MATIYE 2

Kaa kə ase kel bi a gole Yeesu

1Yeesu waŋ haa giidə vil də Betlehema dər ko bə minti *Erodi a jəŋ kumna cəərə seŋka də Zudeŋaŋ. Adordə we nuutuŋaŋ, kaa kə ase kel gə cəərə seskaŋ pətəŋ a gud koŋ da. Bə minti yə tuukuŋ warna Zeruzalem naŋ, 2yə əsəŋ bə lete ku kaŋa minti: «Beebe bə minti bə ji dəmaŋ kumna kə kaanə Ziwifiŋ, wə waŋ haa kəna anə mo? Are asaŋ seska nuutuŋ warda a gud koŋ da, are bəŋ haa a kaw awalna.»

3Bə minti kumna Erodi əskəŋ kel teŋ kəyaŋ, koŋ paapa bə dawa pəda, kaanə Zeruzalem keɗe jəŋ wəra haa bədoona gəm. 4Kəya Erodi raawaŋ bə tepe cəərə kəkamna kə *kaa kə keere Pepeŋa wəra keɗe suru, də *kaa kə hate ku giliŋ kə Pepeŋ. Wə əsəŋ bə lay kuya minti: «Ana hulum bə minti yə məntu Kristuŋ, wə sə a we kəna ane mo?» 5Yə hərnu kel minti: «Wə we haa Betlehema giidə seŋka də Zudeŋa. Gud maa mo, *hulum bə jogte ku mini kə Pepeŋ a jeereŋ warda ana hãã minti:

6‹Te vil də Betlehem, də minti giidə seŋka də Zudeŋaŋ,

te paapa də kerpə-kerpe aduubə də vil də giidə seŋka taŋa ba.

Gud maa mo, kumna bə ame kaanə Israyel, kaa nin,

wə bə tuli yaŋ haa giidi da .›»

7Kəya Erodi mantaŋ kaa kə ase kel suru dəgaaya-dəgaaya. Wə ləənəy kuy wəra pis-pisi bə ase minti seska taŋ vəɗaŋ diri haa koŋ kotnə moŋ. 8Kəya wə vəənəy Betlehem, wə wəətənəy minti: «Aŋ tuluŋ ne Betlehemaŋ, aŋ mantə gud beebe konce toŋ la wəra kəm pisi. Aŋ fəlnu da neŋ, aŋ harə da a waatan, kir minti ten ɗee la a kaw awalna ten də kusrən gəm.»

9Bə minti yə jeɓreŋ kel kə kumnaŋ wəra jeɓraŋ, yə kooroŋ faɗi. Yə haraŋ bə ase seska də minti a vəɗaŋ warda diri da a gud koŋ daŋ. A kəlaŋ tiini hãã bə minti a tuukuŋ a ko bə minti beebeŋ adaŋ, kəya a əsəŋ gil faɗi. 10Bə minti yə asna də əsə-isi bədoona kəyaŋ, yə jəŋ wəra də waale ku tərməyi anə feh-fehi faɗi. 11Bə minti yə tuluŋ warna ada na anəkay, yə vaŋ aləwa giidə kuliŋa. Yə asaŋ beebe konceŋ də nuru Mari, yə vaŋ də gigiiri tiinu, yə əsəŋ bə kaw awalna. Kəya yə pəŋtəŋ ku cokrom neeteŋ wəra, yə əsəŋ bə əytu kara. Kar teŋ ha'aŋ anə kooso bə gusi bə awəy-awəy, anə agumgum daana son bə siisi pisi bə minti yə məntu «mir.» 12Adordə kel teŋa kəyaŋ, Pepeŋ wəətənəy dər soone minti yə a hare sar kumna Erodi na pəda. Kəya yə haŋ kəkəy baalaŋ máŋ bə hare giidə seŋka neeteŋ faɗi.

Anə Zosefi də Mari koore warna Eziptə na

13Adordə minti kaa kə ase kel kooroŋ kooraŋ, *hulum bə digi kə Barkaŋ vəɗaŋ wəra dər Zosefi a sooneŋa, kəya wə wəətunu minti: «Faa la apəya, haa beebe konceŋ la də nuru, gadə la warna diiri giidə seŋka də Eziptəŋ na. Əsə la warna ada na hãã də bə minti ten bə waatam yaŋ minti tam harə daŋ, gud bə minti kumna bə Ziwifiŋ *Erodi maŋ bə golde beebe konceŋa bə awe wəra.» 14Zosefi əskəŋ kel teŋ kəyaŋ, wə faŋ apəya, wə haŋ beebe konceŋ də nuru, wə kooroŋ diiri giidə seŋka də Eziptəŋ duugŋ. 15Wə əsəŋ ada na hãã bə minti kumna Erodi meŋ wəra kəm. Kel teŋ jəŋ bədoona ha'aŋ, minti kel gə minti Barkaŋ a wəətənəy wəra ku *hulum bə jogte ku mini kə Pepeŋaŋ doo kuy la wəra. Kel teŋ haa minti: «Ten mantaŋ kormon minti wə kalə da warda giidə seŋka də Eziptəŋ da .»

Erodi awe kəmar koncoŋ wəra

16Ajew də minti *Erodi kəm bay meŋ, wə asaŋ anəkay minti kaa kə ase kel jəŋ tiniini də toŋ, wə koloŋ waŋ wəra ablaw hasi faɗi. Kəya wə waataŋ kəsooto nuutuŋ minti: «Aŋ ɗee la giidə vil də Betlehem də kuli bə agəjaŋ dəŋ keɗe. Kəmar koncoŋ kaŋkar gə minti laate di ɓasi, də kaayaŋ gə minti laate di kəm bay deye ɓasiŋ, aŋ əwəy la wəra keɗe.» Laate tó ɓasiŋ təpaŋ də kel gə minti wə a iskiniy ku kaa kə ase kela cəərə ko bə minti seskaŋ a vəɗaŋ wəra diriŋ. 17Kəya kel gə minti Zeremi, *hulum bə jogte ku mini kə Pepeŋ a wəətənəy wəraŋ doŋ kuy wəra. 18Wə a waataŋ minti: «Yə əskəŋ tulul də hageŋ, də laaweŋ ablaw giidə vil də Rama da: Rasel bə hage karməyaŋa. A bəlaŋ minti yə a teŋe dər tá ba, gud bə minti karməyaŋ bəsaŋ wəra .»

Zosefi hare Israyel

19Bə minti kumna *Erodi meŋ wəra meŋ, *hulum bə digi kə Barkaŋ vəɗaŋ dər Zosefi a soone giidə seŋka də Eziptəŋa. 20Wə wəətunu minti: «Faa la apəya, haa beebe konceŋ la də nuru. Harə la warna diiri giidə seŋka də Israyel na, gud maa mo kumna Erodi bə minti a jəŋ bə golde beebe konceŋa bə aweŋ meŋ ne wəra.» 21Kəya Zosefi faŋ faɗi, wə haŋ beebe konceŋ də nuru, wə haraŋ warna diiri giidə seŋka də Israyel na. 22Səma, bə minti wə əskəŋ minti Arkeliyus koloŋ kumna a koɗ buru Erodi cəərə seŋka də Zudeŋaŋ, walka juunu bə ɗe a isi ada na. Adordə minti Pepeŋ wəətunu kel dər sooneŋaŋ, wə kooroŋ máŋ bə ɗe a isi warna giidə seŋka də Galile na faɗi. 23Yə ɗeŋ a isi warna giidə vil kəman na yə manta minti Nazareti. Kel teŋ jəŋ bədoona haa minti kel gə minti *kaa kə jogte ku mini kə Pepeŋ a wəətənəy, doo kuy la wəra. Yə a waataŋ minti: «Yə bə mante hulum toŋ yaŋ minti hulum bə Nazareti.»

Actualmente seleccionado:

MATIYE 2: KERNT05

Destacar

Copiar