मत्ति 22

मरमिंगना-जेवनता पिटो

(लूका १४:१५-२४)

1येसु असा ओरकुन उन्दि पिटोते वेहिला लागतुर, 2“स्वरग राज्य आपुना मरिना मरमिंगता जेवन तयार कितुर राजाल लेहका मन्ता। 3अनि ओर पत्रिका हितोर लोकुरकुन मरमिंगना जेवनतिगा केयिर इन्जोर आपुनोर दासक लोकुरकुन लोहतुर मति ओरक ते वायाना इच्चा केवोरक। 4पजा ओर दुसरो दास लोकुरकुन इदाम इन्ज लोहतुर, ‘नना जेवन तयार कितोना, नावांग बोकळाहकुन हव्कतोना, अनि सबोय तयार मन्ता, मरमिंगना जेवनतिगा वाट’ इदाम पत्रिका हितोर लोकुरकुन इन्ट। 5मति ओरक केन्जवाप वरोर आपुना डन्डतिगा, अनि दुसरो वरोर आपुना बुतोते हतुर। 6अनि दुसरो हुचुलोर लोकुरक ओनोर दासकुन पयस ओरा अपमान कितुरक अनि ओरकुन हव्कस वाटतुरक। 7असके राजान होंग वातु अनि ओर आपुना सयनिक लोकुरकुन लोहच ओर हव्कवालोरा नाश कितुर अनि ओरा सहेरतुन पोतिहसितुर। 8असके पजा ओर आपुनोर दास लोकुरकुन इतुर, ‘मरमिंगना जेवन ते तयार मन्ता मति पत्रिका हितोर लोकुरक योग्य ठहरे मायोर। 9इन्जोर चोकतिगा हन्ट अनि बचोलोर लोकुरक मिकुन हापळेमायनुरक ओर सबोय लोकुरकुन मरमिंगना जेवनतिगा केयस ताट’ इन्जोर इतुर। 10पजा ओरक दास लोकुरक हरितिगा हन्जुन पुटतुर खराब अनि सोबाय सबोय लोकुरकुन जमा कितुर अनि ओरकुन मरमिंग लोन ततुर अनि मरमिंग मन्डा वरताहने निदित। 11राजाल वरताहकुन हुळान साटि लोपा वातुर असके मरमिंगना सन्दरा करोर आसि वरोर मानेयतुन अगा ओर हुळतुर। 12राजाल ओन पुच्चेमातुर, ‘हे गोतियाह, निमा मरमिंगना सन्दरा करवाय इगा बाक्या वाति?’ ओर बाराय वळकोर आतुर। 13असके राजाल सेवक लोकुरकुन, ‘येनांग कय-काल्क दोहच ओन बाहरो आन्दारते हरचिम्ट, अगा किलाना अनि पल्क कटरेकियाना आयार#मत्ति ८:१२; २५:३०; लूका १३:२८ ’ इन्जोर इतुर। 14बाक्याकि केयतोरक ते पकाय मन्तोरक मति आचतोरक हुचुलोरक मन्तोरक।”

हजोर राजान टाक्स हियानाता बारेते

(मर १२:१३-१७; लूका २०:२०-२६)

15असके येसुन बोद रितिता पोल्लेते हिरकिहकाट इन्जोर परीसि लोकुरक वरोन-दुसरोनसंग विचार कितुरक। 16आकरिते ओरक आपुना चेला लोकुरकुन अनि हेरोदियास राजाना दलतोरासंग येसुना हेरे इदाम इन्दिला लोहतुरक, “हे गुरु, निमा खरोय अनि परमेस्वरना हरि खरोय रितिते करहान्तोन अनि निमा बोनाय भेदभाव केवि इन्जोर निमा बोने वरियवि इदाम माक पुन्तोरोम। 17इन्जोर हजोर राजान टाक्स हियाना उचित मन्ता या हिले। इदेना बारेते निमा बाताल विचार किन्तोन? माकुन वेहा।” 18येसु ओरा खराब उदेशतुन पुन्ज इदाम इतुर, “हे कपटि लोकुरक, नावा परिक्षा बाक्या किन्तोरिट? 19टाक्सता डबु नाकुन तोहाट” इन्जोर इतुर। असके ओरक ओना हेरे रोमि देशता उन्दि डबु ततुरक। 20असके येसु ओरकुन पुच्चेमातुर, “इद छापे किता चित्र अनि पोरोय बोना मन्ता?” 21ओरक ओन इतुरक, “हजोर राजाना मन्ता।” असके येसु ओरकुन इतुर, “हजोर राजाना हजोर राजान हिम्ट, अनि परमेस्वरना परमेस्वरतुन हिम्ट।” 22इद केन्जुन ओरक बाताले पोल्लो वळक परोर आतुरक, अनि ओरक येसुन तासिस हतुरक।

असा जिवेमायाना अनि मरमिंग

(मर १२:१८-२७; लूका २०:२७-४०)

23ओदे दिया हातोर लोकुरा असा जिवेमायानातुन मानेमायोर सदुकि लोकुरकनिकेडाल हुचुलोर लोकुरक येसुना हेरे वास ओन पुच्चेमातुरक#बुतोंग २३:८, 24“हे गुरु, बोरे मानेय बालक आयवाय हायिर ते ओनोर तमो ओना मुतेनसंग मरमिंग किस आपुना तमोन साटि वंश पयदाह केविर इन्जोर मूसाल आग्या हितोर#व्यव २५:५। 25इदेक माक सात तमोलोरक मतोम हजोर तमो मरमिंग कितुर अनि पजा बालक आयवाय ओर हातुर। इन्जोर ओनोर तमो अदेन मरमिंग कितुर। 26दुसरोर, तिसरोर अनि सात तमोलोरकुन वने इदामे आतुरक। 27ओरक सात तमोलोरक हातपा पजा ओद आळ वने हातु। 28दुनियाता आकरिते हातोर लोकुरक असा जिवेमास तेदानपा ओद ओर सात तमोनिगाडाल बोना मुत्ते आयार? बाक्याकि ओद सबोय तमोलोरा मुत्ते आस मता बहे” इन्जोर पुच्चेमातुरक। 29येसु ओरकुन उत्तर हितुर, “निमाट पवित्र पुस्तकतुन अनि परमेस्वरना लावतुन पुनविट इन्जोर निमाट दोखाते अरान्तोरिट। 30बाक्याकि दुनियाता आकरिते हातोर लोकुरक असा जिवेमास तेदितपा मानेयक अनि आसकना मरमिंग आयो आयनुंग, मति स्वरगतिगा परमेस्वरना दूतक लेहकाय मन्दानुरक। 31मति हातोरिगाडाल असा जिवेमायाना बारेते परमेस्वर मिकुन वेहच मतोर, अदेन निमाट वाचे केविट बहे? 32‘नना अब्रहामना परमेस्वर अनि इसहाकना परमेस्वर अनि याकुबना परमेस्वर आन्दान?’ इन्जोर ओर इन्ज मतोर। ओर हातोर लोकुरा आयो मति जिवित लोकुरा परमेस्वर आन्दुर#निर ३:६।” 33इद केन्जुन लोकुरा भीळ ओना उपदेशते पकाय आश्चरय आतुरक।

सबोयताल हजोर आग्या

(मर १२:२८-३४; लूका १०:२५-२८)

34येसु मसि आपुना उत्तरते सदुकि लोकुरकुन कमेक कितुर इन्जोर परीसि लोकुरक केन्जतुरक ते ओरक उन्दि आतुरक। 35ओरागाडाल मूसाना नियमतुन करिहवाल वरोर मानेय ओना परिक्षा कियान साटि येसुन पुच्चेमातुर#लूका १०:२५-२८, 36“हे गुरु, मूसाना नियमतिगा सबोयताल हजोर आग्या बोद मन्ता?” 37येसु ओन इतुर, “‘निमा आपुनोर परमेस्वर प्रबुन आपुना पुरा मन अनि आपुना पुरा जिवा अनि आपुना पुरा बुद्धितासंग मया किम#व्यव ६:५’। 38सबोयताल हजोर अनि मुक्य आग्या इदेय मन्ता। 39अनि दुसरो नियम इदेना लेहका मन्ता ‘निमा आपुना हेरेटोरकुन आपुना लेहकाय मया किम#लेव्य १९:१८’। 40इवे रन्ड आग्यांगतिगा मूसाना सबोय नियम अनि परमेस्वरना पोल्लो वेहवालोरा सबोय पोल्लो आदार मन्ता” इन्जोर इतुर।

मसिहा बोनोर मरि आन्दुर?

(मर १२:३५-३७; लूका २०:४१-४४)

41परीसि लोकुरक जमा आस मतोर असके येसु ओरकुन, 42“मसिना बारेते निमाट बाताल विचार किन्तोरिट? ओर बोनोर मरि आन्दुर?” इन्जोर पुच्चेमातुर। परीसि लोकुरक येसुन, “दावुदनोर मरि” इन्जोर इतुर। 43येसु ओरकुन, “ते दावुद परमेस्वरना आत्माता लावदे ओन प्रबु इदाम बाक्या इन्तोर?

44‘नना निया दुश्मनतुन निया काल्क अडिय केवोन आयका

अचोवनाह निमा नावा तिन्दान कयबासा उदा#भज ११०:१’

इन्जोर प्रबु नावोर प्रबुन इतुर। 45पजा दावुद ओन ‘प्रबु’ इन्तोर ते ओर ओनोर केवल सन्तान आयो मति प्रबु वने मन्तोर” इन्जोर पुच्चेमातुर। 46येना उत्तरते बोरे उन्दि पोल्लो वने इन्दिला परोर। ओद दियाताल बोने असा ओन बोदे पोल्लो पुच्चेमायाना हिमत आयो आतु।

Actualmente seleccionado:

मत्ति 22: fmu

Destacar

Copiar