छाम्माय़ङ 24
24
हाङ्काचि कामु फेलिक्स्ओ अ़बुदा पावल
1पाच्कालेन्कि मुलो काब़क्पा हननियाआ खा-खाक्को यहुदि अ़धुवाचि खोन्कि तर्तुल्लस अ़ऩङ मुवाङाओ अ़क्छा य़ङ्हुप काले यरुसलेम्दाङ्का खात्तुचिकि कैसरियादा म़ताला। खोन्कि मोचिआ फेलिक्स धिखाहुप काखाङ्एदा पावल्ओ अ़देङ्सालाप्पादा अ़ह़त्ता। 2पावल अ़बुत्ताकिना तर्तुल्लस्आ खोसोओ अ़देङ्सालाप्पादा ह़त्मा पुङ्सु, “सायाकातोक फेलिक्स, आम्नुओ अ़नुवाक हाङ्काचिआ ब़द्धेकादोङ्तारि आन्कान्का सेवाङ्नि युङिन्येन्का। अ़थायातारि खाङ्मा आम्नुओ तायाआ आन्हेन्कोप्दा ब़द्धे अ़ऩङ्वा काचिचि म़लिसायुङ्सा। 3आन्कान्का खादा युङिन्कानुछाङ फेलिक्स खानानिन ब़द्धे आलाङ प़निङ्नि। 4मेन आम्नुओ ग़रि अ़ङ्का ब़द्धे अ़याङ्ऩङ, खोन्नुछाङ, अ़ङ्का लोनिओ आन्काओ य़ङ सोमातुक्निकि थुत्मेत्लो एन्निप़नि। 5ओ म़ना चाअ़त्लो अ़त्सालो काच़पा खोन्कि झारा हेन्खामादाओ यहुदिचिओ अ़चुरादा काचोङ्किना काचेङ्वा कामु आन्कान्का धिरुम्युङ्सुम्का। खोन्कि खो अ़क्छा नासरिनि लोयाङ्ओ फेआओ साम्योक्ओ बुसुवा ओ। 6ओसाआ निनाम्हाङ ब़क्खाखिम्छाङ पोप्मा लाप्तुङु, खोन्ओसा आन्कान्का खो लाउम्का। (आन्कान्का आन्काओ य़ङ्हुप्वा ओ छ़ङ्छेन्मानि मिनिन्येन्काओ। 7मेन रात्खामि मुकुधुम लुसियस ताकि राकाङ्थेत्नि आन्कान्काएदाङ्का खो अ़ङाप्तिन्खात्तिन्का।) 8खोन्किना खानानिन्आङा ओक्को त़सेनुम्नालो आन्कान्का खो ह़त्तुम्योम्काओ झारा अ़छ़ङ य़ङ्चिओ अ़तुक्वादा खानानिन त़सिन्तुम्लाउम।”
9मोदा म़युङाङाओ यहुदि बुसुवाचिआछाङ “तर्तुल्लस य़ङाओ झारा य़ङ्चि अ़नुछ्याङा ओ”नि म़य़ङा।
फेलिक्स्ओ अ़बुदा पावल रात्तान्चिन्ओ
10हाङ्काचि कामु फेलिक्स्आ पावल चेप्माचाला प़, खोन्कि पावल य़ङा, “अ़ङ्का सिन्तुङ्योङ खानानिन ब़द्धेकादोङ्दाङ्का यहुदिचिओ अ़चुछ़ङ्काछेन त़लिसिन्युङ्सिन, खोन्ओसा अ़ङ्देङ्सालाप्पादा ऩह़त्ताङ्ओ आम्नुओ बुदा अ़ङ्लिप्पादा अ़ङ्ऩङानुयाङ्सा रात्ङान्च़ङ। 11अ़ङ्का यरुसलेम्या निनाम्हाङ ब़क्सि खाराङ्ओ बारकालेन्दाङ्का च़लोक मान्लियुक, खानानिन्आ ओ य़ङ नुलोक सिन्मा त़ऱम। 12खोचिआ यहुदिचिएनान दुम छ़राङ्याङ्ओ अ़ङ्का काह़त साङ्आछाङ निनाम्हाङ ब़क्खाखिम्दा मान्धित्ऩदाङ, ना यावायोक्खिम्चिदा ना सहरादा म़नाचि चोङ्सुङ्योङ्च़ङ्ओङा ऩधिराङ। 13ओचिआ अ़ङ्देङ्सालाप्पादा ओन्ग़रि ऩह़त्ताङ्ओ खानानिन सालुम्स़ङ प़माङा ऩऱनानिमिन। 14मेन अ़ङ्का ओ य़ङ खानानिन खाएत्नानिन, मोचिआ ‘फेआओ साम्योक’नि लोवाङाओ साकोङ्छ़ङ कामु लिसाङ्कि आन्काओ सुन्तुम्चिओ अ़चुनिनाम्हाङ अ़ङ्का ब़क्तुङ। खोन्कि निनाम्हाङ्य़ङ खाकालुचिआ छाप्लाखादा अ़छाप्ताओ झारा य़ङ्हुप अ़ङ्का साकोङ्छ़ङ मुङ। 15अ़ङ्का मो म़नाचिवाङा साम्योक्मि खोन्कि मान्साम्योक्मि ह्वातात्माङ म़स़दाओदाङ्का म़लाखोन्लोन निकिना निनाम्हाङ्एदा सोम्कुवा मुयाङ्सा हुङुङ्योङ। 16खोन्ओसा अ़ङ्का अ़धुन निनाम्हाङ्ओ अ़चुबुदा खोन्कि म़नाचिओ अ़चुबुदा दित्छाङ अ़अ़त्पा काचि मान्मुदामा लाम्ङाङा।
17खोन्किना ब़द्धेकादोङ्कि अ़ङ्का मान्तोक्कादा अ़ङ्रावाचि फाखा छेन्बि छोक्सि खोन्कि निनाम्हाङ छुक्दाम प़सि निकिना यरुसलेम बानाङ्ओ। 18अ़ङ्का काह़त्चिआ निनाम्हाङ ब़क्खाखिम्ओ अ़बुक्लुङ्दा ऩधिराङ्हिदा अ़ङ्का अ़ङ्सेङ्मान्चिन काचि चिउङ्युङ्सुङ। मोदा म़ना मुक्ला अ़ङ्काएदा मात्द़ङ्याङ ना काचेङ्वाङा लिसाङा। 19मेन एसिया धिखाहुप्दाङ्का म़ताओ खा-खाक्को यहुदिचि मोदा म़युङाङा, खोन्कि मोचिआ अ़ङ्देङ्सालाप्पादा ह़त्माय़ङ दि-दि युङाङानालो मोचि ओदा आम्नुओ बुदा तामादोराङाओ। 20माङ्नालो धियायोक्खादा एवाङ्हिदा अ़ङ्देङ्सालाप्पादा अ़ङ्का दिसु काचि फिसुङ्ओ मोचिआ अ़धिरा, ओदा ओ म़नाचिआङा खानानिन ऩलोन्ने। 21मोचिओ अ़चुबुदा एवाङ्कि पाराङ, ‘अ़ङ्का म़सुवादाओ म़नाचि निनाम्हाङ्आ म़लासुखोन्तुलोइसुचिनिओ य़ङ्दा साकोङ्छ़ङ मुङाओसा अ़ङ्का आय़ आम्नुओ बुदा सेन्खादा छुक्ङाङा’नि य़ङाङ्ओदाङ्का नि दित्छाङ मात्द़ङ।”
22फेलिक्स्आ येसुओ अ़तुक्वादा नुलोक सिन्तुओसा, “रात्खामि मुकुधुम लुसियस ताकि काचि त़फिसुओ हे माआङ अ़ङ्का अ़छ़ङ मुङ्ने”नि लोकि ग़रि देङ्दा सोत्ता। 23खोन्किना खोसाआ अ़क्छा कप्ताना पावल हुङ्मेत्तु, मेन “खो छेक्खाखिम्दा अ़ताकावा युङ्मा पुवानुम, खोन्कि खो दोत्याङ्ओचि प़सि काता अ़यावाचि तुप्मा पुवानुम्च़म”नि लो।
फेलिक्स खोन्कि द्रुसिल्लाओ अ़बुदा पावल
24अ़क्चित लेन्कि फेलिक्स्आ यहुदिमा अ़खिम्हाङ्मा द्रुसिल्ला खात्तुकि पावल अ़युङ्साओदा खाराचि। खोन्कि खो छेक्ताङाओदाङ्का खुत्लुवाकिना येसु ख्रिस्तएदाओ साकोङ्छ़ङ्ओ अ़तुक्वादा खोएदाङ्का अ़एनाचु। 25मेन पावल्आ साम्योक्मिओ अ़तुक्वादा, क़म्मान्चिन्ओ अ़तुक्वादा खोन्कि तायाङ्ओ निनाम्हाङ्ओ अ़चुछ़ङ्छेन्मा लेन्ओ अ़तुक्वादा खाएत्तुहिदा फेलिक्स्ओ अ़क़माकारा। खोन्कि खोसाआ लो, “ओन्ग़रि खात्मा त़ऱ, अ़ङ्का काङाओ ग़रि खाना बुत्नाने।” 26फेलिक्स्आ पावल्दाङ्का फेक्वा तोक्तुङ हे निकिनाछाङ तामित्मा मुवाङा, खोन्ओसा खोसाआ अ़दु-अ़दु खो खुत्लुवाकि खोएनान हान्ताङाचि।
27खोन्किना ह्वा दोङ्कि फेलिक्स्ओ अ़फान्दा पर्किअस फेस्तस धिखाहुप काखाङ लिसा। मेन फेलिक्स्आ यहुदिचिलाम्पा चोन्लुमा निकिना पावल छेक्खाखिम्दाङ्का मान्होत्लोन्दो।
Actualmente seleccionado:
छाम्माय़ङ 24: bap
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Wycliffe Bible Translators, Inc. All rights reserved.
