1Mos. 16
16
Si Hagar samba si Ismael
1Si Sarai, sinanalep Abram, ta'pei leuet abara togania. Tapoi ai sara paguguletnia sibara ka Misir, sara siokko sipuoni si Hagar. 2Kuanangan si Sarai kai Abram, “Si Tuhan ta'iobaake aku masitu'tuake matat tatoga. Kalulut nenda, simaerunia perepman pasamba paguguletku nene. Bule momoi leu itu'tuake matat sara tatoga kekeu.” Si Abram ioba pinaatut Sarai nenda. 3Kise te' si Sarai aikau si Hagar kai Abram ibailiuake sinanalepnia kabe'be'. Kateteret nenda si Abram aiailingan pulu ngarura ka Kanaan. 4Perep si Abram pasamba si Hagar, iageti bara suruket sinanalep nenda. Tapoi kele aiagai si Hagar, aian suruketnia, bailiu mabuaknangan paatuatnia samba parepenangan si Sarai.
5Lepa kuanangan si Sarai kai Abram, “Akuakean si Hagar paguguletku katubum, samba kateteret aiagai, aian suruketnia, parepenangan aku. Nenda selem. Bule si Tuhan ibailiu sipasiukum katalagat ekeu samba aku.”
6Aleginangan si Abram, “Kauan, ia paguguletnu samba ekeu muute' ka sia; galaiakean siobat bagam katubunia.” Lepa besikinangan si Sarai si Hagar, pat tuituinia masikaddiuake si Sarai.
7Malaikat Tuhan masiailiake si Hagar kabebet bubuaket ka simatangeu, kaenungan siailiake kasimatangeu Sur. 8Kuanangan malaika nenda, “Hagar, pagugulet Sarai, kaipa anubara samba kaipa nueei?”
Aleginangan si Hagar, “Amutuitui aku kainyonyangku kai Sarai.”
9Kuanangan malaika nenda, “Toiliake ekeu katubunia samba pupagugulet ka tubunia.” 10Lepa kuanangan minca malaika nenda, “Kuake te geti katubum sapunuteteu simakope igi, pat berisara sirimanua siooi masiadde sia. 11Ta'an mauuju nutu'tu'ake le geti sara matat tatoga simanteu; oniakenia Iamael, Kalulut aiarepingan sounu si Tuhan. 12Tapoi togam nenda murimanua geti kele kalidei simalia; isaggangi le geti senen sirimanua, samba senen sirimanua masisaggangi geti nia. Murimanuania geti sipasasara ka sangamberi sasarainania.”
13Parerenangan ka paatuatnia si Hagar, “Bulatnia leupa akuitco Taikamanua sipuletsei aku?” Iageti kuanangan, Tuhan amanibongan katubunia, “Taikamanua Sipululetsei”. 14Nenda te lulunia rakua sirimanua uggungan kapaoggangan Kades samba Bered nenda, Uggungan Nia Sipuririmanua Sipuletsei Aku. 15#Gal. 4:22 Lepa geti tu'tu'akenangan matat sara tatoga simanteu si Hagar samba si Abram ukkuinia, masioniake toga nenda si Ismael. 16Keteteret nenda si Abram ainia balu pulu enem ngarura.
Actualmente seleccionado:
1Mos. 16: MWV
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
@LAI 2015
