Maatiyoos 3

Ijaag Yowanis Sinɛ A'aadiik

(Mar. 1:1-8; Luk. 3:1-18; Yow. 1:19-28)

1Saaɓak kusɓa Yowanis sinɛ A'aadiik, nɛɓa rɔririyi paaton Yuudaak kɛ, 2"In weeriikɛ tikiyɛɛkɛ Waakoyota agut sinɔ burɛ dariyoŋk wɔɔŋkuŋ."

3Tonɛɛɓa ete pɛrkaakoŋk Isaayase agut Yowanis kɛ,

"Koŋgoy iɗit sinɔ oo'oy sinɔɔnɛ paatoonoŋk kɛ,

'In isiisɛɛ gopan Suumiyoŋk,

in kekemɛɛ gopan nɛɛk.'"

4Abii Yowanisik ijaagɛɛɓa ami tagakoŋk, maɓa tutus ɓeetɔn nɛɛk teeɓɛɛ, maɓa ɗama nɛɛk teŋɔɔniyak a ɛtɛɗ paatoonoŋk. 5Saaɓak kurakɓa joop son lak Yowanisik sinɔɔnɛ katamɛ Yorsaleemuk sinɔɔnɛ ɗoo Yuudaak baŋɛ sinɔɔnɛ Yordanoosuk tookɛɛta baŋɛ. 6Nɛɓa totonar tikiyɛ gɛŋk, nɛɓa aadi sɛɛg Yowanis Goroo Yordanoosuk.

7Saaɓa dɛnɛɛɗ Yowanis joop Paarisik a joop Saaduukuk a ɓɔɔkaaŋ a kurak son lak sɛɛn kɛnɔ sɛɛg aadɛɛk, nɛɓa sɛɛga tonu kɛ, "Iinak sigi ito iinak kookowɛɛk! Wooɗ sinɛkɔ kɔna yaaŋɛ gopan sinɛkoy bɔdɛrɗɔ goopan sinaanɛkoy mɛlkik? 8In ijaagɛ beeɗit noŋk any sinɔ ɗegerɗɛ eekeerɛ kɛ weeriikɔɔkɔ tikiyɛɛkɛ Waakoyotak. 9Kat kɔna gayi oko sinɛ tonurɗɔ kɛ, 'Eteŋk tɔɔmɔk Abrahamuk.' Tona kɔna kɛ Waakoyo oolɛ a ɓɔŋgɔrku giɗekɛ sigeege tɔɔmɔka Abrahamukuŋ. 10Sisɔ ragadɛɛkɔ kabi sinɔ yawɛɛɗɛɛ kɛɛn tiltilɛɛkɛ gɛŋkiŋ, nɛ kɛɛt sinɔ ki riiɓɛ taamɛ sigɔ mentaanaŋɔŋkuk baŋɛ yawɛɛkoy nɛ orɛɛ maɗa. 11"Aada saak kɔnu maawɛ nɔ weeriikɛɛ tikiyɛɛkɛ Waakoyota. Mayakana iɗit sinɛkɔɔ mɛlki eete baŋik aadikɔɔkɔnu Wɛɛŋakɛ sigɔɔgɛ Geetitaanakik a maɗ. Kaalɛ sɛŋk eet jɛt a aasi kaa oolɛ a ɓataka saamɛɛ gɛɛŋkiŋ. 12Lak Sɛŋk perɛ nɛɛk ariit kɛnɔkɔɔ pey ɗama nɛɛk, nɛ gaɓɛ ɗama nɛɛk anta, ma moɗɛ pɛtɛɛkak gɛɛŋk maɗ sinaanɛ koy ki laarink."

Aadi Yowanis Yeesee

(Mar. 1:9-11; Luk. 3:21-22)

13Saaɓak kusɓa Yeese Gɛlilaake gɔrɔwa Yordanoosuk kɛnɔ sɛɛn aadi Yowanis. 14Nɛɓa sɛɛn ɓaarɗi Yowanis kɛ, "Ɗɛyɛta a guntu aadin iin, nɛ kusun son lak eetik ɛk?"

15Nɛɓa jumurgeeɗ Yeese kɛ, "Kat, ɗɛyɛ tina a dusanɛŋ any sinɔ mentan taamɛkɛ Waakoyotoŋk oko sinik." Nɛɓa Yowanis ari kɛ, "Dɔɔs" nɛ aadi Yeesee. 16Saaɓa aadiiɗɛ Yeeseek nɔɓa ŋaarki maawɛ gɛɛnɛkik, nɛɓa tayɗi dari, nɛɓa kurak Wɛɛŋa Waakoyotoŋk a ito kulɓeer sɛɛna raŋana. 17Nɛɓa tiyɛɛ koŋgoy dari sinɔ tonu kɛ, "Ege sini tɔɔn naak sinɛta yaa sɛɛnek sinɛ poraak."

Actualmente seleccionado:

Maatiyoos 3: KSTM

Destacar

Copiar