Matíe 14
14
Zán Batísɩ a kwɩ́ɛ́ a wɔlɩ́
(Málɩ́kɩ 6.14‑29; Lúkɩ 9.7‑9)
1Bhʋ́ a tányɩɛ́, Elódʋ ŋwɔ́ɔ Galilée á gɔ̀mna a, ɔ́ nú Zozíi a wɔlɩ́. 2Ɩ́ ka ŋnɩ lé ɔ́ srʋ ɔ cóyuó mà: «Zán Batísɩ kʋ̀ʋ̀, ɔ́ ya galɔ̀ ɩ́zà ɔ́ nie bhʋ́anɩ lɛ̀wɔ̀lɩ̀ɛ̀.»
3A lɛ́bhɛɛ cémʋ́ Záan a kwɩ́ɛ́ a wɔlɩ́ɛ́ plɩ́ɩ a, ɩ́mɩ́ lɛ̀: Tányɩ a múó, Elódʋ srʋ nyʋa lé á bhli Záan Batísɩ kʋ́, lé á gʋɔ́ lé á ŋwʋ́ ɔ́ jɩ̀ɩ, ɔ́mɔ́ Elódʋ ɔ nɩ́ayʋ́ Filípʋ a ŋwnɔ́ Elodíádɩ a zà. 4Elódʋ anɩ́, ɛ̀kʋ̀ʋ̀ lé Záan srʋ ɔ́ mà: «Nɩɩ́ ka lé kà Elodíádɩ bhá, ɩ nɩ námasa ŋwɔ́ɔ.» Wɔlɩ́ɛ́ Záan cí lɛ́ sɩ́tɛ̀ a, ɩ́ ka ŋnɩ́ lé Elódʋ ŋwʋ́ ɔ́ jɩ̀ɩ. 5Elódʋ yrá lé ɔ́ kɔ́ɔ́ la bhlá, mà cémʋ́ nyʋa fɩ́ɛ́ yì saá mà Záan ŋwɔ́ɔ Lagɔ a nékʋ́cinyɔ a, ɩ́ ka ŋnɩ́ lé ɔ́ gú. 6Mà Elódʋ a vavayruó a glɩ̀sɩ́sɩ̀ɛ̀ a yruó kʋ́, bhʋ́ Elodíádɩ a ŋnɩ́keyʋ pla jrè lé ɔ́ yɛ nyʋaá Elódʋ wle a, a drɩ̀. Bhʋ́ Elódʋ bháa ŋnɩ́keyʋɔ́ a wɔlɩ́ɛ́ a wàwʋ́ kʋ́. 7Ɩ́ ka ŋnɩ́ lé ɔ́ sɔ́lɩ lé ɔ́ srʋ ŋnɩ́keyʋɔ́ mà: «Nàá gú lɛ́ɛ́ ɩ̀ wà a, pɛ́ɛ́ ŋnɩ́ ká mɔ̀ɔ mɛ́ nyɛ́.» 8Mà ŋnɩ́keyʋɔ́ mʋ lé ɔ yà ɔ nɛ́ sɔ́ núnuu fɩ́ɛ́ lé ɔ́ yi. Ɔ́ yi a, ɔ́ srʋ Elódʋ mà: «Zán Batísɩ a wlúó, ŋwʋ̀ ʋ́ bíipá jɩ̀ lé nyɛ́ mɔ́ mʋ́ dɛ́ kakamnɩ́lɛ́.» 9Wɔlɩ́ɛ́ ŋnɩ́keyʋɔ́ cí a, ɩ́ wɔtɔma lóo Elódʋ kpɩkpɩ gɔ̀, mà cémʋ́ ɔ́ ya la nyʋa a klʋ́ jɩ̀ sɔ́lɩ a, ɔ́ ŋwnʋ́ʋ yɩ́. 10Ɔ́ cíe nyɔ jɩ̀ŋwʋ̀gboó ɔ ká Zán Batísɩ wlú kʋ́ dí. 11Nyɔɔ́ dí Zán Batísɩ wlú kʋ́ lé ɔ́ ŋwʋ́ ʋ́ bɩ́ɩpá jɩ̀ lé ɔ́ lʋʋ́ ŋnɩ́keyʋɔ́ lé ɔ́ fʋʋ́ ɔ́ nɛ́. 12Záan a kʋjɩ̀nyʋ̀àà yi ɔ́ gàzɛ̀ɛ̀ bhá ka lé á zízìò, lé á mʋ yɩ́ Zozíi dí sa ka.
Zozíi nyɛ́ nyʋa a dí sɔ́ lé gwlɩ̀ kʋ́gbá lelilɩ
(Málɩ́kɩ 6.30‑44; Lúkɩ 9.10‑17; Záan 6.1‑14)
13Mà tányɩɛ́ mʋ́ Zozíi nú Záan a kwɩ́ɛ́ a wɔlɩ́ a, ɔ́ bhá gɔ́lʋ́ lé ɔ́ wlʋ́ bhʋ́anɩ bhlɩ́ɛ́ a mnɩ́ lé ɔ́ mʋ dɛ́ɛ́ ɛ̀ bɩglɩ̀ lé nyɔ nɩ́ kʋ a. Mà tányɩɛ́ mʋ́ nyʋaá yɩbhlɩ saá a, á wlʋ́ díé fɩ́ɛ́ a mnɩ́ lé á tʋtrʋ nyɩ́é gɔ̀ lé á jɩ́ɔ́ mɔ̀ɔmɔ̀ kʋ́. 14Zozíi wlʋ́ kɔ́ɔ̀kʋ́ gɔ́lʋ́ a mnɩ́ a, nyʋaá ámá lɛ̀, a nɩ́ bɛ́, ɩ́ bhlálɔɔ́ ŋazɩ, lé ɔ́ yalɩma á nyièdɩ a gupuonyʋa á. 15Kosúgbòsa, Zozíi a kʋjɩ̀nyʋ̀àà ŋnɩ ɔ́ gɔ̀ lé á srʋ ɔ́ mà: «Dɛ́ɛ́ à kʋ̀ lɛ́ a, bhʋ́ bɩglɩ̀, lé yrʋ́ ya sáà yiosa bhli, srʋ nyʋaá a mʋ dɛ́ díé a mnɩ́ lelilɩ kla ka.» 16Zozíi anɩ́: «A nɩ́ ka dá mʋ, amɔ mɔ̀glʋ̀, a nyɛ́ á lelilɩ!» 17Mà á srʋ ɔ́ mà: «Flɔ́ɔbhi gbɩ́ lé zrìyuo sɔ́ cɩ́ɩ́n mɩ́ à kà.» 18Zozíi anɩ́: «A la mɔ́ɔ mɩ́ dɛ́.» 19Lé ɔ́ srʋ nyʋa fɩ́ɛ́ mà a plɩ́ɩ pitíé jɩ̀ a bɔ́bɔ̀ sá, lé ɔ́ bhá flɔ́ɔbhié gbɩ́ɛ́, lé zrìyuó sɔ́ɔ́, lé ɔ́ gbláa lagɔɔ́ yɩ́ lé ɔ́ bhibhiè lé ɔ́ pá yúó. Lé ɔ́ dédìè flɔ́ɔ mʋ́, lé ɔ́ nyɩ́ʋ́ ɔ́ kʋjɩ̀nyʋ̀àà a ká nyʋaá fɩ́ɛ́ à kʋ̀ jrè gɔ̀ a, bhábhà, a ná jie nyɔ kʋ́. 20Nyʋa fɩ́ɛ́ li lé á lʋ, lé flɔ́ɔ ʋ̀ ji kʋ́ lé á fa a, ʋ́ yie papɩ́ a kʋ́gbá sɔ́. 21Nyʋaá à li a, a nɩ sa mɔ̀ɔ ŋwnáá lé yúóó sɔ́ a, á bhli nyʋa a dí sɔ́ lé gwlɩ̀ kʋ́gbá.
Zozíi námnɩ nyɩ́é klʋ́
(Málɩ́kɩ 6.45‑52; Záan 6.15‑21)
22Ɩ̀lɩa plɩ́ kɔ́ɔ̀kʋ́ a, Zozíi mɛ́ ɔ́ kʋjɩ̀nyʋ̀àà jɩ̀ a ká gɔ́lʋ́ bhá a kɔ́ɔ́ nyɩ́é a bɩ́ gláa ka mʋ, bhè ɔ́mɔ́ ɔ ká nyʋaá gɔ̀ cíi a ká dɛ́ á wlʋ́ɛ́ a yrɩ́bhà. 23Ɔ́ cíi nyʋaá gɔ̀ lé á mʋ a, ɔ́ gblà kíké wlú, ɔ́ gbʋ́gbʋ̀ ɔ ká bhibhie. Ɔ́ a múó ɔ́ kʋ ʋ́ lé yrʋ́ bhɩa lagɔɔ́. 24Gɔ́lʋ́ɔ́ ya yɩ́ la dʋ̀dʋ dá trʋma, mà vʋ̀vɔ̀lʋ̀ɔ̀ ʋ̀ yie a, ʋ́ nɩ lé nyɩ́é bhá lákwɩ kʋ́ lé lákwɩɛ́ pápalɛ gɔ́lʋ́ɔ́ kʋ́. 25Mà zizìèda, á kʋ ʋ́ bhè Zozíi námnɩlɛ nyíé klʋ́ ɔ́ yilaá mʋ́. 26Mà tányɩɛ́ mʋ́ ɔ́ kʋjɩ̀nyʋ̀àà yɛ́lɔɔ́ nyíé klʋ́ a námnɩda a, di wlʋ́ á mnɩ́, á pá gbányìdi, á anɩ́: «Gàgàkʋ kʋ̀ʋ!» 27Bhʋ́ Zozíi sa né, ɔ́ anɩ́: «A ŋwʋ́ mɔ̀ɔ di mà mɔ́ɔ kʋ̀ʋ, ŋanɩmɛ ná bhlá amɔ!»
28Bhè Pɩ́ɛ́lɩ sa né ɔ́ anɩ́: «Kanyɔɔ̀, mɔ̀ nɩ̀ kʋ̀ cícása ʋ́ a, nɩ lé ká sáà nyɩ́é klʋ́ námnɩ lé ká mɔ̀ mʋ́ yi.» 29Zozíi anɩ́: «Yi!» Lé Pɩ́ɛ́lɩ wlʋ́ gɔ́lʋ́ɔ́ a mnɩ́ lé ɔ́ kwlíi nyɩ́é klʋ́ lé ɔ́ náa lé ɔ́ mʋ Zozíi mʋ́. 30Mà cémʋ́ ɔ́ yɛ́ vʋ̀vɔ̀lʋ̀ɔ̀ lé ʋ́ ka fɩ́ a, ŋanɩmɛ yilo kʋ́, ɩ́ nɩ lé ɔ́ cíe dʋadʋ́ kʋ́, bhè ɔ́ bhɩa wɔlɩ́: «Kanyɔɔ̀, yi mɔ́ɔ kʋ́!» 31Lé Zozíi fa sɔɔ́ lé ɔ́ bhlio kʋ́ lé ɔ́ srʋ ɔ́ mà: «Nà fádùò nɩ́ zù, lɛ́gbá kʋ̀ʋ bhè nà duo nɩ́ plɩ́ à?» 32Áa sɔ́ɔ́ pla bhlà saá gɔ́lʋ́ɔ́ a mnɩ́ bhè vʋ̀vɔ̀lʋ̀ɔ̀ dúò. 33Mà Zozíi a kʋjɩ̀nyʋ̀àà ànàà kʋ̀ la gɔ́lʋ́ɔ́ a mnɩ́ a, á sra Zozíi a drɩ̀ koti sá lé á srʋ ɔ́ mà: «Lagɔ a Yuwliyʋ mɔ̀glʋ̀ ɩ̀ ŋwɔ́ɔ cícása!»
Zozíi yalɩma Zenezalétɩ bhlɩ a mnɩ́ a nyʋa
(Málɩ́kɩ 6.53‑56)
34Zozíi yà ɔ́ kʋjɩ̀nyʋ̀àà sɔ́ dí lé á ŋnɩ Zenezalétɩbhlɩ a mnɩ́. 35Bhlɩ́ɛ́ a mnɩ́ a nyʋaá yɩbhlɩ Zozíi a, áa fa mɔ̀ɔmɔ̀ a díé fɩ́ɛ́ a mnɩ́ dí, lé á lɔɔ́ mɔ̀ɔ a gupuonyʋa fɩ́ɛ́. 36Lé á bhibhie Zozíi lé á srʋ ɔ́ mà: «Cíe àmɔ̀ sá à kà nà bàna a nimnuó a pʋpʋ́ gbɔ́.» Mà nyʋa fɩ́ɛ́ à gbɔ́ ɔ́ a, á yalɩmaà.
Actualmente seleccionado:
Matíe 14: NEY
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© (Active), Wycliffe Bible Translators, Inc. All rights reserved.
