Markus 5
5
Yesu Lai wi Sim ba tɨmbɨzim na Garasinawa
(Matiyu 8:28; Luka 8:26,39)
1Yesu ɨna sɨba gyagiya kɨ niwasɨ dɨ pɨla madzɨ dɨ batlɨna pakɨ ta Garasina. 2Nda dawa hiyusa Yesuwa ɗe kwatal, wɨ mbasaka riwan dɨ sukɨn, a bota ɗe yamamau dɨ bɨ gɨmai Yesu. 3Naka sɨnka maka ɗe yamamau, bana iya ɗɨhɨnusɨ moyu, kotanga a sansali. 4Asasu ɗahɨnakɨ kɨnwasɨ ɨna ngarusɨ a ta sansali ata kwambala mir tɨda ɓalalai, dɨ ɓoyai, wi bakalpɨ mana iya ti. 5Tangan ghajeki, camaza a mukwa ta maka ɗe yamamau ɨna ghama ɗai, da ɓa kwararɨ da gavɨra tuwatuwusa zɨkɨ.
6Daga naya Yesuwa sar, dɨ kiya mirayai dɨ busɨ dɨda bɨɗusai. 7Dɨ ɓaa kwarara luwasɨ du, “Ma zhafu ɨna mɨna, Yesu laina Ghɨnsɨ Dankwayuwa, mɨna ta rawafu adama Ghɨnsɨ, fata kwaya hɨlaiwanu!” 8A ɗɨnga wanka adama Yesu dɨ ɗɨngaya ndu, “Ɗzarkwai ɨna nakɨn sɨmkɨn mbasaka riwan”
9Je tsiyusa Yesuwa ndu, wa ji ngɨnafa? Je gɨsa ndu “Ngɨnuwɨn ji cas, a dama mi ja cassɨ.” 10Je rawa Yesu du kushi-kushi ta kwaya bi raka tlɨna a ɗɨkau.
11A wiha dangɨsɨ na kam dɨ jaata ki acɨɓɨ ɗai mbatleyi. 12Je rawusa mbasaka riwan du,“Kafɨmeyin dagɨsaso na kanka fa zuwama kwai mizama ɗe tlɨn.” 13Je sama tlɨna Yesu du, ta botlɨn dɨ batlɨn, je bawusa mbasaka riwan dɨ zatlɨn ɗe dangɨsasau kai. A wiha dangɨsasau ka a baibaya zangu tsɨrai, dɨ kɨrma mɨrayai, dɨ vatlɨn ɗo biya madzɨ dɨ mbɨla tlɨnai.
14A ɗika sɨbana kiya dangɨsasau ka dɨ varara dɨ batlɨn dɨbi bɨla sɨbɨ niya vuwagwahɨ gyarya ɨna gyaɓiya, Je buwatlɨna sɨbabau niya vuwagwahi e naya hamba dɨ dzakwatlɨn. 15Dage buwatlɨna tira Yesu, je naya naka ba mbasaka riwan ɗe wasɨka e tsigi, a kaba tuwusɨ, tɨsu ndererai, je kuya tlɨna lakaka yu. 16Sɨba dɨ ɗɨma kutɨka ta tiyatlɨn dɨ babɨla hamba dɨ ɗɨma naka ba mbasaka riwan ɨna wiha dagɨsasauka. 17Je tlɨne dzakwa rawaka Yesu du, ta botaya ɗe mɨdzai tatlɨn.
18Tɨ kwaya ta zusi ɗe kwatal, naka ba mbasaka riwanka a shiyi ka, dɨ rawa Yesu du, “Gana ɗiyafai.” 19Ama Yesu a santa mau, dɨ ɗɨngaya ndu, “Piya kamai a tiira sɨbɨnifu, fabi bɨla tlɨn kutato gyaruni sɨba dɨ ɗɨmafa Bakam, ɨna e ta lulufu.” 20Je piya kamai dɨ babɨla hamba ghɨrɨ sɨba dɨ ɗɨmaya a Yesu, ndyam ɗe vuwa gwahɨ dɨrɓitin ta Dikafolis. Sɨbɨ dɨ mɨtla hamba ghɨri nikya.
Layaka wunta Yayirus ɨna am mana ra pɨram a Yesu
(Matiyu 9:18-26; Luka 8:40-56)
21Yesu dɨ mɨna pɨla ta wiya paka madzai ɗe kwatal sɨbabau cass dɨ ndyuwuseyɨ, tɨ ndɨ ɗɨka ta vɨna madzɨ. 22Daga ɗɨmau wi garna a ɗe gyaruni niya bali mana pa gham, dɨsu kɨn, ngɨnusi ji Yayirus, nda nayaka Yesu dɨ ɓugusa bɨɗusai. 23Tɨ data rawusa ndu, “Kushi-kushi wuntuwun gyaɓiya jaa ta vɨna miyau. Tuku kwai fabɨ vakɨnfa tuwaza nja lalai dɨ tlazai.” 24Je ɗiyusaYesu.
A wiha sibɨ cass data ɗiyusi da zakutusɨ.
25Wiya am dɨ jeyi ma sa kaitɨ washasa za dirbitim bahɨm tsir ata raa pɨram. 26A sasa kaitɨ zhɨkɨ a tɨra sibana tsa nihɨ, dɨ mba kuti niya kɨnza ndyam ama dɨ nda mbam, vɨzhɨ da daɗaza ndɨ daɗau amar ma lahiyu. 27Je dɨkaya ndɨra Yesu, je nje siɗaza adara kyarwasɨ ɗe sɨbɨ, dɨ tɨkɨna kabi tusɨ, 28Adama am ka ɗɨngasa ɗe canza jika, ndu, “Ko mɨnta tɨkɨn gan ndɨ kabɨ tusɨ, mɨna lalai.” 29Nda dliya dlɨ pɨram bana vusa ɗeza dɨ tsɨrusai tik. Je ɗaha ɗe tuwatuwaza a laitla sai a ɗe vɨzhɨ taza.
30Nda dlɨya dlɨ je ɗaha wi kalpɨ e bawusa ɗewasa Yesu, je ghɨdzusɨ ɗe sɨbɨ du, “Wadɨ tɨkɨna kabituna?”
31Je gɨsaya sɨba gyagiya niwasɨ du, “Fada naya-naya wiha sɨbɨ ena zakutayau da gwaɓɨtlafu, fadu wadɨ tɨkɨnafa?”
32Ama je ghɨdzusa Yesu dama dɨ naya wa dɨ ɗɨma wankana? 33Am ka daga asɨnsɨna hamba dɨ marazai, je bawaza a kitlɨrwatɨ, tuwatuwaza da zaba zabau, dɨ dɨda bɨɗusai, je bɨlaya tɨkwasam hamba dametla. 34Je te ɗɨngatla du, “Wumtuwum, tsahiya gasƙewatɨ toom laiyinsai. Takɨn lapiya, ma lasai aha vɨzhɨton.”
35Tɨndɨ ɗe ɗɨngɨ, niwi sibɨ dɨsu kɨnai a kamha Yayirus garna na balɨ mana paghan, du ndu, “Wun tafu mitla sai fiya mɨna nzane basɨna ƙema?”
36Ama Yesu cora ma gan dɨkaya ɗɨngɨ tatlɨnu, je ɗɨnga Yayirus du, “Fata laka wihamu, fidai tsa ndɨ gasƙewatɨ.”
37Yesu malu wi dɨ ɗiyatlɨnu, tanma ndɨ ni Bitrus a Yakubu, a Yahaya yasɨ Yakubu. 38Daga bɨ ɗama kanha Yayirus je dɨkaya maya yawari ɨna vɨrɨya sɨbɨ cas, a mayatlɨn ɗekɨm da ɓaɓakumai. 39Dage zusa kanka, dɨ ɗɨnga tlɨn du, “Hɨna ta para ma nada ɓa kwarara? Wunkɨn a mitla ma miyawu, han nji nda ta sinau.” 40Je ghɨntsaya ndɨ ghɨntsau.
Dage te bawai tlɨn ndyama vikamai, je kiya baawunka a maza ɨna sɨba gyagiyakɨ niwasɨ kideni sɨba tlɨnde wutai ɨna ti, je zusa lɨn eyin wunka. 41Je kuya kɨn wɨnka du, “Talita kumi.” Wato ji, maci takɨn wunkɨn tlakɨmai. 42Nda dlɨyadlɨ wun dɨ tlaza dɨ dzakwa tivai, wunka (washashanza dirɓitin bahɨn tsɨr) Jetlɨne naya ghɨrɨya hamba tiye ɗɨmau. 43Ama Yesu dɨ gɨtla tlɨna ndu tabi bɨla wɨyu. Je zetlɨn du ta tsatla hambatau.
Actualmente seleccionado:
Markus 5: MKF
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
©2023 Seed Company in collaboration with Language Developers and Bible Translators Association
