Matíe 6

Zozíi pápa cémʋ́ á nyɛ́ lɛ́ ŋazɩ̀nyʋa a

1«A mányɩ a Lagɔ̀nɔ̀nʋ̀ɔ̀ kʋ́, a ná nɩ dʋdʋ̀ dʋdʋ̀gbɩ nyʋa nɩ ka amɔ yɩ́gɔ̀ ŋwʋ́! A nɩ nɩ dʋdʋ̀ dʋdʋ̀gbɩ a, a Tʋ́ɔ́ ɔ̀ kʋ̀ lagɔɔ́ a, ɔ nɩ́ ka kɛ́zɔ̀ amɔ dàzɩ̀. 2Nɩ̀ nyɛ́ ŋazɩ̀nyɔ lɛ́ a, nà nɩ lé nyʋa ká saá yɩbhlɩɩ̀, cémʋ́ yrʋnyʋa nie lɛ́ zúfʋcɛcɩghlɩɛ́ a mnɩ́ yà tríi jɩ̀ sɔ́ a, áa nie sɩ́tɛ̀ lé nyʋa ká á dʋdʋ̀ lé a ká á ŋwnú fa. Náa srʋɛ amɔ cɩ́cása, a sɩ́tɛ̀ a wɔlɩ́ɛ́ ka ŋnɩ́ lé á ya wá má sɩsɔɔ́ dàzɩ̀. 3Mà mɔ̀, nà lilisɔ nɩ nyɛ́ ŋazɩ̀nyɔ lɛ́ a, nà kɔmɩsɔ ná yɩbhlɩ saá. 4Bhʋ́ a tányɩɛ́, lɛ́ɛ́ ɩ̀ nyɛ́ ŋazɩ̀nyɔ a, ɛ́ wɔlɩ́ nɩ́ flʋzɔ̀, bhʋ́alɛ́ ɩ̀ Tʋ́ Lagɔ̀ɔ̀ yì wɔlɩ́ɛ́ fɩ́ɛ́ a, ɔ́ yi kɛ́zɔ̀ mɔ̀ dàzɩ̀.

Cégbá mʋ́ á bhibhie a

5A nɩ bhibhie Lagɔ a, a ná nɩ yrʋnyʋa bhísakʋ́, ámá á nynʋ́vʋlɛ zúfʋcɛcɩghlɩɛ́ yà nyɩ́zɛ̀glàgbɩ sɔ́ kʋ́, dɛ́ á yi kʋ lé á yi bhibhie lé nyʋa yi á dʋdʋ̀ a. Cɩ́cása a mnɩ́ a náa srʋɛ amɔ mà, Lagɔ ká á dàzɩ̀ a, ɩ́mɩ́ a nɩ mʋ́mɔ a, ɔ́ ya wá ámá sɩsɔɔ́ dàzɩ̀. 6Mà mɔ̀, nɩ̀ cí mànɩ́ kà Lagɔ bhibhie a, pla wlʋdrèè mnɩ́ yrè nɩ́ kʋ a lé kà bhibhie, mà ɩ̀ Tʋ́ Lagɔ̀ɔ̀ ɩ̀ cílelɛ́ gɔ̀ a, ɔ́ kʋ dɛ́ɛ́ ɩ̀ zúzùò a, wɔlɩ́ɛ́ fɩ́ɛ́ ɩ̀ yrá a, ɔ́ yìi, ɔ́ yi mɔ̀ dàzɩ̀.

7A nɩ bhibhie a, wɔlɩdrèè a yrálɛ́ áa múóó a ná bhá á kʋ́ a ka á sábhla lé a ká mʋ́ trʋma, nyʋaá à nɩ́ Lagɔ yì a, bhísakʋ́; á dùòkʋ́ a nɩ cí wɔlɩ́ kɔ́kɔ́mnɩ́ a, bhʋ́ Lagɔ yi á bhibhiewɔlɩɛ́ nú. 8A ná nɩ ámá bhísakʋ́, mà a Tʋ́ Lagɔ yì wɔlɩ́ɛ́ a yrá a, fɩ́ɛ́ lé a ká lɛ́ bhibhiè.

Zozíi cɩ́a ɔ́ kʋjɩ̀nyʋ̀àà cémʋ́ á bhibhie Lagɔ a

(Lúkɩ 11.2‑4)

9Sɩ́tɛ̀ mʋ́ a ka lé a ká bhibhie:

À Tʋ́ɔ́ ɔ̀ kʋ ɔ̀ lagɔɔ́ a,

Nà ŋnɩ́ɛ́ ɩ blɔ̀.

10Nà nɩnɩgbɩɛ ɩ yi

Na wàwàlɛɛ́ kʋ lagɔɔ́ a ɛ

Kwlíi sáà dʋ̀dʋ kʋ́!

11Nyɛ́ àyɩ zɩmnɛ́ a yruó a lelilɛ,

12Cémʋ́ à ciele nyʋa a,

Cie àmɔ̀ sɩ́tɛ̀,

13Naá sa àmɔ̀ wlɩgɔ̀,

Lé a ka nyumoé nɩ,

Mà sa ʋ́ ayɩ neé!

[Máà mɔ̀ zi kʋ́,

Mɔ̀ kà pɔ́wa lé mɔ̀ à ŋwʋ́ɛ́ kpá

Kɔ́ lé kɔ́ a mnɩ́!

Ɩ kʋ saá.#6.13 Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.]

14A nɩ cie a lía a á nyumoé a, a Tʋ́ɔ́ ɔ̀ kʋ ɔ̀ lagɔɔ́ a, ɔ́ yi sáà amɔ ciè. 15Mà a nɩ nɩ́ a lía cie a, a Tʋ́ɔ́ kʋ̀ lagɔɔ́ a, ɔ nɩ́ ka lɛ sáà amɔ ciè.

Zozíi pápa cémʋ́ á pʋ́lɛ kleé a

16A nɩ pʋ́ʋ kleé a, a ná nyɔnɔ̀ a kwɛ́ɛ́ yrʋnyʋa bhísakʋ́: Ámá nɩ̀ pʋ́ʋ kleé lé à nyɔnɔ a kwɛ́ lé nyʋa ká saá yɩbhlɩ mà kleé mʋ́ á pʋ́lɛ. Cɩ́cása a mnɩ́ náa srʋɛ amɔ mà á nɩ pɛ́ɛ fɩ́ɛ́ ɛ́mɛ́ á yɛ́ lɛ́ sɩ́tɛ̀. 17Mà mɔ̀, nɩ̀ pʋ́ʋ kleé a, wɔlɔ klʋ́ lé nyidò dàŋwóni, 18bhè nyʋa nɩ ka saá yɩbhlɩ mà, kleé mʋ́ ɩ̀ pʋ́lɛ, mà ɩ̀ Tʋ́ Lagɔ yɛ́ mɔ̀ kʋ́, ɔ́ a múó coco yì saá mà kleé mʋ́ ɩ̀ pʋ́lɛ a, ɔ́mɔ́ nà kà mɔ̀ dàzɩ̀.

Zɩkpa zɔ̀ a léyri lé lagɔ̀duú a léyri

(Lúkɩ 12.33‑34)

19A nɩ nɩ a, a ná mʋ́mɔ zɩkpa zɔ̀ a léyri a lilíé, mà ŋwɔnʋ́ lé wlɔ̀sʋ ʋ́ʋ ŋátɩɩ́, lé ghlíighlíinyʋa wáta kpli lé á yríií. 20Mà lagɔ̀duú a léyri a lilíé a nɩ mʋ́mɔɔ̀, mɔ̀ɔmɔ̀ nɩ́ ŋwɔnʋ́ yà wlɔ̀sʋ sɔ́ kʋ, lé ʋ kɩ́ɩ́ ŋáta lé ghlíighlíinyʋa nɩ́ sáà mɔ̀ɔmɔ̀ kʋ lé a ká kpli wáta lé a ká ghlíi. 21Mà dɛ́ nyɔ ŋwʋ́lɛ ɔ́ gbakalɩmalɛ sá a, bhʋ́ ɔ duo kʋɛ.

Yɩ́ ŋwɔ́ɔ yrúkanyɔ a nápɛ

22A lɛ́bhɛɛ, yɩ́ ŋwɔ́ɔ nyɔ a nápɛ. Nà yɩ́ nɩ kplɔ a, ɛ́ ŋana nà lɔ̀fɩ́ɛ́ kʋ́. 23Mà nà yɩ́ nɩ bhlá mɔ̀ a, nɩ́ yɛ́ kʋ́, cúcú a mnɩ́ ɩ̀ kʋ̀. Nà nápɛɛ́ kʋ̀ mɔ̀ mʋ́ a, ɛ nɩ nɩ́ ŋana a, cúcúkpe a mnɩ́ ɩ̀ kʋɛ!

Lagɔɔ, mà moníi

(Lúkɩ 16.13)

24Nyɔ nɩ́ ka míi lé ɔ ká kanyʋa a sɔ́ gà zrɩɩ̀. Ɔ kɩ́ɩ́ nɩ a, ɔ́ yi múó mʋ́ gblɩ̀, lé ɔ́ yi ànɔ wà. Ɩ́zà ɔ yà múó sɔ́ yi núnuù lé ɔ nɩ́ ka ànɔ yɩ́ sra. Nyɔ nɩ́ ka míi lé ɔ ká Lagɔ gà zrɩɩ̀, lé ɔ ká moníi gà zrɩɩ̀.

Lagɔ nyɛ́ àmɔ̀ lɩ́ɛ́ fɩ́ɛ́ à yrá a

(Lúkɩ 12.22‑31)

25Náa srʋɛ ɩ́ lɛ́ amɔ mà: A ná bhɔtɔ a zɩkpa a zà lé a ká cí mà: Bhè dɛ́gbá à yi lelilɛ yɛ́ lé à yi li a? A ná bhɔtɔ sáà á kpɩkpɩ a zà lé a ká cí mà: Bhè dɛ́ gbá à yi kótu bhá lé à yi mʋ́ pla a? Nyɔ a zɩkpa ka gbʋ́ lé á zi lelilɩ kʋ́. Lé nyɔ a kpɩkpɩ ka sáà gbʋ́ lé ɩ́ zi kótu kʋ́.

26A dʋdʋ̀ lagɔɔ́ a nimni, ɩ nɩ́ glɩ lelilɩ, ɩ nɩ́ sáà lelilɩ a saŋwʋ̀da ka, sɩ́tɛ̀ ɩ́ kʋ bhè a Tʋ́ɔ́ ɔ̀ kʋ̀ lagɔɔ́ a ɔ́ fínilɩɩ́! Bhè nyɔ ka gbʋ́ lé ɔ́ zi nimne kʋ́ a! 27Á nyièdɩ a nyɔ gbá yi míi lé ɔ̀ yi bhobho àààn lé ɔ́ bhobhoé yi yru a múó bhá lé ɛ́ yi ɔ́ zɩkpa zɔ̀ a yri kʋ́ ŋwʋ́ a? 28Bhè lɛ́gbá kʋ̀ʋ lé kóti wɔlɩ́ bhlá amɔ a? A dʋdʋ̀ caá flɛ́lɩ jɩ̀ a, a dʋdʋ̀ cémʋ́ ɩ námɛ kʋ a, ɩ nɩ́ zrɩɩ, ɩ nɩ́ bhla sáà loku. 29Mà náa srʋɛ amɔ mà sɩ́tɛ̀ ɩ́ kʋ lé lóo á wlele wá Salomɔ́ɔ a, ɔ̀ li wá kɔ́ a léyrié fɩ́ɛ́ a, ɔ mʋ́plakotu a námɛ nɩ́ flɛ́lɩyie a múó námɛɛ́ zi. 30Klá a mnɩ́ a pití kʋɛ ʋ́ zɩmnɛ́, lé zrɩ nɩ zɩ a, á ŋwʋ́ɩ́ kosu, sɩ́tɛ̀ ɩ́ kʋ bhè Lagɔ yrʋ́ɩ, amɔ Lagɔ nɩ́ ka míi lé ʋ́ ká yrʋ́ʋ? A Lagɔ a fádùò nɩ́ zù! 31A ná bhɔtɔ lé a ká cí mà: Bhè dɛ́gbá à yi lelilɛ yɛ́ɛ a? 32Bhʋ́anɩ wɔlɩ́ɛ́ fɩ́ɛ́ lɩ̀à, nyʋaá à nɩ́ Lagɔ yì a, ámá bhobuí. Mà amɔ, lɛ́ a gbʋ́ nɩ bhlá amɔ a, a Tʋ́ɔ́ ɔ̀ kʋ̀ lagɔɔ́ a, ɔ́ yìi. 33A jɩ́ fɩ́ɛ́ Lagɔ a Léyibhlɩɛ́ a mnɩ́ a námawɔlɩɛ́ kʋ̀ mɔ̀ a kʋ́, a bhli lagɔ̀nyùzɔ, bhʋ́ lɩ́ɛ́ fɩ́ɛ́ a yrá a, Lagɔ yi amɔ mɩ́ nyɛ́. 34A ná bhɔtɔ kɛ́ɛ̀lɛ a zà! Mà zrɩ̀ɛ̀ ɛ̀ zɩɛ a, ɛ́mɛ́ la ɛ́ wɔlɩ́. Yru lé ʋ́ ka ʋ mɔ̀glʋ̀ a wɔlɩ́.»

Actualmente seleccionado:

Matíe 6: NEY

Destacar

Copiar