Pianciilna 9
9
Pathian ii Noah taw Thuciamna
1Pathian in Noah le a tapate thupha pia in, “Na suan na paalte leitung theampo ah teang tu in ta tam mama nei tavun. #Pian 1:28 2Nganhing theampo, vacim theampo le ngasa theampo in no hong kiita in nungta tu uh hi. Tuate theampo noma khutnuai ah kikoi hi. 3Tu in tuate na ne thei tu uh a, ankung hingte zong na ne thei tu uh hi; note an tu in tuate theampo kong pia siat hi. 4Na neak ngawl tu khat sia chi om lai sa na ne bua het tu uh hi; banghang ziam cile nuntakna sia chi sungah om ahi hu in neak tu kong khaam hi. #Thiam 7:26-27; 17:10-14; 19:26; Thkna 12:16-23; 15:23 5Khat pawpo in mihing nuntakna a thisak le ama daan kipia tu hi. Mihing nuntakna a thisak nganhing sia kithisak tu hi. 6Mihing sia Pathian taw kibangin kivawt ahikom mihing khat a that pawpo sia ama ii mipuipa in thatlum tu hi. #Pu 20:13; Pian 1:26
7“Leitung theampo ah na suan le na paalte a teen thei natu in, ta tam mama na nei tu uh hi,” ci hi.
8Pathian in Noah le a tapate tungah, 9“Tu in noma tung le na suan na paalte tung ahizong, 10note taw teambaw sung pan a pusuak khawm nuntakna a nei theampo — vacim theampo le nganhing theampo taw — thuciamna kong vawt hi. 11Note taw ka vawt thuciamna sia hi kammalte hi: nuntakna nei a minpiang peuma tuipi liimna taw ka mon kik ngei buatu a; tuipi liimin leitung ka lalsak kik ngei buatu hi, ci in kong kamciam hi. 12Nang le nuntakna nei a minpiangte taw ka vawt a tawntung a kip tu ka thuciamna lim tu in 13meei sungah ka sangun ka koi tu hi. Tua in leitung taw ka thuciamna lim hi tu hi. 14Van ah meei ka kaaisak simin le sangun hong kilangh simin, 15tuipi liimna in nuntakna nei peuma mon kik ngeingawl tu hi ci in, note le nganhing theampo tungah kong kamciamna ka phawk tu hi. 16Meei sungah sangun a kilangh ciang ka mu tu a, tuaciang keima le leitung ah nuntakna nei a minpiangte kilaklaw ah a kho tawntung thuciamna sia ka phawk tu hi. 17Tuasia in nuntakna nei a minpiang theampo tungah kamciam ka piakna lim ahi hi,” ci hi.
Noah le A Tapate
18Teambaw sung pan a pusuak Noah tapate sia Shem, Ham le Japheth ahi hi. (Ham sia Canaan ii pa ahi hi.) 19Hi Noah ii tapa thumte sia simleitung mi theampo ii taanghpupite ahi uh hi.
20Noah sia lothopa khat hi a, sapit ciing masabelpa ahi hi. 21Ama in sapittui ne in kham a, a puante suutin a puanbuk sungah a pumnguakin lum hi. 22Canaan ii pa Ham in, a pa a pumnguak a lup a mu ciang, a suapuite nii kungah pai in son hi. 23Tuasia ciang Shem le Japheth in puantual khat la in amate ii liangko nungsang ah baang uh hi, a nung leelam in puanbuk sungah tum uh a, a pa sia puantual taw siin uh hi. A pa uh a pumnguak a om a mu ngawl natu in amate in a lu heak uh hi. 24Noah a sapittui kham theau kik a, a tungah a tapa nobel ii a vawtna teng a heak ciang 25ama in,
“Canaan tungah haamsiatna khat
tung tahen!
Ama sia a suapuite ii
sila khat hi tu hi.
26Shem ii Pathian, Topa pok vun!
Canaan sia Shem ii sila hi tu hi.
27Pathian in Japheth pungsak tahen!
A suan a paalte le Shem mite
teang khawm tahen!
Canaan sia Japheth ii sila
hi tu hi,” ci hi.
28Tuipi liim zawkciang Noah kum 350 nungta a, 29kum 950 a phak ciang thi hi.
Actualmente seleccionado:
Pianciilna 9: SCB2
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Siyin Chin Bible © Bible Society of Myanmar, 2016
