Mhakechüko 2

Kemesa Ruopfü Kevor

1Pentekost zha vorlieta tse, uko pete keze vo thechü puo nu ba. 2Sitse vapuonu mhapfhe puo teigei nu khriedi mhie vor di uko keba kiu pete tshulieta. 3Ru mi themia meü kemhiecü keza vo uko mia puopuo gei ba phreta. 4Uko pete Kemesa Ruopfüu u tshupfü di Ruopfüue tsükeshü mhiei die kekreiko nunu mha pu sieta.

5Süki tei khro seyie pete nunu nanyü nu pecü sekecü Judamia vor Jerusalem nu lhou ba. 6Siro mhapfhe hau sikelie ki krodi vor kengulie mu u ngo phita, kekreilamonyü pethakeliekoe uko mia puopuocü ramia die nunu mha pu keba siketa la. 7Sidi u ngo thopfü di sie, “Die pu keba hako pete Galilmia zo mo me? 8Di siliro, kikidi úko pete u thuo u die nunu si phreta ga? 9Parthiamia, Mediamia, Elamitmia, siro Mesopotami-a, Judia mu Kapadokia; Pontu siro Asia nunu kevormia, 10huomia Frigia, tsiu Pamfilia, Ijipt mu Kurin kepenuoki Libia nu kebamia, tsiu Rom nunu rüso chü kevor Judamia mu Judamia nanyü zeketako, 11Kretamia mu Arabmia; u pete u thuo u die nunu Ukepenuopfü mha kezha chükeshü dze rünyü bate.” 12Sidi uko pete vapethopfü mu u ngo di sie huoniehuo ki, “Hau kikidi hilieta ga?” sita. 13Derei kekreiko kethekre di, “Uko zu kesa se u tshupfü balie,” isita.

Pitor Kepetha

14Derei Pitor kerepuokrüko ze siethalie di die pu puo rhiechü themiako ki, “Judiamiako mu Jerusalem nu kebako, nie hau siliecie, mu a kepuko rünyülie. 15Hako nieko noule tuoi meze ba mo; tsie khise keba thepfü zoluo. 16Derei hau dze thiedzü siedzekesiu Joel bu pupie kezhü:

17“ ‘Ukepenuopfüe puya, vo teisozha thelatsa,

a a Ruopfü rupie themia pete gei shüshütuo,

siro nie nuonuo thepfu rei thenu rei siedzedie putuo,

mu nie khriesako ziemho ngutuo,

nie donu ketsako u mho pematuo.

18Siro sütei ki, a a Ruopfü rupie,

a kituo thepfu gei rei thenu gei rei shütuo,

mu uko siedzedie putuo.

19Tsiu a tei peso geinu u ngo zokecü,

mu tei khro kijü nu zasiko,

thezie, tsiu mi, siro mikhu mhoutsa, pekieshütuo.

20Niepuu teisozha kezha,

tsiu zayie chü kevor mhodzü, niaki zeide-itatuo,

mu khrü thezie mevitatuo.

21Siro kehoupuorei Niepuu za kiekelieu kelalietuo.’

22“Nie Israelmiako#2:22 Gk Themiako, Israelmiako., a die rünyüshücie: Nazaret#2:22 Gk Nazor-u.Jisu ha, nieko rei si keba tuoi, Ukepenuopfü thuo puo geinu kekuo mhathoko, u ngoko mu zasiko chü di puo zo ücü thashü, 23themia hau, Ukepenuopfü thuo rhüse ketuo mhie mu puo pedzü si tou di, puo khapie nieko dzie nu shüwa, nieko thuo thezho sanyüyakemomia bu puo gouwa, mu puo dukhriwa. 24Derei Ukepenuopfü kesia nunu puo shüphralie#2:24 Gk Kesia mezhie nunu. di puo chü perheilie, süu kekuo nu puo phapie balie kenjü. 25Kekreilamonyü David-e puo dze pukeshü:

‘A a mhodzüki Niepuu nguya,

puo a zatsa ba seiya,

mu a rüsierünielie lho;

26süla a nou rei puo noumvü,

siro a meü rei puo neiya,

sümho rei a chüüphou ha kemerü nu lhoutuo.

27No a ruopfü pie Hades nu bawa lhocü la,

morei n Kemesau bu cieürietalie lho.

28No kerhei chako thashü a kie;

sidi a bu n mhinguki nu a nei lhe mo tuotatuo.’

29“A keze Israelko, a u puotsa David dze nieko ki pu kemecie tsuoishütuo, puo siata di khruwa, mu puo mekhru thie rei u kengu nu zhü zo. 30Siro puoe siedzekesimia rei chü mu Ukepenuopfüe puo ki rüse di puosepuoyiemia puo bu puo kediba gei batuoü phrakeshü dieko puoe si zo. 31Pedzüperie hau ngu di, David-e Khrista rheilasieketuo pu di,

‘Puo pie Hades nu bawa mo,

morei puo chüe cieürieketa chü mo.’

32Ukepenuopfü thuo, Jisu hau chü perhei laliete, mu hie pete rei süu zhapumia zo. 33Süla Ukepenuopfü zatsa nu puo chü pezhase bate, mu Puou kinu phrapie kezhü Kemesa Ruopfüu ngulieketa la, nieko tsie si mu ngu keba hau puoe rushüte. 34Kekreilamonyü David zowe teiko gei sie mo, derei puoe pukecü,

‘Niepuue a Niepuu ki,

“No a zatsa balie,

35A ngumvüko pie n phiba chüwa kemochie.” ’

36Süla Israel kiu pete bu, nie puo goukewa Jisu hau, Ukepenuopfü puo chüpie Niepu mu Khrista chüwata ücü si kemecie tsuoiliecie.”

Pelelie Kerieko

37Uko hau silie tse, u melou va pechüteilie di sie Pitor mu apostel kekreiko ki, “Kezeko,#2:37 Gk Themiako, siezedzürieko. hie bu kedipuo chülie morosuo ga?” 38Pitor sie uko ki, “Thenoukedilie di nie kehoupuorei Jisu Khrista za nunu dzülupfü phrelie tse nie kephoumako valietuo; mu methuo khakeshü Kemesa Ruopfü mhaphruou nie ngulietuo. 39Kekreilamonyü phrapie kezhüu nie mu nie nuonuo la, tsiu kepecie phi nu ketuoko pete la, siro Niepuu Ukepenuopfü puo thuo kiepie puo kitsa shülieketa pete la rei zo.” 40Mu puo die kekrei kekra rei se zhapu chüshü mu uko tarho di sie, “Kesuokeruo phou hau kinu nie thuo nie kelaliecie,” sishü. 41Süla puo die u neikelie khe dzülupfülie, sidi sünhie mia nyie se mese uko salie. 42Süko u khapie apostelko kepetha die nu, kepekrokecü nu, niekhrüda bietshiekecü nu mu kecha nu shü seilie.

Kepelemiako Donu Kelhou zho

43Süki themiako u ngo phita, kekreilamonyü apostelkoe u ngoko mu zasiko kekra chüshü. 44Siro pelekelie khe keze kro puo chü di u vie pete vierhe chüta. 45Uko u vieko mu u nyaürako zelie di puomako se vor uko donu tsopfhü kebako vaphilie. 46Siro uko teisonhie kezepuo chü di rüsuoki nu u tei kha seshü, uko kinu niekhrüda bietshiecü tsiu u nou mezhü#2:46 Moro unou thetho chü di. mu u nei siei di mhacümhakrie. 47Siro Ukepenuopfü tshe mu themia pete mhodzü therhu rei pfü. Tsiu Niepuu teisonhie kelakelieko bu uko salielie ba zota.

Actualmente seleccionado:

Mhakechüko 2: ANBRBSI

Destacar

Copiar