Matáyɔ 2
2
Ɓaúbaphi ka toka n'okomo ɓábiki ombeba Yéso
1Yéso ɗáɓɔkɔtɛani ka Bɛtɛlɛɛ́mu#Ɔna 1 Sam 16.1 á ka Yudɛ́a, ka mbenɔ á moamɛ angbóngbó Ɛlɔ́dɛ. Mbusa á ɓɔkɔtɛana akɛ, ɓaúbaphi ka toka n'Okomo, ɗáɓáju ka Yɛusalɛ́ma. 2Ɓâ koúsia: «Mɔkɔta ndea Ɓayúda mmbɔ aɓɔkɔtɛani a suani? Nga, ɓɛtɔ́ɔni sɛɛngɔa akɛ n'Okomo. Kaɓondɔ unge, ɓebiki ombeba.»
3Mbenɔ nde moamɛ angbóngbó Ɛlɔ́dɛ ɗáɔ́ki nyɔngɔ ndɔ, měma akɛ áoagatana phɛɛ na ɓato á ka Yɛusalɛ́ma ɓɔbu. 4Áǒdondanisa ɓagbɛga á ɓatoɓeigi-phɛ́a ɓɔbu na ɓaɗundu-ɛɔphi, áǒúsia te: «Ɔma sina nde Kiísito aɔtɔka n'aɓɔkɔtɛani?» 5Ɓáonsikisia te: «Ka Bɛtɛlɛɛ́mu á ka Yudɛ́a, ɓíndɔ mɔtu-nyɔngɔ ndea Mokonga ɗáɗundu gea:
6Oɓɛ Bɛtɛlɛɛ́mu, á ka Yudɛ́a,
oɓɛ kótanda abɔbɔa,
ka ɔlɔ á nji Yudɛ́a,
ka nyɔngɔ nde mɔtɛ-akɔ unge moamɛ mmbé aɛsɔndɔande ɓakpa nɛmɔ Ɓaisilaɛ́li#Ɔna Mik 5.1, atókande.»
7Cɔ, Ɛlɔ́dɛ áɔ̌ɓɔphana ɓaúbaphi ka ɓɔsɔmɛa. Áokaɓa engekisa mɔtɛ-aɓɔ, mbenɔ sina nde sɛɛngɔa atósɛnɛki. 8Mpɔ, áǒteka na Bɛtɛlɛɛ́mu, áǒgea te: «Gǎni ɓɔ́cɔcɛ ánjá mbino á miki ndɔɔ. Mbenɔ nde ɓɔmɔnande ka yɛ, ɓôbika omongoɗea ka gea, eme phɔtɔ négɛ mbebɛ.»
9Cɔ, mbusa á ɔ́ka nyɔngɔ ndea moamɛ Ɛlɔ́dɛ, ɓáoga. Ɓáɔmɔna goto sɛɛngɔa ndɔ n'okomo n'aoga mosá aɓɔ na ka ɓî ɗágeomama gǔ á ɔma nde mbɛnjɛ ɗáɓéi. 10Mbenɔ nde ɗáɓámɔni sɛɛngɔa ndɔ, ɓáotúma na maseye phɛɛ. 11Ɓáongia suɓi éndu, ɓáɔmɔna mbɛnjɛ n'amakɛ Malía. Ɓáogbuka muanku, ɓáombeba miki. Mbusa, ɓáokoɗaga nkumba nɛɓɔ, ɓáomopha ɛkɔmi: láté, ngaɛ́ na nkoki nde ɓáɔɔphana míla. 12Mpɔ, Mokonga áǒɗesa na njeki gea te, ɓákajɛmbɛ k'aphe ndea Ɛlɔ́dɛ. Ɓâ gǎkɛ oja k'aphe nɛngbo ka gǎ ka nji nɛɓɔ.
Yɔsɛ́phu, Malía na miki Yéso ɓáti na Mísii
13Mbenɔ nde ɓaúbaphi ɓájí, Malaéka ndea Mɔkɔta Mokonga áondonda Yɔsɛ́phu ka njeki, áongea te: «Ma, ómbɛɗɛ miki n'amakɛ ɓóteɛ na Mísii. Ɓóikɛ kó na ka ɓî nekongoɗeande mbenɔ á sikianaga anu. Nga, Ɛlɔ́dɛ aokaɓa mowa á miki.» 14Yɔsɛ́phu áoma, áɔmbɛɗa miki n'amakɛ ɓáoga kǐpha na Mísii. 15Ɓáoika kó na ka ɓî Ɛlɔ́dɛ ɗáku. Nyɔngɔ ndɔ áɔtɔtɔkɛana ɓíndɔ Mɔkɔta ɗán'yɔngisi mɔtu-nyɔngɔ nɛkɛ gea: «Nɛmɔphani mukuamɔ ka toka na Mísii#Ɔna Ɔsɛ́ 11.1.»
Ɛlɔ́dɛ aekusisi ɓaniki
16Mbenɔ nde Ɛlɔ́dɛ ɗáúbi ye gea, ɓaúbaphi ɓándemi, áɔɓɛa phɛɛ. Áǒsosea ɓakpa ka gǎ na Bɛtɛlɛɛ́mu na nji nde atimbi ú k'aphe á mowa ɓaniki-ɓǒko ɓɔbu á ɓasaga ɓaɓɛ na dida. Ɗági ɓo ka ɓeana na mbino nde ɗáengekisi ka ɓaúbaphi. 17Cɔ, nyɔngɔ ndɔ áɔtɔtɔkɛana ɓíndɔ Mokonga ɗán'yɔngisi Yɛɛmía mɔtu-nyɔngɔ nɛkɛ gea:
18«Ɛsɔ aotóka na Láma,
ngamɔ na ntaɓo ásii.
Lakɛ́li aámbé aógamea ɓ'anakɛ.
Nnaokonda ɓánkɔmbɛɛ iɓo á ngamɔ,
ka nyɔngɔ nde ɓá ye ku#Ɔna Yɛɛ 31.15.»
Yɔsɛ́phu, Malía na miki Yéso ɓátóki na Mísii
19Mbusa á kukuwa á Ɛlɔ́dɛ, malaéka ndea Mɔkɔta áɔnsɛnɛkɛa Yɔsɛ́phu ka njeki na Mísii, 20áongoɗea: «Ma, mbɛɗa miki na amakɛ, ójɛ na ɓɔ na Isilaɛ́li nga, ɓundɔ ɗáɓáokáɓa mowa á miki ɓá ye ku.» 21Mpɔ Yɔsɛ́phu áoma, áɔmbɛɗa miki na amakɛ, áoja na ɓɔ na Isilaɛ́li. 22Ɓî ɗáɔ́ki gǎkɛ gea, Alkɛláɔ aámbé ɗásiki ka mpɛnɛ á abakɛ Ɛlɔ́dɛ ka mamea á nji á Yudɛ́a, Yɔsɛ́phu áoɓanga gǎ á kó. Malaéka ndea Mɔkɔta áɔngɔɗea nyɔngɔ ka njeki, Yɔsɛ́phu áoga na Galiláya. 23Yɔsɛ́phu áoga oika na Najalɛ́ti ka gea nyɔngɔ ndea ɓaɔtu-nyɔngɔ ndea Mokonga átɔtɔkɛanɛ gea: «Ɓámɔphanande nto á ka Najalɛ́ti#Ɔna Mat 21.11; Eku 24.5.»
Actualmente seleccionado:
Matáyɔ 2: KMW
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2021, Wycliffe Bible Translators, Inc.
