Johan 8

1Sirei Jisu we tuo Oliv Kijüthou gei vota. 2Sitse puo khiserüna rüsuoki nu la vor. Siru themia peteko vor puo houpfü balie mu puo ke balie di uko petha sede lata. 3Süki thezhokepethako mu Farisiko thenumiapfü puoe pieü chükezhü nu telie di ze vor, sidi puo bu uko donu thalie. 4Uko sie Jisu ki, “Kepethau, thenu hapfüha pieü chüzhü di teliewe. 5Mu Mosa zho-u nu hie bu ketsie pie thenu hikecümia vakhriwanu di pu ru no kedipuo pu ta?” 6Uko puo tekelie kele nu puo kedo di die hau kepu zo. Sitse Jisu nuketsu di kijü nu puo dziekinuo pie mha thu bata. 7Sirei uko puo ketso tha zota tse, puo tosie uko ki, “Nieko donu phouma moto zokecüu bu ketsie pie puo va kerietho chücie.” 8Sidi puo nuketsu kijü mha thu la bata.#8:8 Leshü kewe huo nu uko mia puo puo kephoumako icüu sa. 9Siro uko süu sishü tse, phichütho-u rie di mia puo sie puopuo idi peteko tuo phreta. Sidi Jisu puo rübeita mu thenupfü puo mhodzünu tha. 10Jisu tosie di puo ki, “Thenupfü, uko kirapuo vota ga? Miapuorei n pejo mote me?” 11Thenupfü sie puo ki, “Ulie, kezhau, miapuorei si molie.” Sitse Jisu sie puo ki, “A rei n pejolie lho. Tuo votalie, mu phouma la sa hie.”

Jisue Kijü Kezieu Zo

12Süsie Jisu uko ki mha pu la di sie, “A kijü kezieu zo, kehoupuorei a siemedzikezhau kezei nu tuo monyü kerhei kezieu ngulietuo.” 13Sitse Farisiko sie puo ki, “No n thuo n zhapu chüya, süla n zhapu ketho mo.” 14Jisu sie, “A a thuo a zhapu chü zorei a kepuu ketho zo, kekreilamonyü a a thuo kirapuo nu vor shi mu kirapuo votieya shicü si ba, derei nieko we a kirapuo nu vor shi mu a kirapuo votieya shicü si mo. 15Nieko we themia rhi#8:15 Gk Chüüzie kele nunu. nunu mia capi chüya, a we mia puo capi rei chüya mo. 16Mhanuü a mia capi chü zorei, a mia capi kechü puotou zo, sünu a rübei monyü a ketsekeshü a Puou rei tuokecü la. 17Sizomonyü nie zho-u nu rei mia kenie zhapu we ketho zo ükecü thupie tuo. 18A a thuo a zhapuya mu a ketsekeshü Puou rei a zhapu chüya.” 19Süla uko sie puo ki, “N Puou kirapuo ba ga?” Jisu sie “Nieko we a rei morei a Puou rei siya mo. Nieko a sikecü sie a Puou rei silietuoweü,” sita. 20Puo rüsuokiu kinyibouu nunu die hako pupie mia petha, mu miapuorei puo te mo, kekreilamonyü puoteiu vor moluocü la.

A Kevora Nieko Vorlie Lho

21Süsie puo la sie uko ki, “A tuotatuo, mu nieko a pfhütuo, derei nieko nie kephouma nunu siatatuo. A kevora nieko vorlie lho,” sita. 22Süla Judako sie, “Puoe puo thuo puo dukhriwatuo üya me? Puoe sie ‘A kevora nieko vorlie lho,’ ikeshü kedipuo pu ba shi!” 23Sitse puo uko ki, “Nieko pekhrotsa nu vor, a we peso geinu vor, nieko kijü hanu mia zo, a we kijü hanu mia mo zo. 24Süla a nieko nie kephouma nunu siataketuo pushüwate, süla nieko ae süu zo ükecü pelelie kemosie nieko nie kephouma nunu siata zotuo.” 25Sitse uko puo ki, “No supuo ga?” ita. Jisu uko ki, “A tsenu süu nieko ki puwate. 26A nieko dze puketuo mu pejoketuo ba phi; derei a ketsekeshüu ketho zo, mu a puo ki sikelieu se kijüu ki puyakezha zo.” 27Ukoe puo uko ki Puou dze pie pu ketha cau silie mota. 28Süla puo sie uko ki, “Nieko Themia Nuou pie kesie ki, a süu zokecü, mu a a thuo a medo nunu mhapuorei chüya mo, derei Puou a pethakeshü tuoi a süko se puya ükecü nieko silietuo, 29Siro a ketsekeshüu rei a ze tuo zo; puo a bu a rübeitaya mo; a puo neiko chü seiyakezha la.” 30Jisu die hako pushü tse themia kekra puo pelelieta.

Pethakelie Kethomia

31Süsie Jisu puo pelelieketa Judako ki, “Nieko a die nu ba seilie ro, nieko ae pethakeliemia kethota zo; 32mu nieko ketho-u silietuo, sitse ketho-u thuo nie kha kerüüshüwatuo.” 33Siru uko puo ki, “Hieko Abraham yiemia zo, mu hie mhakipuorei miadie chü chie mo zoluo. No ‘Nieko kha kerüüshüwatuo’ idi kepuu puoca kedipuo ga?” 34Jisu uko ki, “A nieko ki pu toushütuo, kehoupuorei kephouma chüyakezhau kephouma dieta zo. 35Miadiemia kikru puo nu ba seilieya mo; nuothonuou we sünu ba seiya. 36Süla mhanuü Nuou nie kha kerüüshüwata üro, nie phreishüwaketamia kethota zo. 37Nieko Abraham yiemia zo ükecü a si ba; sirei nieko a dukhriwatuoü nie hie chü tuoya, a dieko bu baketuo nie nou thechü jücü la. 38A a Puou kinu ngukelieko se puya, mu nieko rei Puou kinu sikelieko chü morosuo zo,” sishü.

Jisu mu Abraham

39Uko puo die kela di puo ki, “Abraham sü hie puou zo.” Jisu uko ki, “Nieko Abraham nuonuo ketho üliro, nieko Abraham mhathoko chütuo, 40derei nieko a Ukepenuopfü kinu sikelie ketho-u pie pukeshü la nieko a dukhriwatuoü pfhü tuoya. Abraham mha sükemhie chü mo zo. 41Nieko we nie puonuo mhathoko chüya.” Sitse uko sie puo ki, “Hie tekhruonuo mo, hie hie puo puo ba, mu süu Ukepenuopfü zo.” 42Jisu sie uko ki, Ukepenuopfü nieko Puou liro nieko a khrietuo; a Ukepenuopfü kinu par mu vor zokecü la. A a thuo a medo nunu vor mo, derei puo thuo a ketsekeshü zo. 43Nieko kiüdi a kepuu silie mo ga? Süu nieko a die rünyü kemvü la zo. 44Nieko sü nieko puou Satan kinu zo, mu nieko puo menguko chü nyüya. Sietsenu zorei puoe mia kedukhrimia zo, mu puo mhakipuorei ketho-u nu thaya mo, kekreilamonyü ketho-u puorei puo nou tuo mo. Puo ketijü pu rei süu puo zho zo, puo ketijümia mu kecürüko krüu zocü la. 45Derei a ketho-u kepu la nieko a peleya mo. 46Nieko supuonie kephouma pu a dalie vi ga? A ketho-u puya ro nieko kiüdi a pelelie mo ga? 47Kepenuopfü kinu kevormia kehoupuorei Kepenuopfü dieko rünyüya. Sirei nieko Ukepenuopfü kinu vor kemo la süko rünyüya mo.

48Sitse Judako puo die kela di sie, “No Samariamia puo mu terhuokesuo zeyakezhamia puo ücü hie pu zhü mo üme?” 49Jisu sie, “A terhuokesuo zeya mo, derei a a Puou rhuya, sirei nieko a rhuya mo. 50A a thuo a la thetshetherhu pfhüya mo, derei süu pfhüyakezhamia puo ba mu süue mia capiu zo. 51A nieko ki pu toushütuo, kehoupuorei a die zekelieu mhakipuorei siatalie lho.” 52Sitse uko sie puo ki, “Hie tsie we no terhuokesuo puo zeya ükecü si touliete! Abraham siate; mu siedzekesiko rei siate, sirei no pucü ‘A die zekelieu mhakipuorei siatalie lho’ ite. 53No hie puo Abraham siaketau ki zhakuo me? Siedzekesiko rei siate. No n thuo n üse supuo üya ga?” 54Jisu sie, “A a thuo a tshe zorei, thetshe süu we mhapuo mo. Mia puo a tshekezhau sü a Puo, nieko puo ki, ‘Puo úko Kepenuopfü zo,’ idi puyakezhau zo, 55nieko thuo puo si mo zo ürei, derei a puo si ba; a puo si mo üta ro, a rei nieko mhiei ketijümia puotatie! Derei a we puo si ba mu a puo die zeya. 56Nieko puo Abraham a kevor teisozhau ngushüketuo le puo nei siei vor mu puo süu ngu di puo neilie.” 57Sitse Judako puo ki, “No tsie teicie hiepengou rei mo di no Abraham ngu le?”#8:57 Leshü kewe huo nu Abraham n nguwate me? si. 58Jisu sie uko ki, “A nieko ki pu toushütuo, Abraham mhodzü a tuo zo.” 59Sitse uko ketsie chüpie puo vatuo üta, derei Jisu rüshü di rüsuokiu nunu prata.

Actualmente seleccionado:

Johan 8: ANBRBSI

Destacar

Copiar