uLuuka 13

Insoshi ku vhe vhatakutonta uvhutalamalandu

1Ahavhaliilizyo hanaaho, avhantu vhamo vhe vhahamutejelezyaga uYeesu, vhahamuvhuuzya vhahati, “UPilaato aavhagozile aVhagalilaaya vhamo, lwe vhakudiba impuutile zyavho kumufumwizya uMulungu.” 2UYeesu ahavhaamula ahati, “Mukusiivha kuuti aVhagalilaaya ivho vhavhavhomvile vhwevhulo, mwe pe vhaamile vhatalamalandu kuluusya aVhagalilaaya avhanji vhonti? 3Te vwe zili haa! Ileelo niimwe muliilovha mwenti, inga mutakutonta uvhutalamalandu vhwinyu! 4Havhili mukusiivha kuuti vhoope vhaala 18 vhe uluvhumba ulwa ku Silowaamu lwaavhagwiliiye nu kufwa, vhaamile vhatalamalandu kuluusya avhantu avhanji vhonti, vhe vhakutendama ku Yelusaleemu? 5Te vwe zili haa! Ileelo niimwe muliilovha mwenti, inga mutakutonta uvhutalamalandu vhwinyu!”

Ishiholanyo isha ikwi lye litakuhoma

6Pe uYeesu ahavhavhuuzya avhantu ivho ishiholanyo ishamwavho ahati, “Páali umuntu wumo we ávhwaye ikwi ilya itiini, mu mugunda waakwe uwa mampensya. Ahasogola kutungula amatiini, ileelo atahalilola inga lyoka. 7Pe ahamuvhuuzya umuvhomvi waakwe uwa mugunda ahati, ‘Yeenya, ninza amaaha gatatu kutungula amantonongwa mwi ikwi ili, ileelo ntakulyaga naalimo! Ishi lyilule lyenelyo, mwe pe likunanganya we mugunda vhweleele!’

8“Ileelo umuvhomvi uyo ahamwamula ahati, ‘We mwene, umwaha uno lileshe, indilimiilile nu kulivhiishila intanga. 9Inga lyahoma amantonongwa umwaha we wukwinza, yiliivha ahinza! Ileelo inga litaahoma, pe uhalyilulaje.’”

UYeesu akumuponia umwantanda isiku ilya Sabaato

10Isiku limo ilya Sabaato, uYeesu ahavhasambilizyaga avhantu mwi isinagoogi. 11Umwo, mwáli umwantanda wumo, we áamile ni mpepo ye yámuvhiisile kuvha muyeyevhazu amaaha 18. Umwantanda uyo águnguvhaaye insinzi, ahapotwaga kugoloha.

12UYeesu lwe amulola, ahamwita, kuuti ayinze pilongolela lyakwe. Pe ahamuvhuuzya ahati, “Maayi, waapona uvhuvhinu vhwaho, ishi wasatulwa!” 13UYeesu ahamuvhiishila inyoovhe, panaapo vhweleele umwantanda uyo, ahagoloha insinzi yaakwe, ahimiilila, ahanda kumutiima uMulungu.

14Umupiti uwa isinagoogi ahaviitwa, mwe pe uYeesu ámuponiizye umwantanda uyo isiku ilya Sabaato. Pe ahayanga ni ivhungaana ilya vhantu ahati, “Kuli insiku 6 zye indajizyo zikwitishila kuvhomba imbombo ku mulungu wooka. Mukwanzilwa kwinza mu nsiku izyo kuuti vhavhaponie impungo zyinyu, ileelo pi isiku ilya Sabaato ndaali!”

15UMwene uYeesu ahamwamula ahati, “Mwe vhashifumbo! Muli imwe aliipo we atakwigulilaga ingʼombe, poosye indogomi kuyitwala kumwela aminzi pi isiku ilya Sabaato? 16Ishi umwantanda uno, uwa mu luho ulwa Aabulahamu, we amaaha 18 aakunziilwe nu Seetano, atahondeeye kuuti asatulwe pi isiku ilya Sabaato?”

17UYeesu lwe ayanga izyo, avhalugu vhaakwe vhonti vhahalola insoni. Ileelo ivhungaana ilya vhantu avhanji vhonti vhásesheeye nkaani ku mbombo inyinza izya kusukumizya zye uYeesu ahavhombaga.

Ishiholanyo isha mbeyu iya haladaali

(uMataayi 13:31-32; uMaaliko 4:30-32)

18Pe uYeesu ahavhavhuziilizya ahati, “Uvhumwene uvhwa Mulungu vhuholiine ni shooni? Imbuholanye ni shooni? 19Vhuholiine ni mbeyu iya haladaali ye nyinsi kuluusya imbeyu zyonti ye umuntu ávhwaye mu shilimbika shaakwe. Imbeyu iyo yihamela, lihavha likwi, ni nyunyi zihatenjela mu nsamba zyakwe.”

Ishiholanyo isha mulembo uwa kuluzizya

(uMataayi 13:33)

20UYeesu ahavhavhuuzya havhili ahati, “Uvhumwene uvhwa Mulungu, vhuli inza ishi: 21Vhuholiine nu mulembo uwa kuluzizya we umwantanda wumo áwunyatuuye nu kuwusangaanya nu vhusu uvhwa ngana ivitundu vitatu. Lwe aahanya, umunya wonti wuhalula.”

Umulyango umufinyanu

(uMataayi 7:13-14, 21-23)

22UYeesu ahajendeelela nu vhulendo vhwakwe kusogola ku Yelusaleemu. Ahatuuhaga mu nkaaya na mu ntala kuvhalumbiilila avhantu. 23Isiku limo, umuntu wumo ahamuvhuziilizya ahati, “We Mwene, avhantu vhe uMulungu alivhapoha vhaliivha vhansi?”

UYeesu ahamwamula ahati, 24“Kwinjila mu vhumwene uvhwa Mulungu, kuli inza kwinjila pa mulyango umufinyanu. Nalyoli nkuvhavhuuzya vhwevhulo, mwe pe avhinji vhaliinyonywa kwinjila ileelo vhalipootwa. Ishi imwe muyikungulaje nkaani kwinjila. 25Ahavhaliilizyo haliyinza he umuhaata nyumba aligalila umulyango. Pe muliyimiilila panzi nu kwiguzya nu kumulaavha kuuti, ‘We mwene! Tukulaavha utwigulile umulyango!’ Ileelo uweene alivhaamula aliiti, ‘Ntavhamanyile imwe, havhili ntamanyile kwe mufumile!’

26“Niimwe muliiti, ‘Iswe swe vhe vhala vhe tuhalyanga nu kumwela pooka niiwe! Havhili iwe we uhatusambilizyaga mu ntala zyitu!’ 27Ileelo uweene aliiti, ‘Nkuvhavhuuzya kuuti, ntavhamanyile imwe, havhili ntamanyile kwe mufumile! Yeepi kuli ine, imwe mwe mukuvhomba imbiivhi!’

28“Mulimulola uAabulahamu nu Yisaaka nu Yaakobu na vhakuvhwi vhonti vhali mu vhumwene uvhwa Mulungu. Ileelo imwe muliivha mwasumbwa kunzi, ukwo mulikuutaga nu kuyimba nkaani! 29Avhantu kufuma imbazu zyonti izya nsi, vhaliyinza nu kulya umulyo pooka mu vhumwene uvhwa Mulungu.

30“Yeenya, avhantu vhe vhatakushindikwa ahavhaliilizyo iha vhaliivha vhantu vhe vhakushindikwa, vhoope vhe vhakushindikwa ahavhaliilizyo iha, vhaliivha vhantu vhe vhatakushindikwa.”

UYeesu akuvhaloosezya avhantu avha mu Yelusaleemu

(uMataayi 23:37-39)

31Ahavhaliilizyo hanaaho, aVhafalisaayi vhamo vhahasogola kwa Yeesu, vhahamuvhuuzya vhahati, “Uyeepe ipa, usogole mu nkaaya izinji, mwe pe uHeelodi akwanza kukugoga.” 32UYeesu ahavhaamula ahati, “Sogooli mumuvhuuzye uhavhila uyo muti, ‘Ileelo ni ndaavhi, nkwefwa impepo nu kuvhaponia avhavhinu, isiku ilya vhutatu, ndiyimala imbombo yaane. 33Poosye vhwevhulo, yikwanzilwa kuuti njendeelele kushuula kusogola ku Yelusaleemu, ileelo ni ndaavhi na pa waasha, mwe pe yikwanzilwa kuuti umukuvhwi afwile mu Yelusaleemu!’

34“Mwe vhantu vha mu Yelusaleemu imwe! Mukuvhagoga avhakuvhwi, nu kuvhahoma na mavhwe avhavhomvi vhe uMulungu avhasonteleziizye kuli imwe. Lulinga nanzaga kuvhavhungaaniha inza inkuku vwe yikwuvhatila utwana twakwe, ileelo mutanzaga? 35Yeenyi, ishi uMulungu kuuti avhaleshe imwe ni nkaaya yiinyu! Ishi nkuvhavhuuzya kuuti, te muhandole havhili, kufishila ahavhaliilizyo he muliiti, ‘Alosiitwe we akwinza kwi izina ilya MWENE uMulungu!’#13:35 iZabuuli 118:26”

Actualmente seleccionado:

uLuuka 13: nih

Destacar

Copiar