Mata 11

1Masa Yesu ka ndəvda mekətec ndah masasəraka jene tata kuraw dapa yaŋ ecew sə, a daɓa faŋga ka ta sasərak nda va mabəzad Labara mambəla ana kad ndah dapa wunam hay mazlakava ta vavara ana.

Zaŋ Baatis va Yesu

(Luk 7.18-35)

2Zaŋ Baatis aŋga dapa daŋgay, ka cəna ma da yaŋ mezlər hay masa Kəristi ta ŋgiya. Ke zlerdec ndah masasəraka jene tata dərziya kad vara vaw ka nəkafa, gege: 3«Kaa sə, ka Mesi masa e te dekey sə, geyey? Daha aabay anda ɓal nda mekele geyey?» 4Yesu ke vehecen, gege: «Madaɗay ma ta gwaɗan Zaŋ jə masa akwa cəna va masa akwa wala. 5Magwaɗa sə, mahazlaw hay aca wala ndey, ndah mahahalɓa ece də eve sek teceŋ, meskwelme hay ece səɗey, madagazlam hay aca cəna zləmay, ndah maməca ece pərekey, Labara mambəla ana mabəzada kad maslamarga hay. 6Mapəsma ɓa kad nda masa a ta gərda makəsparav tata mafay taaɗaw aabay.»

7Ara masa aca daɓa, Yesu ke gweɗ da yaŋ Zaŋ Baatis ana kad miya, gege: «Akwa də kad pa səɓak sə, ke te wuzeɗek mey? Ɓəlev masa memeɗ ta ɓəliya geyey? 8Naa, akwa wuzeɗek sə, mey? Nda masa aŋga ava rəkwat ta səlay fa vaw geyey? Amaa ndah mapana rəkwat ta səlay sə, aca njah sə, da way ta bay hay. 9Akwa də ke te wuzeɗekey ana sə, melemey? Nda mehwedek ma geyey? Aŋga, ya gwaɗakwar, aŋga sə, ka fəna nda mehwedek ma, 10aŋga sə, aŋga nda masa mavinda dapa Ɗelewer mavəna, gege: “Wala ya ta zləraɗ maslaŋ aɗaw fəma takaa, a ta ləmadakaɗ cəv takaa fəma takaa”. 11Ya gwaɗakwar, deveŋ ndah masa ece heyek dapa ŋgwaza hay sə, kwa ndana mafəna Zaŋ Baatis ana sə, aabay. Ava aŋga ana fakwanay, nda mekusetke ana dapa Wunam ta bay da baymaləvaŋ hay sə, aŋga mazlakava fətiya. 12Dəga zleezle masa Zaŋ Baatis a zlar mabəzad ma kasl pəsna, ndana hay aca yahafa ma Wunam ta bay da baymaləvaŋ hay ava gədaŋ, ma ta mapərasliya ndah mayaha ma. 13Ndah mehwedek ma fakwanay va ma majawa ec ke gweɗ da yaŋ Meŋgə bay ta Zlavay ana kasl fe medek ta Zaŋ Baatis. 14Daha akwa wal makəsiya pa rav takwar, Zaŋ sə, aŋga Eli masa e te vehekey.» 15Nda masa aŋga ava zləmay sə, da cəna. 16Ye de cecelec ndah pəsna nesey sə, ava wa? Ac ara wudeh manjaha dapa slam ta macam yaŋ masa aca cə lalaw kad mandala tec hay, gege:

17«Andə ka fətakwar slərem, amaa akwar ke gərev aabay.

Andə ka slakwar law ta macəhwandaw, amaa akwar ka kuɗa aabay.»

18Yaw, Zaŋ ke dekey, ke ndə jene aabay, ka sə jene aabay. Amaa, ndana hay ac ka gwaɗafa, gege: Leŋgesl ka nasata. 19Wut ta nda e dekey, a ndə jene, e sə jene. Amaa ndana hay ece gweɗ, gege: «Mawala, nda mambərhwalam nesey, nda masana jene, aŋga guula ta ndah macəkala budaw hay va ta ndah maŋga mebər hay.» Amaa leŋgesl te meven jene hay ta Zlavay sə, ka sənata mambəla ana jaka pe mezlər tata hay.

Makuɗa da yaŋ berne hay te Gelile

(Mat 10.15; Luk 10.12-15)

20Ara nesey, Yesu ke peyefec wunam hay mazlakava masa ka ŋgə ha mazlakava ta cah hay dapa mabay, afa ac ka ŋgwada rav tec aabay. 21Wabaw kad kaa Kurazeŋ! Wabaw kad kaa Baytisayda! Afa daha cah hay masa maŋga da varakwar nesey sə, ac maŋga da Tir va da Sidaŋw sə, efes ac ka ŋgwada rav teceŋ dəga zleezle, ac ka paɗ bakatar hay fa vaw va magwadəbal vaw dapa meləwec. 22Aŋga, ya gwaɗakwar, pas ta matəɗ ma sə, mekət te Tir va ta Sidaŋw a ta ŋgata afəcaka da yaŋ takwar.

23Kaa may, Kafarnahum,

ka wulakiya sə, ac ta baŋgaɗakaa avəda kasl a baymaləvaŋ geyey?

Ka ta bəraŋgata kasl pa vavara ta ndah maməca hay,

afa daha efes cah hay masa maŋga da varakaa nesey sə, ac maŋga da Sawduma, wunam ana aŋga ɓa heley kasl pəsna.

24Aŋga, ya gwaɗakwar, pas ta matəɗ ma sə, mekət ta Sawduma a ta ŋgata afəcaka da yaŋ takaa.

Zlav Papaŋ va Wudiya

(Luk 10.21-22)

25Dapa ŋgesey ana, Yesu ka zlar megweɗ, gege: «Ya ŋgakaa wasay, Papa, Bay Mazlakava ta baymaləvaŋ va ta vavara, masa ka ka raɓda jeŋ ana hay nesey fa yam te ndey ta ndah masəna jene hay va ta ndah eve leŋgesl, ke ke ŋguzdecen kad wudeh mekweskwes ana. 26Aŋga, Papa, ka ka walaw e de ŋgə ara nesey ana dapa mambəla ana takaa. 27Papa ka vuwa jene hay fakwanay pa ha aɗaw. Kwa ndana masəna, Wat sə, aabay, say Papaŋ, kwa Papaŋ ana, say Wudiya va nda masa wat a wal maŋguzdanay.»

Mazaɓ zakw#11.28 Nesey sə, hap masa aca kəlaŋgiya pa uway ta zla hay ke te həv ava aŋga. Yesu a gwaɗiya fana sə, a ŋgə a cacaliya aɗaw.

28Medek kad vara yey, akwar fakwanay ndah mayiva ta mazaɓ jə masa a fənakwar fa gədaŋ, yey sə, ya ta vakwar masasak vaw. 29Mazaɓ zakw aɗaw fa yaŋ takwar, manjah dapa mesesərekey aɗaw, afa yey sə, ya nda makwaɗma va nda manaha yaŋ dapa rav, ara nesey, mesfen takwar a ta ŋgat masasak vaw. 30Aŋga zakw aɗaw sə, e zeɓ ava ha tata, jə masa ya ta zəɓakwaɗ fə yaŋ sə, aŋga cefekcefek.

Actualmente seleccionado:

Mata 11: CUVnt

Destacar

Copiar