छाम्माय़ङ 23
23
1खोन्किना पावल्आ धियायोक्खादाओचि होन्नि चोउचिकि लोचि, “अ़ङ्ब़ब़ निछाचि ओ, आय़ओ लेन्तारि झारा अ़नुवाक साकोङ्वाआ निनाम्हाङ्ओ अ़चुबुदा अ़ङ्का ह़ङाङ्युङ्साङ।” 2मोन्ग़रिङा मुलो काब़क्पा हननियाआ पावल्ओ अ़च़क्दा काएप्पा “मोसोओ अ़दोदा धात्तु”नि लो। 3मेन पावल्आ हननिया लो, “खाना कोङ्क़त्वा! खानाछाङ निनाम्हाङ्आ ऩधात। खाना य़ङ्हुप्वा अ़ङ्छ़ङ छेन्सि मोदा त़युङ्याङ ओ, मेन ओचि अ़ङ्का धात्त़मेत्तुचिकि खानाङा य़ङ्हुप त़फिसुङु!”
4खोन्किना पावल्ओ अ़च़क्दा काएप्चिआ खो अ़लोवा, “दि खाना निनाम्हाङ्ओ मुलो काब़क्पा यात़सान्तुङु?”
5पावल्आ लासुलोचि, “ब़ब़ निछाचि ओ, खो मुलो काब़क्पा निकिना अ़ङ्का मान्सिन्ङा। साम्कालिन्दा ओवात्नि छाप्याङ, ‘खाना म़नाचिओ हाङ्काचि कामुओ अ़तुक्वादा अ़त्लो मान्चेप्दा।’”#लाम्वाङ्माय़ङ २२:२८
6मेन धियायोक्खादा अ़क रुहुप #२३:६ सदुकिचि : ख्रिस्त म़युङाङाओ ग़रिदा यहुदिचिओ अ़क रुहुप। यहुदिचिओ ब़द्धे मुलो काब़क्पाचि सदुकिचिङा ओ। सदुकिचि खोन्मालोन्मा खोन्कि अ़धुन्ओ ह़ङ्म़ङ्दा साकोङ्छ़ङ मान्मुयाङ्चि। अ़देङ्या य़ङ्सिवा अ़तुक्वाऩङ्दा ‘सदुकि’ लामानुम।सदुकिचि खोन्कि नि फरिसिचि म़याआङाओ सिन्तुकिना पावल अ़धिवाङ य़ङ्आ चेवा, “अ़ङ्ब़ब़ निछाचि ओ, अ़ङ्काछाङ फरिसिचिओ अ़चुछा फरिसिङा ओ। अ़ङ्का म़सुवादाओ म़नाचि निनाम्हाङ्आ म़लासुखोन्तुलोइसुचिनिओ य़ङ्दा अ़ङ्का साकोङ्छ़ङ मुङाओसा ओदा सेन्खादा छुक्ङाङा।” 7पावल्आ ओ य़ङ लोचिउचिकिना फरिसिचि खोन्कि सदुकिचि खोचि-खोचिएदा खिमा अ़पुक्ता, खोन्कि ह्वा रुहुप म़लिसा। 8(देकिनालो सदुकिचि “म़ना स़दाकि अ़लानिन्खोन्निन्लोन्निन, खोन्किना निनाम्हाङ काफा ना लावाङा युङ्याङ।” निकिना साकोङ्छ़ङ म़मु, मेन फरिसिचि ओ झारा य़ङ्चिदा साकोङ्छ़ङ म़मु।)
9खोन्ओसा मोदा अ़धिवाङ काचेङ्वा लिसा, खोन्कि फरिसि रुहुप्दाओ खा-खाक्को य़ङ्हुप काचिन्पाचि म़पुवालोन्ताकि चाअ़त्लो दुम्म़तुसा, “ओ म़नाएदा आन्कान्का दित्छाङ अ़अ़त्पा य़ङ अ़खान्मिन्का। मात्दे सेङ्लावा माङ्लो निनाम्हाङ काफा खोएदा म़चेवाओनालो आन्कान दे च़मा?” 10खोन्कि अ़चुखिमा च़लोक पोन्याङ्सा खारा, खोन्ओसा म़नाचिआ पावल अ़फुत्सेत हे निकिना मुकुधुम क़साकि खोसाआ रात्खामिचि पावल मोचिएदाङ्का रात्खामि युङ्खा खिम्दा खात्मेत्तुचि।
11मो अ़खाखुत्ङा पावल्ओ अ़च़क्दा हाङ्पा म़एवाकि अ़लोवा, “राक मुवा! देत्नि खाना यरुसलेम्दा अ़ङ्तुक्वादा अ़ङ्सालुम्स़ङ म़नाचि त़प़युङ्सुचि, मोवात्निङा खाना रोम्याछाङ अ़ङ्सालुम्स़ङ प़माचिदोत।”
पावल सेत्माओ थालि बाङ्माय़ङ
12अ़माङ्कोलेन अ़वाय़ङ यहुदिचि म़कोवान्चिन्कि पावल्ओ अ़देङ्सालाप्पादा थालि म़बाङ्ता। खोन्कि मोचिआ पावल मान्सेत्माङ्तारि दित्छाङ मान्चादामाकिना मान्दुङ्दामा किरे म़चा। 13मो थालि काबाङ म़नाचि चालिस्कापाङ्दाङ्काछाङ च़लोक म़याआङा। 14खोन्कि मोचि मुलो काब़क्पाचि खोन्कि अ़धुवाचिएदा म़खाराकि म़लोचि, “आन्कान्का पावल मान्सेत्माङ्तारि दित्छाङ मान्चादामाकिना मान्दुङ्दामा चात्लो किरे चान्युङ्सिन्का। 15खानानिन खोन्कि धियायोक्खादाओचि रात्खामि मुकुधुम्एदा खारानिन्कि पावल्ओ अ़तुक्वादा च़लोक नुलोक तुप्मा दोत्याङ्ओवा चुवानिन्कि धियायोक्खादा पावल लाबात्मेत्तानुम। खो ओदा तामादिमा बुयाङा सेत्सि आन्कान्का चुम्सिन्चिन्का।”
16मेन पावल्ओ अ़छुछावाआ मो थालि बाङ्माय़ङ य़ङ एनुकिना रात्खामि युङ्खाखिम्दा वाङाकि पावल खाएत्तु।
17खोन्किना पावल्आ कप्तानाचिदाओ अ़क्छा बुत्तुकि लो, “ओ थाङाछा आम्मुकुधुम्एदा छोङ्सुदो, देकिनालो ओसाआ खो दि-दि खाएत्मादोत।”
18खोन्ओसा कप्तानाआ मो थाङाछा खात्तुकि मुकुधुम लो, “छेक्याङ्ओ पावल्आ अ़ङ्का अ़बुत्ताङ्कि ओ थाङाछाआ खानानिन दि-दि खाएत्मादोत्याङ निकिना खानानिन्एदा छोङ्सि अ़छुत्ताङ्ओ।”
19मुकुधुम्आ मो थाङाछाओ अ़छुक्दा क़क्तुखात्तुकि सुकुलादा सेनु, “खाना अ़ङ्का लोमादोत्याङ्ओ य़ङ दि ओ?”
20पावल्ओ अ़छुछावाआ लासुलो, “खा-खाक्को यहुदिचिआ पावल्ओ अ़तुक्वादा च़लोक सेन्मायु य़ङ्चि सेन्मा दोत्याङ्वा म़च़किना माङ्कोलेन धियायोक्खादा खो खानानिन्एदा खुत्लुमा निकिना याम़योआयुङ्सा। 21मेन मोचिआ ऩलोन्ओ खानानिन मान्काङ्दानिन! देकिनालो चालिस्कापाङ्दाङ्का च़लोक यहुदिचिआ पावल सेत्सि निकि अ़सुक्याङ। मोचिआ खो मान्सेत्माङ्तारि दित्छाङ मान्चादामा खोन्कि मान्दुङ्दामा निकिना किरे म़चायुङ्सा। खोन्कि ओन्ग़रि म़चुम्सान्चिन्कि खोचिआ ऩलोन्ओ ओ त़काङ्सिन निकिना खानानिन ऩहुङिन्येन।”
22खोन्किना मुकुधुम्आ मो थाङाछा चाप्चेत्तुखाइसु, “खाना खात़अ़एत्ताङ्ओ ओ य़ङ साङ्छाङ खामान्एत्दोचि।”
पावल हाङ्काचि कामु फेलिक्स्एदा अ़खाइसाओ
23खोन्किना मुकुधुम्आ ह़वाङ कप्तानाचि बुत्तुचिकि लोचि, “आय़ अ़खाखुत नौकाकोम साङ्हिदा कैसरिया खात्मा ह्वा सयेकापाङ काकोन, सत्तरिकापाङ युक्वा कायुक, खोन्कि ह्वा सयेकापाङ भे काखुन रात्खामिचि चुम्सायुङ्साचुचिन। 24खोन्किना पावल रात्याङ्सा धिखाहुप काखाङ फेलिक्सएदा छोङ्सादानुम। पावल्ओ निम्पाङ्छाङ युक्वाचि तोङ्सानुम्च़म।” 25खोन्कि खोसाआ ओवाको अ़क्तात छाप्लावा हाङ्काचि कामु छाप्तु:
26“सायाकातोक धिखाहुप काखाङ फेलिक्स, अ़ङ्का क्लौदियस लुसियस्दाङ्का अ़ङ्सेवा! 27ओ म़ना यहुदिचिआ अ़लावाकि सेत्मा अ़मुवाङा, मेन खो रोमि ताङ्युङ्नि अ़ङ्का सिन्तुङ्किना अ़ङ्रात्खामिचिएनान खाराङ्कि खो रात्तुङ। 28खोन्किना खो देकि अ़ह़त्ताओ अ़ङ्का सिन्मानि मिनाङ्किना खो यहुदिचिओ अ़चुधियायोक्खादा तारुङ। 29खोचिओ अ़चुयहुदि य़ङ्हुप सेन्मायुचिओ अ़तुक्वादा खो अ़ह़त्ताओ, मेन ओसाआ ना सेत्मा दन्दा माङ्लो छेक्मादोत्ओ काचि दित्छाङ मान्फियुक्तुनि अ़ङ्का सिन्तुङ्लाउङ। 30यहुदिचिआ ओ म़ना सेत्मा थालि म़बाङ्ताङाओ अ़ङ्का खाऩएत्ताङ्कि अ़ङ्का च़क्नि खो खानानिन्एदा बाइसुङ। अ़ङ्का खोसोओ अ़देङ्सालाप्पादा काह़त यहुदिचि आम्नुओ बुदाङा खोसोओ अ़देङ्सालाप्पादाओ ह़त्माय़ङ्चि खालुसानुम्च़म्निछाङ लोङ्युङ्सुङ्च़ङ।”
31खोन्ओसा मुकुधुम्आ लोचिवाङा काकोन रात्खामिचिआ पावल अ़खाखुत्ङा अ़रात्ताखात्ताकि एन्तिपात्रिस सहरातारि अ़ताराला। 32अ़माङ्कोलेन मोचिआ युक्वा कायुक रात्खामिचि पावल खात्म़मेत्तुचिकि रात्खामि युङ्खा खिम म़लासा। 33मो युक्वा कायुक रात्खामिचि कैसरियादा म़तालाकि धिखाहुप काखाङ फेलिक्स छाप्लावा अ़पुवा, खोन्कि पावल्छाङ खो अ़पुवा। 34हाङ्काचि कामुआ मो छाप्लावा खिप्तुचिउ, खोन्किना खोसाआ पावल सेनु, “खाना खाक्को धिखाहुप्दाओ?” पावल्आ, “अ़ङ्का किलिकियादाओ”नि लो। 35“खाना काह़त्चि म़तादिकि आम्तुक्वादाओ य़ङ अ़ङ्का एनुङ्ने”नि फेलिक्स्आ खो लो। खोन्किना खोसाआ “ओ म़ना बुयाओ हेरोद्ओ अ़हाङ्युङ्खाखिम्दा युङ्सानुम्कि हुङानुम”नि अ़रात्खामिचि लोचि।
Actualmente seleccionado:
छाम्माय़ङ 23: bap
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Wycliffe Bible Translators, Inc. All rights reserved.
