14Nmo lage n zeili amo tega kanto baŋa ne, se a daare a pwɛ nmo tei ne. Amo jege se a taa kare a beeri tega kam ne mo, ye a bá na jeiŋa jei. Wolo maama ná jeeri-ne, kotu bá go-ne mo na?” 15Baŋa Wɛ ma leiri o we, “Ko bá taa ye konto. Wolo maama na wó go nmo Kain to, amo wó ŋwe jene dem konto kuni berepɛ mo kotu dwi dem baŋa ne.”

Baŋa Wɛ laam ma ke nyenyego Kain yera ne, se ko che nɔɔno wolo maama na wó jeeri‑o to, se kotu yé zaŋe o go‑o. 16Kain déem ma zaŋe o viiri Baŋa Wɛ tei ne. O ma vo o kare o beeri Noda laŋa kam ne. Jei sem konto wo Eden kara kam wɛ-puli seeni mo.

Kain dwi dem taane

17Kain ma peini de o kaane ye o ja puga o lo bakeira, ka yere mo Enoki. O ma daare o bobo teo kamunu kuri ye o ma o bu Enoki yere dem o ma bwoŋi teo kom yere.

18Enoki déem ma lo Iradi, ye Iradi déem ma ji Mehujayeli kwo.

Mehujayeli de déem ma lo Metusayeli. Metusayeli wom de déem ma lo Lameke.

19Lameke déem ma di kaana balei. Ka-kwea kam yere mo Ada, ka-bia kam yere maa ye Zilla. 20Ada déem ma ba o lo Jabale. Ko ná ye balo na kare ba beera ye ba zoore vwoa wone ba kɔne vara to, Jabale maa ye ba nabaaro. 21O nyaane wom yere déem maa ye Jubale. Wonto de déem mo ye kɔn-magena dedaane wu-wura dwi maama nabaaro. 22Zilla déem ma lo Tubale-Kain. Wonto maa ye luru, ye o bobo se o taa mae luuru dedaane channa o ma ke wonnu dwi dwi. Tubale-Kain déem maa jege nakɔ, o yere na ye Naama.

23Lameke déem ma zaŋe o ta de o kaana bam o we,

“Ada de Zilla,

cheigi-na amo kwora!

A kaana bam,

cheigi-na a taane dem!

Amo go nɔɔno de o na ke-ne zonne to ŋwaane.

O na ye nɔn-doŋo ye o mage-ne to,

a ma go‑o!

24Nɔɔno ná go Kain,

kotu wó jwoori o ŋwe jene dem kuni berepɛ.

Nɔɔno nam ná go amo,

kotu wó jwoori o ŋwe kuni fuserepɛ-berepɛ mo!”

Sɛfi dedaane Enosi taane

25Adam daa ma peini de o kaane Awa, ye ba lo bakeira. Awa ma pa o yere we ‘Sɛfi’, ye o we, “Kain na go Abel to, Wɛ daa pɛ-ne dwi dedwoŋi se wonto leiri Abel yuu ne.” 26Sɛfi de ma lo bu. O ma pa o yere we ‘Enosi’. Maŋa kam konto ne mo nɔɔna laam bobo se ba taa bwoi Baŋa Wɛ yere ba maa zuli‑o.

Actualmente seleccionado:

Pulim 4: KBG

Destacar

Copiar