'Olic 55
55
O Pitolon a Milongoc to Pipadama
O 'olic ni Tafiti, o sapasifana' a 'olic. Mapatorod i kakridan no paradiway, o sapisotasot a lalosidan ko sapacafay a pasoni.
1Kawasaw, nanay tngilenho Iso ko pitolon ako,
aka piliyas a caay pikihar to pingitangit ako.
2Nanay tngilenho Iso ko pingitangit ako,
paca'ofenho kako,
nawhani marorayto kako to nano rawraw no faloco' ako.
3O sakarawraw ako i, o nano nipipatalaw no 'ada ako ato pikari'ang no tatiihay a tamdaw.
Tongalen nangra ko pades ako,
kakteren nangra kako a mi'intel.
4Saadada sa ko faloco' ako,
mitahpo i takowanan ko pipatalaw no patay.
5Mackok a mamirmir kako,
matahpo no talaw kako.
6Nanay ira ko sapikpik ako a matiya o topi, ta ma^deng kako a ma^fer a mikilim to pahanhanan.
7Ta ma^fer kako a tayra i maraayay a kohkohan a milafin itira.
8Ta kalamkam a makilim ako ko pilimekan to miforiforay a faliyos ato 'orad.
9Tapangaw, nanay parawrawen Iso ko caciyaw no 'ada,
nawhani ma'araw ako i niyaro' ko miforiforay a miparawraw.
10Romakat cangra i tongroh no 'adipel no niyaro' to romi'ad to dadaya a mitaliyok to niyaro',
maldef no raraw ato pades ko niyaro'.
11Ira ko mitiihay i cowacowa no niyaro',
sahto o misafana'ay ato misa'fitay ko i niyaro'ay.
12Ano o 'ada ako ko mihaenay a milikaf i takowanan i,
kona ma^dengho kako a mihadidi,
ano o pacoliay i takowanan ko malita'angay a mi^pec i,
kona ma^dengho kako a milimek i cingraan.
13'Arawhani, o kapot ako, o kafana'an ako ato tadawidang ako ko mihaenay i takowanan.
14O nano manga'ayay kami a malalicay,
o nano malahaklongay kami a tayra i Fangcalay Pita'ongan a mita'ong.
15Mamana talifahal sa a mapatay ko 'ada ako,
mamana danta' sa ko patay nangra.
Nawhani, sahto o tatiihay ko iraay i loma' nangra ato i faloco'ay nangra.
16Nikawrira, mitahidang kako a milongoc to pipadama no Kawas i,
caay ka ^ca pipa'orip ko Tapang i takowanan.
17Ano o dafakto, ano o kalahokanto, ano o dadayato i,
mararid kako a pa'ading to rarom no faloco' ako,
caay ka ^ca tngilen Ningra.
18Ano 'alomaloman ko 'ada a milood i takowanan i,
pa'oripen Ningra kako a paliyas nai piloodan a parihaday a panokay.
19Caay ka ^ca pitngil to longoc ako konini a nano to'asho a mikowanay a Kawas,
o lalowiden Ningra cangra,
nawhani caay pifalic cangra to faloco',
caay ka ngodo cangra to Kawas.
20O nano kapot ako i 'ayaw i, pacoli to widang ningra,
cicihen ningra ko niktonan ningra a sowal.
21Ikaka no kamleng no pata#55.21 pata -- o no Ripon a sowal. a simal ko nika kamleng no sowal ningra,
'arawhani, matomes i faloco' ningra ko 'intel.
Ikaka no simal ko nika ka^ped no sowal ningra a damsay,
'arawhani, matiya o citalemay a fonos ko nipicocok no sowal ningra.
22O papatoroden iso i Tapang ko kartengay a 'inorong iso,
caay ka ^ca padamaen Ningra kiso,
caay pihayda Cingra to nika tfad no mo^celay a tamdaw.
23Nikawrira, Kawasaw, o tatfaden Iso i kaitiraan no mapatayay ko misa'fitay a tamdaw,
o mamafatad ko 'orip nangra,
kako to no mako i, masarocod ko faloco' a miti'er i Tisowanan.
Actualmente seleccionado:
'Olic 55: AMIS2019
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© The Bible Society in Taiwan, 2019
