ꓟ˗ꓗꓴ ꓟꓮꓴ ꓢꓮꓴ 15
15
ꓑꓲ˗ꓡꓔ ꓰ ꓣ ꓧ ꓟꓴ ꓬꓥ ꓡꓰ ꓢꓗ ꓢꓰ ꓧꓳ ꓗꓳ ꓰ
1ꓧꓮꓴ ꓠꓑ ꓖꓬꓳ ꓡꓰ ꓡꓥ ꓘꓶꓠ ꓙꓳꓥ ꓮ ꓖꓲ ꓑꓰ ꓮ ꓖꓲ ꓢꓴ ꓪꓴꓠ ꓑꓰ ꓟꓮꓴ ꓢꓮꓴ ꓗ ꓰ ꓢ ꓣ ꓑꓰ ꓰ ꓧꓮꓴ ꓢꓴ ꓪꓴꓠ ꓒꓴꓥ ꓐꓠ ꓫꓳ ꓖꓶ꓾ ꓐꓳꓥ ꓠꓬꓳ ꓐ ꓗꓳ ꓡꓪꓲ꓾ ꓬꓰ˗ꓢꓴ ꓡꓰ ꓔꓪꓲ ꓡꓪꓲ꓾ ꓬꓥ ꓡꓰ ꓫꓰ ꓡꓳ ꓡꓪꓲ꓾ ꓑꓲ˗ꓡꓔ ꓚꓥ ꓮꓑ ꓐꓲ ꓗꓳ ꓰ꓿ 2ꓧꓮꓴ ꓘꓴꓠ ꓑꓲ˗ꓡꓔ ꓖꓶ꓾ ꓠꓥ ꓬꓴ˗ꓓ ꓐꓬꓴ ꓑꓰ ꓰ ꓘꓳ ꓘꓟ ꓥꓴꓔ ꓡꓰ ꓡꓴ꓾ ꓖ ꓡꓪꓲ꓾ ꓬꓥ ꓡꓰ ꓟꓲ ꓰ꓿ ꓬꓥ ꓖꓶ ꓠꓥ ꓔꓮꓲ ꓰ ꓣ ꓙꓴꓥ ꓜ ꓥꓴꓔ ꓔꓳ ꓡꓰ꓾ ꓖ ꓡꓪꓲ꓾ ꓔꓴ ꓰ꓿ 3ꓘꓶꓠ ꓙꓳꓥ ꓮ ꓖꓲ ꓑꓰ ꓚꓮꓴ ꓖꓶ ꓟʼꓣ ꓟꓬꓳ ꓟꓬꓳ ꓬꓥ ꓡꓰ ꓧꓴꓠ ꓗꓳ ꓰ꓿ 4ꓧꓮꓴ ꓟꓴ ꓡꓪꓲ꓾ ꓑꓲ˗ꓡꓔ ꓖꓶ꓾ ꓠꓥ ꓧꓮꓲ ꓡꓰ ꓮ ꓔꓴ ꓡꓴ꓾ ꓬꓥ ꓟꓳ ꓠꓥ ꓡꓰ ꓟʼꓣ ꓧꓴꓠ ꓰ ꓘꓬꓳ ꓘ ꓟꓬꓳ ꓪ ꓟꓬꓳ ꓠꓲ ꓰ ꓡꓰ꓾ ꓪꓴ ꓪꓴ ꓮ꓾ ꓖ ꓡꓪꓲ꓾ ꓬꓥ ꓡꓰ ꓟꓲ ꓰ꓿ 5ꓬꓰ˗ꓢꓴ ꓚꓮꓴ ꓖꓶ꓾ ꓧꓮꓲ ꓓꓥ ꓣ ꓘꓴꓠ ꓮ ꓔꓴ ꓥꓴꓔ ꓡꓪꓲ꓾ ꓑꓲ˗ꓡꓔ ꓖꓶ ꓣꓴ ꓟꓮꓴ ꓠꓲ ꓣ꓿
ꓐ˗ꓣ˗ꓐ ꓡꓰ ꓠꓥ ꓗꓔ ꓐꓲ ꓡꓪꓲ ꓬꓰ˗ꓢꓴ ꓡꓰ ꓙꓰꓠ ꓑꓬꓟ ꓰ
6ꓧꓮꓴ ꓑꓳꓲ ꓖꓬꓳ ꓟ ꓬꓥ ꓟꓳ ꓓꓴꓥ ꓠꓲ ꓡꓰ ꓰ ꓣ ꓙꓴꓥ ꓜ ꓕꓳꓥ ꓡꓴꓥ ꓰ ꓐꓬꓴ ꓣ ꓬꓴ ꓬꓴ ꓡꓰ ꓬꓥ ꓬꓥ ꓟꓳ ꓰ ꓟ ꓔꓴ ꓗꓔ ꓗꓔ ꓫꓥ ꓖ ꓰ꓿ 7ꓧꓮꓴ ꓘꓴꓠ ꓖꓴꓟ ꓡꓮꓴ ꓗʼꓐꓬꓳꓥ ꓡꓰ ꓰ꓾ ꓐꓬꓴ ꓡꓰ ꓢꓔ ꓑꓬꓟ ꓰ ꓖꓴꓟ ꓡꓮꓴ ꓑꓰ ꓰ ꓣ ꓧ ꓔꓪꓲ ꓡꓳꓟ ꓰ ꓐ˗ꓣ˗ꓐ ꓖ ꓢꓴ ꓣ ꓬꓴ ꓐꓳ ꓔꓳ ꓡꓰ꓿ 8ꓧꓮꓴ ꓘꓴꓠ ꓫꓶʼꓪ ꓐꓬꓴ ꓑꓰ ꓓꓳ ꓡꓳ ꓡꓪꓲ꓾ ꓕꓴꓥ ꓡꓲ ꓰ ꓣ ꓙꓴꓥ ꓜ꓾ ꓬꓥ ꓟꓳ ꓡꓰ ꓗꓴꓔ ꓣ꓾ ꓓꓴꓥ ꓗꓳ ꓰ꓿ 9ꓑꓲ˗ꓡꓔ ꓚꓮꓴ ꓖꓶ꓾ ꓬꓴ˗ꓓ ꓑꓰ ꓘꓳ ꓘꓟ ꓡꓰ ꓗꓔ ꓗꓔ ꓣ꓾ ꓠꓴꓥ ꓟꓳ ꓳ ꓮ ꓗꓳ ꓡꓴ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓔꓴ ꓰ꓿ 10ꓘ ꓢꓴ ꓖ ꓡꓰ ꓟ ꓠꓳꓠ ꓟ ꓫꓟ ꓬꓠ ꓟꓮꓲ ꓘꓶꓠ ꓙꓳꓥ ꓮ ꓖꓲ ꓑꓰ ꓬꓥ ꓡꓰ ꓮꓑ ꓑꓬꓟ ꓗꓳ ꓰ ꓡꓰ ꓬꓥ ꓢꓰ ꓠꓲ ꓡꓰ꓿ 11ꓘꓶꓠ ꓙꓳꓥ ꓮ ꓖꓲ ꓑꓰ ꓚꓮꓴ ꓖꓶ꓾ ꓬꓥ ꓟꓳ ꓰ ꓟ ꓔꓴ ꓐ˗ꓣ˗ꓐ ꓡꓰ ꓗꓔ ꓗꓔ ꓫꓥ ꓖ꓾ ꓖ ꓡꓪꓲ꓾ ꓫꓶʼꓪ ꓐꓬꓴ ꓑꓰ ꓡꓰ ꓲ ꓟꓲꓔ ꓡꓳ ꓔꓳ ꓐꓲ ꓔꓳ ꓮ ꓗꓳ꓿ 12ꓑꓲ˗ꓡꓔ ꓚꓮꓴ ꓖꓶ ꓬꓥ ꓟꓳ ꓡꓰ ꓓꓴꓟ ꓔꓴ ꓡꓪꓲ꓾ ꓧꓮꓴ ꓥꓴꓔ ꓡꓰ ꓖꓶ꓾ ꓬꓴ˗ꓓ ꓑꓰ ꓘꓳ ꓘꓟ ꓠꓴꓥ ꓟꓳ ꓖ ꓰ ꓢꓴ ꓡꓰ꓾ ꓥꓳ ꓘ ꓢꓴ ꓗꓴꓔ ꓣ ꓕ꓾ ꓖ ꓔꓮꓲ ꓰ꓿ 13ꓬꓥ ꓟꓳ ꓖꓶ꓾ ꓥʼꓓꓥ ꓟ ꓙꓰꓠ ꓔꓳ ꓮ꓾ ꓖ ꓡꓪꓲ꓾ ꓓꓴꓟ ꓑꓴꓗ ꓖ ꓣꓴ ꓗꓳ ꓰ꓿ 14ꓑꓲ˗ꓡꓔ ꓖꓶ꓾ ꓬꓥ ꓮ ꓘꓬꓴ ꓰ ꓧꓮꓲ ꓙꓴꓥ ꓪ ꓜꓥ ꓗꓴꓔ ꓐꓰ ꓕ꓾ ꓖ ꓡꓪꓲ꓾ ꓟꓲ ꓰ꓾ ꓬꓥ ꓟꓳ ꓚꓮꓴ ꓖꓶ꓾ ꓥʼꓓꓥ ꓟ ꓬꓥ ꓡꓰ ꓙꓰꓠ ꓔꓳ ꓗꓰ꓾ ꓖ ꓡꓪꓲ꓾ ꓙꓰ ꓑꓴꓗ ꓖ ꓣꓴ ꓗꓳ ꓰ꓿ 15ꓑꓲ˗ꓡꓔ ꓖꓶ ꓫꓶʼꓪ ꓐꓬꓴ ꓑꓰ ꓡꓰ ꓲ ꓟꓲꓔ ꓡꓳ ꓥꓳꓠ ꓐꓲ ꓠꓮꓴ ꓡꓰ ꓰ꓾ ꓬꓥ ꓟꓳ ꓰ ꓟ ꓔꓴ ꓐ˗ꓣ˗ꓐ ꓡꓰ ꓠꓥ ꓗꓔ ꓐꓲ ꓡꓪꓲ꓾ ꓬꓰ˗ꓢꓴ ꓡꓰ ꓠꓴ ꓐꓔ ꓡꓪꓲ꓾ ꓙꓰꓠ ꓔꓳ ꓧꓪꓲ ꓫꓥ ꓖ ꓮꓑ ꓑꓬꓟ ꓐꓲ ꓗꓔ ꓰ꓿
ꓬꓰ˗ꓢꓴ ꓡꓰ ꓙʼꓒꓳꓲ ꓰ
16ꓧꓮꓴ ꓘꓴꓠ ꓖꓬꓰ ꓜꓳ ꓑꓰ ꓖꓶ꓾ ꓔ ꓣ ꓓ ꓣ ꓬꓴꓟ ꓪꓥ ꓘꓮꓴ ꓫꓴꓔ ꓬꓰ˗ꓢꓴ ꓡꓰ ꓫꓪꓲ ꓡꓳ ꓡꓪꓲ꓾ ꓖꓬꓰ ꓪꓑ ꓖꓳꓟ ꓡꓰ ꓙꓲ ꓔꓳ ꓗꓳ ꓰ꓿ 17ꓬꓥ ꓟꓳ ꓖꓶ꓾ ꓟꓰ ꓐꓴ ꓠꓰ ꓬꓥ ꓡꓰ ꓧꓴꓔ ꓡꓪꓲ꓾ ꓠꓲꓗ ꓰ ꓜꓴ ꓟꓴ ꓬꓥ ꓡꓰ ꓧꓴꓔ ꓐꓲ ꓟꓴ꓿ 18ꓬꓴ˗ꓓ ꓑꓰ ꓘꓳ ꓘꓟ ꓰ꓾ ꓠꓥ ꓮ꓾ ꓮ ꓣꓥ ꓪꓳ ꓫꓥ ꓖ ꓳ꓾ ꓖ ꓡꓪꓲ꓾ ꓬꓥ ꓡꓰ ꓫꓶʼꓗꓬꓟ ꓗꓔ ꓗꓳ ꓰ꓿ 19ꓬꓥ ꓟꓳ ꓖꓶ ꓒꓴꓥ ꓘꓔ ꓰ ꓬꓥ ꓰ ꓴ ꓡꓴꓟ ꓟ ꓠꓴ ꓡꓪꓲ꓾ ꓬꓥ ꓡꓰ ꓢꓳ ꓗꓠ ꓐꓬꓰ ꓖꓬꓴꓠ ꓡꓰ꓾ ꓘꓲ ꓒꓴꓔ ꓕꓴ ꓴ ꓚꓥ ꓬꓥ ꓡꓰ ꓑꓮꓲ ꓗꓳ ꓰ꓿ 20ꓬꓥ ꓡꓰ ꓮ ꓖꓳꓠ ꓗꓴꓔ ꓬꓮꓴ ꓙꓥ ꓟꓰ ꓐꓴ ꓠꓰ ꓡꓰ ꓬꓥ ꓟꓳ ꓘꓬꓴꓔ ꓑꓬꓟ ꓡꓪꓲ꓾ ꓬꓥ ꓰ ꓟꓰ ꓐꓴ ꓡꓰ ꓓꓴꓟ ꓧꓴꓔ ꓗꓳ ꓰ꓾ ꓧꓮꓴ ꓘꓴꓠ ꓥʼꓓꓥ ꓟ ꓬꓥ ꓡꓰ ꓙꓰꓠ ꓔꓳ ꓣ ꓟ ꓔꓴ ꓫꓪꓲ ꓕꓳ ꓰ ꓡꓳ ꓡꓪꓲ꓾
ꓬꓰ˗ꓢꓴ ꓡꓰ ꓥʼꓓꓥ ꓟ ꓙꓰꓠ ꓔꓳ ꓰ
21ꓬꓥ ꓥʼꓓꓥ ꓡꓰ ꓪ ꓐꓲ ꓫꓥ ꓖ꓾ ꓬꓳ ꓢꓳ ꓓꓴꓟ ꓟꓮꓲ ꓡꓳ ꓡꓪꓲ ꓡꓮꓲ ꓡꓟ ꓡꓳ ꓰ꓾ ꓮ˗ꓡꓰ˗ꓢꓠ˗ꓓꓣꓴ ꓰ ꓣꓴ˗ꓒꓴ ꓬꓥ ꓪ ꓢꓲ˗ꓟꓴꓠ ꓖ ꓰ꓾ ꓗꓴ˗ꓣꓰ˗ꓠꓲ ꓟꓶꓥ ꓐꓬꓴ ꓣ ꓬꓴ ꓡꓰ ꓚꓴꓠ ꓠꓥ ꓗꓳ ꓰ꓿ 22ꓮ ꓘꓪꓲ꓾ ꓖꓳ˗ꓡ˗ꓖ˗ꓕ ꓖ ꓰ ꓙꓳ ꓪꓳ ꓫꓴꓔ ꓬꓥ ꓟꓳ ꓬꓥ ꓡꓰ ꓫꓪꓲ ꓕꓳ ꓰ ꓗꓳ ꓰ꓾ ꓖꓳ˗ꓡ˗ꓖ˗ꓕ ꓓꓥ ꓡʼꓚꓴꓟ ꓖꓶ ꓴ ꓡꓴꓟ ꓫꓳ ꓪꓲ ꓙꓳ ꓪꓳ꓾ ꓖ ꓰ ꓥꓴꓔ ꓡꓰ꓿ 23ꓧꓮꓴ ꓘꓴꓠ ꓬꓥ ꓟꓳ ꓖꓶ ꓟꓴ ꓣ ꓰ ꓠꓬꓳ ꓰ ꓝꓶʼꓐꓲ ꓪꓥ ꓡꓰ ꓬꓥ ꓡꓰ ꓐꓲ ꓗꓳ ꓡꓥ ꓬꓥ ꓮ ꓗꓟ ꓫꓴ ꓡꓳ꓿ 24ꓮ ꓘꓪꓲ꓾ ꓬꓥ ꓟꓳ ꓥʼꓓꓥ ꓟ ꓬꓥ ꓡꓰ ꓙꓰꓠ ꓔꓳ ꓡꓪꓲ꓾ ꓬꓥ ꓰ ꓟꓰ ꓐꓴ ꓡꓰ ꓖꓟ#15.24 This word appears twice in 1951 Roman script edition. ꓔꓳ ꓡꓰ ꓰ꓾ ꓣ ꓬꓴ ꓰ ꓣ ꓬꓴ ꓬꓴ ꓙꓳ ꓣ ꓟ ꓔꓴ ꓒꓮꓲ ꓐꓔ ꓗꓳ ꓰ꓿ 25ꓥʼꓓꓥ ꓟ ꓬꓥ ꓡꓰ ꓙꓰꓠ ꓔꓳ ꓰ ꓖꓶ꓾ ꓢꓴꓟ ꓬꓟ ꓥꓴꓔ ꓔꓳ ꓡꓰ꓿ 26ꓧꓮꓴ ꓟꓮꓲ ꓖꓳ ꓔꓴ꓾ ꓬꓴ˗ꓓ ꓑꓰ ꓘꓳ ꓘꓟ꓾ ꓖ ꓡꓪꓲ꓾ ꓬꓥ ꓰ ꓟʼꓣ ꓡꓰ ꓫꓲꓔ ꓰ ꓟꓮꓴ ꓢꓮꓴ ꓗ ꓔꓑ ꓔꓳ ꓗꓳ ꓰ꓿ 27ꓬꓥ ꓰ ꓣ ꓧ ꓓ ꓟꓬ ꓲ ꓬꓴ ꓡꓰ ꓡꓰ꓾ ꓬꓥ ꓰ ꓡꓳꓼ ꓬꓳꓽ ꓫꓴꓔ ꓣ ꓬꓴ ꓡꓳ ꓑꓮꓲ ꓫꓴꓔ ꓣ ꓬꓴ꓾ ꓬꓥ ꓟꓳ ꓙꓰꓠ ꓔꓳ ꓗꓳ ꓰ꓿ 29ꓘꓬꓳ ꓟ ꓡꓮꓲ ꓰ ꓡꓳ ꓐꓥ ꓡꓰ ꓬꓥ ꓡꓰ ꓡꓴ ꓟꓴ ꓡꓪꓲ꓾ ꓬꓴꓟ ꓢꓶꓥ ꓴ ꓡꓴꓟ ꓡꓰ ꓥꓔ ꓥꓔ ꓗꓴꓔ ꓴ ꓚꓥ꓾ ꓮ ꓧ꓾ ꓠꓳ ꓗꓴ ꓙꓳꓥ ꓡꓰ ꓒꓬꓳ ꓑꓬꓟ ꓡꓪꓲ꓾ ꓢꓴꓟ ꓠꓲ ꓖꓬꓳ ꓟ ꓓꓴꓟ ꓪꓳ ꓢꓮꓲ ꓢꓴ ꓰ꓾ 30ꓠꓥ ꓰ ꓖꓴꓥ ꓡꓰ ꓠꓥ ꓘꓲ ꓬꓴ ꓡꓪꓲ꓾ ꓥʼꓓꓥ ꓟꓮꓲ ꓠꓥ ꓖꓬꓳ ꓡꓳ ꓮ꓾ ꓖ ꓗꓳ ꓰ꓿ 31ꓘꓶꓠ ꓙꓳꓥ ꓮ ꓖꓲ ꓑꓰ ꓡꓰ ꓟꓮꓴ ꓢꓮꓴ ꓗ ꓢ ꓣ ꓑꓰ ꓡꓰ꓾ ꓧꓮꓴ ꓰ ꓣ ꓙꓴꓥ ꓜ ꓮ ꓖꓳꓠ ꓗꓴꓔ ꓴ ꓚꓥ꓾ ꓐꓬꓴ ꓖꓳ ꓔꓴ ꓡꓰ ꓬꓥ ꓪꓳ ꓘꓲ ꓬꓴ ꓡꓰ꓾ ꓬꓴꓟ ꓢꓶꓥ ꓖꓴꓥ ꓡꓰ ꓖꓶ ꓮ ꓪꓳ ꓘꓲ ꓬꓴ ꓠꓴꓥ ꓡꓲ꓾ 32ꓥ ꓟꓳ ꓟꓬꓥ ꓡꓰ꓾ ꓪꓳ ꓡꓴꓟ ꓫꓥ ꓖ꓾ ꓲꓢ˗ꓣ˗ꓰꓡ ꓘꓳ ꓘꓟ ꓘꓣꓲꓢ˗ꓔꓴ ꓖꓶ ꓧꓮꓴ ꓥʼꓓꓥ ꓟꓮꓲ ꓮ ꓘꓪꓲ ꓖꓬꓳ ꓡꓳ ꓫꓥ ꓖ꓾ ꓖ ꓡꓪꓲ꓾ ꓫꓶʼꓓ ꓓ ꓔꓮꓲ ꓗꓳ ꓰ꓾ ꓬꓥ ꓰ ꓣ ꓧ ꓥʼꓓꓥ ꓟ ꓙꓰꓠ ꓔꓳ ꓢꓴꓺ ꓠꓲꓗ ꓡꓰ ꓬꓥ ꓡꓰ ꓣꓳꓲ ꓣꓳꓲ ꓖ ꓗꓳ ꓰ꓿
ꓬꓰ˗ꓢꓴ ꓫꓲ ꓰ
33ꓮ ꓘꓪꓲ ꓘꓬꓴ ꓬꓟ ꓙꓰ ꓙꓥ ꓧꓮꓴ ꓟꓮꓲ ꓖꓮꓴ ꓬꓟ ꓙꓰ ꓫꓳ ꓟꓶꓥ ꓖꓳꓟ ꓟ ꓟꓮꓴ ꓛꓴꓔ ꓟꓗ ꓓꓴꓔ ꓐꓬꓴ ꓰ꓿ 34ꓖꓮꓴ ꓬꓟ ꓟ ꓬꓰ˗ꓢꓴ ꓖꓶ ꓕꓰ ꓟꓳ ꓰ꓾ ꓰ˗ꓡꓳ˗ꓲ ꓰ˗ꓡꓳ˗ꓲ ꓡ ꓟ ꓢ˗ꓐꓗ˗ꓕ˗ꓠꓲ꓾ ꓖ ꓡꓪꓲ꓾ ꓑꓴꓗ ꓰ꓾ ꓧꓮꓴ ꓓꓥ ꓡʼꓚꓴꓟ ꓖꓶ꓾ ꓥ ꓰ ꓗ˗ꓣꓮꓲ ꓪ ꓰ꓾ ꓧꓮꓲ ꓬꓠ ꓟꓮꓲ ꓠꓥ ꓥꓳ ꓡꓰ ꓑꓬꓟ ꓔꓳ ꓡꓰ ꓡꓴ꓾ ꓖ ꓰ ꓥꓴꓔ ꓡꓰ꓿ 35ꓧꓮꓴ ꓠꓟ ꓟ ꓬꓑ ꓔꓳ ꓐꓥ ꓣ ꓪꓟ ꓖꓶ꓾ ꓧꓮꓴ ꓡꓰ ꓪꓳ ꓖꓬꓳ ꓙꓥ꓾ ꓪꓴ ꓗꓰ꓾ ꓬꓥ ꓰ˗ꓡꓲ˗ꓮ ꓡꓰ ꓪꓴꓔ ꓠꓲ ꓣ꓾ ꓖ ꓗꓳ ꓰ꓿ 36ꓧꓮꓴ ꓘꓴꓠ ꓐꓬꓴ ꓣ ꓬꓴ ꓓꓲꓠ ꓰ ꓡꓪꓲ꓾ ꓲ ꓡꓥ ꓟ ꓐꓮꓴ ꓖꓳ ꓰ ꓚꓲꓠ ꓜꓰ ꓗꓔ ꓑꓲꓥ ꓡꓪꓲ꓾ ꓒꓴꓥ ꓘꓔ ꓟ ꓔꓑ ꓟꓴ꓾ ꓬꓥ ꓡꓰ ꓐꓲ ꓗꓳ ꓡꓰ꓾ ꓠꓲ ꓠꓲ ꓫꓥ ꓖ꓾ ꓰ˗ꓡꓲ˗ꓮ ꓬꓥ ꓡꓰ ꓡꓰ ꓘꓬꓳ ꓬꓴ ꓣ ꓡꓴ꓾ ꓲ ꓠꓴꓥ ꓪꓴ ꓪꓴ ꓫꓥ꓾ ꓖ ꓗꓳ ꓰ꓿ 37ꓬꓰ˗ꓢꓴ ꓚꓮꓴ ꓖꓶ ꓕꓰ ꓟꓳ ꓰ ꓑꓴꓗ ꓴ ꓚꓥ ꓢꓳ ꓕꓴꓟ ꓐꓬꓴ ꓡꓳ ꓰ꓿ 38ꓧꓮꓴ ꓘꓴꓠ ꓠꓳ ꓗꓴ ꓙꓳꓥ ꓟ ꓰ ꓟꓰ ꓖꓳ ꓮ ꓕꓳ ꓟꓮꓲ ꓟꓲ ꓖꓴꓥ ꓙꓰ ꓫꓳ ꓖꓴꓥ ꓖꓴꓥ ꓐꓬꓥ ꓟꓴ ꓖꓳ ꓐꓬꓴ ꓰ꓿ 39ꓬꓰ˗ꓢꓴ ꓖꓶ ꓧꓮꓴ ꓢꓴ ꓢꓳ ꓕꓴꓟ ꓐꓬꓴ ꓰ ꓡꓰ ꓬꓥ ꓧꓶ ꓟ ꓬꓑ ꓠꓲ ꓰ ꓖꓬꓰ ꓜꓳ ꓣ ꓫꓳ ꓴꓑ ꓰ ꓖꓬꓰ ꓜꓮꓴ ꓟꓬꓥ ꓙꓥ꓾ ꓖꓰ ꓖꓰ ꓪ ꓫꓲ ꓬꓴ ꓖꓶ ꓗ˗ꓣꓮꓲ ꓗ˗ꓢꓥ ꓬꓥ ꓜꓳ ꓠꓠ ꓥꓴꓔ ꓔꓳ ꓣ꓾ ꓖ ꓰ꓿ 40ꓪꓰ ꓪꓰ ꓟꓮꓲ ꓪꓴ ꓠꓲ ꓰ ꓟꓲ ꓪꓰ ꓜꓳ ꓑꓰ ꓡꓰ ꓠꓲ ꓗꓳ ꓰ꓾ ꓬꓥ ꓟꓳ ꓚꓥ ꓟ ꓖ˗ꓡꓲ˗ꓡꓰ ꓟꓮꓴ ꓟ ꓬꓥ ꓠꓲ ꓮ ꓫꓲ ꓘꓴꓠ ꓬꓥ ꓚꓥ ꓛꓥ ꓡꓪꓲ꓾ ꓬꓥ ꓡꓰ ꓢꓮꓲ ꓝꓳ ꓢꓮꓲ ꓧꓴ ꓢꓴ꓾ ꓟ˗ꓖ˗ꓓ˗ꓡ ꓟ˗ꓣꓲ꓾ ꓬ˗ꓗꓴ ꓔꓲ ꓠꓲꓗ ꓬꓳ˗ꓢꓲ ꓬꓥ ꓠꓴ ꓟ˗ꓣꓲ ꓰ ꓢ˗ꓡꓳ˗ꓟꓰ ꓑꓰ ꓡꓳꓟ ꓗꓳ ꓰ꓿ 41ꓬꓰ˗ꓣꓴ˗ꓢ˗ꓡꓰꓟ ꓪ ꓫꓴꓔ ꓬꓥ ꓰ ꓣ ꓧ ꓓꓳ ꓡꓳ ꓰ ꓟꓲ ꓪꓰ ꓜꓳ ꓖꓳ ꓔꓴ ꓡꓰ ꓟꓬꓳ ꓟꓬꓳ ꓡꓰ ꓪꓴ ꓡꓳꓟ ꓗꓳ ꓰ꓿
ꓬꓰ˗ꓢꓴ ꓡꓰ ꓟꓬꓴꓑ ꓰ
42ꓮ ꓘꓪꓲ ꓟꓮꓴ ꓛꓴꓔ ꓡꓪꓲ꓾ ꓧꓮꓴ ꓬꓴ ꓐꓠ ꓐꓪꓲ ꓠꓲ ꓰ ꓧꓶ ꓠꓲ ꓥꓴ ꓰ꓾ ꓫꓶʼꓚꓲꓑ ꓔꓳ ꓰ ꓐꓪꓲ ꓠꓲ ꓥꓴꓔ ꓰ ꓬꓠ ꓟꓮꓲ꓾ ꓮ ꓣꓳꓥ ꓪꓳ ꓡꓪꓲ꓾ ꓣꓴꓥ ꓮ ꓬ ꓪꓳ ꓡꓰ ꓰ꓾ ꓗ˗ꓣꓮꓲ ꓗ˗ꓢꓥ ꓰ ꓟꓶꓥ ꓓꓠ ꓡꓰ ꓟꓲꓔ ꓐꓬꓴ ꓠꓲ ꓰ꓾ ꓮ˗ꓣ˗ꓟ˗ꓕꓲ ꓪ ꓟ ꓬꓳ˗ꓢꓰꓑ ꓖꓶ ꓙꓰ ꓡꓰ ꓡꓪꓲ꓾ 43ꓑꓲ˗ꓡꓔ ꓚꓥ ꓪꓟ ꓪꓥ ꓡꓪꓲ꓾ ꓬꓰ˗ꓢꓴ ꓰ ꓖꓴꓥ ꓢꓳꓟ ꓡꓰ ꓓꓴꓥ ꓰ꓾ 44ꓬꓥ ꓧꓠ ꓜ ꓫꓲ ꓐꓬꓴ ꓰ ꓡꓰ ꓑꓲ˗ꓡꓔ ꓟꓮꓴ ꓡꓪꓲ꓾ ꓖꓬꓰ ꓣ ꓫꓳ ꓴꓑ ꓰ ꓖꓬꓰ ꓜꓮꓴ ꓡꓰ ꓪꓴꓔ ꓬꓴ ꓡꓪꓲ꓾ ꓬꓥ ꓫꓲ ꓰ ꓖꓶ ꓘ ꓟꓬꓥ ꓐꓰ ꓡꓴ꓾ ꓖ ꓟꓲ ꓰ꓿ 45ꓖꓬꓰ ꓜꓮꓴ ꓬꓥ ꓡꓰ ꓫꓲꓔ ꓗꓬꓳ ꓙꓥ꓾ ꓧꓮꓴ ꓟꓥ ꓢꓳꓟ ꓖꓶ ꓬꓳ˗ꓢꓰꓑ ꓡꓰ ꓮꓑ ꓐꓲ ꓗꓳ ꓰ꓿ 46ꓬꓥ ꓖꓶ ꓙꓲ ꓟꓰ ꓑꓠ ꓪꓲ ꓬꓴ ꓡꓪꓲ꓾ ꓧꓮꓴ ꓟꓥ ꓡꓰ ꓘꓬꓳ ꓬꓴ ꓟꓴ꓾ ꓑꓠ ꓰ ꓕꓴꓑ ꓬꓴꓑ ꓡꓪꓲ꓾ ꓡꓴ ꓖꓳꓗ ꓰ ꓔꓳꓗ ꓔꓳ ꓰ ꓡꓴꓑ ꓟ ꓗꓔ ꓔꓳ ꓰ꓾ ꓧꓮꓴ ꓡꓴꓑ ꓓꓳꓥ ꓟ ꓬꓥ ꓡꓴ ꓖꓳꓗ ꓗꓶꓥ ꓥꓳꓑ ꓔꓳ ꓰ꓿ 47ꓟ˗ꓖ˗ꓓ˗ꓡ ꓟ˗ꓣꓲ ꓰ ꓬꓳ˗ꓢꓲ ꓬꓥ ꓠꓴ ꓟ˗ꓣꓲ ꓠꓲꓗ ꓖꓶ ꓧꓮꓴ ꓔꓳ ꓔꓳ ꓰ ꓙꓳ ꓪꓳ ꓡꓰ ꓟꓬꓥ ꓗꓳ ꓰ꓿
Actualmente seleccionado:
ꓟ˗ꓗꓴ ꓟꓮꓴ ꓢꓮꓴ 15: ATB1938
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
First published in Fraser script in 1938.
