यूहन्ना 17
17
येशूकी सोल्वाङ
1दि स्याहल सुङ छार फान्ज्यो येशूगी स्यिहङगाम ङो़ले ज़ी़दी सुङ नाङसीन, “ओ़ याहप, ता़ह ती़हजी लेप सिहन्दी येह। राहङगी स़ेबुगी याहपदी ज़िज्यिद तेन ख़ूज्यु म़ेदी खोला ज़िज्यिद नाङदोङ। 2च्यिबेमाना राहङगी खोला मिह थाम्ज्यी थो़ला ओङ नाङदी येह, ओ़ह लाहमले याहपगी नाङग्यो थाम्ज्यीलाराङ खोगी था़ म़ेहबा मिहली ज़ाङबु तेर्च्यु। 3राहङ च्यिमे च्यी़राङ तेहन्दामकी किन्ज्यो ओहले राहङगी ताङ नाङग्योकी येशू मास्यीकाला ङोह स्य़ेगेन्दीॱराङ था़ म़ेहबा मिहली ज़ाङबु यिहम्बा। 4राहङगी ङाहला चि क्याहप नाङग्योकी छ्या़लेन तेहन्दा डुप च्य़ूदी ङाहगी राहङगी छेन दि जाम्बुलीङला छ्यिम्बु जे़दी येह। 5ता़ह ओ़ याहप, जाम्बुलीङ छ्या़ च्य़ू नाङगे म़ेदी तोहङले ङाह राहङ ङ्याम्बु तेहकेमु ङाहती ज़िज्यिद येहकें ता़ह ओ़ह ज़िज्यिद येहपाराङ राहङ ज़्य़ू नाङग्यो ग्या़ला ङाहला नाङदोङ।
स्याहप्च्यीया़गी तेहन्दाला येशूकी सोल्वाङ
6 जाम्बुलीङलेगी राहङगी ङाहला नाङग्यो मिहया़ला ङाहगी राहङला ङोह स्य़े च्य़ूदी येह। खुङया़ राहङदी यिहन्गे, ओहले राहङगी खुङया़ ङाहला नाङसीन, ओहले खुङया़गी राहङगी सुङदेन ङ्यिहन्दी येह। 7ओहले राहङगी ङाहला नाङग्योकी ना थाम्ज्यीराङ से़हया़ राहङ लाहमलेॱराङ ओहङग्यो यिहन माएँ ताम ता़ह खुङया़ला क्यी़ह येह, 8च्यिबेमाना राहङगी ङाहला नाङग्योकी सुङदेन ङाहगी खुङया़ला तेर्ती येह, ओहले खुङया़गी ओ़ह सुङदेन ची़दे येह। ङाह तेहम्बाराङ याहप-साले ओहङग्यो यिहन म़ेदी खुङया़गी या़हबु पेहती ङोह स्ये़दे येह। ओहले याहपगीॱराङ ङाहला ताङ नाङग्यो यिहन म़ेदी खुङया़गी यिह छ्य़ेदी येह।
9 खुङया़गी तेहन्दाला ङाह सोल्वाङ ताप्केराङ येह। ङाह जाम्बुलीङगी तेहन्दालानी सोल्वाङ मेहताप, यिहॱनाङ याहपगी ङाहला नाङग्यो मिहया़गी तेहन्दाला च्यी़राङ ङाह सोल्वाङ ताप्कें च्यिबेमाना खुङ राहङदीराङ यिहन। 10ङाह ङ्याम्बु येहकेन्गी थाम्ज्यीराङ से़हया़ याहपती यिहन, ओहले याहप ङ्याम्बु येहकेन्गी थाम्ज्यीराङ से़हया़ ङाहती यिहन। ओहले खुङगी पेहतीराङ ङाहगी मिहन चा़ छ्यिम्बु काहल्दी येह। 11ता़ह ङाह राहङसाला ओहङगेॱराङ येह। ङाह दि जाम्बुलीङला माहङबु ती़हजी तेहच्ये म़ेह, यिहॱनाङ खुङया़नी दि जाम्बुलीङला तेहच्ये येह। नाम्पार-ताहक्पा याहप, राहङगी ङाहला नाङग्योकी राहङगी छेनला खुङया़ला तेम्बु जेती ज़्या़ नाङदोङ, ओहले ओहराङ ल़ेहमु खुङया़ॱआङ च्यी़राङ डो ख़ूज्यु। 12ङाह खुङ ङ्याम्बु येहकें थु राहङगी ङाहला नाङग्योकी राहङगी छेनला ङाहगी खुङया़ला तेम्बु पेहती ज़्या़सीन ओहले थार च्य़ूसीन। खुङया़ नाहङला तोङदी डो कोहएँगी पुह#१७:१२ तोङदी डो कोहएँगी पुह : दिदी येशूला गो़ कोर च्य़ूक्यो यहूदा इस्करियोतकी तेहन्दाला माक्यो यिहम्बा। च्यी़ले ल्हाक्पु लेहमेन सुॱआङ तोङदी माहकाहल, च्यिबेमाना सुङरापला प्रुहक्योकी स्याहल तेहन्दा डुपॱराङ कोहच्ये येहकें।#भज ४१:९; यूह १३:१८
13 यिहॱनाङ ता़हनी ङाह राहङसाला ओहङगेॱराङ येह। खुङया़गी सेम ङाहती काहसोगी काहङ्येॱराङ काहङ ख़ूज्यु म़ेदी ङाह दि केच्याया़ जाम्बुलीङला येहकेमुराङ माएँराङ येह। 14ङाहगी खुङया़ला राहङती सुङदेन तेर्सीन, यिहॱनाङ जाम्बुलीङगी खुङया़ला ङ्येन्ज्येन पेहसीन, च्यिबेमाना ङाह ल़ेहमुराङ खुङॱआङ दि जाम्बुलीङदी मिहन। 15राहङगी खुङया़ला दि जाम्बुलीङले नोम फेप नाङदोङ म़ेदीनी ङाह सोल्वाङ मेहताप, यिहॱनाङ खुङया़ला ती़ह यिहन्ज्यु जेम्दी ज़्या़ नाङदोङ। 16ङाह दि जाम्बुलीङती मिहन ओ़हठीॱराङ पेहती खुङॱआङ दि जाम्बुलीङदी मिहन। 17खुङया़ला तेहन्दामला नाम्पार-ताहक्पा ज़ो नाङदोङ, राहङगी सुङदेन तेहन्दाम यिहन। 18राहङगी ङाहला जाम्बुलीङला ताङ नाङग्यो ल़ेहमु ङाहगीॱआङ खुङया़ला जाम्बुलीङला ताङदी येह। 19खुङॱआङ तेहन्दामला नाम्पार-ताहक्पा डो ख़ूज्यु म़ेदी खुङया़गी तेहन्दाला ङाह राहङगी राहङला चाङमा ज़ोएँ।
20 ङाह खुङया़की तेहन्दाला च्यी़राङ सोल्वाङ मेहताप, यिहॱनाङ खुङया़गी लेहङगुगी पेहती ङाहला यिह छ्य़ेगे मिहया़गी तेहन्दालाॱआङ सोल्वाङ ताप्को येह। 21खुङ थाम्ज्यी च्यी़राङ डो ख़ूज्यु म़ेदी ङ्यिह राहङला ओहर-छ्य़े स्युहएँ। ओ़ याहप, ङाह राहङ ङ्याम्बु ओहले राहङ ङाह ङ्याम्बु ज़्य़ूदी ओहराङ च्यी़राङ काहल्ग्यो ल़ेहमु खुङॱआङ ओहराङ ङ्याम्बु डी़दी च्यी़राङ ओहङ ख़ूज्यु ओहले राहङगीराङ ङाहला ताङ नाङग्यो यिहन म़ेदी जाम्बुलीङगी यिह-छ्य़े ख़ूज्यु। 22याहप दाङ ङाह च्यी़ येहकें ल़ेहमु खुङॱआङ च्यी़राङ डो ख़ूज्यु म़ेदी राहङगी ङाहला नाङग्योकी ज़िज्यिद, ङाहगी खुङया़ॱलाङ तेर्ती येह। 23ङाह खुङ ङ्याम्बु ओहले राहङ ङाह ङ्याम्बु ज़्य़ू नाङदी येह। दि ल़ेहमु पेहती खुङॱआङ छाङबु पेहती च्यी़राङ ओहङ ख़ूज्यु। ओहले राहङगी ङाहला ताङ नाङदी चेवा जे नाङग्यो ल़ेहमु खुङया़लाॱआङ चेवा जे नाङसीन माएँ ताम जाम्बुलीङगी ङोह स्य़े ख़ूज्यु।
24 ओ़ याहप, राहङगी ङाहला नाङग्योकी मिहया़ ङाह ङ्याम्बुराङ तेहती ङाहती ज़िज्यिद थोङ ख़ूज्यु म़ेदी ङाह म़ेहबा पेहकें। ओ़ह ज़िज्यिद जाम्बुलीङ छ्या़गे म़ेदी तोहङ यिहन्ज्युराङ राहङगी ङाहला चेवा जे नाङग्यो सोङबे राहङगी ङाहला नाङग्यो येहकें।
25 ए ठिम टाहङबु ताङ नाङगेन्गी याहप, जाम्बुलीङगी राहङला ङोह मे़हस्येएँ, यिहॱनाङ ङ्यिहगी राहङला ङोह स्य़ेएँ, ओहले राहङगी ङाहला ताङ नाङग्यो यिहन म़ेदी खुङया़गी ङोह स्ये़ज्ये येह। 26राहङगी ङाहला जे नाङग्योकी चेवा खुङ ङ्याम्बुॱआङ लिहच्यु ओहले ङाह खुङ ङ्याम्बु तेह ख़ूज्यु म़ेदी याहपला ङाहगी खुङया़गी पाहरक्यीला ङोह स्य़े च्य़ूदी येह ओहले तोहरोङॱआङ ङोह स्य़े च्य़ूगेनॱराङ येह।”
Actualmente seleccionado:
यूहन्ना 17: HYLM
Destacar
Compartir
Copiar

¿Quieres guardar tus resaltados en todos tus dispositivos? Regístrate o Inicia sesión
© 2023 (Active), Wycliffe Bible Translators, Inc. All rights reserved.