Matíe 18

Ɔ̀ ŋwɔ́ɔ Lagɔ a Léyibhlɩɛ́ a mnɩ́ a nyɩ́kpɔkádɔ aa?

(Matíe 5.29‑30; Málɩ́kɩ 9.33‑50; Lúkɩ 9.46‑50)

1Bhʋ́ a tányɩɛ́ a múó a mnɩ́, kʋjɩ̀nyʋ̀àà yi Zozíi gɔ̀ lé á yrɔ́ɔ́ mà: «Nyɔ gbá ŋwɔ́ɔ Lagɔ a Léyibhlɩɛ́ a mnɩ́ a nyɩ́kpɔkádɔ a?» 2Á yrɔ́ɔ́ a, ɔ́ wle yítòtòyilɛ̀ lé ɔ́ sríó á drɩ̀. 3Lé ɔ́ srʋ á mà: «Náa srʋɛ amɔ cícása, a nɩ nɩ́ cɩ́cɩ lé a ká yúó bhísakʋ́ plɩ́ a, a nɩ́ ka Lagɔ a Léyibhlɩɛ́ a mnɩ́ pla. 4Nyɔɔ́ nà kà ɔ nyoku sá kwlée yítòtòyilɛ̀ɛ̀ lɩ̀à bhísakʋ́ a, ɔ́mɔ́ nà kà Lagɔ a Léyibhlɩɛ́ a mnɩ́ mɔ̀ nyɩ́kpɔkádɔ plɩ́. 5Lé nyɔ nɩ bhli yʋ́ɔ́ lɩ̀à bhísakʋ́ a yʋ́, ná ŋnɩ́ mʋ́ námasa kʋ́ a, mɔ́ɔ ɔ́ bhli námasa kʋ́.

À mányɩ kʋ́ à nɩ̀ kà nyumoé nɩ

(Málɩ́kɩ 9.42‑48; Lúkɩ 17.1‑2)

6Mɔ̀ nyɔɔ́ nà kà nɩ lé yúó lɩ̀à à kà ná fádùò a, á nyièdɩ a yʋ́ ká nyumoé nɩ a, á yi mɔ̀ cɔ́kʋ kádʋ blɛɛ́ gʋa, lé á yi mɔ̀ jié páa.

7Nɩnɩgbɩɛ fɩ́ɛ́ ɩ̀ nie lé nyʋa nie nyumoé a, ɩ́ pʋpʋ́ nilo, kplé ya zɩkpa zɔ̀ ŋnɩ. Cícása lé bhʋ́anɩ nɩnɩgbɩ̀ɛ̀ nɩ́ ka kɛ́ zɩkpa zɔ̀ bhɩa, mà mɔ̀ nyɔɔ́ nà kɩ̀ɩ fʋfʋa a kplé lé ɛ́ kla mɔ̀! 8Ɛ́ yi náa nà glɔ̀gbá ò, nà kokokpó ò, ɩ́mɩ́ nɩ̀ nɩ lé nɩ̀ nɩ nyumoé a, dií kʋ́ lé pɩ́ɩ́ klá kplɔ́ɔ̀kplɔ́ɔ̀! Nɩ̀ kà sɔdrè yà mɔdrè sɔ́ lé nɩ̀ mʋ Lagɔɔ́ a, ɩ́ náa lé ɩ́ zi kà glɔ̀gbɩ́ sɔ́ yà bhɩɩ́ sɔ́ sɔ́ ka lé kà kosugàlà a nɩ́ nyúmo kɔ́ɔ̀kɔ́ a mnɩ́ bhliì. 9Nà yɩ́ ká nɩ lé kà nyumoé nɩ a, sɛɛ́ mɔ̀ɔ lé pɛ́ɛ́ klá kplɔ́ɔkplɔ́ɔ! Nɩ̀ kà yɩ́ a múó lé nɩ̀ mʋ Lagɔ̀duú a, ɩ́ náa lé ɩ́ zi ka yɩ́ sɔ́ lé kà kosugàlà a nɩ́ nyúmo kɔ́ɔ̀kɔ́ a mnɩ́ bhlii.

Bhlábhlɛ́ ɛ̀ tuo lé á yɛ́

(Lúkɩ 15.3‑7)

10A mányɩ, a ná fɛlɩa yúó lɩ̀à, náa srʋɛ amɔ, á kplɔkplɔzìzìè kʋ̀ kɔ́ɔ̀kɔ́ lagɔɔ́ mɔ̀, ɩ Tʋ́ a drɩ̀. 11A lɛ́bhɛɛ, Nyɔɔ́ a Yuwliyʋɔ́, ɔ́ɔ yi lé ɔ ká ʋ́ nyʋaá yà wá tuo a, ʋ́ neé sa.

12Cégbá mʋ́ a bhobhole wɔlɩdrèè lɩ̀à a? Nyɔ nɩ ka bhlábhlɩ́ a gwlɩ̀ gbɩ́ lé ɩ́ nyièdɩ a bhlábhlɛ́ a múó nɩ tuo a, ɔ́ɔ nɩ́ tɩ ʋ́ bhlábhlɩ́ ànɩ̀ɛ̀ gwlɩ̀ɛ̀mɔ̀nàà lé kʋ́gbá fɛnaá kíkéé jɩ̀ lé ɔ nɩ́ mʋ bhlábhlɛ́ɛ́ ɛ̀ tuo a, mʋ́mɔ ka a? 13Náa srʋɛ amɔ mà ɔ nɩ yɛ́ɛ́ a, ɛ́ a múó a lɔlɔɔ́ bhlɔ́ a, ʋ́ zù lé ʋ́ zi bhlábhlɩ́ ànɩ̀ɛ̀ gwlɩ̀ɛ̀mɔ̀nàà lé kʋ́gbá fɛnaá nɩ́ tuo a kʋ́. 14Sɩ́tɛ̀ mʋ́ a Tʋ́ɔ́ ɔ̀ kʋ̀ ɔ̀ lagɔɔ́ a, ɔ nɩ́ yrá sáà lé ɔ yúó a nyièdɩ a yʋ́ a múó coco tuo.

Nyɔ nɩ nɩ nyumosa a, a cieloó

15Ɩ̀ nɩ́ayʋ́ nɩ bhli mɔ̀ nyumosa kʋ́ a, mʋ ɔ́ gɔ̀ lé a gbʋ́gbʋ lé kɔ̀ɔ gɔ̀ cíi. Ɔ́ nɩ nú mɔ̀ a, yà ʋ́ ɩ̀ nɩ́ayʋ́ neé sa. 16Ɩ́ zà ɔ nɩ nɩ́ mɔ̀ nyúkwlí pʋ a, mʋ́mɔ sɔ́kʋ́ nyɔ ànɔ a múó ò, nyʋa sɔ́ ò, lé yà sɔ́ a mʋ ɔ́ gɔ̀, bhʋ́ a tányɩɛ́ ŋwɔ́nɩ́srɩ̀nyʋa a sɔ́ ò, ta ò, ká ʋ́ kʋ lé a ká núnuù.#18.16 A zɛlɩɩ sáà Detro 19.15. 17Ɔ nɩ á nyúkwlí pʋ a, mʋ lé cilɩɩ́ cɛ́cɩgboó mɔ̀, ɔ nɩ nɩ́ yɩ́ sɔ́kʋ́ cɛ́cɩgbòò nyúkwlí pʋ a, srʋ yɩ́ ɩ̀ nyòku mà ɩ̀ nɩ́ayʋ́ɔ́ nɩ́ Lagɔ yì, lapóo a kʋbhlinyɔɔ́ bhísakʋ́ ɔ́ kʋ́. 18Cícása a mnɩ́, náa srʋɛ amɔ mà, nɩ̀ gʋa dɛ́ dʋ̀dʋ kʋ́ lɛ́ a, ɛ́ yi lagɔɔ́ mɔ̀ɔ gʋalɔɔ̀. Ɩ́zà nɩ vlulò dɛ́ Dʋ̀dʋ kʋ́ lɛ́ a, ɛ́ yi lagɔɔ́ mɔ̀ vlulò.

19Cícása a mnɩ́ náa srʋɛ sɔ́kʋ́ amɔ mà, a nyièdɩ a nyʋa a sɔ́ nɩ núnuù dɛ́ Dʋ̀dʋ kʋ́ lé a nɩ yráa ɩ Tʋ́ɔ́ ɔ̀ kʋ̀ lagɔɔ́ a lɛ́ mʋ́ a, ɔ́ yi amɔ mɛ́ nyɛ́. 20Ɩ́zà náa srʋɛ sáà amɔ mà dɛ́ɛ́ nyʋa sɔ́ yà nyʋa ta sɔ́ ŋnɩlɔ̀ wlú ná ŋnɩ́ mʋ́ a, ɩ́ kʋ á nyièdɩ.»

Cóyʋ a múó nɩ́ yrá ɔ liyʋ á ciecú

21Lé Pɩ́ɛ́lɩ ŋnɩ Zozíi gɔ̀, lé ɔ́ yrɔ́ɔ́ mà: «Kanyɔɔ̀, ɩ nɩ́ayʋ́ nɩ nɩ mɔ́ɔ nyumoé a, zùò kʋ́ ɩ́ yió cie áa? Gbaásɔ́ kʋ́ʋ?» 22Zozíi anɩ́: «Ʋ́nn! Nɩ́ mɔ̀ srʋ mà gbàásɔ́ kʋ́, mà nɩ̀ yió cie a, cieloó gwlɩ̀ ta lé kʋ́gbá a cí a gbàásɔ́ kʋ́.»

23Lé Zozíi pá núnúó mà: «Ɩ́zà Lagɔ a Léyibhlɩɛ́ a mnɩ́ a wɔlɩ́ wlʋ́ mànɩ́, cémʋ́ lóo wle ɔ cóyuó lé ɔ káá jɩ̀ ɔ́ kpa sa a, 24mà ɔ ká kpaá a zele kʋ́ cíe a, cóyʋɔ́ kà ɔ́ moníi kɔ́kɔ́mnɩ́ a kpaa ɔ́mɔ́ á lɔɔ́ drɩ̀. 25Mà cémʋ́ ɔ nɩ́ bhúanɩ moníe ka lé ɔ ká kpaá pɛ́ɛ a, ɔ kanyɔɔ́ srʋ nyʋa mà a ŋwʋ́ ɔ́ pɛ́lʋ́, ɔ́mɔ́, ɔ ŋwnɔ́, ɔ yúó, lé ɔ kakalɩɛ́ fɩ́ɛ́ bhè ɔ kpaá ká pɛ́ɛlɔ̀. 26Mà ɔ Kanyɔ cí kɔ́ɔ̀kʋ́ sɩ́tɛ̀ a, cóyʋɔ́ sra ɔ́ drɩ̀ koti sá, lé ɔ́ bhli ɔ́ bhɔɔ́ kʋ́, lé ɔ́ srʋ ɔ́ mà: Kanyɔɔ̀, ɩ́bhìè tɛ́ma duo kʋ́ mà, ɩ́ yi nà kpaá fɩ́ɛ́ pɛ́ɛ! 27Cémʋ́ ɔ́ cíi a, ɩ́ la ɔ kanyɔ ŋazɩ kʋ́, ɩ́ ka ŋnɩ́ lé ɔ́ cieloó. 28Mà cóyʋɔ́ flʋ zɔ̀ a, ɔ́ licoyʋ a múó kà wá ɔ moníi pɛ a kpa a, ɔ yɔ̀sɔ́ gbɩ́dà a, ɔ́ bhli ɔ blɩzɔ̀ kʋ́ klɩklɩ, lé ɔ́ srʋ ɔ́ mà: Pɛ́ɛ ná kpaá ɩ̀ kà a! 29Lé ɔ́ liyʋɔ́ sra ɔ́ drɩ̀ koti sá lé ɔ́ bhli ɔ́ bhɔɔ́ kʋ́ lé ɔ́ srʋ ɔ́ mà: Ɩ́bhìè tɛ́ma duo kʋ́ àyé mà, ɩ́ yi nà kpaá pɛ́ɛ! 30Mà ɔ́mɔ́ ɔ nɩ́ ɔ liyʋɔ́ a bhibhiewɔlɩɛ́ kʋ́ ŋwnʋ́ʋ lé ɔ́ bhlio kʋ́ lé ɔ́ ŋwʋ́ ɔ́ jɩ̀ɩ ɔ ká ɔ kpaá pɛ́ɛ a ká mɔ̀ bhɩa. 31Mà tányɩɛ́ mʋ́ ɔ licoyuo ànàà yɛ́ wɔlɩ́ɛ́ ɔ́ nɩ a, ɩ́ bhláá, bhʋ́ á mʋ lé á sa mɔ̀ wɔlɩ́ɛ́ ɩ̀ plɩ́ a á kanyɔ. 32Bhʋ́ á kanyɔ wle cóyʋɔ́ lé ɔ́ srʋ ɔ́ mà: Bhàlʋ̀còyʋʋ, tányɩɛ́ mʋ́ ɩ̀ bhibhie mɔ́ a, ɩ́ cie mɔ̀ ná kpa kɔ́kɔ́mnɩ́ɛ́ ɩ̀ kà a. 33Ɩ̀ yi la sáà ɩ̀ liyʋɔ́ a ŋazɩ bhobho a, cémʋ́ ɩ́ bhobholɛ́ nà ŋazɩ̀ɛ̀ a. 34Wɔlɩ́ɛ́ cóyʋɔ́ nɩ a, ɩ́ bhláa ɔ́ kanyɔ dɩ, ɩ́ ka ŋnɩ́ lé ɔ́ ŋwʋ́ ɔ́ jɩ̀ɩ, ɔ ká mɔ̀ɔ kʋ lé ɔ ká ɔ kpaá a lɔ̀fɩ́ɛ́ pɛ́ɛ.» 35Bhʋ́ Zozíi srʋ á mà: «Sɩ́tɛ̀ mʋ́ ɩ Tʋ́ɔ́ ɔ̀ kʋ̀ lagɔɔ́ a, na ká amɔ kʋ́ bhliì, a nɩ nɩ́ a kplɔkplɔdì a mnɩ́ a lía cie a.»

Actualmente seleccionado:

Matíe 18: NEY

Destacar

Copiar