1Mos. 3

Sirimanua masisaggangi Taikamanua

1Ulou iate leiti simasiku paatuat ka sangamberi leiti sibaraakenen Tuhan Taikamanua. Parerenangan si ulou nenda katubut sinanalep nenda, “Bulatnia leu aikera kam Taikamnaua masikom buat kaju ka sangamberi loina ka mone nenda?” 2Aleginangan sinanalep nenda, “Momoi le kukom kai buat kaju kasenen loina ka mone nene, 3tapoi buat loina sikuddu katalagat mone ta'momoi. Ikekera le Taikamanua kukom kai buat loina nenda ele masirape; ke'kugalaiakekainia, matei geti kai.” 4Aleginangan ulou nenda, “Nene ta'aisese; ta'mamatei kam. 5Aikua Taikamanua nenda kalulut iagai ke'nukom kam buat kaju nenda, tubukanangan geti patuatmui; bailiunangan kam geti kele Taikamanua, siagai simaeru samba sikatai.” 6Sinanalep nenda masiitco, loina nenda malainge samba buania mananam itukom. Paatunangania bulat maeru le ke' ibailiu nia siagai paatuat. Lulut nenda appeknangan buat kaju nenda, iageti komnangannia samba kaunangan leu kasimanteunia, samba simanteunia leu komnangannia. 7Kele ailepa aikom buat kaju nenda, tubukanangan patuadra samba agairangan, mabulutut le sia. Lulut nenda tabborangan tubudta pasamba buluk bago sitikaira.

8Kasoibokat nenda areprangan ipuenung si Tuhan ka mone, lepa pulipputrangan ruada ka oggak loina bule bui iitco sia si Tuhan. 9Tapoi pusoganangan si Tuhan Taikamanua katubut simanteu nenda, “Kaipangan ekeu?”

10Aleginangan simanteu nenda, “Akuarepman ai Ekeu malotokungan; maloto le aku, oto pulipputkungan kalulut mabulutut aku.”

11Parerenangan Taikamanua, “Kasei masikua katubum, sibulutut le ekeu? Taleu anukom buat kaju sikerakKu?”

12Aleginangan simanteu nenda, “Sinanalep siakeNu sipaalei aku, aiake buat kaju nenda katubukku, iageti komkungannia.” 13Parerenangan Tuhan Taikamanua katubut sinanalep nenda, “Angoi nugalaiake nenda?”

Aleginangannia, “Aipajo le aku ulou, bailiu komkungan buat kaju nenda.”

14Lepa nenda kuanangan si Tuhan Taikamanua kai ulou nenda, “Tuukum le geti ekeu kalulut sigalainu nenda; kasangamberi leiti sarat ekeu le masisilo pateleiat nene: Barania kineiget nuguruiake le geti bagam, samba abut polak le komennu kasanganantat purimanuaiatnu. 15Ekeu samba sinanalep nenda palaga baga le geti kam. Punuteteunia samba punuteteunu pasasaggak le geti. Punuteteunia masipeperak geti utenu samba nusoson le geti bukkutrerenia.” 16Lepa kuanangan si Tuhan ka sinanalep nenda, “Kutuppai le geti besit tubum aiekeu ka suruket samba kateteret nupusule. Tapoi kenanen kisedda, iala peile bagam ka simanteunu, tapoi bui'ta murappo le ekeu katubunia.” 17Kuanangan si Tuhan ka simanteu nenda, “Anuarepman poi tiboiet sinanalepnu, iageti komnungan buat kaju sikeraKu. Kalulut sigalainu nenda, tutelei le polak. Bui'ta mugalai le ekeu simaron ujum murimanua bule polak nene moi ibaraake kannu. 18Se'se samba rui itu'tuake geti polak nene kekeu, samba paguleigulei ibailiu geti komennu. 19Mugalai le ekeu geti ka gejat baga samba muattinang le ekeu masigalai polak nene ibara kannu, teret nutoili minca ka polak, aipoi ka polak aitubailiuake ekeu, samba toili le geti ekeu kapolak.”

20Si i Adam masioniake sinanalepnia si Eba, kalulut sinanalep nenda ibailiu ina sangamberi sirimanua.

21Iageti galainangan si Tuhan Taikamanua bibilet sibara ka kulit tarimeu addeat kai Adam samba ka sinanalepnia, lepa kaunangannia katubuda.

22Kuanangan Tuhan Taikamanua, “Kineneiget sirimanua aibailiuan kele Sita samba aian puaagai pagalaiat simaeru samba sikatai. Oto tukera le sia rakom buat loina siake purimanuaiat, bule bui ipurimanua teret buru-buru.” 23Iageti keklenangan Tuhan Taikamanua sirimanua ka mone Eden samba koiniakenangannia mugalai mone sibailiu kabaraiatnia nenda. 24Lepa, ka isit kakaiaman mone nenda kamatat baliu gugurukat, uddetnakenangan si Tuhan Taikamanua kerubim, samba sara lanjau sipuobengan sipututumeng kasenen jurungan, addeat masijago enungan ka loina siake purimanuaiat nenda. Kabagat nenda berisara sirimanua sioi tuguru samba masilegeri loina nenda.

Actualmente seleccionado:

1Mos. 3: MWV

Destacar

Copiar