1 Korint 13

1Yang na upla nani aisi ba bîla ra, bara insal nani bîla sin aisaia sip kamna sakuna, latwan lâka âpu sna kaka, aisinki ba lika drum prukan kli kli ini ba baku sa, pân taya prukan bin dauki ba baku. 2Gâd aikan bîla dahra nani ba aisaia sip kamna kra, dahra prakan tânka nani ba sut kakaira kamna kra, sins lâka sât sât bri kamna kra, il nani ba ai pliska wina kitbi sakaia kasak lukan lâka aitani kat bri kamna kra,#Mt 17.20; 21.21; Mk 11.23. sakuna latwan lâka âpu sna kaka, yang lika bahki sni. 3Dîa brisna ba upla nani ra yuamna kra, bara wîni tara pali na sin angkbia wisi yabamna kra, sakuna latwan lâka âpu sna kaka, baha sut ba bahki baman sa.

4Latwan lâka bri uplika ba, wihka bîla kaikisa; upla yamnikira sa bara tatumra lika apia; aimayunras sa bara kakalra sin apia. 5Ai natka nani ba saura apia sa bara ai dukia sin plikras; ai kupia baikras sa bara upla ra lawi baman sin taukras. 6Kasak apia nani dukiara witin ai lilia takras, sakuna kasak tânka dukiara lika. 7Diara sut ba twilkisa. Diara sut ba kasak lukisa. Diara sut ba ai kainara bîla kaikisa. Diara sut mapara ban bapi buisa.

8Latwan lâka ba pruras ban raya iwisa. Piua kum balbia, bara Gâd wina bîla nani brin dahra aisabia apia, bîla aihka nani ra sin aisabia apia sa, diara tânka kaikaia lâka ba sin luha apia kabia. 9Kan yawan diara tânka kaiki ba wiria baman sa, bara Gâd bîla dahra ba sin wiria baman yawan aisisa; 10sakuna aiska aihwa tânka ba balbia ba ra, wiria baman ba lap tiwbia.

11Yang tuktan kapri piua, tuktan baku aisi katna, tuktan baku daira wali katna, bara tuktan baku sin luki katna; sakuna almuk takri na ra, tuktan lâka nani ba mahka swiri. 12Baha sim natka ra, nanara yawan diara nani kaiki ba lukinglas ra baku sa, lilka tihmu baku; sakuna baha piua ra lika, yawan latan pali kaikbia.#1 Jn 3.2. Nanara lika yang wiria baman kaikisna, sakuna baha piua ra lika aiska pali kakaira kamna, Gâd mita yang ra kakaira ba baku.

13Diara yumhpa ban kaia ra bâra sa: kasak lukan lâka ba, wan kainara diara bîla kaikaia lâka ba, bara latwan lâka ba sin; sakuna yumhpika wina kau tara ba lika, latwan lâka.

Actualmente seleccionado:

1 Korint 13: MSKTU

Destacar

Copiar