Genesi 9
9
Nungungulu a ngu gira pwanano ni Nowa
1 # Wona gambe: Gen 1:28. Nungungulu a di kategisa Nowa ni sanana saye, a mu embela, khuye: Velegelanani, mu andra, mu tadza mafu. 2Sirengo satshavbo sa khabini ni sinyoni sa damboni, ni satshavbo si khwirirago khu lididi mafuni ni dzindzandzi dza phwani, satshavbo si na mi ningani githawo, mu na fumelani satshavbo. 3Hodzani satshavbo si vbanyago, ni mitongwe ni mihandro. Satshavbo nyi ngu mi ningani si khala giphaso gwanu.
4 # Wona gambe: Levh 7:26-27; 17:10-14; 19:26; Dhet 12:16,23; 15:23. Aholu, nyama mu nga yi hodzini nyamba phela khu gu yi dusa novba wakone, kholu novba womi. 5Wa gu vbaladzwa novba nya muthu wu na livbwa; wa gu vbaladzwa khu girengo mwendro khu muthu, gu vbwetega wu livbwa, kholu womi wanu.
6 # Wona gambe: Gen 1:26; Eks 20:13. Oyu a vbaladzago novba nya muthu, novba waye nuwo wu na vbaladzwa khu muthu, kholu muthu wumbidwe khu mufananiso wa Nungungulu.
7 # Wona gambe: Gen 1:28. “Gasi enu, velegelanani, mu andra, mu enedza litigo mu li fuma.”
8Khavbo avbo, Nungungulu a di embela Nowa ni sanana saye, khuye: 9“Eni nyi na hunga pwanano wangu nanu, ni situgulwana si na gutago khu hwane gwanu; 10ni sirengo satshavbo si vbanyago vbakari gwanu: Sinyoni, sifuyo sa ndrangani, ni sirengo satshavbo sa khabini si vbanyago vbakari gwanu; satshavbo si dugidego khu taroni, ni satshavbo sirengo sa mafuni. 11Nyi na sayisa gikhati gyatshavbo pwanano wangu nanu: Gukhugela olu, gimwalo gambe givangwa gi na gu fuviswago khu talo nya mati nya ndrambi; litigo gima kha li na mbembiswa gambe khu mati.”
12Nungungulu a di engedza gambe, khuye: “Egi khu giwonegiso nya pwanano nyi girago nanu ni sirengo satshavbo si vbanyago vbakari gwanu khu mimelana yatshavbo yi natago. 13Nyi na wonegisa wulaho wangu nya Nyazimwe mapfhini wu gu khala gialakanyiso nya pwanano wangu ni litigo. 14Gikhati gyatshavbo nyi na gu fenengedzago litigo khu mapfhi, wa gu wonega Nyazimwe mapfhini, 15nyi na alakanya pwanano wangu nanu ni sivangwa nya guvbanye nya mafumbu yatshavbo. Mati gima kha ma na nga tala gambe ma gira ndrambi, ma mbembisa sivangwa satshavbo. 16Avbo gialakanyiso gi na gu wonegago mapfhini, eni nyi na khedzisa nyi gu dundruga pwanano yoyu nya gupindruge, nyi wu giridego ni sivangwa satshavbo nya guvbanye mafuni.”
17Nungungulu a di hegisa khu gu embela Nowa, khuye: “Egi khu giwonegiso nya pwanano nyi hungago ni sivangwa satshavbo nya guvbanye si guromo mafuni.”
Guvbanya ga Nowa ni sanana saye
18Sanana sa Nowa si dugidego khu litaroni, khu Semi, Kami ni Jafeti. Kami khu babe wa Khanani.
19Sanana sa Nowa, khiso basi esi nya siraru. Vathu vatshavbo va tadego tigoni, va gu duga khavbo gwawe.
20Nowa a diri mulimi. Khuye muthu nya guphele gu yala misimbo nya miuvha. 21Nowa a di sela wadwa nya dziuvha a gu leva, aya lala wumbwiri tshatshani gwaye. 22Kami, babe wa Khanani a di wona wumbwiri wa babe waye, a hongola aya embela vandriyaye nya vavili. 23Aholu, Semi ni Jafeti, va di dzega mwendra va fenengela magatani gwawe, va gimbila khu nyagihwane va ya fenengedza nyehe wawe. Kha va wona wumbwiri wa babe wawe, kholu va di thendregidzide dzikhovbe dzawe va khedza phuvbo.
24Avbo Nowa a wugidego khu gulevali gwaye, a di siti esi a nga girwago khu mwanaye nya nandra.
25A di ganela, khuye:
“A na vadwe Khanani,
a na khale uye wa mahegiso ga dzikhumbi dzatshavbo
dza vandriyaye!”
26A gu engedza gambe, khuye:
“A na rungudzwe Pfhumu Nungungulu wangu,
a kategisa Semi,
gasi Khanani a na khale khumbi yaye.
27Nungungulu a na dandrise Jafeti,
a na vbanye mitshatshani ya Semi, Khanani a na va thumele kha nga khumbi yawe!”
28Hwane nya ndrambi, Nowa vbanyide gambe mazana mararu ni livbandre magumi (350) myaga.
29Fude nari li livbandre na mana mazana ni livbandre magumi (950) myaga nya guvelegwe gwaye.
Actualmente seleccionado:
Genesi 9: BGG2014
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Gitonga DC Bible © Bible Society in Mozambique, 2014.
