Génesis 3
3
K'uiripueri no kurhantirakua
1Iámentu manakorhericha enka ACHA Diósï kueraaka, akuitse sánteru únharhitpitispti, ka akuitse kurhamarhespti nanakani: ¿Ísïski eskaksïni ACHA Diósï arhiska eskats'ï no jámaaka akurhutani no ma jásï amanhech'akua enka xáni jukaka?
2Ka nanaka arhispti akuitseni: Uák'achi akurhutani amanhechakuechani enka xáni jukaka.
3Diósïts'ïni arhisti: Ásï jama je akurhuta imani anhatapuni enka teruakuni jaka, ásï p'árhe je, jimpokats'ï sési jimpo uarhiaka.
4Tátsekua akuitse arhispti nanakani: Nóts'ï uarhiaka.
5Diósï sési mítetixati, eska imani jurhia enkats'ï jima akurhutaaka, p'enonharhiakats'ï ka isïuakats'ï eska Diósï, miteakats'ï ampesï sési ka ampesï no sési.
6Nanaka erarhutaspti ka amanhech'akua kánekua sési jánharhispti ka uékaspti mímixeni. P'ikurhutaspti ka arhaspti ka íntskuspti uámpa jempani ka imat'u arhaspti. 7Jiáni uératiniksï tsimarheni p'enonharhisti, ka exekorhesptiksï eskaksï xásku jarhaspka, ijusï ch'kurhiksï sïrikuspti ka imani jimpoksï óch'uspti.
8Temunkurhiriniskï ACHA Diósïni kurhaaspti, enka ima jima uanakurhani jápka, enka tarhiani jápka ka uiriasptiksï sïpakorhekuni ACHA Diósïni. 9ACHA Diósï uantap'aspti tatakani ka arhispti: ¿Naniri jarhaski?
10Ka ima arhispti: Anhatapu ísïkini kurhaaspka ka cheskpka, jimpokani xásku jarhaska, jimposïni jirikorhepka.
11Diósï arhispti: ¿Ka nékini arhiski eskari xásku jarhaska? ¿Akurhutaskiri jima enkakini arhipka eskari no jamapirinka akurhutani?
12Ka Tataka arhispti: Nanaka enkarini íntskuka eska jucheti márkuepirinka imarinisï intskuti amanhech'akua ka ji arhaska.
13Tátsekua ACHA Diósï arhispti nanakani: ¿Amperisï ú? Ka nanaka arhispti: Akuitserini únharhitasti ka ji arhaskia.
14Tátsekua ACHA Diósï arhispti akuitseni: Inteni jimpo enkari úka, ¡T'úri sánteru no ampakitiuaka iámentu manakorhericha, ikimenhari ka no ikimenharhichani jinkuni! Antsikorheakari chéti k'uparhata jimpo ka echeriri t'ireaaka enkari xáni irekaaka.
15Úaka eskaksï no sési páp'eraaka nanaka jinkuni, ni eskaksï chéti sïrukua sési páp'eraaka, nanakeri sïrukua jinkuni; Imakini ch'atats'ïkuati ka t'úri irhanturhakua katsantukuaka.
16Nanakani arhispti: Kánekuari p'ameraaka enkari sapini kámani jámaaka, chéti acheti jinkuni janhchaaka ka imakini juramucheati.
17Tatakani arhispti: Jimpokari kurhach'aska chéti tempani ka arhaskari imani ama anhechakua enkakini arhipka eskari no apirinka, chéti jimpo no sési jasï incharhetixati echeri; ka kánekua úkua jimpori ánchetaaka ampe jatsini ka ampe p'ikuntani enkari xáni t'ueuaka.
18Echerirhu uitsakua tsurhumiti antaraati ka xakuari t'ireaaka. 19Ka aparhekuntakari t'irekua antakorheaka, enkari jamperi jántaaka, jimpokari jima ueraska, echeriskari ka echeriri úkorhentaaka.
20Adani, tempani, Eba jakankurhitaspti, jimpoka ima nanteska iámentu tsípiticheri. 21Tátsekua ACHA Diósï t'ipich'ukua sïkuiriri úkuapti ka tsimarheni xukutapsti. 22Ka ACHA Diósï uantaspti: Iásï k'uiripu mák'uenisti eska jucha, jimpoka míteskia ampeski sési, ka ampeski no sésini, ásï iásï akurhute enka tsípekuerika amanhechakua, ka méntku isï ireke.
23Tátsekua, ACHA Diósï petataspti Edenirhu, eska ánchetapirinka echerini, imani echeri enka jimpo kuerakatepka. 24Enka na kentitaapka k'uiripuni, jurhiata antarakuarhu isï péraasti Kerubinichani ka tiámu atap'etarakua ma, enka etskurhini jápka ka iápuru ísï manakorhemka xanharini kuáni enka tsípekueri anhatapu jukaka.
Actualmente seleccionado:
Génesis 3: BI-PURHE
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia en P´urhépecha, Michoacán, México © Sociedad Bíblica de México, A.C.