छाम्माय़ङ 27
27
पावल रोम खात
1खोन्किना आन्कान्का वाप्तेलालाम्पा इतालिया खात्माओ अ़छ़ङ लिसाकिना खोचिआ पावल खोन्कि खा-खाक्को नि काछेक्चि तोक्पोहाङ अगस्तस्ओ अ़रात्खामि अ़क्छा कप्ताना युलियस्ओ अ़पाङ्दा अ़पाक्तापुवा। 2आन्कान्का द्रामितेनोस सहरादाङ्काओ अ़क्तात वाप्तेलादा वाङिन्काकि एसिया धिखाहुप्ओ ब़द्धे वाप्तेला नान्खाचिलाम्पा लियाङ्सा खात्मा मुवाङाओ वाप्तेला ओ। थेसलोनिके सहरादाङ्का बानाओ अ़क्छा माकेदोनि अरिस्तार्खस्छाङ मो वाप्तेलादा आन्कान्काएनान याआङा।
3अ़माङ्कोलेन आन्कान्का सिदोन सहरादा तान्लान्का। कप्ताना युलियस्आ पावल सोमातुक्तुकि अ़यावाचि तुप्सि खात्ने खोन्कि खो दोत्याङ्ओ सामाचि अ़प़ने निकिना खो अ़वाखाम प़। 4खोन्कि मोदाङ्का आन्कान्का वाप्तेलादाङ्का साइप्रस खाम्दाक्ओ अ़च़क-अ़च़क ह़क इप्याङ्सा खारिन्का, देकिनालो ह़क्आ आन्काओ देङ्सालाप्पादा अ़वेरिन्येन्का। 5खोन्किना आन्कान्का किलिकिया खोन्कि पाम्फिलिया धिखाहुप्ओ अ़च़क्दाओ धियाङ्वामा धेरुम्काकि आन्कान्का लुकिया धिखाहुप्दाओ माइरा सहरादा तान्दिसिन्का। 6मोदा कप्ताना युलियस्आ अलेक्जेन्द्रिया सहरादाङ्का इतालिया खात्खा वाप्तेला धिरु, खोन्कि खोसाआ आन्कान्का मो वाप्तेलादा अ़पाइन्का। 7खोन्किना आन्कान्का ब़द्धेकालेन्तारि चोम्पे बुया खारिन्का, खोन्कि राक्काभाला क्निदस सहरादा तान्लान्का। ह़क आन्काओ देङ्सालाप्पालाम्पा बानाङाओसा आन्कान्का च़लोक बुया खात्मा मान्ऱदान्का, खोन्ओसा आन्कान्का क्रेत खाम्दाक्दा इप्नान्चिन्सा सालमोनेओ अ़च़क लियाङ्सा खारिन्का। 8राक्काभाला क्रेत खाम्दाक्ओ अ़केम-अ़केम लियाङ्सा आन्कान्का लासिया सहराओ अ़च़क्दाओ खान्नुओनि अ़लोवाङाओ वाप्तेला नान्खादा तान्लान्का। 9ब़द्धे आन्काओ ग़रि खाराचिआयुङ्सा खोन्कि हेवा लेत्खा तोक्पो चानुचाओ लेन्छाङ खाराचिआकिना कुह़क्मा बान्मा ग़रि लिसाचिआओसा धियाङ्वामादा कोन्मा क़माकात्लो लिसायुङ्सा। खोन्ओसा पावल्आ वाप्तेलादाओ पाङ्कातोक म़नाचि ओसोओ अ़तुक्वादा यायोक प़चि। 10“यावाचि ओ, अ़ङ्का खाङ्योङ, ओन्ग़रि वाप्तेलादाङ्का आन्कान खारिन्नालो वाप्तेला खोन्कि ओदा म़याक्याङ्ओ सामाचि ओन्ङा ऩलुक्निन, मेन आन्कान्छाङ लुक्तिन।” 11मेन रात्खामि कप्ताना पावल्आ लोओ य़ङ मान्एन्दो, खोसाआ वाप्तेलादाओ कप्ताना खोन्कि वाप्तेलाओ अ़हाङ्पाआ अ़लोवाचुओ य़ङ च़लोक एनु। 12खोन्कि चुङ्हिप खान्मा मो खान्नुओनि अ़लोवाङाओ वाप्तेला नान्खा अ़नुवाक मान्मुयाङ, खोन्ओसा वाप्तेलादा काकोन ब़द्धे म़नाचि मोदाङ्का फोनिक्स सहरादा तामालामानि अ़छ़ङ अ़मुवा। क्रेत खाम्दाक्दा याआङाओ मो फोनिक्स सहरादाओ वाप्तेला नान्खा ह्युहोन देङ्सुहोन खोन्कि धाउहोन देङ्सुहोन हुसाङा।
धियाङ्वामादा कुह़क्मा बानाओ
13खोन्किना ह्युहोन्युङ्का फुरुरुवा ह़क बान्मा पुङ्सु, मोचिओ अ़चुमित्चिऩङ तालानि म़मिना। खोन्ओसा मोचिआ वाप्तेलाओ अ़क़क्खा अ़सारालोइसा, खोन्कि क्रेत खाम्दाक्ओ अ़केम-अ़केम वाप्तेला अ़खात्ता। 14मेन च़क्नि मो क्रेत खाम्दाक्दुङ्का “धाउबुसुहोन”निओ अ़फुक मेत्तुओ कुह़क्मा बाना। 15खोन्कि कुह़क्मा तेम्याङ्सा वाप्तेला खात्मा मान्ऱअ़दा, खोन्ओसा वातेप्ला खात्नि कुह़क्माआ खात्तु, मोह्यात्निङा आन्कान्का लेरुम्खाइसुम्का। 16क्लौदा अ़ऩङ मुवाङाओ अ़चुप्पो खाम्दाक्ओ ह्युहोन्यु आन्कान्का तान्लान्काकिना मो खाम्दाक्आ कुह़क्मा अ़चित इप्तु खोन्कि मोदा वाप्तेलाओ अ़देङ्या छ़साङाओ अ़चुप्पो नावा आन्कान्का राक्काभाला रात्तुम्का। 17खोन्किना नावा वाप्तेलाहुत्दा अ़सारावाक्ताकि माक्य़चिआ नुलोक अ़छ़सा। वाप्तेला लिबियाओ अ़केम्ह्यात्नि खात्कि लुङ्च़क़य़क्लोरिदा हुप्दि हे निकिना अ़चुक़माकारा। खोन्ओसा ह़क्मुत्खातित अ़धान्ता, खोन्कि वाप्तेला ह़क्दा अ़लेराखाइसा। 18खोन्किना क़माकात्तुओ कुह़क्माआ आन्कान्का अ़मुत्तिन्युङ्सिन्काओसा चाअ़त्लो लिसिन्का, खोन्ओसा अ़माङ्कोलेन मोचिआ वाप्तेलादा म़याआङाओ सामाचि केमा अ़पुङ्सा। 19खोन्कि अ़छिन्तुओ लेन वाप्तेलादाओ खाम्माचि अ़चुछुक्आङा म़वेइसुदिसुचि। 20ब़द्धेकालेन्तारि आन्कान्का ना नाम ना साङ्केन्माङा खाङ्मा तोक्तुम्का। खोन्कि कुह़क्माआ आन्कान्का चाअ़त्लो अ़मुत्तिन्युङ्सिन्काओसा आदेङ्माङ झारा ह़ङ्माङा ऩङ्पुक्तुम्का।
21म़नाचिआ चामायु मान्चाचिओ ब़द्धेकालेन लिसाखारायुङ्साओसा पावल्आ झारासोओ अ़चुबुदा एवाकि मोचि लोचि, “अ़ङ्यावाचि ओ, अ़ङ्यायोक खानानिन्आ त़एनुम्कि क्रेत्दाङ्का मान्बान्दामादोराङाओ। मोन्ग़रि अ़ङ्का लोनानिन्ओ य़ङ त़एनुम्ओ खाङ्दे ओ केत्मा खोन्कि तुत्ता खानानिन्आ आङ्मा मान्दोत्याङ्ओ। 22मेन ओन्ग़रि अ़ङ्का यायोक प़नाङ्नानिन, राक मुवानिन! देकिनालो खानानिन्एदा साङ्छाङ त़स़न्मिन, मेन वाप्तेला ओन्ङा योकोचेम्पा लि। 23अ़ङ्का निनाम्हाङ्ओ अ़चुम़ना ओ, खोन्कि खोक्कोङा अ़ङ्का ब़क्तुङ। निनाम्हाङ काफा आय़ अ़खाखुत अ़ङ्च़क्दा म़एवा, 24खोन्कि खोसाआ ऩलोवाङ, ‘पावल, मान्क़दा। खाना रोमि तोक्पोहाङ #२७:२४ कैसर : बुया अ़क्तात रोम्याओ खिम्लुम्पाओ अ़ऩङ्ओ। आदेङ्माङ रोम्याओ हाङ ओ य़ङ्आ साऩङ्वा अ़मेत्ताकि कैसरनि अ़लोवा। आदेङ काता हाङ्काचि कामुचिआ मोसोओ अ़ऩङ कैसर छान्वा अ़याङा (लुका ३:१) अ़ऩङ्वा छाप्लाखाओ ग़रिदा म़तालाहिदा रोम्दाओ हाङ ताक्पेत्निओ कैसरनि लोमा अ़पुङ्साचिआ युङ्सा। ओ कैसरआङा हेन्खामादाओ ब़द्धे हाङ्चिओ अ़चुहेन्कोप्चि ङाप्तुचिकि हाङ्काचि मुवा।कैसरओ अ़बुदा छ़ङ्छेन्प़लुसि खात्मादोत। खोन्कि खानाएनान वाप्तेलादाङ्का काखात निनाम्हाङ्आ झारा म़रात्तुचि।’ 25खोन्ओसा अ़ङ्यावाचि ओ, आम्नुओ राक पोइसानुम! देकिनालो अ़ङ्का निनाम्हाङ्एदा साकोङ्छ़ङ मुङा, निनाम्हाङ काफाआ अ़ङ्का ऩलोवाङ्वात्निङा लि। 26खोन्नुछाङ, हान आन्कान अ़क्तात खाम्दाक्दा धुङ्सिन।”
वाप्तेला योकोचेम्पा लिसाओ
27आन्काओ वाप्तेला एद्रियास धियाङ्वामादा थेम्सुङुओ कुह़क्मा बानाओ चौधकाखाखुत लिसायुङ्सा, वाप्तेला कातुङ्चिआ आप्फात अ़दाक्वा खाखुत अ़क्तात थाम्पुक्ओ अ़च़क्दा तामालामा मुन्येन्वा मोचि म़लुवा। 28खोन्ओसा खोचिआ चाक्वाओ अ़ग़ङ्मा अ़हाक्ताहिदा अ़क सये बिस फुता याआङा। अ़क्चित ह्यात्नि म़खाराकि अ़लासाहाक्ताहिदा नब्बे फुतालेका लिसाओ अ़धिरा। 29खोन्किना लुङ्छ़ङ्दा वाप्तेला धुङ हे निकि मोचिओ अ़चुक़माकारा, खोन्ओसा वाप्तेलाओ चारकातात अ़क़क्खाचि अ़देङ्याङ्का म़धान्तुचिकि खादात्ने निकिना याम़मारा। 30मेन वाप्तेला कातुङ्चिआ वाप्तेलाओ अ़बुयाङ्का वाप्तेलाओ अ़क़क्खाचि धान्माओ अ़ऩङ मुयाङ्सा अ़चुप्पो नावा वाप्तेलादाङ्का अ़धान्ताकि फुङ्मा म़लामा। 31मेन पावल्आ मोचि मोवात्नि म़चुवाङाओ सिन्तुकि रात्खामि कप्ताना खोन्कि रात्खामिचि लोचि, “ओ वाप्तेला कातुङ्चि म़फुङ्नालो खानानिन साङ्छाङ त़ह़ङिमिन।” 32खोन्किना रात्खामिचिआ अ़चुप्पो नावा धाखात्ने निकिना अ़छ़खा माक्य़चि अ़क़प्ताखाइसा।
33अ़वाय़ङ खादात्मा मुवाङाओ ग़रि पावल्आ झारा म़नाचि चामायु चामा यायोक प़चि, “खानानिन मिन्राक्आ चामायु मान्चात़युक्तिन्ओ चौधकालेन लिसाचिआयुङ्सा। 34खोन्ओसा अ़ङ्का खानानिन राक प़नाङ्नानिन, अ़चिचित चामायु चानिन। ओसाआ खानानिन सावा ऩप़न। देकिनालो साङ्कोछाङ आम्नुओ ताङ्दुओ अ़क्तात ताङ्मुवाछाङ अ़मानिन्खात्निन।” 35ओन य़ङाचिआकि खोसाआ पेम्पाक क़क्तु, खोन्कि झारासोओ अ़चुबुदा निनाम्हाङ आलाङ प़। खोन्कि धाङ्सुकिना चामा पुङ्सु। 36खोन्किना झारासोओ अ़चुराक पोयाकि मोचिछाङ चामायु म़चा। 37आन्कान्का झारा मो वाप्तेलादा ह्वा सये छ्याहत्तराकापाङ याइन्येन्का। 38मोचिआ अ़चुबुक खासालो अ़चाचिआकि वाप्तेला याङ्लो मुमानिकिना धियाङ्वामादा छुमाचा अ़वेइसादिसा।
39खादाराकिना वाप्तेला कातुङ्चिआ मो खाम्दाक सिन्मा मान्ऱअ़दा, मेन अ़क्तात धियाङ्वामा केम्दाओ लुङ्च़क़य़क अ़खा। वाप्तेला मोह्यात्निङा खात्मा अ़छ़ङ अ़मुवा। 40खोन्किना मोचिआ वाप्तेलाओ अ़क़क्खाचि म़क़प्तुचिकि धियाङ्वामादाङा अ़लेराखाइसा, खोन्कि मोन्ग़रिङा वाप्तेलाओ अ़याप्खाचि म़छुम्साङाओ माक्य़चिछाङ अ़हुराखाइसा। खोन्किना ह़क्आ मुत्खातित धात्नि अ़लोइसा, खोन्कि ह़क्आ वाप्तेला खात्तुङुहिदा अ़केम्ह्यात्नि अ़खात्ता। 41मेन वातेप्ला लुङ्च़क़य़क्दा धुङ्याङ्सा खाराकिना अ़बुयाओ अ़ताङ बाखायु हुप्तादिसा, खोन्कि तुङ्मा मान्ऱ। अ़देङ्या चाक्वाओ अ़लोङ्वात्आ वेरुयुङ्सुओसा केत्मा पुङ्सु। 42मोन्ग़रि छेक्कालुचि वाप्याङ्सा अ़केम्या म़लोन्कि म़फुङ्खात हे नि म़मित्तुचिकि रात्खामिचिआ मोचि सेत्माचिनि याम़योआ। 43मेन रात्खामि कप्तानाआ पावल लेन्मानि मिनाङा, खोन्ओसा खोसाआ साङ्छाङ सेत्मा मान्प़दोचि। खोन्कि खोसाआ “वाप्मा काले बुयाङा वाप्तेलादाङ्का छुक्ताधानिन्कि वाप्सा अ़केम्दा लोन्तानिन”नि लोचि। 44खोन्कि खोसाआ निचि “फलेक्चि माङ्लो वाप्तेलादाङ्का म़केरालोन्ताओ अ़चेत्वाचि लावानुम्च़म्कि अ़ह्याउधेत्या लोन्तानिन”नि लोचि। खोन्किना आन्कान्का झारा नुलोक अ़केम्दा लोन्तिन्का!
Actualmente seleccionado:
छाम्माय़ङ 27: bap
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Wycliffe Bible Translators, Inc. All rights reserved.
