Lukas 8

Tànkùt ngama'nsa

(Mark. 15.40-41)

1Yen nu là lo be tôge, Yésu nke nzin ntùm ngôngô boa ntaṅla' nke ntshob, mbèn nke nsoṅ nkùn mebwô nufen Nsi. Boa tse ntshob bàa gham na' mbèn mbe; 2mba #Mat. 27.55-56; Mark. 15.40-41; Luk. 23.49tsemo' bènnzwi tse Yésu yate ngokèt tshobe, nta' ywètkebwô num bo là: Maria ze bo ke mbèn ntsiaṅ Madelèna ze ywètkebwô sammbàa tum num i là; 3Yohanà nzwi Kusà, ngalôte tshu Hèrodé, mba Susànà, mba tsemo' tse yàme, tse bo ke ndo' tshu tshob njwimte Yésu boa ghazi'te nu i yi là.

4Mba mo' mà bwoṅ benntùn tse'te mbaṅ i, benntùn bèn nse' yi, mfe ntùm ngô nzenze, a tshob yen tànkùt li ndù: Ngama'nsa lo tum nke nèn nema' nsa mi, 5ngelaṅ z'a ke ma' là, mo' bag i vù nkaṅ manze; benntùn nyiaṅte nku; bon nsaṅ mfe kamànyam se' mfèl'é. 6Mo' bag i vù num ndoṅ, mbile, mbèn njum be kua' ndende, nummbe dù' nefite lo ke be. 7Mo' vù netèt ngumndot; ngumndot ko' bo yi, mfam i. 8Mo' bag i vù ntùm dù' tsha' mebwô, mbile, mbèn njame, tsha i ghù miag nkù. A be tshob ndùlala, ntshob neta ndù: Mèn z'a ghù ntoṅ mi à neju' yi là, a ju'.

9Ghazi'te nu i bètt'é tun yen tànkùt là. 10A #Es. 6.9-10tshob bo ndù: A bin nà tse bo fà tsham nufen Nsi bin nà. Mbe se' mba tsemo' ben nà, bo la'te njoṅ i fa bo à ntùm tànkùt, ndùlala ndù bo ke njen ke yen; nju' ke tshùb.

11Tshù tun yen tànkùt là li: Nsa b'a ntshob Nsi. 12Ba kaṅ manze b'a ben tse bo num nju' ntshob Nsi, là Satan se' be ndende nsô ntshob là ntùm ntù tshob ndù kà bo bam, ngù nse' njôg là. 13Ba num ndoṅ b'a ben tse bo num nkwé ntshob Nsi ntùm tsiaṅte ngelaṅ bo ju'u, là ke ghù nga tse, bamntù yub ze keta fam ngelaṅ metsit laṅte se' bo là. 14Nsa mi a vù dù' ngumndot là b'a benntùn tse bo ju' ntshob Nsi, là nelab wut, nu neghù tshu yàm se', mfam yub num manze, bo ke yam sàm tàm nà. 15Nsa mi a vù ntùm dù' tsha' mebwô là b'a benntùn tse bo ju' ntshob Nsi, ntshùb ntùm ntù mebwô mba ntù nenùne, nke njam ntàm ntùm nefènte là.

16Sàm #Mat. 5.15; Luk. 11.33mèn ke' be te mbwôg num lambo, mbèn ndo' kab nkabte yi, ke nete lakunndà lo, là, a ke nte i à num téblé ndù ben tse bo tsho ndà là yen nelàn i. 17Mo' #Mat. 10.26; Luk. 12.2ju ke' be z'a na' ndeme, mbe ndù a ke nsi tswite wul i là; mo' ju ke' be z'a na' mbe ntùm tsham, mbe ndù bo ke nsi lène, mbe ndù a ke nsi tum njù mbwôgtshù là. 18Bin #Mat. 25.29; Luk. 19.26bam nà num mat ze bin num ndo' nju' yi là. Nummbe mba we lo z'a ghù là, mba bo a' fà yi; là mba we lo z'a ke' ghù là, mba bo a' kwé mba z'a tshwèt nkwate ndù a ghù là.

Mà Yésu mba fèt tse

(Mat. 12.46-50; Mark. 3.31-35)

19Mà Yésu mba fèt tse se' neyen i, là ke ku'ni nenèn nkum mbaṅ i, nummbe benntùn lo yàme. 20Bo soṅ i ndù: Màan mba fèt tsho num njù, nke nkô neyen o. 21A bùnte ntshob bo ndù: Mà mba fèt tshàm b'a ben tse bo num nju' ntshob Nsi, nke nze là.

Fetmbaṅ num ntse

(Mat. 8.23-27; Mark. 4.35-41)

22A be num mo' lé'njù a tsho kenu boa ghazi'te nu i, ntshob bo ndù: Be dut nèn mo' yoṅ diaṅnkat ntse; bo lo nke nène. 23Ngelaṅ ze bo ke ndut là, Yésu nke nzi. Mo' fetmbaṅ ndùb lo num ntse; ntse dun ntùm kenu, bo tù' b'a benntùn nebi. 24Bo kù'te nse' mbaṅ i, mbam i, ntshob ndù: Tà, bag bi li! A bam, ntshobte fetmbaṅ mba fetntse, bo tsin, dù' tswe ndù kam. 25A tshob bo ndù: Bamntù zin b'a yà? Bwôg tshùb yube, bo nyàmte yen nu là, nke ntshob bo bo ndù: Yen mèn ni b'a ndùke? A num ntô fetmbaṅ mba ntse, bo nke nju'ni yi.

Ngaghù ywètkebwô ntùm ngô Gérasa

(Mat. 8.28-34; Mark. 5.1-20)

26Bo kum kaṅ ntse ntùm ngô ba Gérasa, z'a be mbwe Galiléa là. 27Yésu yoṅ mbe tum kaṅ ntse, mo' mènntùn ntùm ngô z'a na' ngù ba ywètkebwô yàm num i là, se' mbwe Yésu. Fe ngelaṅ yàme, a lo ke bèn neket nzwe, ke bèn nke ntswe ndà, là, a ke ntswe à ntàb tufi. 28A be yen Yésu, nkua' neta, mbèn ngwù num nku mi, ntshob nze neta ndù: Ke z'o ghù ntùm yàm nu Yésu Mén Nsi mfe tù? Me le't'o kà ghùtni àm. 29Nummbe Yésu lo ke ntshob ywètkebwô ndù a tum num yen mèn nà; nummbe a lo ke ntô i fe ngelaṅ yàme; bo lo ke nkul i nkù tùne, nke mbéb i, a be'te nkù tùne, ywètkebwô nke ndo' i nèn yi kônkwa. 30Yésu bètt'é ndù: Lén so b'a we? A bùnte Yésu ndù: Légion, nummbe ywètkebwô yàm lo tsho num i. 31Tshen ywètkebwô là bu' mbu Yésu ndù k'a bam ndù bo nèn ntùm gheme.

32Tshù, mo' bwoṅ ngùnyàm lo be num yen kônga là, nke njù dù', ba ywètkebwô bu' mbu Yésu ndù a bam bo tsho num tshen ngùnyàm nà. A bam bo. 33Bo be tum num mèn nà, ntsho num tshen ngùnyàm nà; bwoṅ ngùnyàm nà tsho num tu mbale, ngwù ntùm diaṅnkat ntse, nkwùte fa.

34Benntùn tse bo ke mbéb nyàm nà, yen mba yen nu là tshùa là, nkù, mbèn nèn nsa yen nu là ntùm ngô mba tshwèt. 35Benntùn tum neyen ju z'a tshùa là, nkum mbaṅ Yésu, njen mèn ze ywètkebwô tum num i là, ndù a ma' nzwe num i, ntswe mbaṅ nku Yésu, mbèn nke ntshob nu a làn. Bo bwôg. 36Ben tse bo yen yen nu li là, soṅ yub mba ngaghù ywètkebwô lo njate là. 37Njoṅ benntùn fa ntùm bag ngô Gérasa le'te Yésu ndù a tum ntùm ngô yube, nummbe bwôg lo tshùb yub kua' yàme. Yésu bèn ntsho ntùm kenu, mbèn njam.

38Mèn ze ywètkebwô tum num i là le'te Yésu neghô njam i, là Yésu tshob yi ndù a nène, ntshob yi ndù: 39Bèn njam la' o, nsoṅ ju ze Nsi ghù wù là. A nèn, nsoṅ ju ze Yésu ghù yi là ntùm njoṅ dù' fa ntùm ngô.

Ngon Yairô

(Mat. 9.18-26; Mark. 5.21-43)

40Yésu be bèn njam, bwoṅ benntùn lo' i, nummbe bo lo ke mbéb i. 41Tshù, mo' mèn lén se Yairô, z'a na' mb'a ngalôte sinagogue là, se' ngwù nsi num nku Yésu, mbèn mbu' mbu yi ndù a tsho ntùm ndà i; 42nummbe a lo ghù nkwi ngon i ntshù' z'a na' mbe nguan ngu' ntshob bàa gham nà, ndù a tù' nekwù. Ngelaṅ Yésu ke nèn bwe là, bwoṅ benntùn nke mfét dù' k'a nke mfam tèt bwe.

43Mo' mènnzwi z'a na' ngù ntsekebwô fe ngu'njù ntshob bàa gham, mbagte njoṅ tshu tse fa mbu ghaghù fu, sàm ta' i ke yat'é là, 44se' njamnjam nkwag tôg nzwe Yésu. Be ndùse lem a ke ntum num i là keb. 45Yésu tshob ndù: We z'a kwag àm à? Njoṅ benntùn fa nke nta, Pétro mba ben tse bo à bo be là tshob ndù: Tà, bwoṅ benntùn diaṅ o mbume, mbèn nke ntèn o. 46Là Yésu tshob bo ndù: Mènntùn kwag àm, nummbe me ju' mba mo' neta tum num àm nà. 47Mènnzwi là lo be yen ndù a be a ke lemte wul i mvèle, nse' ngwù num nku Yésu, nsoṅ mbwe njoṅ benntùn fa, ju z'a lo ngù k'a nkwag i là, mba mat a lo ndo' njate yi be ndùse là. 48Là, a tshob yi ndù: Ngon àm, bamntù o yôg o, nèn fite.

49Mb'a ke nke' ntshob là, mo' mèn fe ju ngalôte sinagogue, ntshob ndù: Ngon o à kwù, kà bèn neghùtni ngatswite. 50Là Yésu z'a ju' yen nu là là, tshob Yairô ndù: Kà bwôg, bam nda' nebame, ngon o a' yôg. 51A kum ndà, mbam be nda' Pétro, Yohané mba Yakobo tsho, mba tà mén bo màab. 52Njoṅ benntùn fa nke nkua'a, nke ndab wut tshob num ngon nà; a tshob bo ndù: Kà bin nekua'a, a ke' kwù, là, a nezi. 53Bo zwi i, nummbe bo lèn ndù a kwù. 54Là Yésu tshùb bu i, ntshob kua' neta ndù: Mén àm, lo tù. 55Ywèt tse bèn mbèn njam. Be ndùse, a lo tù, Yésu tshob ndù bo fà jujù yi a jù. 56Ntù tàab bo màab tum, Yésu tshob ndù kà bo soṅ sàm mèn mba ntshù' nu z'a lo netshùa là.

Actualmente seleccionado:

Lukas 8: BMa

Destacar

Copiar