កណើត ពដិះ គ្រែ 8

យ៉ាគ់ ណូអ៊ែ ញឺស ឝឹត ឌូក ទិះ

1យ៉ាគ់ គ្រែដៃ ហ ឃឹត ឃូ ឌី ណូអ៊ែ វ៉ា សនឺ ស្រ៊ុក សនឺ ប្រ៊ី ឡា គូ អរែង វ៉ា ហ លែក អ៊ែ កនុង ឌូក។ អ៊ែ ឡើយ ហ បើម កយឺវ ពឹក ពឺង ពដិះ គ្រែ អ៊ែ ដាក ហ ស្រាក់ ចាំ ស្រាក់។ 2អ៊ែ ដាក ឡា ប្ល៉ុះ ឝឹត ពដិះ វ៉ា គ្រែ ឡា ប៉ើក បហយ អ៊ែ ហ ប៉ាំង ឋាវ្គ វ៉ា គ្រែ ឞ៊ឺ កគ់ ហ ត្រះ ពទឺ។ 3ដាក កគ់ ចាំ ស្រាក់ ចាំ ស្រាក់ និះ ប៊ឹះ មូយ ក្លាំ សើង ជិត តង៉ៃ រ៉ិ អ៊ែ អ៊ែ ដាក ហ ស្រាក់ ឞៀតៗ ឋាវ្គ។

4និះ ប៊ឹះ តង៉ៃ ជិត ប៉ឹះ ខៃ ប៉ឹះ អ៊ែ ឌូក ទិះ ហ គឺង ពឺង ចន់ឌូ អារ៉ារ៉ាត។ 5ដាក ហ គូ ស្រាក់ ឌែៗ និះ ប៊ឹះ ខៃ ជិត តង៉ៃ មូយ អ៊ែ មែ តៃ ហ្នដើម ឡូវ បូយ ចន់ឌូ។

6ប្លូច ពួន ជិត តង៉ៃ ឋាវ្គ អ៊ែ ណូអ៊ែ ហ ប៉ើក ឝ្ល៉ោះ ឌូក ហ។ 7អ៊ែ ហ ប្រ៉ូស កអាក មូយ ហ ប៉ារ់ ជឹ ដក់ ដាល់ ឌី ដាក ស្រាក់ ប៊ឹះ ពដិះ។ 8ដូវ អ៊ែ ឋាវ្គ ហ ប្រ៉ូស ជែម ព្លឹក មូយ បក់ឌី ណោះ សឝ៉ាវ ឞន ដាក ឡា ស្រាក់។ 9ហាក់ឌី ជែម ព្លឹក អ៊ែ ដាំង ឞន ជ្រឹប តបើម តៃ អ៊ឺម អ៊ែ ហ ប៉ារ់ ជឹ ដាំង ណូអ៊ែ កនុង ឌូក អ៊ែ ណូអ៊ែ លូក ចក់ ហ តមុត កនុង ឌូក ឋាវ្គ ឌីខង ដាក ណាគ់ ទិះ ប៊ិង ពដិះ គ្រែ នែ។ 10ដូវ អ៊ែ ណូអ៊ែ ចាំ ប៉ឹះ តង៉ៃ រ៉ិ អ៊ែ អ៊ែ ហ ប្រ៉ូស ជែម ព្លឹក ហ ឝឹត ឌូក អ៊ែ ឋាវ្គ។ 11និះ ប៊ឹះ ហ៊ឹ អ្មប៊ឹ ជែម ព្លឹក អ៊ែ ជឹ មុត ហ៊ឹ ឌូក ហ ឋាវ្គ ហ្នដឹប ហ ឝ៉ង់ បិច អូលីវ។ អ៊ែ ណូអ៊ែ ហ ណោះ រៀន ដាក ស្រាក់ ឞ៊ែត ឡើយ។ 12អ៊ែ ហ ចាំ រ៉ាង ប៉ឹះ តង៉ៃ ឋាវ្គ ហ ប្រ៉ូស ជែម ព្លឹក ទឺ អ៊ែ ហ្មិះ ហ៊ឹ លង៉ាវ ហាក់ឌី ជែម អ៊ែ ទឺ ឡើយ តជឹ ដាំង ឌូក ហ យ៉ាវ។ 13សាគ់ ណូអ៊ែ អញុ ត្រូវ ក្លាំ មូយ កម៉ កនុង តង៉ៃ មូយ ខៃ មូយ អ៊ែ ដាក ស្រាក់ ឡើយ ឝឹត ពដិះ អ៊ែ។ ណូអ៊ែ ហ ប៉ើក ឝ្ល៉ោះ តូយ កំពូ ឌូក ហ រ៉ាង តៃ ពដិះ ឝ៉ូក លែក ឡើយ។ 14ប៊ឹះ តង៉ៃ បារ ជិត ប៉ឹះ ខៃ បារ អ៊ែ ពដិះ អ្យាគ់ ស្រាំង ក្រោះ ឡើយ។

15គ្រែដៃ ហាយ ឌី ណូអ៊ែ៖ 16«ហគ់ សៃ ញឺស ឝឹត ឌូក នែ វ៉ា ទ្រី សៃ កួន កឡ ហ្នដឹប កម៉ាន់ ម៉ាយ សៃ មិញ។ 17ហគ់ ពញឺស លែក ឌី សនឺ ឡា គូ អរែង វ៉ា សៃ យ៉ះ ជែម ចណាយ សនឺ ឈឹង ពួន សនឺ រែ វ៉ារ បក់ឌី ពឝ៉ើត កួន ចូវ អាំ ស៊ឺក តាក ប៊ិង ពដិះ គ្រែ នែ»។ 18អ៊ែ ណូអ៊ែ ហ ញឺស ឝឹត ឌូក អរែង វ៉ា កួន កឡ ហ វ៉ា ទ្រី ហ វ៉ា ហ្នដឹប កម៉ាន់ ម៉ាយ ហ ពទឺ។ 19វ៉ា លែក ឌី សនឺ នឺ ប៉ាគ់ សនឺ ឈឹង ពួន ប៉ាគ់ ឡា ជែម វ៉ា សនឺ រែ វ៉ារ ឡា គូ ពឹង ពដិះ គ្រែ នែ។

20ដូវ អ៊ែ ឡើយ ណូអ៊ែ ហ ប៊ូក តម៉ មូយ ប្រនូក បើម ឞន ហ្មបះ គ្រែដៃ។ អ៊ែ ហ ចក់ សនឺ ឈឹង ពួន លែក នែវ ឡា អ្យាគ់ៗ វ៉ា ជែម លែក នែវ ឡា អ្យាគ់ៗ តៀត ប៊ុះ ហ្មបះ គ្រែដៃ។

21គ្រែដៃ ហ ដុង ត្រ រូគ ឌី តូរ អ្មពី អ៊ែ ហ ឃឹត កនុង ប៊ុត ហ រៀន៖ «អៃ ម៉ា តបើម តហ៊ិ ឌី ពដិះ នែ ញ៉ន ឌី បនិះ យ៉ាវ ឌីខង ខំឃឹត មែ ឃឹត ឡូវ កាន តហ៊ិ តើម ឝឹត អ្ងគ្លែត ឡើយ យ៉ះ ពឆិ កតាម កគ់ អៃ តបើម ឌី មែ យ៉ាវ ប៉ាគ់ អៃ ឡា បើម ឌី មែ ពឋើម អ៊ែ។

22កាស ឌិវ ឆិ ណាគ់ ប៊ិច ពដិះ គ្រែ អ៊ែ ហ ណាគ់ ប៊ិច ធុន ឆមូ ចួយ ធុន សួត រ៉ិះ ធុន ឝ៉ ធុន ឞ៊ឺ ធុន ប្រ៉ាំង វ៉ា ប៊ិច តង៉ៃ ប៊ិច ម៉ាំងៗ លឿយៗ»។

Actualmente seleccionado:

កណើត ពដិះ គ្រែ 8: ផគដ

Destacar

Copiar