Mhakechüko 8
8
1Siro Saul rei uko puo dukhrikewa puo medo zo.
Saul Kehou Pechükecü
Sünhie yawinu, Jerusalem nu kehouu pechüpenyü secü sedeta, mu Apostelko zo kemosie kekreiko pete ta cüre Judia mu Samaria kijü pete nu vota. 2Miathomia huo Stefan pie vo khruwa mu puo krükra rei phi.
3Derei Saul we kehouu bie pejüwaketuo la thehie chüta; puo kiü nu le di kepelemiako thepfu rei thenu rei tepie kedieki nu shüta.
Filip Samaria nu Pethakecü
4Kepelemia ta cüre kevoko thechü puo sie puo nu vo mu kehoura vo rei dieu pu keza vota. 5Filip-e Samaria nadiu nu ke Khrista dze pushü. 6Siro sünu themiako u terüchü Filip die rünyülie tsiu puoe zasi chükeshüko rei ngu, 7kekreilamonyü mesa kemo ruopfüko shie kemerie chü di mia kekra geinu parta, mu lasiamia tsiu phiyhomia kekra shürholieketa la. 8Süla nadi sünu u nei phita.
9Siro nadi sünu Simon ükecü mia puo baya, puo themou la Samariamiako bu u ngo phi mu puo thuo puo üse themia kemeyie puo ücü leya. 10Siro uko pete, kecü nu vo kezhau ketso puo die rünyü terü di sie, “Themia hauha Ukepenuopfü kekuo Kezhau üyakezhau,” sita. 11Mu ukoe puo die ze terüya kekreilamonyü puotei kekra puo themouko pie uko bu u ngo phi tuoketa la. 12Derei uko Filip kepetha die, Ukepenuopfü kedi dze dieliekeviu mu Jisu Khrista zau pelekelie ki, sidi thepfu rei thenu rei dzülupfülie. 13Süki Simon thuo rei pelelieta. Sidi dzülupfülieta tse vor Filip khieki bata tsiu u ngo phicü mu zasiko chükelie ngu di puo ngopfü bata.
14Siro Jerusalem nu keba apostelko Samaria nu kebako rei Ukepenuopfü dieu lielieketa dze silie tse, uko Pitor mu Johan nie ketsepie uko ki shü. 15Unie tsu di uko bu Kemesa Ruopfü ngulieketuo la kecha chüshü. 16(Kekreilamonyü süketso zowe Kemesa Ruopfüu uko mia puo gei rei vorlie moluo; uko Niepuu Jisu za nu dzülupfükelie zoluo). 17Sitse Pitor mu Johan unie u dzie pie u gei shü, siru uko Kemesa Ruopfü ngulie. 18Siro Simon-e Pitor mu Johan unie u dzie pie uko gei keshü ki, süko Ruopfüu ngulieketa ngushü tse, puo raka pie Pitor mu Johan unie tsü, 19di sie, “Kekuo hau pie a rei tsücie, sidi a bu rei a dzienie yhapie mia gei keshü ki mia bu Kemesa Ruopfü ngulieketuo la,” sita. 20Derei Pitor puo ki, “N shükeiraka bu n ze katacie, kekreilamonyü no n shükeiraka se Ukepenuopfü mhaphruo khrülieketuo lekecü la! 21No mha hau nu n za morei n ya puorei ba mo, kekreilamonyü n noue Ukepenuopfü mhodzü puotou ba mo. 22Süla n nou kerüzhü hau nunu thenoukedilie, mu hakemhie keleko vapie n tsülieketuo la Niepuu ki chaliecie. 23Kekreilamonyü kepfhükerhu keba mu kerüzhü roko tuokecü a ngu ba.” 24Sitse Simon sie, “Niepuu ki a la chashücie, sidi nnie kepu mha kesuo hako puo bu rei a gei vor moliecie,” sita.
25Sidi Pitor mu Johan unie Niepuu dieu zhapu chü siro pushükewa sie, unie Jerusalem nu la vortatuo ükezhü ki Samaria rüna kekra nu dieliekeviu pie pethashü.
Filip mu Ethiopiau
26Süsie Niepuu dieliemia puoe Filip ki, “Sielie, di tuo pekhrotsa Jerusalem nunu Gaza nu kevo chau ze volie,” si. (Süu rayha cha zo). 27Süla puo sie di tuo ke. Süki Ethiopia iunukmia puo, Ethiopia nu kedipfü Kandase khro kinyi pete seyakezha kezha phimia puo ba. Ru puoe rüsuotuo üdi Jerusalem nu vo, 28di kinu la vortazhü; puo kierbagei gei tuo di Isaya siedzekesiu leshü phrü tuo. 29Sitse Ruopfüu Filip ki, “Kierbagei gei pfülie di puo ze balie.” 30Süla Filip ta süu ki phi ru puo Isaya siedzekesiu leshü phrüketuo silie. Sitse puo sie, “No phrüketuou ca si tuo mo?” 31Puo sie, “Huomia puoca vatshapie a kieshü kemosie a kidi silietuo ga?” Sitse puo Filip bu pfür puo kierbageiu gei puo ze balienuta. 32Siro puo Kethodie phrüketuou ro hau:
“Tekuo dukhrituoü ze kevo tuoi puo ze vo;
siro tekuonuo puomie kebeu mhodzü kemekrie bakezha tuoi,
sütuoi puoe puo tie tiegashü chie mo.
33Puo zhase di thecau chüpie puo tsü mote.
Supuonie puo seyieko dze pu kekralie ta?
Kekreilamonyü kijü hanunu puo kelhou chüsete.”
34Sitse iunuk-u sie Filip ki, “Siedzekesiu supuo dze pu ba shi pupie a kiecie, puo thuo puo dze mo kekreimia huo dze pu ga?” idi ketso. 35Sitse Filip puo ki kethodie hau nunu sede di Jisu dze dieliekeviu pie puo ki pushü. 36Sidi unie keze cha nu vozhü ru vo thechü puo nu dzü keba ngulie, sitse iunuk-u sie “Haki dzü ba. A dzülupfülieketuo chakha huo ba me?” 37(Filip sie puo ki, “No n nou pete se peleta ro dzülupfülie vi zo.” Sitse puo sie, “A Jisu Khristae Ukepenuopfü Nuou zokecü pelete.”) 38Sitse puo kierbageiu bu thalienushü, sidi Filip mu iunuk unie keze dzü nu lelie di Filip bu puo dzülu khashü. 39Süsie unie dzü nunu parlie tse, Niepuu Ruopfüu Filip ze tuota. Sidi iunuk bu puo ngu sa mota, derei puoe puo nei phalie kelho chü di puo chau nu vota. 40Sirei Filip we vo Azota nunu puo ngulie, mu puo tuo sünunu rüna pete nu vo di dieliekeviu pupie mia kie zo vo Kaisaria tso.
Actualmente seleccionado:
Mhakechüko 8: ANBRBSI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
The Bible Society of India
© 2023, Used by permission. All rights reserved. More
