Záan 3
3
Nikodémʋ mʋ dɩ́bɩ Zozíi gɔ̀
(Matíe 18.3; Záan 1.12‑13; 1 Pɩ́ɛ́lɩ 1.3‑23)
1Nyɔ a múó kʋ wá Falizɩ́ɛnyʋa nyièdɩ lé ɔ́ kʋ wá Zúfʋnyʋa kádàà a jrè a mnɩ́, ɔ́mɔ́ ɔ̀ ŋwɔ́ɔ wá Nikodémʋ. 2Ɔ́ yi yruú a múó a dɩ́bɩ Zozíi yɛ́ ka lé ɔ́ srʋ ɔ́ mà: «Kanyɔɔ̀, à yì saá mà Lagɔ ɔ́ɔ cíe mɔ̀ lé kà àmɔ̀ cɩ́à, máà lɛ̀wɔ̀lɩ̀ɛ̀ fɩ́ɛ́ ɩ̀ nie lɛ́ a, Lagɔ nɩ nɩ́ nyɔ gɔ̀ kʋ a, ɔ nɩ́ ka míi lé ɔ kɩ́ɩ́ nɩ.»
3Bhʋ́ Zozíi srʋ ɔ́ mà: «Cɩ́cása a mnɩ́ náa srʋɛ yɩ́ lɛ́ mɔ̀ mà nyɔ nɩ nɩ́ sɔ́kʋ́ valɔ#3.3 Sɔ́kʋ́ valɔ: Á yi míi a yi sáà cí mà Lagɔ va mɔ̀ɔ. a, ɔ nɩ́ ka míi lé ɔ ká Lagɔ a Léyibhlɩɛ́ yɛ́.» 4Nikodémʋ anɩ́: «Nyɔɔ́ yà zubònyɔ plɩ́ a, cégbá mʋ́ á yio sɔ́kʋ́ va a? Ɔ́ ká sɔ́kʋ́ ɔ nɛ́ a mnɩ́ pla lé ɔ ká valɔɔ?» 5Zozíi anɩ́: «Cɩ́cása a mnɩ́, náa srʋɛ mɔ̀ mà, nyɔɔ́ ɔ̀ nɩ́ nyíé yà Blɔ̀blɔ̀zùzùò sɔ́ mʋ́ plɩ́ɩ lé ɔ̀ ka valɔ a, ɔ nɩ́ ka Lagɔ a Léyibhlɩɛ́ a mnɩ́ pla. 6Nyʋaá ŋwnɔ́ yà yʋwlɩ sɔ́ va a, nyʋa kʋ̀ʋ. Lé nyʋaá Blɔ̀blɔ̀zùzùò va a, blɔ̀blɔ̀zùzùò a nyʋa kʋ̀ʋ. 7Ne ná mna mɔ̀, nɩ srʋ mɔ̀ mà, a ka lé a ká sɔ́kʋ́ valɔɔ̀! 8Dɛɛ́ vʋ̀vɔ̀lʋ wà a bhʋ́ ʋ́ pʋlɛ, ɩ̀ núé ʋ wɔlɩ́, mà dɛɛ́ ʋ́ lalɛ lé dɛɛ́ ʋ́ falɛ a, nɩ́ ʋ́ yì. Blɔ̀blɔ̀zùzùò nɩ va nyɔ a, sɩ́tɛ̀ tɛ̀ɛ̀ mʋ́ ɔ́ plɩ́ɛ́.»
9Bhʋ́ Nikodémʋ yrɔ́ɔ́ mà: «Bhè cégbá mʋ́ ɩ́ na ká plɩ́ɩ a?» 10Zozíi anɩ́: «Bhè Izrayɛ́lɩbhlɩɛ́ lɩ̀à a mnɩ́ a másɛ kádɔ ɩ̀ ŋwɔ́ɔ a, cégbá ɩ́ kʋ bhè nɩ́ bhʋ́anɩ wɔlɩ́ɛ́ yì a? 11Cícása a mnɩ́ náa srʋɛ mɔ̀: mà wɔlɩ́ɛ́ à yì a, ɩ ŋwɔ́nɩ́srɩ̀lɛ à nie. Wɔlíɛ́ kɩ̀ɩ dá à yɛ́ a, ɩ cɩ́cása à cíe, bhè sɩ́tɛ̀ ɩ́ kʋ bhè wɔlɩ́ɛ́ à cíe a, a nɩ́ bhɩ́ɩ́ cɩ́cása kʋ́. 12Nɩ srʋ amɔ dɛ́ dʋ̀dʋ kʋ́ a wɔlɩ́ lé a nɩ nɩ́ɩ́ cɩ́cása kʋ́ bhá a, lagɔ gɔ̀ a nɩɛ́ ɩ́mɩ́ nɩ srʋ amɔ a, ɩ́mɩ́ a yi cɩ́cása kʋ́ bhá a? 13Nyɔɔ́ nɩ́ à zà lagɔ gɔ̀ gblàa, ɛ̀ nɩ nɩ́ Nyɔɔ́ a Yuwliyʋɔ́ lɩ̀à múó ŋwɔ́ɔ a. Ɔ́ a múó ɔ́mɔ́ ɔ̀ wlʋ́ lagɔɔ́ lé ɔ̀ kwlíi. 14Moyízɩ bubùò wá drɛ́ a pʋpʋ́ a nɩnɩbɛbɛlɛ su yɩ́ zɩkpa a mnɩ́ a,#3.14 A zɛlɩɩ sáà Nɔ́blʋ 21.9. sɩ́tɛ̀ tɛ̀ɛ̀ á na ká sáà Nyɔɔ́ a Yuwliyʋɔ́ su yɩ́ bubùò. 15Bhʋ́ nyʋaá fɩ́ɛ́ nà kɔ̀ɔ ɔ fádùò ka a, a ká kɔ́ɔ́ nɩ́ɩ bhɩada ka a, yɛ.
16Lagɔ máa kɔ́ a nyʋa a wàwʋ́ kʋ́ lé ɔ́ sa ɔ yʋ́ɔ́ a múó cocoó ɔ́ ka a, lé mɔ̀ nyɔɔ́ nɩ̀ kà ɔ́ fádùò a a, nɩ̀ ka tuò, lé kà kɔ́ɔ́ ʋ̀ nɩ́ bhɩada ka a, yɛ́. 17Lagɔ, ɔ́ɔ nɩ́ ɔ yʋ́ɔ́ laa lé ɔ ká zɩkpa zɔ̀ a nyʋa tɩ́tɩ́ ŋwʋ́, mà ɔ́ɔ lɔɔ́ lé ɔ ká ʋ́ má neé sa. 18Nɩ̀ ka Lagɔ a Yuwliyʋɔ́ a fádùò a, nɩ ka jɩ̀ɩ pla, ɩ́zà nɩ̀ nɩ́ ɔ Yuwliyʋɔ́ a fádùò ka a, bhʋ́ ɩ̀ yi jɩ̀ɩ pla. 19Jɩ̀ɩ ɛ́ gba ŋwɔ́ɔ mà, nápɛɛ́ yi zɩkpa zɔ̀ mà nyʋa cúcú á bhá mɔ̀ɔ lé á zi nápɛɛ́ ɛ̀ yi zɩkpa zɔ̀ a kʋ́, á nyumopɩɛ́ a ninie a zà. 20Nyɔɔ́ ɔ̀ nie nyumowɔlɩ a, ɔ nɩ́ yrá nápɛ lé dɛɛ́ nápɛ kʋ a, ɔ nɩ́ ŋnɩ ʋ́, a nɩ kɔɔ bɩ́ yɛ́ɛ. 21Mà nyɔɔ́ ɔ̀ wà cɩ́cása a, ɔ́mɔ́ yie nápɛ yɩ́ kʋ́ bhʋ́ námasaá ɔ́ nie a, nyʋa dʋdʋɛ a, lé á yɩbhlɩɛ saá mà, Lagɔ̀nyùzɔ ɔ́ bhlie.»
Zán Batísɩ nɩ sɔ́kʋ́ Zozíi a ŋwɔ́nɩ́srɩ̀lɛ
22Ɩ̀lɩa plɩ́ a, Zozíi yà ɔ́ kʋjɩ̀nyʋ̀àà sɔ́ mʋ Zudée. Ɔ yàsɔ́ zii mɔ̀ɔ tányɩ, ɔ ká nyʋa nyú wlú ŋwʋ́. 23Záan a sɛ́fʋ kʋ Anɔ́ɔ a dúó á wlele Salímʋ a gɔ̀. Mà cémʋ́ nyíé zù dúó gɔ̀ a, Záan kʋ mɔ̀ɔmɔ̀ ɔ́ ŋwʋ́ɛ́ nyʋa nyú wlú, ɩ́ ka ŋnɩ́ lé nyʋa yie ʋ́ nyú wlú ŋwʋ̀ ka. 24Bhʋ́ a tányɩɛ́ a nɩ́ ayɩ Záan jɩ̀ɩ ŋwʋ́.#3.24 A zɛlɩɩ sáà Matíe 14.3; Málɩ́kɩ 6.17; Lúkɩ 3.19‑20.
25Tányɩ a múó, Záan a kʋjɩ̀nyʋ̀àà yà Zúfʋyʋ sɔ́ bhla wɔlɩpɩʋ kʋ́, ɩ́mɩ́ ŋwɔ́ɔ mà, ɔ̀ kɔ̀ɔ nɩ nyúbùdoe, kplɔ Lagɔ drɩ̀ a? 26Lé á mʋ Záan srʋ ka mà: «Kanyɔɔ̀, ɩ̀ luolee, nyɔɔ́ ɔ yɔ̀sɔ́ kʋ wázɔ̀ Zrʋdɛ́ɛ a bɩ́, bhè ɔ̀ kɔ̀ɔ námasa a cíé wázɔ̀ a, ɩ̀ lɛ́bhɛ nyʋa ɔ́ ŋwʋ́ɛ́ yɩ́ nyú wlú, ɔ́mɔ́ gɔ̀ nyʋaá fɩ́ɛ́ kwlíle yɩ́.» 27Bhʋ́ Záan srʋ á mà: «Wɔlíɛ́ Lagɔ nyɛ́ nyɔ a, ɩ́mɩ́ ɔ́ nie. 28Amɔ mɔ̀glʋ̀ a yì saá mà: mɔ́ɔ nɩ́ Kláyɩ́sɩ ŋwʋ́ʋ! Mà Lagɔ ɔ́ɔ cíe wá mɔ́ɔ lé ká wá bhlà plɩ́ɩ.#3.28 A zɛlɩɩ sáà 1.20; Mala 3.1. 29Nyɔɔ́ ɔ̀ kà ŋwnɔ́ɔ́ a, ɔ́mɔ́ ŋwɔ́ɔ yʋwlɩɛ́, ɩ́ zà yʋwlɩ ɔ bheyie, ɔ́ɔ kʋɛ ɔ́ gɔ̀ lé ɔ́ pʋɔ nyúkwlí, ɔ cícíwɔlɩ kɔɔ́ lɔlɔ kʋ́. Sɩ́tɛ̀ ɩ́ ka sáà mɔ́ɔ lɔlɔ kʋ́ lé lɔlɔɔ́ ʋ̀ bhlá mɔ́ɔ a, ʋ́ ya gɔ̀ plɩ́! 30Ɔ́ ŋwnú ka lé ʋ ká mʋ lé ná nʋɔ́ ka lé ʋ ká dʋ̀dʋ kʋ́ mʋ.
Nyɔɔ́ ɔ̀ wlʋ́ lagɔɔ́ a
31Nyɔɔ́ ɔ̀ wlʋ́ɛ́ Lagɔ gɔ̀ a, ɔ́mɔ́ zi kʋ́. Ɩ́ zà, nyɔɔ́ kʋ̀ dʋdʋ̀ kʋ́ a, dʋ̀dʋ kʋ́ a nyɔ kʋ̀ʋ, dʋ̀dʋ kʋ́ a wɔlɩ́ ɔ́ cie. Ɔ̀ wlʋ́ɛ́ lagɔɔ́ a, ɔ́ zi lɩ́ɛ́ fɩ́ɛ́ kʋ́. 32Wɔlíɛ́ ɔ́ yɛ́ lé ɔ́ nú a, ɩ́mɩ́ ɔ́ cíé, sɩ́tɛ̀ ɩ́ kʋ bhè nyɔ nɩ́ bhá ɔ cícíwɔlɩ cɩ́cása kʋ́. 33Ɔ̀ nɩ̀ ŋwnʋ́ ɔ ŋwɔ́nɩ́srɩ̀lɛ kʋ́ a, ɔ́ ka Lagɔ a cɩ́cása. 34Nyɔɔ́ Lagɔ cíe a, Lagɔ á niwɔlɩ ɔ́ cíé, máà Lagɔ a Blɔ̀blɔ̀zùzùò a lɔ̀fɩ́ɛ́ ʋ́mʋ́ ɔ́ ŋwʋ́ ɔ́ jɩ̀. 35Tʋ́ɔ́ wà ɔ Yuwliyʋɔ́, ɩ́ ka ŋnɩ́ lé ɔ́ ŋwʋ́ ɔ́ wɔlɩ́ɛ́ fɩ́ɛ́ wlɩɩ́. 36Nyɔɔ́ ɔ̀ nɩ̀ tɔ̀ Lagɔ a Yuwliyʋɔ́ duo a, ɔ́mɔ́ ɔ̀ yɛ́ kɔ́ɔ́ ʋ̀ nɩ́ bhɩada ka a. Ɩ́zà nyɔɔ́ ɔ̀ nɩ́ Lagɔ a Yuwliyʋɔ́ a cɩ́cása ka a, ɔ nɩ́ yɛ́ kɔ́ɔ́ ʋ̀ nɩ́ bhɩada ka a, lé Lagɔ yio kɔ́ɔ̀kɔ́ a zà dɩ kʋ́ ŋwʋ́ʋ.»
Actualmente seleccionado:
Záan 3: NEY
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© (Active), Wycliffe Bible Translators, Inc. All rights reserved.
