Lûqa 10

Îsa Hewtayna Şagirdan Wezîfedar Keno

1Enê ra pey Îsayî hewtayna şagirdî wezîfedar kerdî. Her şaristan û her cayo ke do şiro, xwu ra ver ê di heb - di heb şirawitî. 2Înan ra va “Mehsûl zaf o, la karkerî tay ê. Eno semed ra Rebê wayirê mehsûlî rê lavey bikerê ke wa seba hewanayişê mehsûlê xwu karkeran bişirawo.”

3“Nika şêrê! Ez şima sey verekan şirawena miyanê vergan. 4Pere, tewreyê erzaqî yan zî çaroxanê yêdekan qet megêrê xwu het. Rayir de zaf mevinderê û kesî dir yarî mekerê. 5Şima hema ke denêkewtê yew keye, verî vajê ‘Wa silametî enê keyeyî ser o bo!’ 6Eger uca keso layiqê silametî bibo, do silametîya şima ey ser o bimano. Feqet eke çinê bo, do ageyro şima ser. 7Şima şiyî kamcîn keye uca bimanê, şima rê çi îkram bikerê biwerê bişimê, çimkî karker heqê keda xwu heq keno. Keye bi keye megeyrê.

8“Gama ke şima dekewtî yew şaristan, eger însanî şima qebûl bikerê, şima rê çi îkram bikerê biwerê. 9Şîfa bidê nêweşanê ucayî û însanan ra vajê ‘Hukimranîya Homayî ameya nizdîyê şima.’ 10La eke yew şaristan de şima qebûl nêkerê, vejîyê kuçeyanê ê şaristanî û wina vajê: 11Tozê şaristanê şima ke dusîyayo linganê ma bîle, seba îqazkerdişî, ma vera şima de weşanenê! Labelê enê bizanê ke Hukimranîya Homayî nizdî ya. 12Ez şima rê enê vajî, roja hesabî halê înanê ke o şaristan de cûyenê do şarê Sodomî ra bêter bo.”

13“Wey halê to rê ey şarê Xorazînî! Wey halê to rê ey şarê Beytsayda! Mucîzeyê ke miyanê şima de biyê eke Sûr û Sayda de bibiyêne, şarê ucayî rewna tewbe kerdbi, palas antbi xwu û miyanê wele de roniştbi.#10:13 palas antiş xwu ser û miyanê wele de roniştiş: Palas mûyan ra ameyo vawitiş. Zemananê verî de cihûdan sey îşaretê tewbekerdişî yan zî şîn de biyayişî palas antêne xwu û wele kerdêne xwu ro. 14La roja hesabî, halê şima do yê Sûr û Sayda ra bêter bo. 15Ey Kefernahûm ya ti, ti vanê qey ti do bihewanîyê asmîn. Nê! Ti do bikewê alemê merdeyan!

16“Ey şagirdê mi, o ke şima bigoşdaro, seke ez goşdarita. O ke şima red bikero, seke ez red kerda. O ke mi red bikero zî seke Eyê ke ez şirawita red kerdo.”

17Hewtay şagirdî bi keyf raywanîya xwu ra ageyrayî. Îsayî ra va “Wayirê ma, gama ke ma nameyê to zikir kerdêne cinan bîle ma rê vîye ronayne!”

18Îsayî înan ra wina va: “Mi dî Îblîs asmîn ra sey virsoyî kewt war. 19Biewnîyê, cinê ke emirê Îblîsî de yê, manenê maran û eqreban. Mi selahîyet dayo şima ke înan bigêrê binê linga xwu û bipelixnê. Şima do temamen bibê xalibê dişmenê xwu Îblîsî. Tu çiyêk do nêeşko zirar bido şima. 20Feqet seba ke cinî şima rê vîye ronanê keyfê xwu meyarê, seba ke nameyê şima asmîn de qeyd beno keyfê xwu biyarê.”

Îsa, Babîyê Semawî rê Dua Keno

21A esna de Îsa bi Ruho Miqedes ame şewq û wina va: “Babîyo Semawî, Wayirê erd û asmînî! Ez to rê şukir kena ke to enê heqîqetî kesê wayirê hîkmetî û biaqilan ra nimitî, to însanê ke qasê tutan saf ê rê akerdî. Belê Babîyo Semawî, eno miradê to bi.

22“Babîyê minê Semawî her çî emanetê mi kerd. Babîyo Semawî ra teber tu kes nêzano Lajo Semawî kam o. Babîyo Semawî zî, Lajo Semawî zano O kam o. Û tenya, kesê ke Lajo Semawî wazeno Ey bi înan bido şinasnayiş zanê O kam o.”

23Îsa ageyra şagirdanê xwu ser û xisûsen înan rê wina va: “Werre bi ê çiman, çiyo ke şima dîyo, ê zî vînenê! 24Ez şima rê enê vajî, gelek pêxemberan û hukimdaran çiyo ke şima dîyo waşt bivînê la nêeşkayî bivînê; çiyo ke şima şinawito waşt bişinawê la nêeşkayî bişinawê.”

Mîsalê Ardimkarîye

25Yew alimê Tewratî seba ke Îsayî îmtîhan bikero wurişt payanî û wina va: “Seyda, seba ke ez biresî heyato ebedî ez se bikerî?”

26Îsayî persa va: “Tewrat de çi nuşte yo? Ti uca çi wanenê?”

27 # Lewîyijî 19:18 # Tekrarê Qanûnî 6:5 Mêrikî wina cewab da: “Bi heme qelbê xwu, bi heme canê xwu, bi heme qewetê xwu û bi heme aqilê xwu Rebê xwu Homayî ra hes bikerê, şima xwu ra senî hes kenê cîranê xwu ra zî wina hes bikerê.”

28Îsayî va “To cewabo raşt da. Eke ti wina bikerê ti resenê heyato ebedî.”

29Labelê alimê Tewratî seba ke xwu heqdar vejo Îsayî ra persa va: “Eyla cîranê mi kam o?”

30Îsayî wina cewab da: “Yew mêrik wexto ke Yeruşalîm ra şino Erîha keweno destê heydûdan. Heydûdî mêrikî şelênenê, kuwenê û wezîyetêko nîmkişte de verdenê, danê piro şinê. 31Yew kahîno ke tesadufen uca ra vîyarto o dîyo, labelê vîyarto hetê wetê rayirî û şiyo. 32Dima yew Lewîyij#10:32 Lewîyijî: Ardimkarê kahînan ke qebîlaya Lewî yê Îsraîlîyan ra yê. ameyo uca. Mêriko birîndar dîyo, la o zî vîyarto şiyo. 33La rayirê yew Samîrîyeyijî zî uca ra vîyarto, mêriko birîndar dîyo û zerrîya ci pê veşaya. 34Şiyo verê mêrikî, zeyt û şerab rişnayo birînanê ey ser, birînê ci piştê. Dima zî mêrik wenayo herê xwu û berdo xane, uca ey dir eleqedar biyo. 35Roja bîne di dînarî dayê xandarî û vato ‘Baş biewnî ey ra, eger pereyo ke mi dayo ra vêşêr ti xerc bikerê ageyrayiş de ez dana to.’”

36Îsayî alimê Tewratî ra persa va: “To gore, enê hîrê kesan ra kamcînî mêriko ke kewto destê heydûdan rê wezîfeyê cîrantî ardo ca?”

37Alimê Tewratî cewab da va: “O ke zerrîya ci veşaye û ci rê ardim kerd.” Îsayî va “O wext ti zî şo û eynî winî bike.”

Îsa Keyeyê Meryeme û Merta de

38Îsayî û şagirdanê ci rayirê xwu dewam kerd, dekewtî yew dewe. Uca yew cînî estbî. Nameyê aye Merta bî, keyeyê xwu de ê kerdî meyman. 39Yew waya Merta estbî. Nameyê aye Meryeme bî. Meryeme verê linganê Îsayî de roniştbî, goşdarîya qiseykerdişê ci kerdêne. 40Feqet Merta karê xwu yê zafî ver miyanê telaşî de bî. Ameye verê Îsayî û Ey ra va “Wayirê ma, ti nêvînenê, waya mi heme kar mi rê verdayo. Dê vaje wa hetê mi bikero!”

41Îsayî zî cewab da, va: “Merta, Merta, ti endîşe kena û her çî xwu rê kena derd. 42Oxro ke tenya yew kar esto gereka bêro kerdiş. Axir Meryeme eno karo tewr muhîm tercîh kerd û eno tercîh zî do aye ra nêgêrîyo.”

Actualmente seleccionado:

Lûqa 10: diqSZZ

Destacar

Copiar