Genesi 11

Langwe ya Bhabheli

1Matshiguni yale, vathu vatshavbo va di gu ganela lidimi limwedo basi, vatshavbo va di thumisa malito ya mamowo.

2Aholu gu di vboha avbo va nga fulugago khu Khugadambo, va gimbila kala guya vboha panini ga Sinari, va gu vbaha umo.

3Va di embedzelana khu gyawe, khavo: “Hongoleni hi gire sitini, hi si vbisa niloni.” Sitini va di si thumisa kha nga siwindri, aholu va di londra khu nyedzi. 4Khu hwane nya ugo va di khavo: “Olu hongoleni hi vbahe lidhoropa ni langwe nya yikhongolo nya gulaphe ngudzu yi manela ndzadzini, kholu gu vbwetega hi pwala ndruma, gasi hi si phalalegiswi ni litigo latshavbo.”

5 Pfhumu Nungungulu a di tshiga gasi guta wona lidhoropa ni langwe va nga bani va guvbaha vathu. 6Khavbo avbo, Pfhumu Nungungulu a di ganela, khuye: “Avo vatshavbo lifumbu limwedo basi, gambe vatshavbo va gu ganela lidimi limwedo basi. Olu va giride esi, gukhugela olu mwalo gambe a na dzi kodzago gu va thindrekisa gugira ni gevbini va na gu gi alakanyago. 7Hongoleni hi relela vbavbatshi yeyi, hi ya hambanisa malimi gasi vathu va si mani gupwanana khu gyawe.”

8Khu magirelo yaya, Pfhumu Nungungulu a di va phalalegisa mafuni gwatshavbo, va hegisa khu gu diga guvbaha lidhoropa. 9Khu guralo, lidhoropa lile li di ranwa gupwani Bhabheli, kholu khumo dhoropani momo Nungungulu a nga hambanisago maganelelo nya vathu a gu va phalalegisa ni litigo latshavbo.

Sasamedzo nya sanana sa Semi kala Abrahama

(1 Dzikoronika 1:24-27; Luka 3:34-36)

10Owu khu longoloko nya sanana sa Semi. Semi a di tshanganiside lizana myaga gikhati a velegidego mwanaye Arifasadi, na gu vbindride myaga mivili hwane nya talo nya ndrambi. 11Na velegide Arifasadi, Semi vbanyide gambe livbandre mazana (500) myaga, a gu velega sanana nya vama ni vanyamayi.

12Arifasadi, khu tanga nya magumararu na livbandre myaga, a di velega Sela. 13Na velegidwe Sela, Arifasadi a di vbanya gambe mazana mana ni myaga miraru (403), a gu velega sanana nya vama ni vanyamayi.

14Sela a nari ni magumararu myaga nya guvelegwe gwaye, a di velega mwanaye Hebheri. 15Hwane nya ugo, Sela a di vbanya gambe mazana mana ni myaga miraru (403), a gu velega sanana nya vama ni vanyamayi.

16Hebheri nari ni magumararu na mina myaga, a di velega mwanaye Pelegi. 17Hwane nya guvelegwe Pelegi, Hebheri vbanyide gambe mazana mana ni magumararu (430) myaga, a gu velega sanana nya vama ni vanyamayi.

18Pelegi, nari ni tanga nya magumararu myaga, a di velega mwanaye Rewu. 19Hwane nya guvelegwe Rewu, Pelegi vbanyide gambe mazana mavili ni livbandre na mina (209) myaga, a gu velega sanana nya vama ni vanyamayi.

20Rewu, khu tanga nya magumararu na mivili myaga, a di velega mwanaye Serugi. 21Hwane nya avbo, vbanyide gambe mazana mavili ni livbandre na mivili (207) myaga, a gu velega sanana nya vama ni vanyamayi.

22Serugi, khu tanga nya magumararu myaga nya guvelegwe gwaye, a di velega Nahori. 23Hwane nya guvelegwe Nahori, Serugi vbanyide gambe mazana mavili (200) myaga, a gu velega sanana nya vama ni vanyamayi.

24Nahori, khu tanga nya magumavili na livbandre na mina myaga, a di velega mwanaye Tera. 25Na velegidwe Tera, Nahori vbanyide gambe lizana ni likhumi na livbandre na mina (119) myaga, a gu velega sanana nya vama ni vanyamayi.

26Tera, nari ni tanga nya livbandre na mavili magumi myaga, a di velega Abrahama, Nahori ni Harani.

27Longoloko nya sanana sa Tera khowu: Tera velegide Abrahama, Nahori ni Harani. Harani a di velega Loti. 28Harani phede khuye gufa a tshiya babe waye Tera tigoni gwawe nya mavelego, dhoropani gwa Uri, tigoni gwa Kalidhiya. 29Abrahama ni Nahori va di dzega vanyamayi. Mwangadzi wa Abrahama a di gu ranwa gupwani khu Sarayi; gasi mwangadzi wa Nahori khu Milika, gyanana gya Harani, ndruye wa Yisika. 30Aholu Sarayi a diri gyumba, a diri mwalo sanana.

31Khavbo avbo, Tera a di khuga khu Uri, a gu dzega mwanaye Abrahama gumogo ni gitugulwana gyaye Loti, gyanana gya Harani, ni ngadzamwane waye Sarayi, mwangadzi wa Abrahama, va gu hongola tigoni ga Khanani. Aholu na va vbohide dhoropani ga Harani, va di vbaha umo va gu khala. 32Tera vbanyide kala gutshanganisa tanga nya mazana mavili ni livbandre (205) myaga a gufa dhoropani ga Harani.

Actualmente seleccionado:

Genesi 11: BGG2014

Destacar

Copiar