Blasi Sturka 7

Lisamra tara ba

1Baha ningkara Dawan Noa ra win: “Man, wamtla bîla uplika nani sut ark watla ra dims, kan naha piua uplika nani tilara, man baman kasakkira mai kaikisni. 2Daiwan klin nani sâtka sut ba wina, wainhka 7 bara mairka ba 7 brima. Sakuna daiwan tâski nani tila wina lika, wainhka kumi bara mairka kumi brima. 3Baku sin tnawira nani kasbrika ra pâli ba wina wainhkika 7 bara mairka 7 brima, tasba ra baha nani kiamka ba raya bri kaia ba mata. 4Kan kau wik kumi ba bilka ra, yang yârika tasba purara, kakna yawanaiska wâl, tihmia yawanaiska wâl lî auhi kabia. Bara diara rayakira nani sut tasba ra bâra ba, diara nani sut tasba purara paski daukri ba âpu daukamni.” 5Bara Dawan adarka dîa daukaia win ba kat Noa daukan.

6Noa ba mani 600 bri kan, lisamra tara laya nani tasba purara balan ba ra. 7Lisamra tara dingkan bara Noa ark watla ra diman,#Mt 24.38-39; Lk 17.27. ai luhpia waitna nani, ai maya bara ai mula yaptika nani sut kira, lisamra tara wina swakwaia dukiara. 8Daiwan klin nani, daiwan tâski, tnawira nani, bara ai biara purara kwasi tauki nani ba sut sin diman, 9Noa aikuki ark watla ra daiwan bani ai maya wâl wâl diman, Gâd Noa ra adar win ba kat.

10Bara baku takan, wik kumi alkan bara lisamra tara laya nani ba tasba purara balan. 11Baha sika kati wâl aimakan yua ba, lapta yua 17 aimakan ra. Baha piua ra Noa 600 mani bri kan. Baha yua ra tihuka tara nani sut bâra ba, lî kârma nani sut sin baiwan. Kasbrika purara lî watla nani ba sut kwawan,#2 Pi 3.6. 12bara tasba purara lî auhi kan kakna yawanaiska wâl, tihmia yawanaiska wâl. 13Baha yua ra Sem, Cam, Jafet, Noa luhpia nani kan ba, Noa, ai maya bara ai mula yaptika nani yumhpa kan ba sut aikuki, ark watla ra aimakan. 14Witin nani wal diman daiwan wail nani sâtka bani, daiwan tim nani sâtka sut, ai biara purara kwasi tauki daiwra bani, tnawira nani bani sin aimakan. 15Baha nani rayaka bri nani sut, Noa aikuki ark watla ra balan, kumi bani ai maya wâl wâl. 16Bara daiwan sâtka bani balan ba, wainhka kum bara mairin, Noa ra Gâd adar yan ba kat daukan. Bara baha nani sut diman ningkara, Dawan mita ark watla durka ba prakan.

17Lisamra tara ba yu yawanaiska wâl tasba purara kan; lî ba pupuhkan, bara ark watla ba mahka awan, ai watlika ba wina tasba purara awan. 18Lî nani ba ulan bara pupuhkanka tara pali kan tasba purara, bara ark watla ba lî purara awi kan. 19Lî nani ba kasak pali sunan kan ba mita, il nani purara pali bâra kan ba sut bikan kan. 20Lî ba 25 pît il nani ba pura luan kan. 21Bara baku tasba purara ai rayaka bri kan nani ba, tnawira nani, daiwan tim nani, daiwan wail, daiwan ai biara purara kwasi tauki nani ba, bara upla nani sin sut pruan. 22Baha nani sut rayaka bri, ai kakma ra wingka puhbi kan nani sut ba pruan. 23Baku sika tasba purara rayaka bri nani kan ba, sut sauhki tikan ba: upla nani, daiwan sâtka bani, ai biara purara kwasi nani ba, bara tnawira nani pâli ba sut, tasba wina baha nani âpu daukan. Bara Noa baman takaskan, daiwan nani witin wal ark watla ra diman kan nani ba sin takaskan. 24Lî ba tasba purara banhki ban bâra kan, yu 150 nani.

Actualmente seleccionado:

Blasi Sturka 7: MSKTU

Destacar

Copiar