Lûqa 6

Wayirê Roja Sebtî

(Metta 12:1-14; Marqos 2:23—3:6)

1Rojêka Sebtî de Îsa miyanê hêgayanê xeleyî ra viyartêne. Şagirdanê ci weşeyê xeleyî cirakerdî, kefê destê xwu de feriknayî û werdî. 2Tayê Fêrisîyan înan ra persa va: “Şima çira rîayetê qedexeyê Roja Sebtî nêkenê?”#6:2 Qanûnê Tewratî gore Roja Sebtî cihûdan rê kerdişê her tewir karî qedexe yo.

3Îsayî wina cewab da Fêrisîyan: “Wexto ke Dawud û peyayê xwu veyşan mendbî, se kerdbi, şima nêwendo? 4Dawud şi keyeyê Homayî, nano ke teqdîs bibi girewt werd û da peyayanê xwu zî. Oxro ke werdişê enê nanan kahînan ra teber sewbîna kesan rê qedexe yo.” 5Badê, Îsayî înan ra va “Ez sey Benîademo Semawî wayirê Roja Sebtî ya zî.”

6Yewna Roja Sebtî Îsa reyna şi xavra û dest bi dayişê waezan kerd. Yew merdimo destê xwu yê raştî ra seqet zî uca bi. 7Alimê Tewratî û Fêrisîyan Îsa nizdî ra teqîb kerdêne. Ewnîyayne dê hela Roja Sebtî do şîfa bido mêrikî. Yew sebeb geyrayne ke Ey sûcdar bikerê. 8Îsayî zanayne hişê înan ra çi vîyareno. Mêrikê destseqetî ra va “Wurze û vera her kesî de vindere!” Mêrik zî wurişt û vatişê Îsayî kerd. 9Îsayî va “Ez şima ra persena. Gelo Roja Sebtî kerdişê başî, yan zî kerdişê xirabî caîz o? Xelisnayişê ganî yan zî kiştişê ganî caîz o?” 10Îsayî çimê xwu hemîne ser o çarnayî, mêrikê seqetî ra va “Destê xwu derg bike!” Mêrikî destê xwu derg kerd û destê ci a esna de bi weş û war. 11Fêrisîyan û alimanê Tewratî ke eno çî dî, hêrsan ra har biyî; xwu miyan de minaqeşe kerd ke Îsayî ra senî bixelisîyê.

Îsa Diwês Hewarîyanê Xwu Weçîneno

(Metta 10:1-4; Marqos 3:13-19)

12Çend rojî badêna Îsa semedê dua şi ko. Temamê şewe Homayî rê duayî kerdî. 13Roja bîne serê sibayî veng da şagirdanê xwu. Înan ra diwês kesî weçînayî û sey hewarîyê xwu tayîn kerdî:#6:13 hewarî: Keso ke şîretan û bawerîya Îsayî keno vila; qasid, sehabî. Enê diwês hewarîyan ra teber Pavlûs, Barnabas û tayê bînan ra zî hewarî yeno vatiş

14Yaqûb, Yûhena, Filîpos, Bertolomeyos, Şîmûno ke Îsayî bi leqebê Petrûs#6:14 Petrûs: Zinar venga ey dayne û birayê ci Endrawis, 15Metta, Tûma, Yaqûbo lajê Halfayosî, Şîmûno ke bi leqebê Welatparêz şinasîyayne, 16Yahûdayo lajê Yaqûbî û Yahûdayê Îsxeryotî ke badêna Îsayî rê îxanet keno.

Îsa Waezan Dano û Şîfa Dano Nêweşan

(Metta 5:1-12)

17Îsa hewarîyanê xwu dir ko ra ame war û raşte de vindert. Yew qelebalixo pîl ke şagirdanê ci ra ameyo meydan zî uca bi. Sewbîna zî, heme cayanê Yahûdîye û Yeruşalîm ra, mintîqeyê qeraxî yê Sûr û Sayda ra bi qefleyan însanî ameybî. 18Pêro ameybî ke goşdarîya Îsayî bikerê û nêweşîyanê xwu ra bixelisîyê; êyê ke bi cinan kewtbî şîfa dîyêne. 19Qelebalix de her kes lebitîyayne ke destê xwu bisawo Îsayî ra. Çimkî yew hêzo ke zereyê Ey ra herikîyayne şîfa dayne her kesî.

20Îsa ewnîya şagirdanê xwu ra û wina va:

“Werre bi şima ey feqîran;

Çimkî Hukimranîya Homayî yê şima ya.

21Werre bi şima yê ke nika veyşan ê,

Çimkî şima do bêrê mirdkerdiş.

Werre bi şima yê ke nika bermenê,

Çimkî şima do şa bibê.

22“Werre bi şima, wexto ke însanî, rîyê mi Benîademî ra şima ra nefret kenê, şima xwu miyan ra kenê teber, heqaret kenê û şima xirab kenê! 23A roje şa bibê, keyf bikerê, çimkî sema de do mikafatê şima pîl bo. Axir verînanê înan zî pêxemberan rê eynî muamele kerdbi.

24“Feqet wey halê şima rê, ey dewlemendî,

Çimkî şima bi heyatêko rehet teselîya xwu girewte.

25Wey halê şima rê ke nika mird ê,

Çimkî şima do veyşan bimanê.

Wey halê şima rê ke nika huyenê!

Çimkî şima do şîn bigêrê û bibermê.

26“Eke her kes şima wesifneno, wey halê şima rê! Enêyê ke enê çiyan kenê, verînanê înan zî pêxemberê sexteyî wesifnayne.”

Dişmenanê Xwu ra Hes Bikerê

(Metta 5:38-48; 7:12)

27“Feqet êyê ke mi goşdarenê, Ez şima rê vana, dişmenanê xwu ra hes bikerê. Êyê ke şima ra nefret kenê rê hewle bikerê. 28Êyê ke şima lanet kenê rê şima hewle biwazê. Êyê ke şima rê xirabî kenê rê şima dua bikerê. 29Eger yew bido alişka şima ro, alişka bîne zî bidê ver. Eger kesî dest na ebayê şima ser, pirênê xwu zî bidê ci. 30Kesî şima ra çiyêk waşt, bidê. Eke kesî yew çiyo aîdê şima berdo, apey mewazê. 31Şima wazenê sewbîna kesî şima dir senî reftarî bikerê, şima zî înan dir o tewir reftarî bikerê.

32“Eger şima tenya êyê ke şima ra hes kenê ra hes bikerê, eno do îtîbar bido şima? Merdimê ke dîn ra dûrî yê zî heskerdoxanê xwu ra hes kenê! 33Eger tenya êyê ke şima rê hewle kenê rê şima hewle bikerê, eno do îtîbar bido şima? Merdimê ke dîn ra dûrî yê zî eynî çî kenê. 34Gama ke şima deyn danê kesî eger şima tim apey biwazê, eno do îtîbar bido şima? Merdimê ke dîn ra dûrî yê zî bi şerto ke apey bigêrê deyn danê sewbîna kesan. 35Labelê şima dişmenanê xwu ra hes bikerê, înan rê hewle bikerê û bêke paweyê ewêzeyî bê, deyn bidê. Bi eno qeyde do mikafatê şima pîl bo, şima do bibê ewladê Homa tealayî. Çimkî Homa nankoran û zaliman rê zî merhemet keno. 36Senî ke Babîyê şima yo Semawî birehm o, şima zî o qeyde birehm bên.”

Derheqê Kesî de Hukim Medê

(Metta 7:1-5)

37“Derheqê kesî de hukim medê; Homa zî derheqê şima de do hukim nêdo. Kesî sûcdar mekerê, Homa zî do şima sûcdar nêkero. Efû bikerê ke Homa zî şima efû bikero. 38Bidê, do Homa zî bido şima. Bi yew peymo baş dewisnaye, şedênaye û lewan ra pir do birişîyo pêşê şima. Şima bi kamcîn peymî bidê êyê bînan, do Homa zî bi eynî peymî bido şima.”

39Îsayî eno mîsal zî da înan: “Kor eşkeno bibo rêberê korî? Her di zî do nêkewê çale? 40Şagird seydayê xwu ra serêr nîyo, feqet her şagirdo ke kamil biyo reseno sewîyeyê seydayê xwu.

41“Çira ti qirşo ke çimê sewbîna kesan de yo vînenê la daro ke çimê to de yo ferq nêkenê? 42Ti misasîya çimê xwu de nêvînenê la ti êyê vera xwu ra vanê ‘Birayê mi vinde, ez dasîya çimê to de vejî’. Hey gidî dirî! Ti ewilî misasîya çimê xwu de veje, hema ti bieşke dasîya çimê birayê xwu de hîna baş bivîne û veje.”

Dara Başe Meyweyo Baş Dana

(Metta 7:16-20; 12:33-35)

43“Dara başe meyweyo xirab nêdana, dara xirabe zî meyweyo baş nêdana. 44Her dare bi meyweyo ke dana şinasîyena. Nebatanê telîyinan ra încîre, birran ra engure arênêdiyena. 45Însano baş qelbê xwu de hewle keno weye, coka qala başe vano. Însano xirab zî qelbê xwu de xirabî keno weye, coka qala xirabe vano. Qelbê însanî de çi bibo, fekê ci ra zî o vejyeno.

46“Şima mi ra vanê ‘Wayirê ma, Wayirê ma’ la çiyo ke ez vana, şima çira nêkenê? 47O ke yeno mi het, çiyo ke ez vana goşdareno û pê emel keno, ez şima rê vajî însanêko senîn o. 48O kes maneno însanê ke ban virazeno. Hîmê banê xwu xorîn keneno û esasê ci zinarî ser o ronano. Gama ke laser yeno û awe dana ban ro, feqet seba ke ban pêt virazîyayo, cayê xwu de maneno. 49Keso ke qalanê mi goşdareno û pê emel nêkeno zî, maneno merdimê ke banê xwu bê hîm virazeno. Laser bêro, ban do tavilî birijîyo; rijîyayişê ci zî do dehşet bo.”

Actualmente seleccionado:

Lûqa 6: diqSZZ

Destacar

Copiar