छाम्माय़ङ 28
28
माल्ता खाम्दाक
1आन्कान्का नुलोक अ़केम्दा लोन्तिन्चिइन्काकिना मो खाम्दाक्ओ अ़ऩङ माल्तानि आन्कान्का सिन्तुम्का। 2मो खाम्दाक्दाओ म़नाचिआ आन्कान्का अ़न्नुनु सोमाऩतुक्तिन्का। मोन्ग़रि वा ताकि चुङा लुवाङाओसा मोचिआ मि म़तुम्ता खोन्कि आन्कान्का झारा भुक्सि ऩबुत्तिन्का। 3खोन्किना पावल्आ अ़क भोङ स़ङ कोउकि मिदा पाउङुहिदा अ़क्तात अ़छ़क्स़रिओ प़ मिओ अ़कुमाआ मो स़ङ्दाङ्का लोन्ता खोन्कि पावल्ओ अ़छुक्दा धोक्तुकि क़ङ्सान्चिन। 4मो खाम्दाक्दाओ म़नाचिआ पावल्ओ अ़छुक्दा प़ क़ङ्साङाओ अ़खाकिना अ़क्छा निएदा लोम़मुवा, “अ़नुछ्याङा ओ म़ना ना म़ना कासेत्ङा ओ! धियाङ्वामादाङ्का लेरानुछाङ छ़ङ्काछेन माङ्माआ ओ ह़ङ्मा अ़प़न।” 5मेन पावल्आ प़ मिहुत्दा रेम्सुदिसु, खोन्कि पावल देत्छाङ मान्लि। 6खोन्कि म़नाचिआ पावल होम्लोन माङ्लो च़क्नि तेन्कि स़दा निकिना अ़हुङाङा। मेन ब़द्धेतारि अ़हुङाकिछाङ खो देत्छाङ मान्लिओ अ़खाकिना मोचिआ अ़चुमिन्मा अ़फान्ताकि “ओ ना माङ ओ!”नि मोचि म़य़ङा।
7आन्कान्का लोन्तिन्काओ मो खाम्दाक्ओ अ़च़क्दा अ़धुवाताङ पब्लियस अ़ऩङ मुवाङाओसो अ़व़क छुक्ताङा। खोसाआ आन्कान्का सोमाअ़तुक्तिन्काकि अ़खिम्दा साऩङ्वा अ़मेत्तिन्का खोन्कि सुम्कालेन्तारि तावाङ अ़मुन्काकि आन्काओ ऩङाअ़नुसिन्का। 8मोन्ग़रि पब्लियस्ओ अ़पा माङ्धिन खोन्कि कोङ्लेन्मा सारिमाआ तुआकि इम्साङा। खोन्कि पावल खो तुप्सि खाराकि यामात्तु प़ खोन्कि अ़छुक खोएदा युङ्सुकि खो नुसु। 9खोन्किना खो नुवाओ अ़सिन्ताकि झारा मो खाम्दाक्दाओ सारिमाआ लाउचिओ म़नाचि म़ताकि पावल्आ मोचिछाङ नुसुचि। 10मोचिआ आन्कान्का ब़द्धे साया ऩमेत्तिन्का खोन्कि आन्कान्का वाप्तेलादा खात्मा ग़रि कोन्खादा दोराङाओ झारा सामाचि मोचिआ आन्कान्का ऩपाक्तिन्खाइसिन्का।
माल्तादाङ्का रोम
11खोन्किना वाप्तेला केराओ सुम्कादोङ्वात्कि माल्ता खाम्दाक्दाङ्का अलेक्जेन्द्रिया सहरादाङ्का बानाकि चुङ्हिप क़प्तुओ “काप्छाले माङ्चि” अ़बुदा ऱमाय़ङ याआङाओ वाप्तेलालाम्पा आन्कान्का खारिन्का। 12आन्कान्का सुराकुसाइ सहरा तान्लान्काकि मोदा आन्कान्का सुम्कालेन्तारि युङिन्का। 13खोन्कि मोदाङ्का आन्कान्का रेगियन सहरादा तान्लान्का। अ़माङ्कोलेन ह्युहोन्युङ्का ह़क थाङा खोन्कि अ़छिन्तु आन्कान्का पतिओलि सहरादा तान्लान्का। 14मोदा आन्कान्का अ़क्चित्कापाङ हाङ्पा येसुएदा साकोङ्छ़ङ कामुचि धिरुम्च़म्का। आन्कान्का खोचिएनान अ़क्साता युङ्सि ऩबुत्तिन्का। खोन्किना आन्कान्का रोम सहराह्यात्नि खारिन्का। 15खोन्कि रोम्दा कायुङ हाङ्पा येसुएदा साकोङ्छ़ङ कामुचिआ आन्कान्का तान्येन्काओ अ़एनाकिना अप्पियस बजारादा खोन्कि सुम्कायाक्खाखिम्निओदातारि आन्कान्का तुप्सि म़बाना। मोचि खाचिकि पावल्आ निनाम्हाङ आलाङ प़ खोन्कि राक तोक्तु।
पावल रोम सहरादा
16आन्कान्का रोम्दा तान्लान्काकिना पावल अ़क्छा रात्खामि हुङ्अ़मेत्ताकि अ़क्तात खिम्दा युङ्मा अ़पुवा। 17पावल रोम्दा तालाओ सुम्कालेन्कि खोसाआ मोदाओ यहुदिचिओ अ़चुबुसुवाचि अ़क्नि बुत्तुचि। खोन्कि मोचि म़कोवान्चिन्किना खोसाआ मोचि लोचि, “अ़ङ्ब़ब़ निछाचि ओ, अ़ङ्का आन्म़नाचिओ माङ्लो आन्सुन्तुम्चिओ अ़चुच़माथाङ्माओ अ़देङ्सालाप्पादा देत्छाङ मान्फिङानुछाङ यहुदि आन्म़नाचिआ अ़ङ्का यरुसलेम्दा ऩलावाङ्कि छेक्ताङाओ म़नावा रोमिचिओ अ़चुपाङ्दा ऩपाआङ। 18रोमि पाङ्कातोक्चिआ ऩसेनाङ्चिआङ्कि अ़ङ्का लेत्माखान्मानि ऩमित्ताङ, देकिनालो मोचिआ अ़ङ्का सेत्मा दन्दा प़मा अ़खान्ताङ्ओ अ़ङ्देङ्सालाप्पादा दित्छाङ अ़तुक्वा मान्धित्अ़दा। 19मेन यरुसलेम्दा यहुदिचिआ अ़ङ्का मान्लेत्दामानि फित्चि म़मुवाओसा अ़ङ्का रोमि तोक्पोहाङ कैसरएदा छ़ङ्छेन्प़लुमाङादोरा। अ़ङ्यहुदि म़नाचिओ अ़चुदेङ्सालाप्पादा दित्छाङ ह़त्मा मिन्माआ मोवात्नि चुवाङ्ओ माआङ। 20खोन्ओसा खानानिन्एनान तुप्सि खोन्कि चेप्सि अ़ङ्का आय़ ओदा बुत्नानिन्ओ। अ़ङ्का इस्राएलिचिआ अ़हुङाङाओ कालेन्पा म़ताचिआयुङ्सा निकिना अ़ङ्का साकोङ्छ़ङ मुङाओसा ओदा अ़क्छा काछेक्वा काकाराओ चोक्माय़आ ऩछ़साङ्युङ्साङ।”
21खोन्कि खोचिआ खो अ़लोवा, “आन्कान्का यहुदिया धिखाहुप्दाङ्का अ़क्तात्छाङ छाप्लावा आम्नुओ तुक्वादा मान्तोक्दोम्का खोन्कि मोयाङ्का म़बानाओ खाक्कोछाङ आन्म़नाचिआ आम्नुओ तुक्वादा य़ङ्खान खामान्एत्ऩदान्का माङ्लो दित्छाङ एन्अ़त्साङाओ दुम खामान्लुचि। 22मेन आन्कान्का आम्मिन्माचि एन्मा स़न्येन्का, देकिनालो ओ साम्योक रुहुप्ओ अ़तुक्वाओ अ़देङ्सालाप्पादा झारादात्नि म़नाचि म़चेप्याङ्ओ आन्कान्का सिन्तुम्योम्का।”
23खोन्किना खोचिआ पावल तुप्खालेन अ़तोङ्सा, खोन्कि खो युङाङाओदा ब़द्धे यहुदिचि म़ता। खोसाआ अ़वाय़ङ्दाङ्का अ़नाम्प़क्तारि निनाम्हाङ्ओ अ़चुहाङ्होन्ओ अ़तुक्वादा खाएत्याङ्सा खोन्कि मोसाओ अ़य़ङ्हुप खोन्कि निनाम्हाङ्य़ङ खाकालुचिओ अ़चुछाप्लाखादाङ्का येसुओ अ़तुक्वादा साकोङ्छ़ङ मुमा निम्पाङ सोन्तुचि। 24खोन्कि खा-खाक्को यहुदिचिआ खो य़ङाओ य़ङ्दा साकोङ्छ़ङ अ़मुवा, मेन निचि साकोङ्छ़ङ मुमा म़छुन्ता। 25खोन्किना खोचि-खोचिएदा दुम मान्तोङ्कि मोचि हामान्चिन म़मुवाङाहिदा पावल्आ अ़क्तात य़ङ लोचि, “सेङ्लावा आन्सुन्तुम्चिएदा यसैया निनाम्हाङ्य़ङ खाकालुलाम्पा म़चेवाओ य़ङ अ़नुछ्याङा ओ,
26‘ओ म़नाचिएदा खाराकि लोचि,
“एन्मा ना खानानिन त़एनुम, मेन देम्खाछाङ त़तुप्तिमिन,
चोप्मा ना त़चोउम, मेन देम्खाछाङ त़खान्मिन।”
27देकिनालो ओ म़नाचिओ अ़चुओ मिन्माचि मान्तुप्कादा लिसायुङ्सा।
खोन्कि मोचिओ अ़चुओ नाबाक खामान्एन्कादा लिसायुङ्सा,
खोन्कि मोचिआ अ़चुओ म़क अ़सिप्तायुङ्सा।
माङ्नालो मोचिआ अ़चुओ म़क्आ खाङ्मा अ़रुवाओ,
खोन्कि अ़चुओ नाबाक्आ अ़एनाओ,
खोन्कि अ़चुसाकोङ्वाआ अ़तुप्ताओ।
खोन्कि अ़ङ्काएदात्नि म़लासाओ, खोन्कि अ़ङ्का मोचि नुसुङ्च़ङ्ओ।’#यसैया ६:९-१०
28खानानिन्छाङ सिन्मादोत, निनाम्हाङ्ओ अ़लेन्मा निरावाचिएह्यात्नि अ़खाइसायुङ्सा, खोन्कि मोचिआ अ़एन।” [29खोन्कि पावल्आ ओ य़ङ्चि लोचिउचिकि यहुदिचि अ़क्छा निएदा चाअ़त्लो दुम तुयाङ्सा म़हासान्चिन।]
30ह्वा दोङ्तारि पावल मो अ़लुङ छोरुङुओ खिम्दाङा युङा, खोन्कि खो तुप्सि काता झारा साऩङ्वा मेत्तुचि। 31खोसाआ राक्एनान निनाम्हाङ्ओ अ़चुहाङ्होन खालुसुङु, खोन्कि हाङ्पा येसु ख्रिस्तओ अ़तुक्वादा झारा चिन्तुङुचि, खोन्कि साङ्आछाङ खो मान्छेक्अ़दाङा।
Actualmente seleccionado:
छाम्माय़ङ 28: bap
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Wycliffe Bible Translators, Inc. All rights reserved.
