छाम्माय़ङ 17
17
थेसलोनिके सहरादा
1पावल खोन्कि सिलास अम्फिपोलिस खोन्कि अपोल्लोनियाओ सहरा लियाङ्सा थेसलोनिके सहरादा तालाचि। मोदा यहुदिचिओ अ़क्तात यावायोक्खिम युङाङा। 2पावल अ़धुन चुवाङावा यावायोक्खिम्दा वाङा। खोसाआ सुम्कासातातारि साम्कालिन्ओ अ़तुक्वादा मोदाओ म़नाचिएनान दुम्म़तुसा। 3खोसाआ साम्कालिन्दाङ्का खाएत्याङ्सा खोन्कि सालुम्स़ङ प़याङ्सा मोचि लोचि, “ख्रिस्तआ दुखा आङ्मा खोन्कि म़सुवादाओदाङ्का खोन्मालोन्मादोरा। ओक्को येसुओ अ़चुतुक्वादा अ़ङ्का खानानिन खाएत्नाङ्नानिन, खोक्कोङा ख्रिस्त ओ।” 4मोचिएदाओ देम्कापाङ यहुदिचि साकोङ्छ़ङ म़मुवाकि पावल खोन्कि सिलास म़त़ङ्तुचि। निनाम्हाङ काब़क ब़द्धे ग्रिक म़नाचि खोन्कि अ़क्चित ब़द्धे बुसुवा मेत्छामाचिछाङ साकोङ्छ़ङ म़मुवाकि मोवात्निङा म़चुवा।
5मेन यहुदिचि ऩङ्च़ म़मुवा, खोन्ओसा हाताचिदाओ नामान्ल़क म़नाचि म़बुत्तुचिकिना रुहुप म़मुचि खोन्कि सहरादा अ़धिवाङ काचेङ्वा मुम़मेत्तुचि। मोचिआ पावल खोन्कि सिलास म़ना मुक्लाचिएदा लाम्माकि सात्मातात्माचि निकिना यासोन्ओ अ़खिम्दा म़झोम्तुचि। 6मेन मोचिआ पावल खोन्कि सिलास मोदा मान्धित्म़दोचिओसा मोचिआ यासोन खोन्कि साकोङ्छ़ङ कामु खा-खाक्कोचि सहरादाओ बुसुवाचिएदा म़सारुखात्तुचिकि पात्याङ्सा म़य़ङा, “झारादात्नि काछ़ङ्चि ओन्ग़रि आन्सहरादाछाङ तादिसायुङ्साचि। 7यासोन्आ खोचि अ़खिम्दा युङ्सुङुचि। खोन्कि ‘येसु अ़ऩङ मुयाङ्ओ अ़क्छा नि हाङ युङ्याङ’नि य़ङ्याङ्सा कैसर तोक्पोहाङ्ओ अ़य़ङ्हुप्ओ अ़देङ्सालाप्पादा मोचि झारा काचि म़मुयाङ।” 8ओ य़ङ अ़एनाकि म़ना मुक्लाचि खोन्कि सहरादाओ बुसुवाचि म़चोङालोन्ता 9मेन आदेङ्माङ बुसुवाचिआ यासोन खोन्कि नि साकोङ्छ़ङ कामुचिएदाङ्का लोन्खा फेक्वा अ़लाराकि मोचि म़लेरुखाइसुचि।
बेरिया सहरादा
10साकोङ्छ़ङ कामुचिआ खाखुत्ताङावा पावल खोन्कि सिलास बेरिया सहरादा म़छुत्तुखाइसुचि। खोन्कि मोदा तालाचिकि खोचि यहुदिचिओ अ़चुयावायोक्खिम्दा खाराचि। 11मोदाओ यहुदिचि थेसलोनिकेदाओ म़नाचिदाङ्का ब़द्धे कासिम्नान्चिन म़मुवाङा। खोन्कि पावल्आ खालुसुओ निनाम्हाङ्य़ङ मोचिआ मिन्मा पाक्सा अ़एना। पावल्आ चिन्तुङुचिओ य़ङ अ़नुछ्या हे माआङ निकिना मोचिआ अ़लेन्खिन्तुम साम्कालिन अ़खिप्ताकि नुलोक अ़तोङ्साखाङा। 12खोन्ओसा ब़द्धे यहुदिचि हाङ्पाएदा साकोङ्छ़ङ म़मुवा, खोन्कि अ़चुऩङ ऱङाओ ब़द्धे ग्रिक मेत्छामाचिआकिना दुवाछाचिआछाङ हाङ्पाएदा साकोङ्छ़ङ म़मुवा।
13थेसलोनिकेदा म़युङाङाओ यहुदिचि बेरियादाछाङ म़तालाकि पावल्आ निनाम्हाङ्ओ अ़चुय़ङ खालुसुङुनिओ य़ङ अ़एनाकि पावल्ओ अ़देङ्सालाप्पादा मुक्लाचि म़चोङ्सुचि। 14खोन्किना साकोङ्छ़ङ कामुचिआ धियाङ्वामाओ अ़केम्दा च़क्नि पावल अ़छुत्ताखाइसा। मेन सिलास खोन्कि तिमोथि बेरियादाङा युङालाराचि। 15पावल छोङ्दासि काखात्चिआ खो एथेन्स सहरादातारि अ़छोङ्सादा। खोन्किना पावल्आ “सिलास खोन्कि तिमोथि ऱचि ओन च़क्नि बान्चिने”नि छोङ्सि काखात्चि लोबाइसुचि।
एथेन्स सहरादा
16एथेन्स सहरादा पावल्आ सिलास खोन्कि तिमोथि हुङुङुचिहिदा मो झारा सहरा सेम्पोक्चिआ भेप्ताओ खाकि खोसोओ ब़द्धे अ़मिन्मा चाअ़त्सा। 17खोन्ओसा यहुदिचिओ यावायोक्खिम्दा खाराकि यहुदिचि खोन्कि निनाम्हाङ काब़क ग्रिक्चिएनान खोन्कि अ़लेन्खिन्तुम हाता रादा तुउचिओ झारा म़नाचिएनान्छाङ खो दुम्तुसायुङ्साङा। 18खो देम्कापाङ इपिक्युरि खोन्कि स्तोइकि तायाहाङ्पाचिएनान्छाङ दुम्तुसा। खोसाआ मोचि येसु म़खोन्तालोन्ताओसो अ़तुक्वादा खाएत्तुचिओसा “ओ याचेक्वा दे य़ङ्याङ?”नि अ़लोवा। निचि म़य़ङा, “खोसाआ नि म़नाचिओ अ़चुमाङ्चिओ अ़तुक्वादा आन्कान खाम़एत्याङ।” 19खोन्किना मोचिआ पावल अरियोपागस यायोक्खादा अ़खात्ताकि अ़सेना, “खानानिन्आ खात़लुसुम्योम्ओ अ़ऩङ्वा चिन्माय़ङ्ओ अ़तुक्वादा आन्कान्का अ़चित च़लोक खाएत्मा त़ऱनि हे? 20खानानिन्आ आन्कान्का देम्खाछाङ मान्एन्युक्तुम्काओ य़ङ्चि खात़एत्निङ्नि, खोन्ओसा आन्कान्का मोसोओ अ़तुक्वादा सिन्मा स़न्येन्का।” 21झारा एथेन्स्दाओ म़नाचि खोन्कि नि हेन्कोप्दाङ्का म़ताओ मोदा कायुङ म़नाचिआ अ़ऩङ्वा य़ङ्चि चेप्याङ्सा माङ्लो एन्याङ्सा अ़चुग़रि मोहा अ़खाइसाङा।
22खोन्किना पावल्आ अरियोपागस्ओ यायोक्खाओ अ़बुदा एवाकि लोचि, “एथेन्स सहरादाओ म़नाचि ओ, खानानिन माङ ब़क्मादा ब़द्धे मिन्मा कापाक्चि त़याइन्येन्ओ अ़ङ्का खाङ्नाङ्नानिन। 23देकिनालो सहरादा अ़ङ्का कोलाङ्याङ्हिदा आम्नुओ ब़क्खाचि अ़ङ्का नुलोक खाङ्च़ङ। मोचिएदाओ अ़क्तात्दा ‘अ़सिन्निनिन्ओ माङ्ओ निम्पाङ’नि छाप्ताङाओ ब़क्खाछाङ धिरुङ। खोन्ओसा खाक्को खानानिन्आ मान्सिन्माङ त़ब़क्तुम्योम, खोक्कोसोओङा अ़तुक्वादा अ़ङ्का खानानिन खाएत्नाङ्नानिन।
24निनाम्हाङ्आ हेन्खामा खोन्कि मोदा म़याक्याङ्ओ झारा सामाचि म़मुयुचि। निनाम्हाङ्ङा निनाम्मा खोन्कि हेन्खामाओ अ़हाङ्पाओसा खोक्को छुक्आ मुमाय़ङ्ओ ब़क्खाखिम्चिदा ऩयुङ्निन। 25निनाम्हाङ हाप्तिन्दिसिन्वा म़नाएदाङ्का फाऩलुनिन, देकिनालो खोक्कोसाआङा ह़ङ्म़ङ, साक्मा खोन्कि झारा सामाचि झारा म़नाचि म़प़चि। 26खोन्कि झारा हेन्खामादा म़युङ्ने निकिना निनाम्हाङ्आ अ़क्छा म़नाएदाङ्का झारा रावाचि म़मुयुचि। खोक्कोसाआ बुयाङा अ़चुह़ङ्मा खोन्कि अ़चुस़माओ ग़रिकिना अ़चुयाक्खा युङ्खाओ अ़इन्चिछाङ अ़छ़ङ म़मेत्तुप़चि। 27मोचिआ निनाम्हाङ अ़लाम्कि अ़सोप्कि अ़धित्ने निकिना खोक्कोसाआ मो काचि अ़मुवा। खोन्नुछाङ, निनाम्हाङ आन्कान झाराएदाङ्का अ़थाया ऩयुङ्निनिन। देकिनालो,
28‘आन्कान खोक्कोएदा ह़ङिन, खोन्कि खोक्कोएदा कोलिन थाङिन,
खोन्कि खोक्कोएदा आन्कान युङिन।’
ओसोओ अ़तुक्वादा आम्नुओ अ़क्छा मित्माय़ङ काछाप्आछाङ छाप्तुयुङ्सु,
‘आन्कान खोक्कोसोओङा अ़छाचि ओ।’
29आन्कान निनाम्हाङ्ओ अ़छाचि लिसिन्ओसा, आन्कान म़नाचिओ अ़चुमित्मा खोन्कि अ़चुसिकिआ मुमाय़ङ हाराक्वा, रुपा माङ्नालो लुङ्ओ सेम्पोक्वाकोओनि मित्मा अ़नुनिन। 30म़नाचिआ निनाम्हाङ मान्सिन्माङ बुया अ़मुवाओ काचिदा अ़चुम़क अ़सिप्ता। मेन हान खोक्कोसाआ झारादात्निओ झारा म़नाचि अ़चुहेवादाङ्का म़लानेनि म़य़ङ्याङ। 31देकिनालो खोक्कोसाआ अ़छेन्ताओ अ़क्छा म़नालाम्पा हेन्खामादाओ झारा म़नाचि साम्योक्मि छ़ङ्छेन्मा निकिना खोक्कोसाआ अ़क्लेन अ़छ़ङ अ़मुवायुङ्सा। खोक्कोसाआ मो म़ना म़सुवादाओदाङ्का अ़खोन्तालोइसाकि झारा म़नाचि ओसोओ अ़चुसालुम्स़ङ अ़पुवायुङ्सा।”
32स़दाओदाङ्का म़ना म़खोन्लोन्नि पावल य़ङाओ अ़एनाकि खा-खाक्कोचिआ खो अ़सुङ्ता। मेन निचिआ अ़लोवा, “आन्कान्का ओ य़ङ्ओ अ़तुक्वादा अ़क लेन खाना च़लोक लानिखाएत्नि।” 33खोन्किना पावल मो यायोक्खादाङ्का खारालावा। 34खा-खाक्को म़नाचि खोलिप्पा म़वाङाकि येसुएदा साकोङ्छ़ङ म़मुवा। मोचिएदाओ अरियोपागस यायोक्खादाओ म़ना दियनुसियस खोन्कि दामारिस अ़ऩङ मुवाङाओ मेत्छामा युङाङा। खोन्कि निचिछाङ साकोङ्छ़ङ म़मुवा।
Actualmente seleccionado:
छाम्माय़ङ 17: bap
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Wycliffe Bible Translators, Inc. All rights reserved.
