Zaŋ 1

Mɛkpa mɛ tsik nɛ yii gwyɛ

1Tɔɔɔ é mɛkɛn mɛ esonok djas, ye nabɛ ɛ́, Mɛkpa moo tak. Mɛkpa nabɛ ɛ́ bɛ nɛ Zɛɛb, Mɛkpa nabɛ ɛ́ Zɛɛb. 2Yɛ ɛ́ tsɛɛtsɛ náá, é mɛkɛn tɔɔɔ, Mɛkpa nadi ɛ́, é di wat bɛ nɛ Zɛɛb. 3Esonok djas di kɔ bɔs ɛ, nakusel ɛ́ nɛ Mɛkpa. Ye tok nɛ sa wat kɔ bɔs'ak Mɛkpa nadi ààkus. 4Tsik nadus ɛ́ pɛ tɔ lɛ. Deenek, tsik tak naasa náá, bot djas nyen popoopwon tɔ gwyɛ. 5Ngel ɛpekas, djɛ boo gwyɛ é di mɛghomela nadi ɔ. Tin, mɛghomela kadi ɛ́ ààkwak ɛdimal yɛ.

6Ye nabɛ ɛ́ nɛ dhiiti mot Zɛɛb nadhis ɔ. Din ɛ mot tak nabɛ ɛ́ Zaŋ. 7Nyɛ nazyɛ ɛ́ tyee tyaasɛs, étɛp ɛzɛlyo bot dum nɛ gwyɛ, etɛɛ náá, bot djas needum koŋ nɛ Zɛɛb é ze yɛ. 8Zaŋ nyɛy nyɛ ɛmet nabɛ ɛ́ ààbɛ gwyɛ tak. Deenek, nyɛ nazyɛ ɛ́ tyee tyaasɛs étɛp ɛzɛlyo bot dum nɛ gwyɛ tak. 9Mɛkpa mɛ tak nabɛ ɛ́ sim gwyɛ na tsɛɛtsɛ. Ye nabɛ ɛ́ tɛtɛ gwyɛ di edjɛ bot djas eselele ɛ. Ye nazyɛ kɔ bɔs ɛ, ye neezɛdjɛ bot gwyɛ.

10Deenek, Mɛkpa naazyɛ pɛ kɔ bɔs, yɛ ɛ́ nyɛy ɛ nakus bɔs. Tin, bot ɛ bɔs'ak ààpakamyaal nyɛ. 11Mɛkpa naazyɛ pɛ daa bot ɛ mbyak'ɛ. Ye kabela náá, bot ɛ mbyak'ɛ naabyen ɛmyaal ɛ nyɛ. 12É di'enek, bot djas aamyaal nyɛ ɔ, bot aadum koŋ nɛ nɛ ɔ, Mɛkpa waadjɛ bɛ ghwyil ɛdi ɛ́ bɔn ɛ Zɛɛb. 13Bɔn ɛ Zɛɛb tak aanàkwaabyel-byelak ghiya, ààbɛ yii gwyes epuud, ààkobaabɛ-bɛak yii ɛkwosak ɛ mot. Yɛ ɛ́ ɛbyel nɛ ɛkwosak ɛ Zɛɛb ɛ.

14Mɛkpa nadi ɛ́, ye moo mot. Mot tak naazɛbe di tɔ lena. Mena naabeeka Mɛkas mɛ, yɛ ɛ́ Mɛkas mɛ Sɛɛŋɛlɛ sim Mɔn di ebela nɛ Sɛɛg ɛ, lwoodela nɛ enɛm nɛ embɛɛ e Zɛɛb nɛ etsɛɛtsɛ. 15Zaŋ nakan ɛdi ɛ́ tyee tyaasɛs étɛp ɛlyo bot dum nɛ nɛ. Nyɛ nadi etuud náá: «Yɛ ɛ́ kɔ ɛsu ɛ lɛ ɛ mɛ nadi ekeke náá: “Mot di ezyɛ bhis'am ɔ, nyɛ eedhaa mɛ. Etɛɛ náá, ɛsok nɛ mam nɛ byel, nyɛ nadi ɛ́ tak.”»

16Nɛ tsɛɛtsɛ, mena naabelaka bɛtɛ nɛ ekum bɛ. Nyɛ naakɛl kɔ lena enɛm nɛ embɛɛ bɛ yak kɔ yii. 17Yɛ ɛ́ tsɛɛtsɛ náá, Zɛɛb naadjɛ mena etsi nɛ Moiiz. Deenek, Zɛɛb kabaadhis mena enɛm nɛ embɛɛ nɛ etsɛɛtsɛ ɛ, nɛ Yezu Klisto. 18Ye tok nɛ mot ngɔt nabee Zɛɛb sok. Tin, sɛɛŋɛlɛ sim Mɔn'ɛ ɛmet, nyɛy mot di Zɛɛb ɔ, nyɛ di ɛ́ é di wat bɛ nɛ Sɛɛg. Yɛ ɛ́ Mɔn ɛ di elyaal bot Sɛɛg.

Lɛŋ dum nɛ Zaŋ Nduuel-bot

19Ekukuma eYuda e ghaada Yeluzalɛm naalwom bɛdhiiti bɛghaa-Zɛɛb nɛ eLevit, bot ɛ di esa mɛsa tɔ kok Ndjaa-ebuwa ɔ. Bot ɛ tak nakɛdji Zaŋ Nduuel-bot ɛ́ náá: «Wɔy ɛ́ yɔ zɛ é?» 20Nyɛ naazɛlɛɛ bɛ nɛ etsɛɛtsɛ náá: «Mam tok Mɛsia.» 21Bhii tak, bɛ eezɛdji nyɛ náá: «Bha wɔy ɛ́ zɛ? Wɔ ɛ́ ngoolel-Mɛkpa ɛ Zɛɛb Eli?» Nyɛ eezɛbɔɔza nɛ nɔɔ náá: «Ààbɛ! Mɛ ɛ́ tok Eli.» Bɛ eebaazɛdji nyɛ náá: «Yɛ ɛ́ wɔy ɛ di ngoolel-Mɛkpa ɛ Zɛɛb di ebwoodaa ɛ?» Nyɛ eebaazɛbɔɔza nɛ nɔɔ náá: «Ààbɛ» 22É di'enek, bɛ eezɛdji nyɛ náá: «Haaa wɔy ɛ́ zɛ? Etɛɛ náá, bis ɛ́ sik ɔɔ, bis neekɛlɛɛ bot ɛ dhis bis ɔ. Wɔy nakuma nyel, wɔ ke náá, wɔ ɛ́ zɛ?» 23Nyɛ eezɛbɔɔza náá:

«Mɛ ɛ́ gwood mot di etuud pɛ kyee bɔs bɛsyɛ di ààbɛ nɛ mɛdii ɛ náá:

“Koobalka mɛze ɛ Ghɛŋ, ye di looba-looba#1.23 Eza 40.3 !”»

Dáa ye di kwyala tɔ mɛkana mɛ ngoolel-Mɛkpa ɛ Zɛɛb Ezayi ɛ.

24Tin, tɔ bot ɛ nalwomaa pɛ daa Zaŋ ɔ, ye nabɛ ɛ́ nɛ bot ɛ ɛdhuu ɛ eFalizyɛ. 25Deenek, bɛ eebaazɛdji nyɛ náá: «Étɛp yé wɔ di eduu bot Zɛɛb, yɛ bɛ náá, wɔy tok Mɛsia, ààbɛ Eli, ààbaabɛ dhiiti ngoolel-Mɛkpa ɛ Zɛɛb ɔɔ?» 26Zaŋ eezɛbɔɔza nɛ nɔɔ náá: «Mam duu bin Zɛɛb ɛ, pɛ tɔ mɛdii. Tin, tɔ ɛdhuu ɛ len, yɛ ɛ́ nɛ mot ngɔt bi di ààgu ɔ. 27Mot di ezyɛ bhis'am ɔ, nyɛ eedhaa mɛ nɛ mɛbwala. Mam aanàkwaakobela-belak duu ɛmalal étɛp ɛkotii-tiiak ekel e ekoko bɛ.» 28Etɛp bak djas sael tin ɛ, pɛ ghaada Bhetani, pɛ yii kyiid dii Yuldɛn. Yɛ ɛ́ pɛ kyee Zaŋ Nduuel-bot nadi eduu bot Zɛɛb ɛ.

Yezu ɛ́ Mɔn ɛ Zɛɛb

29Tɔ yak mɛlem, Zaŋ kabee ɛ́ Yezu ezyɛ pɛ daa lɛ. Tin, nyɛ eezɛke náá: «Beeka mɔn bhata Zɛɛb é! Yɛ ɛ́ nyɛy ɛ di edis mesyem mɛ bot ɛ bɔs djas. 30Yɛ ɛ́ dum nɛ nɛ mɛ nalɛɛ náá: “Mot di ezyɛ bhii koŋ'am ɔ, nyɛ eedhaa mɛ. Etɛɛ náá, ɛsok nɛ mam nɛ zyɛ, nyɛ nadi ɛ́ tak.” 31Mam nabɛ ɛ́ ààdi egu náá, nyɛ ɛ́ Mɛsia. Tin, mam nazyɛ, zɛduu bot Zɛɛb tɔ mɛdii ɛ́, etɛp mɛ neelyaal nyɛ nɛ bot ɛ Yisalaɛl.»

32Zaŋ ɛ́ boozɛkaada sa nyɛ nabee ɛ. Nyɛy náá: «Mɛ eebee Sisim Zɛɛb edus tɔ gwoo, sul pɛ si dáa ɛghum, bhii tak, Sisim tak eezɛtyaa kɔ lɛ. 33Kɛkum dwoo lak mos, mam nabɛ ààdi egu náá, nyɛ ɛ́ Mɛsia. É di'enek, yɛ ɛ́ mot nadhis mɛ náá, mɛ zɛduu bot Zɛɛb tɔ mɛdii ɔ, nyɛ nalii nɛ nam ɛ́ náá: “Wɔ waabee Sisim edus tɔ gwoo, sul, zɛdi kɔ mot. Bhii tak Sisim tak ɛ zɛtyaa kɔ lɛ. Yɛ ɛ́ nyɛy ɛ aakwaaduu bot Zɛɛb nɛ Sisim na Dɛɛ.” 34Mam eebee yɛ nɛ mis mam met. Yɛ ɛ́ étɛp tak ɛ mɛ di ebaŋa bin yɛ ɛ, mot'ak ɛ́ Mɔn ɛ Zɛɛb.»

Bɛdjekel ɛ Yezu yii mɛkɛn

35Tɔ yak mɛlem Zaŋ nabaadi ɛ́ tin nɛ bɛdjekel bɛ bɛbá. 36Dáa nyɛ nabee Yezu é dhaŋ ɛ, nyɛ eezɛke nɛ bɛdjekel bɛ náá: «Beeka mot di mɔn bhata ɛ Zɛɛb ɔ!» 37Bɛdjekel bɛ bɛbá eezɛgwak deenek, wɔ gwaa bɛ zɛdu Yezu. 38Wɔ gwaa, Yezu zɛliig mis, gwyák pɛ bhis, dáa nyɛ nabee náá, bɛdjekel binɔk nadi edu nyɛ ɛ, nyɛ ɛ́ booke nɛ nɔɔ náá: «Bi saa yé?» Bɛ eezɛbɔɔza nɛ nɛ náá: «Labhi! Wɔ dyeebadi paa?» Labhi kwyɛl ɛlɛɛ ɛ́: Lyoel. 39Yezu eezɛbɔɔza nɛ nɔɔ náá: «Dhaka, étɛp bi neezɛbee.» Bhii tak, bɛ eezɛdu nyɛ, bɛ eezɛtɔ́, kɛbee sum di Yezu nadidi ɔ. Tin, bot binɔk zokadi bɛ nɛ Yezu é di wat dwoo tak. Ye nabɛ ɛ́ dwoo eezeleega moo tyee ɛwala ɛ ená.

40Andele, dhyeeb ɛ Simɔŋ Pyɛɛd, nabɛ ɛ́ ngɔt pak bɛdjekel ɛbá binɔk nagwak lii ɛ Zaŋ, da bhii tak bɛ ɛ́ du Yezu ɔ. 41Andele nakɛleeboma ɛ́ nɛ tel Simɔŋ. Nyɛ ɛ́ boolɛɛ nyɛ náá: «Bis eebela Mɛsia!» Nyɛ nadi eke deenek ɛ́ etɛɛ náá, din ɛ Mɛsia kwyɛl ɛlɛɛ ɛ́: Klisto. 42Bhii tak, nyɛ eezɛdul nyɛ pɛ daa Yezu. Dáa Yezu nabee nyɛ ɛ, nyɛ ɛ́ booke nɛ nɛ náá: «Wɔ ɛ́ Simɔŋ, mɔn Zaŋ. Wɔ aakadjóoaa ɛ́ Kefas.» Ye kwyɛl ɛlɛɛ ɛ́: Pyɛɛd.

43É yak dhiiti dwoo, Yezu nadi ekwyɛl ɛtɔ́ pɛ kyee dik Ghalile. Tin, nyɛ eezɛboma nɛ dhiiti mot di edjóoaa Filip ɔ. Nyɛy nɛ nɛ náá: «Dua mɛ!» 44Filip nadi ɛ́, mot Bhɛtsaida, ghaada ɛ Andele bɛ nɛ Pyɛɛd. 45Filip eezɛboma nɛ Natanaɛl, nyɛy nɛ nɛ náá: «Bis eebela mot Moiiz nakwyal dum nɛ nɛ tɔ mɛkana mɛ etsi ɔ. Yɛ ɛ́ mot bɛngoolel ɛ Mɛkpa ɛ Zɛɛb nabaalii kɔ ɛsu ɛ lɛ ɔ, Yezu mot dɛl Nazalɛt, mɔn ɛ Zozɛf.» 46Natanaɛl eezɛke nɛ nɛ náá: «Tɛtɛ sonok ɛ́ nɛ ghwyil ɛtuula pɛ Nazalɛt é?» Filip ɛ́ boobɔɔza nɛ nɛ náá: «Dha, wɔ neezɛbee.»

47Dáa Yezu nakabee Natanaɛl ezyɛ pɛ daa lɛ ɛ, nyɛ ɛ́ booke nɛ nɛ náá: «Nɛ tsɛɛtsɛ beeka mot dik Yisalaɛl di ààgu mɛkɔŋ ɔ.» 48Natanaɛl eezɛdji náá: «Wɔ gu mɛ dáa?» Tin, Yezu eezɛbɔɔza nɛ nɛ náá: «Ɛsok nɛ náá, Filip djóo wɔ, ye bɛ ɛ́, mɛ eezebee wɔ. Wɔ di ɛ́, pɛ si le fiigh.» 49Natanaɛl eezɛbɔɔza, nyɛy nɛ nɛ náá: «Labhi! Wɔ ɛ́ Mɔn ɛ Zɛɛb! Wɔ ɛ́ mɛkoozi mɛ Yisalaɛl!» 50Yezu eebaazɛbɔɔza nɛ nɛ náá: «Wɔ dum koŋ nɛ nam ɛ́, etɛɛ náá, mɛ eelɛɛ wɔ náá: “Mɛ bɛ ɛ́, mɛ eebee wɔ é ghɛŋ wɔ di si le fiigh ɛ?” Wɔ waabee esonok dhaa yii wɔ di ebee'aak.»

51Yezu eebaazɛlɛɛ nyɛ náá: «Tsɛɛtsɛ nɛ tsɛɛtsɛ mɛ lɛɛ bin etɛp e tsɛɛtsɛ ɛ́ náá: bi ɛ́ waabee gwoo ndiia, efofop ɛ Zɛɛb ebyet nɛ ɛsul kɔ Sɛɛŋɛlɛ Mɔn Mot.»

Actualmente seleccionado:

Zaŋ 1: bkwNT

Destacar

Copiar