مارکوس 11

حضرت عیسیٰ سی گیالپوے تشولّا گاسوس جْوس ۔

1یروشالیمّی گیالسے نیموا ذیتونی ریکا یودکھان بیت فگے تانگ بَیت عَنِیّاؔہ ڈونگسیبگونلا لیبکییس یودّاچیگ، حضرت عیسیٰ مسیح لوبٹوگس نیس سنگونلا لامچوگا زادتے 2مولس، ”ا ڈونگسیبّی نانّگا سونگ، تیرو لیبّاچیگ، سوانگ ماژونکھانّی بونگسارجیگ تاگستے تھونگچین، تیبو ٹولتے یرو کھیونگ۔ 3کالتیس سوجیگی کھیوجاگونلا، ’چی چواد‘ زیرتے ٹینا ’مسیحا گھوسدوم دوگ یانگ گیوگسپا لوگستے کھیونگین‘ زیر۔“

4کھونگون سونگ یانگ بونگساربو ثانگیکا گھوے پھیلوگا تاگستے یودکھانبو تھونگ۔ کھونگونی تیبو ٹول زانے 5تیکا لانگستے یودکھانّی می کھاچیگی ٹیس، ”کھیوجاگونّی بونگساربو ٹولتے چی چوستے این؟“ 6حضرت عیسیٰ سی یکا سالکھان نانگجین کھونگونی لانتانگسپا، کھونگونلا بونگساربو کھیرچوگس۔ 7تینے کھونگونی بونگساربو حضرت عیسیٰ سی یودسا کھیونگستے کھونگرانگونّی کوس تیبوا ستادس یانگ حضرت عیسیٰ سی تیبویکا ژونّا زادس۔

8می مانگپوجیگی رانگرانگی کوس حضرت عیسیٰ سی سکیودسے لامیکا تینگس، یانگ جانگونّی جینگی تھاما یودکھانّی لچانگمے یالگا چادتے تینگس۔ 9حضرت عیسیٰ سی دونّے ڈولکھان یانگ گیابنے یونگکھان گُونی کُوچو تانگین زیرس۔

”خُدا ستودپا پھول۔

مسیح خُدے وانگچھے نانّگا سکیودکھانبو برکت چان۔

10نگاتانگونّی اتا اپو حضرت داؤد ّی یونگچیسچانّی

گیالثیدلا برکت سالشیگ۔

نامکھے تھوشوگّا ژوگسکھانّی خُدا ستودپا پھول۔“ #11‏:10 زابور شوقبُوئ 118‏۔ 25‏، 26؛ 148‏۔ 1

11یروشالیمّی نانگکوگا لیبّاچیگ حضرت عیسیٰ سی بیت المقدِس سی نانّگا سکیودس۔ کھونگی کارونگسا زِیگس، اِین نانگ پھیتوگ گورتے این پاسانگ، کھونگ لوبٹوگس چوگنییس نیامپو بَیت عَنِیّاؔہ لوگستے سکیودس۔

حضرت عیسیٰ سی پھیگی لچانگما نگان تابّا زادس۔

12ستینگماجاگی نگامو، کھونگون بَیت عَنِیّاؔہ نے سکیود زانے حضرت عیسیٰ مسیح ہلتوخسے ۔ 13کھونگی ازامشیگّا پھیگ کھازاسّی لچانگما لومے گنگستے یودکھانجیگ زِیگس، تیکا کھازاس یودڈو سامستے زیگسّالا سکیودس۔ اِین نانگ لدُونلا لیبّاچیگ، کھونگی لوما مانے کھازاس مازیگس، چیازیرنا کھازاس سمینچیسّی توسپو مالیبّا اینپین۔ 14تینے کھونگی لچانگما مولس، ”تانیپھارلا سوجیگیانگ، کھیرانگی کانے کھازاس میزا“ یانگ کھونگی مولکھانبو لوبٹوگسگونّی تشور۔

حضرت عیسیٰ سی بیت المقدِس ژانگما زادس۔

15کھونگون یروشالیمّا لوگستے سکیودس، تیرو لیبّاچیگ حضرت عیسیٰ، بیت المقدِس لا سکیودتے قُربانلا پھولچیسّی سیمسچان تسونگکھان تانگ نیوکھان گُون پھینگچیس گوزوگ زادس۔ پینے جیبکھانّی چوگتسیگون تانگ پھورگون تسونگکھونّی کورسیگون لوگّا زادس، 16یانگ کھونگی بیت المقدِس سی نانّگا تشونگی چالاگ ینگو کھیرکھان تشانگما گھاگّا زادس۔

17حضرت عیسیٰ سی کھونگونلا مولس، ”ہلژخمہ شوقبُو بوے نانّگا خُدے مولّا زادتے دوگ، ’نگے کھانگپا گیالکھاگ تشانگمے میگونّی دُعا چوسے کھانگپا زیرین‘ اِین نانگ کھیوجاگونّی تیبو چاگپاگونّی تشانگس چوستے دوگ۔“ #11‏:17 حضرت یسعیاہ شوقبُوئ 56‏۔ 7؛ حضرت یرمیاہ شوقبُوئ 7‏۔ 11

18اِمام کُنی چھونمو گونتانگ شریعتی عالِم گونّی، حضرت عیسیٰ سی زادکھانبو تشورّاچیگ، کھونگونی کھونگ سادچیسّی تھابس ژالچیس گوزوگس۔ اِین نانگ کھونگون کھونّگا جیگسّادپین، چیازیرنا حضرت عیسیٰ سی شیسرابسچانّی لابجا سالکھانبویکا میتشوگس گانگپو ہالاستے یودپین۔

19پھیتوگ لیبّاچیگ، حضرت عیسیٰ تانگ کھونگی لوبٹوگسگون گیالسانے بینگستے سکیودس۔

20ستینگماجاگا نگامو، کھونگون حضرت عیسیٰ سی نگان تابّا زادکھانّی پھیگی لچانگمے دونّے چھاچیگ، لوبٹوگسگونّی تیبو پاٹاگنے پھارلا سکامستے تھونگ۔ 21حضرت عیسیٰ سی مولّا زادکھانبو، حضرت پطرؔس لا ایدتو یونگستے کھونّگا زیرس، ”رابّی زیگسّانگ، نیرانگی نگان تابّا زادکھانّی پھیگی لچانگمابو سکامستوگ۔“

22حضرت عیسیٰ سی لانسالس، خُدے نانّگا ایمان چوس۔ 23نگے کھیوجا لدینبا زیرّاد، کالتیس کھیوجے ای ریبوا، ”سونگ یانگ کھیرانگ تشوے نانّگا پھونگ“ زیرنا، یانگ سنینگی نانّگا تھےژومس ماچوا زیرکھانبو ڈوبّانوگ سامستے ایمان چونا، تیبو کھیوجے پھیا چوا زادِین۔ 24نگے کھیوجاگونلا زیرّاد، کھیوجے دُعا گونی نانّگا چیجیگ ژونانگ تیبو تھوب تشارتے این سامستے ایمان چونا، تیبو کھیوجاگونّی اینوگ۔ 25اِین نانگ کھیرانگونّی دُعا پھول زانے، گوما کھیوجے گیابگالّا نگانپا چوستے یودکھانگونلا مُعافی تونگشیگ۔ تینے نامکھے نانّگا ژوگسکھانّی کھیوجے یابّی، کھیوجاگونّی دِیگپاگونلانگ مُعافی سالّا زادِین۔ 26#11‏:26 سنگونمے شوقبُو کھاچیگی نانّگا 11‏۔ 26 ”اینّانگ کالتیس کھیوجے مُعافی ماتانگنا نامکھے نانّگا ژوگسکھانّی کھیوجاگونّی یابّی کھیوجاگونّی دِیگپاگونلانگ مُعافی سالّا میزاد“ یودتے اینوگ۔ ”اینّانگ کالتیس کھیوجے مُعافی ماتانگنا نامکھے نانّگا ژوگسکھانّی کھیوجاگونّی یابّی کھیوجاگونّی دِیگپاگونلانگ مُعافی سالّا میزاد“ یودتے اینوگ۔

حضرت عیسیٰ سی وانگچھے سکورلا ڈولدور۔

27یانگسکیار کھونگون یروشالیمّی نانّگا لیب، حضرت عیسیٰ سی بیت المقدِس سی گیانگسکورّی نانّگا، جابڈُولّا سکیود زانے اِمام کُنی چھونمو گون، شریعتی عالِم گون تانگ یہُودی پے اُسکیونگون کھونگ یودسا یونگستے 28ٹیس، ”کا وانگچھا نیامپو کھیرانگی یگون چواد یانگ کھیورانّگا ای وانگچھا سوی تانگس؟“

29حضرت عیسیٰ سی کھونگونلا مولس، ”نگیانگ کھیوجاگونلا ٹیواجیگ ٹیاین، کالتیس کھیوجے لانتانگنا، تینے نگیانگ کا وانگچھا گیُودتے یگون چواد کھیوجا شادین۔ 30نگا شودّانگ، حضرت یُوؔحنّا ٰ غوتا سالچیسّی وانگچھا خُدے چھوگسنے تھوبتے اینّوگا یا می چھوگسنے؟“

31کھونگونی کھورانگونّی ٹوا سپیرا تانگستے زیرس، ”کالتیس خُدے چھوگسنے اینوگ زیرنا کھوے نگاتانّگا، کھیوجے کھوے نانّگا چیا ایمان ماچوسپین زیرین؟ 32اِین نانگ نگاتانگی میی چھوگسنے اینوگ زیرچیسّی ہامپا چوادا؟“ (کھونگون میتشوگسلا جیگسّادپین، چیازیرنا می تشانگمے حضرت یُوؔحنّا ٰ پیغمبر سیادپین)۔ 33تیبویپھیا کھونگونی حضرت عیسیٰ سی لانتانگس، ”نگاجا گیوسمید۔“

تینے حضرت عیسیٰ سی کھونگونلا مولس، ”نگیانگ میشاد، سوی وانگچھے نانّگا نگے یگون چواد۔“

Actualmente seleccionado:

مارکوس 11: LBJNT

Destacar

Copiar