Mata 12

Maŋgwah bəley

(Mar 2.23-28; Luk 6.1-5)

1Dapa pas ana ŋgesey, pas ta masasak vaw, Yesu ke dey jaka pe ley te bəley. Ndah masasəraka jene tata, mayə ke kəɗeceŋ, ac ka ŋgwah yaŋ te bəley ana hay ka ta nday. 2Masa Farisa hay aca wala sə, aca gwaɗa, gege: «Wala ndah masasəraka jene takaa aca ŋgə jə masa ma majawa ka və cəv ta maŋgiya pas ta masasak vaw aabay!» 3Ke vehecen, gege: «Akwar ka jaŋgaw masa bay Deevet ta ŋgiya masa mayə ta kəɗa, aŋga va ndah tata hay sə, aabay geyey? 4Ke sehw pə way ta Zlavay, ac ka ndə peŋ masa mava kad Zlavay masa kwa aŋga, kwa ndah tata cəv mava kad eceŋ ta mandiya aabay, say ndaakwas hay#12.4 Ac ka ndə peŋ mava kad Zlavay. Wuzaɗ 1Sa 21.2-7. Kwakwas tandakwa a və cəv sə, kad nda maŋga kwakwas hay ta Zlav babəla. Lev 24.9. 5Pas ta masasak vaw, ndaakwas hay maŋga mezlər dapa way ta kwakwas sə, aca nah yaŋ kad pa ma majawa ta pas ta masasak vaw aabay, anjəkar ac ke ŋgə mebər aabay sə, akwar ka jaŋgaw dapa ma majawa ta Muyiz aabay geyey? 6Yaw, ya gwaɗakwar, jə mazlakava mafəna Way ta kwakwas ana sə, fana ɓa. 7Efes daha akwar ka cəna ma masa a wal megweɗ: “Ya wal sə, metekwen fa ndana hay bəna, maŋgə kwakwas bay” sə, akwar ta zlafa metəɗec ma yaŋ ndah masa ac eve mebər aabay ŋgesey sə, aabay, 8afa bay da yaŋ pas ta masasak vaw sə, Wut ta nda.»

Nda masa ha maməca

(Mar 3.1-6; Luk 6.6-11)

9Yesu ke zleftek faŋga, ke dey, ke sehw pə Way ta macə mbahw te Zuwef hay. 10Dapa way ana faŋga, ndana ɓa ha tata leŋgeɗ maməca. Ac ka nəkafa Yesu ka ta jawiya ava ma hay, gege: «Cəv mava ka ta mbəl ndana pas ta masasak vaw geyey?» 11Amaa Yesu ke vehecen, gege: «Ndana wa deveŋ akwar masa aŋga ava təmak pal amta, təmak ana ka kazlata pe veɗ mekweleleŋ ana pas ta masasak vaw sə, e dey, e kəsek avəda aabay sə, wa? 12Yaw, ndana sə, a fəna təmak ana eve mehehəm aabay geyey! Ara nesey, cəv ɓa te meŋgə jə mambəla ana pas ta masasak vaw.» 13Ka gwaɗa nda masa ha tata maməca sə, gege: Telek ha takaa. Nda sə, ka talan ha ana. Ha sə, ləmadata pa slam ana ara ha leŋgeɗey. 14Farisa hay sə, ndal! Ece də kad a vəda, ke te cek mamənak fətiya da yaŋ wewer hay ta makəɗiya.

Yesu, nda maŋga mezlər ta Zlavay

15Masa Yesu ka cəna wewer tec da yaŋ ana avəda sə, ndal! A daɓa faŋga. Ndana hay gaa ac ka cəpaw, ke mbəlec avəda fakwanay. 16Amaa ke ɓeɓəcec ndah ana, ac ta ŋguzda yaŋ tata kad ndana bay, 17afa, masa Izay nda mehwedek ma te gweɗ zleezle sə, da ŋgata. Ke gweɗ, gege:

18«Zlav ke gweɗ, gege: “Mawala, nda maŋga mezlərey aɗaw masa ya ka yahaɗha,

aŋga nda masa ya waya elehey, ya ka yahaɗha eve mewesley.

Ya ta paɗ Mesfeney aɗaw a yaŋ ana,

afa e de ŋguzdecen meŋgə mezlər eve cəvey ana kad tərsam hay fakwanay.

19A ta yah ma ava ndana aabay, a ta cə lalaw aabay.

Ndana ma ta cəna uway tata dapa slam ta macam yaŋ hay aabay.

20A ta pasl ɓəlev majara ana sə, aabay.

A ta məca petərla masa ndana a wala ara mbala a ta məcay sə, aabay,

kasl pa pas masa aŋga ta hwadaɗ meŋgə mezlər eve cəvey ana pa bigula.

21Vavara hay fakwanay ac ta pə mawulak yaŋ ta maŋgat jene jaka pe mezel tata.”»

Yesu va Belzebul

(Mar 3.22-30; Luk 11.14-23; 12.10)

22Ndana hay aca hwadana Yesu nda mahazlaw ana ɓa aŋga ava damkwaw dapa yaŋ, aŋga ɓaɓa. Yesu ka mbəla avəda. Nda ana, ke gweɗey, ka wala ndey saya. 23Ndana hay fakwanay ec ke rəzlec da yaŋ mezlər masa Yesu ta ŋgiya. Mafay ana, ec ke gweɗ, gege: «Nda ana nesey sə, aŋga wut te Deevet sə, aabay?» 24Amaa Farisa hay aca cəna ara nesey sə, ec ke gweɗ, gege: «Nda ana a mbas damkwaw hay sə, ava gədaŋ te Belzebul, bay ta damkwaw hay.»

25Yesu ka səna mawulak yaŋ tec avəda, gege: «Daha ndah dapa wunam ta bay amta aca ŋgə vəram dapa taɓa teceŋ, wunam ta bay ana a nasata. Daha ndah dapa berne, daha aabay da hwaɗ ta way kwa wula wula, ece ŋgə vəram dapa taɓa teceŋ, wunam ana, daha aabay hwaɗ ta way ana e zlec aabay. 26Daha Saadan a mbas Saadan sə, ŋgesey, a ŋgə vəram fə yaŋ tata. Daha ara nesey sə, wunam ta bay tata de zlec meemey? 27Naa daha yey, ya mbas damkwaw hay ava gədaŋ te Belzebul, ndah masasəraka jene takwar hay aca mbasiya sə, ava gədaŋ ta walawa? Ara nesey, eceŋ ana ec te njehec ka ndah ma ta təɗakwar ma yaŋ. 28Amaa daha yey, ya mbas damkwaw hay ava gədaŋ te Mesfen ta Zlavay, ara nesey, Meŋgə bay ta Zlavay sə, ka husakata kasl varakwar cay. 29Daha aabay, ndana mazlafa mesehw kad hwaɗ ta way ta nda masa aŋga ava gədaŋ, a da kəriya sə, aabay. Say nda ana aŋga ta jawa nda masa aŋga ava gədaŋ sə, avəda, e sehw a hwaɗ ta way tata, a həla jene hay tata fakwanay. 30Nda masa aŋga ava yey aabay sə, ŋgesey a ŋgə vəram eve yey. Nda masa e jəniyey te meɓəcekec ndana hay aabay sə, ŋgesey, aŋga nda makwakwaca ndana hay.»

31Mawala mafay te mey, ya gwaɗakwar, mebər ta ndana hay fakwanay va malaf nda ta ndana hay fakwanay kad Zlavay sə, Zlav a ta pəla avəda, amaa nda malafa Mesfen Mavəna sə, Zlav a ta pəlan mebərey tata aabay. 32Daha ndana ta gwaɗ ma mambəla ana aabay da yaŋ Wut ta nda sə, a ta ŋgat mepəl mebər tata, amaa daha e gweɗ da yaŋ Mesfen Mavəna sə, a ta ŋgat mapəl mebər tata aabay. Kwa dapa vavara pəsna, kwa maayaŋ kad fəma.

Ma hay va rav

(Mat 7.16-17; Luk 6.44-45)

33Daha wudez mambəla ana sə, wudiya ana hay mambəla ana may. Daha wudez mambəla ana aabay sə, wudiya ana hay mambəla ana aabay may, masən wudez sə, fa wudiya ana hay. 34Hay, akwar tərsam ta bay ta wudam hay, akwar ndah mambəla ana hay aabay, akwar de gweɗek ma mambəla ana sə, a ŋgana gwagumaw? Afa ɗaf ta ma e gweɗek sə, jə masa manəha dapa rav. 35Nda mambəla ana sə, e təreŋgek jə mambəla ana dapa rav tata masa aŋga manəha weh eve jene hay mambəla ana, amaa nda mambəla ana aabay sə, e təreŋgek jə mambəla ana aabay dapa rav tata masa aŋga manəha weh eve jə mambəla aabay. 36Ya gwaɗakwar, pas ta matəɗ ma sə, ndana hay ec te vehek ma mambəla ana hay aabay fakwanay masa ac ta gwaɗiya. 37Ara nesey, Zlav a ta təɗakaa ma yaŋ sə, ava ma hay masa ka ta gwaɗiya, daha kaa sə, ka nda mambəla ana, kwa ka nda mambəla ana aabay.

Cah hay ta Zawnas

(Mat 16.1-4; Mar 8.11-12; Luk 11.16, 29-32)

38Ndah dərziya deveŋ ndah mesesərekecen ma majawa kad ndana hay va Farisa hay dərziya ec ke gweɗ, gege: «Nda masasəraka nda, anda wal ŋgandaw cah masa andə da wala.» 39Yesu ke vehecen, gege: «Akwar ndah mambəla ana aabay pəsna nesey, ndah maŋgwadafa dəɓa Zlavay, akwa nək cah marəzla nda, amaa akwar ta ŋgat mawala aabay, say cah masa aŋga te ŋgə ava Zawnas, nda mehwedek ma zleezle. 40Ara masa Zawnas te ŋgə pas mahkar, vaɗ mahkar da hwaɗ te kəlef mazlakava, ara aŋga ana Wut ta nda e te ŋgə pas mahkar, vaɗ mahkar dapa wuyak. 41Pas ta matəɗ ma sə, ndah dapa vavara te Niniwey ec te beŋgeɗek yaŋ ke te jewec ndah dapa vavara pəsna nesey ava ma hay, afa pas masa Zawnas nda mehwedek ma te bəzedec ma sə, ac ka ŋgwada rav teceŋ. Anjəkar, nda mafəna Zawnas ana sə, fana ɓa. 42Pas ta matəɗ ma sə, ŋgwaz maŋga bay da yaŋ vavara ta Saba zleezle sə, e te beŋgeɗek yaŋ ke te jewec ndah dapa vavara pəsna nesey ava ma hay, afa aŋga sə, e dek da ma ta kwakumakw ta vavara ka ta cak zləmay fe leŋgesl te meven jene hay ta Bay Salmaŋw. Anjəkar, nda mafəna Salmaŋw ana sə, fana ɓa.»

Mevehek ta damkwaw kad pa ndana

(Luk 11.24-26)

43Daha damkwaw ka data a vəda dapa ndana, a ŋgway vəla vəla dapa səɓak, a yah slam ka ta sasak vaw, amaa ka ŋgataw aabay. 44Ara nesey, a wulakiya dapa rav tata, gege: Zuwan ya vahaɓa pa slam aɗaw masa ye dek dapa. Mevehek tata sə, a ŋgatafa kwa jene dapa aabay, mafaɗa va maləmada eve cəvey ana. 45Ara nesey, e dey, e zelekec damkwaw hay mekele tasəla masa aca fəna eve suwe. Ece sehwey, aca njah pa nda ana. Manjah ta ndana ana sə, a ta nasata ka fəna mezleezle ana. Ara aŋga ana, e te ŋgə ava ndah masa suwe pəsna nesey.

Hwaɗ ta way metehwe ana te Yesu

(Mar 3.31-35; Luk 8.19-21)

46Dapa masa Yesu e gweɗ kad miya hay heley sə, ac mamaŋ va malamaŋ hay mazlaca da vəda, aca wal magwaɗa. [47Ndana ɓa ka gwaɗa, gege: «Mmakw va malamakw hay ac da vəda, aca wal ma ta gwaɗakaa.»]

48Yesu ka vahan kad nda medek magwaɗa sə, gege: «Mma va malama hay sə, wa hay wa?» 49Ava dəɓa ana, Yesu, ka waɗ ha kad fa ndah masasəraka jene tata, ke gweɗ, gege: «Mawala mma va malama hay, 50afa malama, dəma, daha aabay, mma sə, nda masa e ŋgə jene ara Papa da baymaləvaŋ ta waya.»

Actualmente seleccionado:

Mata 12: CUVnt

Destacar

Copiar