Gyenesis 13

Abram Na Lot Dzi Mpaapaamu

1Na Abram fii Egypt, ɔno, nye ne yer, nye dza ɔwɔ nyinara, nye Lot ka no ho, kɔr Pomu afamu. 2Na Abram nyaa no ho kɛsenara wɔ fiembowa, nye dwetɛ, nye sika mu. 3Na otuu no kwan fi Pomu afamu araa kodur Bɛtɛl, beebi mbrɛ ahyɛse no n’asesee wɔ mu no, wɔ Bɛtɛl nye Ai ntamu: 4beebi mbrɛ afɔrmbukyia a asɔpɔn no ɔyɛɛ no wɔ hɔ no wɔ no: na hɔ na Abram sɔɔr EWURADZE. 5Nna Lot a ɔnye Abram nam no so wɔ nguan, nye anantwi, nye asese. 6Nna asaase no nnso hɔn dɛ wɔbɛtsena fakor: osiandɛ hɔn ahodze dɔɔ so, ma dɛm ntsi wɔbɔ mu tsena a ɔnnyɛ yie. 7Na aperper baa Abram no mbowahwɛfo nye Lot no mbowahwɛfo ntamu. Ber no nna Keenanfo nye Perizfo tsetse asaase no do. 8Na Abram see Lot dɛ, Meserɛ wo, mma emma aperper mmba emi nye ɔwo ntamu, na mo mbowahwɛfo nye wo mbowahwɛfo ntamu; osiandɛ yɛyɛ enuanom. 9Ana nnyɛ asaase no nyinara na ɔda w’enyim yi bi? Meserɛ wo, tsew woho fi mo ho: sɛ bankum na ebɛfa a, ɔno mo so mobɔkɔ nyimfa; anaa sɛ nyimfa na ebɛfa a, ɔno mo so mobɔkɔ bankum. 10#Gye 2.10 Na Lot maa n’enyi do, na ɔhwɛɛ Jordan Tɛtɛrmu nyinara dze rokɔ Zoar, na ohun dɛ no do beebiara wɔ nsu papaapa. Iyi ekyir ansaana EWURADZE resɛɛ Sodom nye Gomora, tse dɛ EWURADZE no ture, nna ɔtse dɛ Egypt asaase. 11Nna Lot faa Jordan Tɛtɛrmu nyinara; na Lot tui faa boka afamu: na ɔbaako paa noho fii ne nyɛnko ho. 12Abram tsenaa Keenan asaase do, na Lot tsenaa Tɛtɛrmu kurow no mu, na ɔdze n’asesee tutui araa dze kodur Sodom. 13Afei Sodomfo yɛ ehuhufo nye ndzebɔnyɛfo kɛsenara tsia EWURADZE. 14Na Lot paa noho wɔ Abram ho n’ekyir no, EWURADZE see Abram dɛ, Afei ma w’enyi do, na fi beebi mbrɛ ewɔ no hwɛ kwaamu afamu nye pomu afamu nye boka afamu nye anee afamu: 15#Ndwu 7.5 na asaase a ihu no nyinara, medze bɛma ɔwo, nye w’asefo daa. 16Na mebɛma w’asefo ayɛ dɛ asaase do huntuma: na sɛ obi tum kan asaase do huntuma a, ɔnodze nna wobotum akan w’asefo no. 17Soɛr, fa asaase no do wɔ ne tsentsen nye tɛtɛr mu; na ɔwo na medze bɛma wo. 18Na Abram tutuu n’asesee, na ɔbae bɛtsenaa Mamre nsudur a ɔwɔ Hebron no ne nkyɛn, na osii afɔrmbukyia wɔ hɔ maa EWURADZE.

Actualmente seleccionado:

Gyenesis 13: MFANBRP

Destacar

Copiar