PUDUT 24

Ribeka Tinuduk Kuan Isak

1Idi Ibrahim pangeh mengered. Idi Tuhan pangeh nengeperuan neneh bang luk amung-amung. 2Idi kebala Ibrahim nan lun dukenneh luk rayeh luk ngimet amung binawehneh, “Ngerareng ticu'mu pa liang tipanku, 3idi do' iko pebulung ku ngadan Tuhan, Allah langit idi tana', pad iko na nima' anakku ngaweh decur lun Kanaani luk arang tau ini. 4Iamo' do' iko amé' bawang su luk inanku tinganak, idi ngalap seburur decur ku awan anakku Isak rat arang pupuku.”

5Iamo' kebala lun dukenneh kuanneh, “Kian, kudeng decur ineh ara' maya' negku amé' bang bawang ini, miakké ui nguit anakmu lemubed amé' bang bawangmu ineh?”

6Idi kebala Ibrahim neneh, “Aleg tu-tu iko nguit anakku lemubed amé' déi'. 7Tuhan Allah luk kuan langit nenguit negku rat bang ruma' tamanku idi rat bang bawang luk inanku tinganak. Idi Ieh nepejani' maré tana' ini kuan anak inulku. Ieh miak ngecuk melaikatNeh amé pa atunmu, pad iko ngalap seburur decur ku awan anakku rat déi'. 8Idi kudeng decur ineh na sikal maya' namu, idi iko mepuit ratnan jani'mu ini. Iamo' aleg iko nguit anakku lemubed amé' déi'.” 9Idi lun duken ineh nengerareng ticu'neh pa liang tipan Ibrahim luk tuanneh. Idi ieh nepejani' neneh ratnan luk bila Ibrahim.

10Idi lun dukeh ineh nengalap pulu' unta tuanneh, idi binaweh luk meraga. Idi ieh nenalan iné' Mesopotamia, ieh ineh bawang Nahor. 11Kareb ieh nacing, idi ieh nenganau' untaneh tekeradung muneng ku subuk bal alad bawang kareb malem aco, ieh ineh kareb amung-amung decur remuat amé' ngalap abpa'. 12Idi ieh nesembayang, “O Tuhan, Allah tuanku Ibrahim, ngedengan negku, pad ui miak mangeh kekamen ini bang aco sini, idi ui mutuh Namu mada' éi'Mu kuan tuanku Ibrahim. 13Siruh, ui tuped muneng ku subuk ini, kareb amung-amung anak adi' decur lun luk bang bawang ini remuat ngalap abpa'. 14Ui miak pebala kuan seburur decur, ‘Ngerareng sidangurmu pad ui miak ngirup,’ idi kudeng ieh pebala, ‘Ngirup iko, idi ui miak maré kuan amung-amung untamu teh,’ ieh ineh decur luk pangeh pinili' Allah kuan demulunMu Isak. Ratnan ini ui miak kali' idi Tuhan maya' jani'Mu kuan tuanku ineh.”

15Idi kareb nateh sembayangneh pangeh, idi Ribeka nacing maan sidangurneh, ieh ineh anak Betuil luk anak Milka, awan Nahor, luk kinanak deléi Ibrahim. 16Idi decur ineh seburur anak adi' luk do' taga idi luk pun mebaruh. Idi ieh netemurun matun subuk ineh idi nengook abpa', idi numak teh. 17Idi lun duken ineh nupun matun neneh, idi nepebala, “Maré negku ngirup sesuut abpa' rat bang sidangurmu ineh.”

18Idi kebala decur ineh, “Do' iko ngirup, Tuan,” idi ieh petacu nengerareng sidangurneh idi nemaré abpa' rupenneh. 19Pangeh ieh nemaré rupen lun duken ineh idi keburi'neh, “Ui miak ngook abpa' kuan amung-amung untamu pad ideh ngirup macing mebor.” 20Idi petacu ieh nengutang abpa' rat bang sidangurneh bang bau' idi nupun matun subuk ineh idi nengook abpa' teh, idi ieh nenguit abpa' kuan amung-amung untaneh. 21Idi lun duken ineh nenier neneh idi ungeng, pian kali' kudeng Allah maré peruan bang lawéneh lek.

22Kareb amung unta ineh pangeh nengirup, idi lun duken ineh nengalap aceh susing amas luk meraga, idi dueh leku' amas luk meraga teh. 23Idi kebalaneh, “Anak idé iko ini? Do' mada' negku. Inanké luk inan kai ucu' déi' bang ruma' tamanmu?”

24Idi kebala decur ineh neneh, “Ui ini anak Betuil Nahor didueh Milka. 25Kai inan uduh luk tekering idi luk kenen unta pana' inan petap, idi luk inan ucu' pana' inan.”

26Idi lemulun ineh netekunal idi nesembayang inan Tuhan, 27kebalaneh, “Amung ubur kuan Tuhan, ieh ineh Allah tuanku Ibrahim, luk lutep maya' jani'Neh kuan tuanku. Idi Tuhan pangeh nenguyut negku macing bang ruma' kinanak tuanku.”

28Idi decur ineh nupun iné' ruma' tinanneh idi nemada' bala ineh nedeh. 29Idi Ribeka inan sebuleng kinanak deléi, ngadanneh Laban; idi Laban nupun matun lun duken ineh déi' iring subuk. 30Ieh pangeh nenier susing, idi leku' ineh luun ticu' kinanakneh, idi ieh pangeh neninger amung bala luk bila lun duken ineh ni Ribeka. Idi ieh iné' matun lun duken ineh luk tuped dengan untaneh déi' iring subuk. 31Idi kebala Laban, “Do' umak bang ruma'ku. Iko seburur lemulun luk inan Tuhan pangeh nemaré peruan. Ngudeh iko tuped déi' liang? Ui pangeh nganau' temina' luk inan kuanmu idi kuan amung unta ineh pana'.”

32Idi lemulun ineh numak, idi Laban neneka abet amung-amung unta ineh idi nenganau' nedeh kuman uduh luk tekering idi luk kenen baken teh. Idi ieh nemaré abpa' ku maru' kukud sakai ineh. 33Pangeh ineh ideh nemaré akan. Iamo' keburi' lemulun ineh, “Na ui miak kuman kareb nateh ui pangeh nemada' amung-amung balaku atun.”

Idi kebala Laban, “Do' mada' ineh.”

34Kebalaneh, “Ui ini demulun Ibrahim. 35Idi Tuhan pangeh nengeperuan tuanku pad ieh mangun ku lun do'; idi Ieh nemaré kuanneh mula' sapi', amék, amas, pirak teh, idi tuda'-tuda'' burur demulun, do' deléi idi decur teh, dengan unta idi keladai pana'. 36Idi Sara awan tuanku ineh pangeh nenganak aceh anak deléi kuanneh bang kareb ieh mengered; idi ieh nemaré amung-amung luk ieh kuan bang palad anakneh. 37Idi tuanku nengecuk negku pejani', kebalaneh, ‘Aleg iko ngalap seburur decur lun Kanaani ku awan anakku Isak. 38Iamo' amé' iko déi' ruma' tamanku idi pupuku idi nakap seburur decur déi' ku awanneh.’ 39Idi kebalaku nan tuanku, ‘Kian, decur ineh na sikal maya' negku lek.’ 40Iamo' kebalaneh, ‘Ui megéi' maya bala Tuhan. Idi Ieh miak ngecuk MelaikatNeh maya' namu, pad lawému inan peruan. Idi iko miak ngalap seburur decur ku awan anakku ratnan pupuku idi ratnan ruma' tamanku. 41Idi kudeng ineh mo' lawéneh iko mepuit ratnan jani' ineh: kareb iko pangeh nacing déi' dengan pupuku, idi kudeng ideh na maré neneh kuanmu, kali' rungen iko mepuit ratnan jani' ini.’

42“Kareb ui nacing iring subuk ineh aco sini, idi ui nesembayang, ‘O Tuhan, Allah tuanku Ibrahim, di' maré peruan kuan lawéku ini. 43Siruh, ui tuped iring subuk ini. Kareb seburur anak adi' decur remuat ngalap abpa' idi ui pebala neneh, “Maré sesuut abpa' rupenku rat bang sidangurmu ineh,” 44idi kudeng decur ineh pebala, “Ngirup iko idi ui miak ngalap abpa' rupen amung-amung untamu pana',” do' ieh mangun ku decur luk pinili' Tuhan kuan anak tuanku.’ 45Idi kareb nateh ui pangeh sembayang bang niatku, idi Ribeka neremuat maan sidangurneh, idi ieh netemurun matun subuk ineh idi nengook abpa'. Idi kebalaku neneh, ‘Do' maré abpa' rupenku.’ 46Idi petacu ieh nengerareng sidangurneh, kebalaneh, ‘Do' iko ngirup, idi ui maré abpa' rupen kuan untamu pana'.’ Idi ui nengirup, idi ieh nemaré abpa' rupen unta pana'. 47Idi ui nengitun neneh, ‘Anak idéké iko?’ Idi kebalaneh, ‘Anak Betuil Nahor didueh Milka.’ Idi ui nenganau' susing nan icungneh, idi dueh leku' luun penguanneh. 48Idi ui netekunal idi nesembayang inan Tuhan. Ui nengubur Tuhan, Allah tuanku Ibrahim, luk pangeh nenguyut negku petacu, pad ui miak ngalap anak decur kinanak tuanku ku awan anakneh. 49Idi nekini, kudeng iko sikal nganau' luk do' idi luk matu pa kiung tuanku, do' mada' negku; kudeng na miak, do' mada' negku teh; pad ui kali' anun luk petulu ruenku.”

50Idi kebala Laban idi Betuil, “Amung ini ratnan Tuhan; idi na kai miak mutut ini. 51Siruh, Ribeka ineh idi pa kiungmu, do' iko ngalap neneh idi nguit neneh, pad ieh mangun ku awan anak tuanmu, maya' kudeng bala Tuhan ini.” 52Kareb demulun Ibrahim neninger bala didueh ineh, idi ieh netekunal idi nesembayang inan Tuhan. 53Idi ieh nengeruat tuda'-tuda' binaweh pirak idi amas, idi tuda'-tuda' kibung luk biréneh kuan Ribeka. Idi teh tuda'-tuda' binaweh luk meraga biréneh kuan kinanakneh luk deléi idi kuan tinanneh teh.

54Idi lun duken ineh nekuman idi nengirup, dengan amung lun luk maya' neneh, idi ideh rudap sedacem déi'. Kareb ideh nekulat pekak idi kebala lun duken ineh, “Do' maré negku muli' amé' inan tuanku.”

55Iamo' kebala kinanakneh, idi tinanneh, “Nima' Yamu tudo dengan kai pulu' aco teh. Pangeh ineh ieh miak amé'.”

56Iamo' kebalaneh nedeh, “Aleg muyuh ngimet negku, ngaceku Tuhan pangeh nengeperuan lawéku. Do' nima' negku muli' amé' inan tuanku.”

57Idi kebaladeh neneh, “Do' tau nawar ni Yamu idi ngitun neneh.” 58Idi ideh nenawar Ribeka, kebaladeh neneh, “Sikalké iko amé' maya' lemulun ini?” Idi kebalaneh, “Ui sikal amé'.”

59Idi ideh nemaré Ribeka nalan dengan seburur demulunneh, idi lun duken Ibrahim ini dengan amung lun luk maya' neneh. 60Idi ideh nengeperuan ni Ribeka, kebaladeh,

“Do' kinanak kai mangun ku tinan tuda'-tuda' juta lemulun.

Idi do' anak inulmu metueh ratnan amung-amung bunu'deh!”

61Idi ideh nengegkang Ribeka dengan amung-amung demulunneh luk decur, idi ideh nenalan maya' unta dengan lun duken Ibrahim ineh.

62Idi Isak pangeh nacing rat “Subuk Tuhan luk Mulun idi luk Nier Negku,” ngaceku ieh tudo bang bawang Negeb. 63Idi Isak pana' neremuat sikal nalan-nalan déi' natad kareb malem aco, idi ieh netukag idi nenier tuda'-tuda' unta macing. 64Idi Ribeka pana' netukag, idi ieh nekali' ni Isak, idi ieh netemurun ratnan untaneh. 65Idi kebalaneh nan lun duken ineh, “Idéké deléi luk nalan déi' natad ineh luk amé' matun netau?”

Idi kebala lun duken ineh, “Ieh ineh tuanku.” Idi Ribeka nengalap ebpu uluhneh idi nemapen kiungneh.

66Idi demulun ineh nemada' ni Isak ratnan amung-amung luk pangeh inau'neh. 67Idi Isak nenguit ni Ribeka semuet bang lepo kibung tinanneh Sara, idi ieh nengalap Ribeka mangun ku awanneh; idi ieh mawa neneh. Ratnan luk kudeng ineh Isak mawang niat pangeh até tinanneh.

Actualmente seleccionado:

PUDUT 24: BLD

Destacar

Copiar