छाम्माय़ङ 25
25
पावल रोमि तोक्पोहाङ्एदा छ़ङ्छेन्प़लुवाओ
1फेस्तस धिखाहुप काखाङ लिसाओ सुम्कालेन्कि कैसरियादाङ्का यरुसलेम खारा। 2मोदा मुलो काब़क्पाचि खोन्कि यहुदि बुसुवाचि खोएदा म़ताकि पावल्ओ अ़देङ्सालाप्पादा लाहि अ़पाक्ता। 3मोचिआ पावल यरुसलेम छुत्निछोक्निनि फेस्तसएदा छुक म़फाङ्ता। देकिनालो मोचिआ लाम्दाङा सुक्माकि पावल सेत्मा थालि म़बाङ्ताङा। 4मेन फेस्तस्आ मोचि लासुलोचि, “पावल कैसरियादाङा छेक्याङ खोन्कि अ़ङ्काछाङ च़क्नि मोह्यात्निङा लाङाखात्ङाङा। 5आम्नुओ बुसुवाचिदा खा-खाक्कोचि अ़ङ्काएनान कैसरिया म़खात्ने खोन्कि खोसाआ दिसु काचि फिसुयुङ्सुनालो मोचिआ पावल्ओ अ़देङ्सालाप्पादा मोयाङा लाहि अ़पाक्ने।”
6खोन्किना आथ-दस्कालेन्तारि ओन्ङा फेस्तस खोचिएनान यरुसलेम्दा युङाकि खो कैसरिया लासाखारा। खोन्कि अ़माङ्कोलेन अ़छ़ङ्छेन्खादा युङाकि पावल मोदा तात्मेत्तुचि। 7खोन्कि पावल तादिसाकिना यरुसलेम्दाङ्का म़ताओ यहुदिचिओ अ़चुबुसुवाचिआ खो अ़ऱङाखात्ता, खोन्कि खोसोओ अ़देङ्सालाप्पादा अ़धिवा-अ़धिवा ह़त्माय़ङ्चि अ़पाक्ता। मेन मोचिआ खाक्कोछाङ य़ङ्ओ सालुम्स़ङ प़मा मान्ऱअ़दा।
8खोन्किना पावल्आ रात्नान्चिन्सा फेस्तस लो, “अ़ङ्का यहुदि य़ङ्हुप्ओ अ़देङ्सालाप्पादा ना निनाम्हाङ ब़क्खाखिम्ओ अ़देङ्सालाप्पादा ना रोमि तोक्पोहाङ कैसरओ अ़देङ्सालाप्दाङा काचि फिसुङ्युङ्सुङ।”
9यहुदिचि अ़चुऩङानुमाचिनि मिनाकिना फेस्तस्आ पावल सेनु, “दि खाना यरुसलेम्या खात्माकिना आम्देङ्सालाप्पादा ऩपाक्ताओ ह़त्माय़ङ्चि मोया अ़ङ्का आम्छ़ङ छेन्नाप़नानेनि त़मिन्याङ?”
10मेन पावल्आ लासुलो, “अ़ङ्का रोमि तोक्पोहाङ कैसरओ अ़छ़ङ्छेन्खाओ अ़बुदा एप्ङाङा। खोन्ओसा अ़ङ्को ओदाङा अ़ङ्छ़ङ्छेन्मादोत। अ़ङ्का यहुदिचिओ अ़चुदेङ्सालाप्पादा दित्छाङ अ़त्लोकाचि मान्मुयुक्तुङ, मो य़ङ खानानिन्आ नुलोक त़सिन्तुम्योम। 11अ़ङ्का काचि फिसुङ्युङ्सुङ माङ्लो सेत्मा दन्दा तोक्मादोत्ओ काचि मुङ्युङ्सुङ्नालो, अ़ङ्का स़मा अ़छुन्ऩङ। मेन यहुदिचिआ अ़ङ्देङ्सालाप्पादा ऩपाक्ङाओ ह़त्माय़ङ्चि अ़छ़ङ ऩलिनिन्नालो अ़ङ्का मोचिओ अ़चुछुक्दा साङ्आछाङ पाक्मा ऩऱऩङ। रोमि तोक्पोहाङ कैसरआङा अ़ङ्छ़ङ अ़छेन्ङाप़ङाने निकिना अ़ङ्का छुक फाङ्ङा।”
12खोन्किना फेस्तस्आ खोसोओ अ़यायोक काप़चिएनान यायोआचिआकिना पावल लासुलो, “खाना रोमि तोक्पोहाङ कैसरएदाङा खान्निनि त़य़ङाओसा कैसरएदाङा खाना खान्ना।”
फेस्तस्आ हाङ अग्रिपाएदा यायोआओ
13अ़क्चित लेन्कि हाङ अग्रिपा खोन्कि खोसोओ अ़छेत्कुमा निछा बरनिकि फेस्तस अ़ऩङ्वा धिखाहुप काखाङ लिसाओदा साऩङ्वा मेत्सि कैसरियादा बानाचि। 14मोचि ब़द्धेकालेन कैसरियादा युङाचिओ लिसाहिदा फेस्तस्आ पावल्ओ अ़तुक्वादा लिसाओ दुम हाङ खाएत्तु, “ओदा अ़क्छा म़ना युङ्याङ, खो फेलिक्स्आ छेक्खादा छेक्तुदोयुङ्सु। 15अ़ङ्का यरुसलेम खाराङ्हिदा यहुदिचिओ अ़चुमुलो काब़क्पाचि खोन्कि नि अ़धुवाचिआ खोसोओ अ़देङ्सालाप्पादा लाहि अ़पाक्ता, खोन्कि खो ‘स़मा दन्दा प़मादोत’नि ऩलोवाङ।
16मेन अ़ङ्का मोचि लोङ्च़ङ, ‘खाक्कोछाङ म़ना मान्चिन्खाङ्माङ्तारि रोमि य़ङ्हुप्आ दन्दा प़मा अ़प़ऩङ। म़ह़त्तुचिओचिआ काह़त म़नाचिओ अ़चुदेङ्सालाप्पादा रात्मान्चिन्ओ निम्पाङ चेप्मा अ़वाखाम तोक्मादोत।’ 17मो यहुदि अ़धुवाचि अ़ङ्काएनान ओदा म़बाना, खोन्किना अ़ङ्का स़लेनि मान्च़माङ अ़माङ्कोलेन्ङा पावल छ़ङ्छेन्खादा तात्मेत्तुङ्च़ङ। 18खोन्कि खो काह़त्चि खोसोओ अ़देङ्सालाप्पादा ह़त्सि म़पुवालोन्ता। मेन अ़ङ्का मित्तुङ्वा खोचिआ खो अ़त्लो चुवाओ दित्छाङ ह़त्माय़ङ्चि पाक्मा मान्ऱअ़दा। 19मेन खोचिओ अ़चुसाम्योक्ओ खोन्कि सुवादाओ येसुनि अ़लोवाङाओसो, खोन्कि पावल्आ खो ह़ङ्याङ्नि क़रुओसो अ़तुक्वादा अ़खिसा। 20खोन्किना ओवाको य़ङ्चिओ अ़तुक्वादा देत्नि अ़ङ्का सेन्मा निकिना ओहा ना मोहा लिसाङ, खोन्ओसा अ़ङ्का खो ‘यरुसलेम्दुङा लोन्माकि ऩह़त्ताओ अ़तुक्वादा मोदुङा आम्छ़ङ्छेन्नाप़नानेनि त़मिन्याङ हे?’ नि सेनुङ। 21मेन रोमि तोक्पोहाङ्आ अ़छ़ङ मान्मुयुक्तुतारि छेक्खाखिम्दाङा युङ्साङ्ऩङ्नि पावल य़ङाओसा अ़ङ्का तोक्पोहाङ कैसरएदा मोक्को मान्छुत्युक्तुङ्तारि खो नुलोक रात्मेत्तुङ्च़ङ्कि ओदाङा युङ्मेत्तुङ्च़ङ।”
22खोन्किना अग्रिपाआ फेस्तस लो, “अ़ङ्काङा मोसोओ अ़य़ङ एन्मा सुवाङ।” खोन्कि फेस्तस्आ लासुलो, “माङ्कोलेन खोसोओ अ़य़ङ खानानिन्आ एनानुम।”
पावल अग्रिपाओ अ़बुदा
23खोन्किना अ़माङ्कोलेन अग्रिपा खोन्कि अ़छेत्कुमा निछा बरनिकिएनान म़नाचिओ अ़धिवाङ साया मेत्मादा खोचि रात्खामि मुकुधुम्चि खोन्कि सहरादाओ ब़द्धे अ़चुऩङ ऱङाओ म़नाचिएनान तुप्खाखिम्दा वाङाचि। खोन्किना फेस्तस्आ रात्खामिचि पावल तुप्खाखिम्दा तात्मेत्तुचि। 24खोन्किना फेस्तस्आ लोचि, “हाङ अग्रिपा खोन्कि आन्कान्एनान ओदा काता झारा सायाकातोक म़नाचि ओ, खानानिन त़खाम्ओ म़नाओ अ़तुक्वादाङा झारा यरुसलेम्दाओ यहुदिचि खोन्कि ओदा कैसरियादाओचिआ सेत्माङादोत्नि अ़ङ्का पात्याङ्सा ऩलोवाङ्याङ्ओ। 25मेन अ़ङ्का ओ म़नाएदा सेत्मा दन्दा प़मा खान्तुओ दित्छाङ काचि फिसुओ मान्धित्ङा। खोन्कि खोसाआ तोक्पोहाङ्लाम्पा छ़ङ्छेन्प़लुवाओसा अ़ङ्का खो तोक्पोहाङ्एदाङा छुत्माखान्मा अ़छ़ङ मुङ। 26मेन अ़ङ्का ओसोओ अ़तुक्वादा तोक्पोहाङ्एदा छाप्माखान्मा अ़छ़ङ दुम दित्छाङ मात्द़ङ। खोन्ओसा अ़ङ्का ओ झारासोओ आम्नुओ बुदा खोन्कि अ़च़वाङ खानानिन हाङ अग्रिपा आम्नुओ बुदा तारुङ्युङ्सुङ। खोवात्नि आन्कान खो सेनुम्चिउम्किना ओसोओ अ़तुक्वादा दे-दे य़ङ अ़ङ्का छाप्मा तोक्तुङ हे। 27देकिनालो काछेक म़नाओ अ़देङ्सालाप्पादा ह़त्माय़ङ य़ङ खाङ्मान्मुमाङ तोक्पोहाङ्एदा छुत्माखान्मा अ़ङ्का नुलोक मान्लुङा।”
Actualmente seleccionado:
छाम्माय़ङ 25: bap
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Wycliffe Bible Translators, Inc. All rights reserved.
