Matíe 21
21
Zozíi pla Zelízalɛ́mʋ
(Málɩ́kɩ 11.1‑11; Lúkɩ 19.28‑40; Záan 12.12‑19)
1Tányɩɛ́ mʋ́ á mnɛ́ Zelízalɛ́mʋ a dúó gɔ̀ ŋnɩ ka a, dú a múó kʋ ʋ́ lé á wlelʋʋ́ Befazée, ʋ́ gɔ̀ a Olivíe kikéé kʋ ʋ́ a, á ŋnɩ a wlú a, Zozíi cíe ɔ́ kʋjɩ̀nyʋ̀àà a sɔ́. 2Ɔ́ srʋ á mà: «A mʋ dúó a dʋdʋɛ lɛ́ ɔ̀ a mnɩ́, mà a yi jákásɩ a gʋagʋaánɛ yɛ́, ɛ yʋ́ nynʋ́vʋ̀ɛ̀ gɔ̀, a vluloe lé a la mɔ́ mɩ́! 3Nyɔ nɩ yrá amɔ wɔlɩ́ kʋ́ a, a srʋ ɔ́ mà: Kanyɔ ɔ̀ yrɩ́ɩ́. A nɩ cí sɩ́tɛ̀ a, á yii sá cíè lé a yɩ̀sɔ́ a yi kakamnɩ́lɛ́ yi.» 4Wɔlɩ́ɛ́ fɩ́ɛ́ lɩ̀à, ɩ́ nilo lé Lagɔ a nékʋ́cinyɔ a cícíwɔlɩɛ́ fɩ́ɛ́ ɔ́ cí wá a, ɩ ká neé sralɔɔ̀. 5Lagɔ a nékʋ́cinyɔ cí wá mà:
A srʋ Sinyɔ́ɔ # 21.5 Sinyɔ́ɔ: Zelízalɛ́mʋ dùò ʋ́mʋ́ á wlele sáà sɩ́tɛ̀. a nyʋa mà:
A lóo, a kɩ́ɛ ɔ́mɔ́ yie ámá gɔ̀, ɔ yà ɔ́ diwɔtaá sɔ́,
Ɔ́ gblà jákásɩɛ́ jɩ̀, bhè ɛ yʋ́ɔ́ kʋ ɔ bɩ́ ɛ ya bédìè sɔ́. # 21.5 A zɛlɩɩ sáà Eza 62.11; Zaka 9.9.
6Kʋjɩ̀nyʋ̀àà sɔ́ɔ́ mʋ a, cémʋ́ ɔ́ srʋ á, sɩ́tɛ̀ mʋ́ á nɩ. 7Á yi a, á la jákásɩɛ́ yà ɛ yʋ́ɔ́ sɔ́. Á ŋwʋ́ mnaá sɔ́ɔ́ jɩ̀ kóti lé Zozíi plɩ́lɩɩ́ jɩ̀ lé ɔ́ bɔ́ɔ sá. 8Nyʋakɔ́kɔ́mnɩ́ wlʋɛ a mʋ́plalɩ nyúzɔ kʋ́, nyʋa àna dí nyokwigɔ̀lɩ́ lé á pópuí nyúzɔ kʋ́. 9Nyʋa kʋ ɔ́ drɩ̀, nyʋa àna kʋ ɔ bɩ́ á nie lɔlɔ á pá wɔlɩ́: «Ozana#21.9 Ozana: Ebléewɔlɩdrè kʋ̀ʋ, á ŋwɔ́ɔ Lagɔ a ŋnú fa wɔlɩ́. Davídɩ a yʋ́ʋ̀! Pʋ́pʋ́ɛ́ ŋnɩ mɔ̀ kʋ́, mɔ̀ɔ ɔ̀ ŋwɔ́ɔ à tɩtɔ Davídɩ a yʋ́ a! Yɛ́ pʋ́pʋ́ɛ́, mɔ̀ɔ ɔ̀ yi à Kanyɔ Lagɔ a ŋnɩ́ mʋ́ a, ɔ pá mɔ̀ nyú! Ozana! Yɛ́ pʋ́pʋ́ɛ́ Lagɔ gɔ̀ mɔ̀!#21.9 A zɛlɩɩ sáà Lɔlɔ 118.25‑26.»
10Mà Zozíi pla Zelízalɛ́mʋ a, dúó soglù, nyʋa yráyralɛ: «Nyɔgbá lɛ̀ a?» 11Lé nyʋa srʋ á mà: «Galiléebhlɩ a dúó á wlele Nazalɛ́tɩ a, mɔ̀ a Lagɔ a nékʋ́cinyɔɔ́ á wlele lɛ́ Zozíi a, ɔ́mɔ́ kʋ̀ʋ.»
Zozíi pla Lagɔ̀wlʋ̀kádʋ̀ɔ̀ a mnɩ́
(Málɩ́kɩ 11.15‑17; Lúkɩ 19.45‑46; Záan 2.13‑17)
12Zozíi pla Lagɔ̀wlʋ̀kádʋ̀ɔ̀ a mnɩ́ a, ɔ́ jɩ́ɩ nyʋa fɩ́ɛ́ kʋ̀ mɔ̀ lé à pá pɛ́lʋ́ a, ɔ́ bhóbhuo nyʋaá kʋ̀ mɔ̀ɔ lé à ziziele moníi mʋ́ a, a tébhlié lé nyʋa àna kʋ̀ mɔ̀ɔ lé à ŋwʋ́ɛ́ kpóòkpí pɛ́lʋ́ a, ɔ́ pápa a kpíé klá. 13«Lé ɔ́ srʋ á mà: Wɔlɩ́ɛ́ Lagɔ cí lé á jɩ́jrà a, ɩ́mɩ́ ŋwɔ́ɔ mà: Ná wlʋɔ́, Lagɔ̀bhìbhìè wlʋ á na kʋ́ʋ́ kɛ́zɔ̀ wleè. Mà ɛ̀ nɩ́ ghlíighlíinyʋa a wlʋʋ́ ŋwɔ́ɔ!#21.13 A zɛlɩɩ sáà Eza 56.7; Zele 7.11.»
14Mà Zozíi kʋ Lagɔ̀wlʋ̀kádʋ̀ɔ̀ a mnɩ́, lé yɩ́bhlanyʋa yà bhɩbhlanyʋa sɔ́, yió gɔ̀, lé ɔ́ yalɩmalaá.
15Mà wɔlɩ́ɛ́ fɩ́ɛ́ Zozíi nɩ lɛ́ sɩ́tɛ̀ a, ɩ́ mna nyʋa neé, ɩ́ ka ŋnɩ́ lé yúó pá Lagɔ̀wlʋ̀kádʋ̀ɔ̀ a mnɩ́ wɔlɩ́, á nie: «Ozana! Pʋ́pʋ́ɛ́ ŋnɩ à tɩtɔ Davídɩ a yʋ́ɔ́ kʋ́.» Wɔlɩ́ɛ́ ka Lagɔ̀bʋ̀bɔ̀nyʋ̀àkádàà yà lɔ̀ a másɛnyʋaá sɔ́ dɩ kʋ́. 16Ɩ́ ka ŋnɩ́ lé á srʋ Zozíi mà: «Ɩ̀ núé wɔlɩ́ɛ́ yúó cíé a?» Zozíi anɩ́: «Aan, ɩ́ núí. Bhè a nɩ́ à zà wɔlɩdrèè lɩ̀à, Lagɔ̀bɔ̀gʋ a mnɩ́ zɛɛ! Á jɩ́jrà mɔ̀ɔ mà:
Yúó sʋ́sʋ́, lé yúó ànàà bhlʋʋ́ kʋ ayɩ kpacɩ́ a,
Mɔ̀ nɩ lé á bhlɩɛ lé á falɛ mɔ̀ ŋwnú. # 21.16 A zɛlɩɩ sáà Lɔlɔ 8.3. »
17Zozíi bhɩa cícíé zɔ̀ a, ɔ́ tɩ ʋ́ má lé ɔ́ wlʋ́ dú a mnɩ́ lé ɔ́ mʋ Betaníi pʋ́ʋ ka.
Zozíi dabʋ̀ figíe su
(Málɩ́kɩ 11.12‑14,19‑26; Lúkɩ 13.6‑9)
18Zrɩ̀ɩ zɩ a, geglìàmíí Zozíi yrɩ́bha ɔ́ yie Zelízalɛ́mʋ, mà kleé ɛ̀ bhlɔ́ a, ɛ́ plɩ́ ɔ́ gɔ̀. 19Ɔ́ dʋdʋ̀ a, figíe su srí ʋ́ nyúzɔ gɔ̀ lé ɔ́ ŋnɩ ʋ́ gɔ̀, mà ɔ́ dʋdʋ̀ a, nyokwi a pʋpʋ́ kʋʋ wlú, bhʋ́ ɔ́ dabʋ̀lʋ̀ʋ, ɔ́ anɩ́: «Nàa trʋ kɛ́ bhúó!» Ɔ́ cí sɩ́tɛ̀ a, suó kʋ dáamúó lé ʋ́ yɛ. 20Tányɩɛ́ mʋ́ ɔ́ kʋjɩ̀nyʋ̀àà yɛ́ wɔlɩ́ɛ́ a, neé mnaá lé á yrá Zozíi mà: «Cégbá mʋ́ suó nɩ lé ʋ́ yɛ sɩ́tɛ̀ dáamúóó à?» 21Bhʋ́ Zozíi srʋ á mà: «Náa srʋɛ amɔ cícása, a nɩ tɔ̀ cícása Lagɔ duo a, lé a nɩ nɩ́ ɔ́ duo bɩ́ sa a, wɔlɩ́ɛ́ ɩ́ nɩ lɛ́ figíe suó a, a yi míi lé a yií nɩ, lé a yi míi lé a yi kíkéé lɩ̀à srʋ mà: Kíkée! Wlʋ́ bhlekʋ́ lé bhli jié! Lé cémʋ́ a cí lɛ́ a, ɩ́ yi nilo. 22A nɩ bhibhie lé a nɩ tɔ̀ Lagɔ duo a, wɔlɩ́ɛ́ fɩ́ɛ́ a na kɔ́ɔ́ mʋ́ yrá a, a yií yɛ́.»
Dɛ́gbámɔ̀ Zozíi a pɔ́wa wlʋ́ɛ́ lɛ́ à?
(Málɩ́kɩ 11.27‑33; Lúkɩ 20.1‑8)
23Zozíi pla Lagɔ̀wlʋ̀kádʋ̀ɔ̀ a mnɩ́ a, ɔ́ kʋ cɩ́ada lé Lagɔ̀bʋ̀bɔ̀nyʋ̀àkádàà yà bhlɩ́ɛ́ a mnɩ́ a dɔ̀panyʋaá sɔ́ yio gɔ̀ lé á yrɔ́ɔ́ mà: «Ɔ̀ nyɛ́ mɔ̀ lɔ̀ lé ɩ̀ nie wɔlɩ́ɛ́ ɩ̀ nie lɛ́ à? Lé ɔ̀ nyɛ́ mɔ̀ bhʋ́anɩ pɔ́wa a?» 24Bhʋ́ Zozíi srʋ á mà: «Náa ká sáà amɔ wɔlɩdrè a múó coco kʋ́ yráa, a nɩ srʋ mɔ́ a, lɛ́ɛ́ ɛ̀ nie lé ɩ́ nie sa a, ɩ́ yi amɔ mɛ́ pápa a. 25Ɔ̀ cíe Záan lé ɔ́ ŋwʋ́ lɛ́ nyʋa nyú wlú à? Lagɔ cíeó? Mà nyʋa cíeó?» Ɔ́ yráa a, a sɛ́fʋɔ́, á bháa ʋ́ wɔlɩ́ɛ́ a kʋbhlalɛ kʋ́: «À nɩ̀ cí mà Lagɔ cíe Záan a, ɔ́ yi cí mà, bhè ɛ̀kʋ̀ʋ̀ lé a nɩ́ ɔ cícíwɔlɩɛ́ wɔlɩ́ kʋ́ bhá à? 26À nɩ cí sáà mà nyʋa cíeó a, ʋ́nn! A mányɩ jrèè kʋ́! Nyʋa fɩ́ɛ́ yì saá cémʋ́ Záan ŋwɔ́ɔ wá Lagɔ a nékʋ́cinyɔ a.» 27Ɩ́ ka ŋnɩ́ a, á srʋ Zozíi mà: «Nyɔɔ́ cíe Záan a, à nɩ́ ɔ́ yì.» Bhʋ́ Zozíi a sɛ́fʋɔ́ srʋ á sáà mà: «Ààà! Ná sɛ́fʋɔ́ sáà, pɔ́waá à nie lé ɩ́ nie wɔlɩ́ɛ́ ɩ́ nie lɛ́ a, nɩ́ kaa amɔ pápa.»
Nyɔ a múó a yúó sɔ́ a núnúó
28Bhʋ́ Zozíi srʋ á sɔ́kʋ́ mà: «Cégbá mʋ́ a bhobhole wɔlɩdrèè lɩ̀à zà a? Nyɔ a múó kà yúó sɔ́ a, ɔ́ wle ɔ tagàyʋ̀ɔ̀ lé ɔ́ srʋ ɔ́ mà: Ná yʋ́ʋ, kà zɩmnɛ́ glàyʋ̀làgbàà a mnɩ́ nɔnʋʋ́ mʋ. 29Yʋ́ɔ́ anɩ́: Nɩ́ yrá, nɩ́ ka mɔ̀ɔ mʋ! Yʋ́ɔ́ cí cícása sɩ́tɛ̀, mà ɔ́ cɩ́cɩ bhobhoé, lé ɔ́ mʋ lágbàà a mnɩ́ nɔnʋzrɩ̀ka. 30Tʋ́ɔ́ mʋ sɔ́ yʋɔ́ gɔ̀ lé ɔ́ srʋ ɔ́ nɔnʋwɔlɩɛ́ a múóó, mà yʋ́ɔ́ srʋ ɔ́ mà: À Tʋ́ʋ̀, yáa nú! Náa mnɛ yɩ́ lɛ́. Ɔ́ ŋwnʋ́ mà ɔ nɩ́ mɔ̀ɔ mʋ. 31Ámá yúó sɔ́ɔ́ lɩ̀à, ànɔ gbá ŋwʋ́ ʋ́ ɔ tʋ́ à?» Nyʋaá anɩ́: «Tagàyʋ̀ɔ̀ mɔ́ ŋwʋ́ ʋ́ ɔ tʋ́.» Bhʋ́ Zozíi srʋ á mà: «Náa srʋɛ yɩ́ lɛ́ amɔ cícása mà, lapóo a kʋbhlinyʋaá yà kàpàkápáŋwnʋaá sɔ́ yi kɛ́zɔ̀ amɔ kʋ́klʋ́dá, Lagɔ a Léyibhlɩɛ́ a mnɩ́. 32Ɛ̀kʋ̀ʋ̀ a? Záan yi amɔ gɔ̀, lé ɔ́ pápa amɔ Lagɔ a námanyùzɔ̀ɔ̀ a na ká bhli a, lé a nɩ́ ɔ cícíwɔlɩɛ́ cícása kʋ́ bhá. Mà lapóo a kʋbhlinyʋaá yà kàpàkápáŋwnʋaá sɔ́ ámá bhá ɔ cícíwɔlɩɛ́ cícása kʋ́. A dʋdʋ̀ wɔlɩ́ɛ́ fɩ́ɛ́ lɩ̀à jɩ̀, sɩ́tɛ̀ ɩ́ kʋ lé a nɩ́ a nɩnɩgbɩ cɩ́cɩ lé a ká ɔ cícíwɔlɩɛ́ cícása kʋ́ bhá.»
Glàyʋ̀làgba a mnɩ́ a nɔnʋzrɩ̀nyʋ̀àà nyù mnɩ́
(Málɩ́kɩ 12.1‑12; Lúkɩ 20.9‑19)
33Lé Zozíi srʋ á sɔ́kʋ́ mà: «A pʋ núnúó àna nyúkwlí. Nyɔ a múó glɩ ɔ glàyʋ̀làgba, ɔ́ kɩklaá, lé ɔ́ wlúu lé ɔ́ ŋwʋ́ mɔ̀ɔ glàyʋ a cɩada. Ɔ́ pá sáà mɔ̀ɔ gbadʋ́ lágbàà a dɛdɛ̀ a zà. Ɔ́ ŋwʋ́ mɔ̀ɔ nɔnʋzrɩ̀nyʋa ɔ yà sɔ́ ká bhábhà lé ɔ́ mʋ wɛ́ɛ. 34Glàyʋ̀ɔ̀ a glɛ̀glɛ̀ tanyɩ ŋnɩ a, lágbɩ̀kànyɔ̀ɔ̀ cíe ɔ cóyuó lágbaá nɔnʋzrɩ̀nyʋ̀àà gɔ̀ lé cémʋ́ ɔ yàsɔ́ ŋwʋ́ʋ wá kʋ́ a, a ká yɩ́ bhábhà. 35Mà nɔnʋzrɩ̀nyʋàà bhli cóyuó kʋ́, á bhɩtɩ múó, á bhlá múó lé á pá taánɔɔ́ cɔ́kpalɩ lé á bhlɔ́ɔ́. 36Lé lágbɩ̀kànyɔ̀ɔ̀ cíe sɔ́kʋ́ yígàdà cóyuo zù lé a zi tagà anaá kʋ́ a, mà nɔnʋzrɩ̀nyʋ̀àà wɔlɩ́ɛ́ a múóó mɩ́ á nɩ. 37Zɔ̀bhɩ̀àdàà, lágbɩ̀kànyɔ̀ɔ̀ cíe ɔ mnɩ́ a yʋ́, ɔ́ srʋ ɔ nyoku mà: Á yi ʋ́ ná yʋ́ɔ́ ŋwʋ́. 38Mà nɔnʋzrɩ̀nyʋ̀àà yɛ́ yʋ́ɔ́ a, á srʋ á nyoku mà: Lágbàà a jáalinyɔɔ́ mɔ́ yie ɔ̀! À bhlɔ́ɔ́ bhè à kà lágbàà jáa kʋ́ li! 39Á bhli Nyɔɔ́ a Yuwliyʋɔ́ kʋ́ lé a yɔ̀sɔ́ wlʋ́ lágbàà a mnɩ́ lé á bhlɔ́ɔ́.» 40Lé Zozíi yrá á mà: «Lágbɩ̀kànyɔ̀ɔ̀ nɩ yi a, cégbá mʋ́ ɔ́ na ká nɔnʋzrɩ̀nyʋ̀àà kʋ́ bhli áa?» 41Nyʋaá anɩ́: «Lágbɩ̀kànyɔ̀ɔ̀ nɩ yi a, ɔ nɩ́ ka nyɔ a ŋazɩ bhobho ɔ́ na ká mɔ́nyùmò nɔnʋzrɩ̀nyʋ̀àà a lɔ̀fɩ́ɛ́ bhlá, lé ɔ ká yígàdànyʋa lagbàà a mnɩ́ ŋwʋ́, ɔ yà sɔ́ ká bhábhà.» 42Lé Zozíi srʋ á mà: «A nɩ́ à zà wɔlɩdrèè lɩ̀à Lagɔ̀bɔ̀gʋ a mnɩ́ zɛɛ? Á jɩ́jrà mà:
Cókpalɩ́bhuoó ghlɩpanyʋaá pá wá klá a,
Ámá bhli yɩ́ lɛ́ wlʋɔ́ kʋ́.
À nɩ̀ dʋdʋ̀ ɩ́ lɔ̀fɩ́ɛ́ a,
Lagɔ á nɩnɩwɔlɩ kʋ̀ʋ̀,
Námasa a pʋpʋ́ kʋ̀ àmɔ̀ à zà. # 21.42 A zɛlɩɩ sáà Lɔlɔ 118.22‑23.
43Ná srʋɛ yɩ́ lɛ́ sáà amɔ mà: Lagɔ a Léyibhlɩɛ́, á yi amɔ mɛ́ gɔ̀ bhá lé á yie yígàdàbhlɩ kʋ́ a nyʋaá à kà a nɩnɩgbɩ náa a, nyɛ́. [44Mà nyɔɔ́ nà kà cɔ́kpalɩ́bhuo jɩ̀ zɔ̀ bhli a, ɔ́ yi ʋ́ ɔ nyoku nɔmɩ́ zɛzɩ̀à, ɩ́zà nyɔɔ́ á na ká jɩ̀ bhli a, á yio wlawlaà.#21.44 A zɛlɩɩ sáà Eza 8.14. Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.]» 45Mà tányɩɛ́ mʋ́ Lagɔ̀bʋ̀bɔ̀nyʋ̀àkádàà yà Falizɩ́ɛnyʋaá sɔ́, nú Zozíi a cícíwɔlɩɛ́ a, á yɩbhlɩ saá mà ámá ɔ́ sa. 46Á yrá yɩ́ la ɔ́ kʋ bhlibhlíé, mà á gúu nyʋa a zumole kʋ́, nyʋa fɩ́ɛ́ yì saá mà Lagɔ a nékʋ́cinyɔ ɔ́ ŋwɔ́ɔ.
Actualmente seleccionado:
Matíe 21: NEY
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© (Active), Wycliffe Bible Translators, Inc. All rights reserved.
